Azərbaycanda ordu quruculuğu işi yüksək səviyyədədir

Silahlı Qüvvələrimizdə hərbçilərin xidmət şəraitinin yaxşılaşdırılması daim dövlətin diqqətindədir

Ölkəmizdə ordu quruculuğu işinin Azərbaycan Prezidenti, Silahlı Qüvvələrin Ali Baş Komandanı tərəfindən prioritet elan olunması ilk növbədə milli maraqlarımızdan irəli gələn bir sıra vacib problemlərin həllini özündə ehtiva edir. Müxtəlif güc mərkəzlərinin dünyada və regionda daha çox əzələ nümayişilə mövqe sərgilədiyi bir vaxtda müvafiq istiqamətdə həyata keçirilən ardıcıl və səmərəli tədbirlər ölkəmizin rəqabətə davamlılıq əmsalını ildən-ilə nəzərəçarpacaq dərəcədə artırır.

Ancaq bununla belə, Azərbaycan gündən-günə güclənən və bərkiyən haqlı mövqeyilə dünyanın ən nüfuzlu beynəlxalq təşkilatları tərəfindən tanınan və təqdir olunan, kifayət qədər əsaslandırılmış fundamental hüquqi və siyasi bazaya malik məqsəd və məramlarının ifadəçisi kimi çıxış etdikcə, müxtəlif maraqlı qüvvələrin ölkəmizə qarşı yönəlmiş təxribat xarakterli təpkiləri də artır. Bu mənada əsas zərbə obyekti kimi ilk növbədə Silahlı Qüvvələrimizin daim hədəfdə saxlanılması və onun, necə deyərlər, hər bir ani fürsətdə belə nüfuzdan salınması üçün edilən cəhdlər dövlətin ən böyük güc strukturunu zərərsizləşdirmək, bununla da, ölkənin immun sistemini zəiflətmək niyyəti daşıyır.

Silahlı Qüvvələr quruculuğunun zaman-zaman cilalanmış hüquqi və siyasi bazası kifayət qədər dolğun və əhatəlidir. Ölkəmiz həm beynəlxalq müstəvidə, həm də beynəlxalq qurumlar və bölgədə gedən ümumi proseslər çərçivəsində özünü təsdiq etməklə son bir il ərzində Birləşmiş Millətlər Təşkilatında həqiqi tərəfdaşlarının sayını ikiqat artırmış, 2012-ci ildə Dağlıq Qarabağ münaqişəsinin həlli istiqamətində son dərəcə vacib qərarların qəbul edilməsinə nail olmuşdur. Bu mənada Qoşulmama Hərəkatı tərəfindən iştirak etdiyimiz elə ilk zirvə görüşündəcə münaqişənin yalnız ölkələrin ərazi bütövlüyü çərçivəsində həll olunması ilə bağlı dünya ictimaiyyətinin diqqətinə çatdırılan yekun qətnamə xüsusi əhəmiyyət daşıyır. Bundan əlavə, ötən il NATO-nun zirvə görüşündə də Qarabağ münaqişəsilə əlaqədar dünya birliyinin birmənalı mövqeyini ifadə edən eyni məzmunlu növbəti qətnamə qəbul edilmişdir. Əlbəttə, yuxarıda sadalanan uğurların əsasında ilk növbədə Azərbaycan Prezidenti, Silahlı Qüvvələrin Ali Baş Komandanı İlham Əliyevin strateji əhəmiyyətə malik milli maraqlarımızın təmsilçisi və qarantı kimi çıxış etməsi dayanır.

Beləliklə, işğalçı Ermənistan ordusu tərəfindən hərbi təcavüzə məruz qalmış bir ölkədə Silahlı Qüvvələr quruculuğu işinə dövlət rəhbərliyinin verdiyi önəm, həm də mövcüd vəziyyətdən çıxış yollarından biri kimi, təbii qarşılanmalıdır. Bu zərurətin yaranmasında həlledici rol oynayan əsas amil isə Azərbaycan dövlətinin bölgədə daim sülhə və əmin-amanlığa çalışmasına, beynəlxalq təşkilatların Azərbaycanın ərazi bütövlüyünü dəstəkləməsinə, işğal olunmuş torpaqların qeyd-şərtsiz azad olunmasını nəzərdə tutan qərar və qətnamələrin qəbul olunmasına baxmayaraq, Ermənistan rəhbərliyinin qeyri-konstruktiv mövqeyi üzündən indiyədək aparılan danışıqların nəticəsiz qalması, münaqişənin həlli istiqamətində ciddi irəliləyişlərin əldə olunmamasıdır. Bu mənada yüksək döyüş hazırlığına yiyələnmiş peşəkar ordu, həm də Azərbaycan xalqının tarixi təbii təlabatı kimi dəyərləndirilməlidir.

Təsadüfi deyil ki, Dünya Azərbaycanlılarının Həmrəylik Günü və Yeni il münasibətilə Azərbaycan xalqına təbrikində bu mühüm və vacib məsələ haqqında danışan Prezident İlham Əliyev ötən il Silahlı Qüvvələrimiz üçün böyük miqdarda hərbi texnika, silah-sursat, helikopter və təyyarələr, artilleriya və hava hücumundan müdafiə qurğularının alınmasını bildirmiş, daxildə 40-dan yuxarı sənaye müəssisəsində hərbi təyinatlı məhsulların istehsal olunduğunu dilə gətirmiş və bu işin cari ildə də artan xətlə davam etdiriləcəyini xüsusi vurğulamışdır: “Biz ordumuzu 2013-cü ildə daha da gücləndirəcəyik. Ordumuza xərclənən vəsait Ermənistan büdcəsindən 50 faiz çoxdur və bundan sonra da bu istiqamətdə məqsədyönlü, hərtərəfli siyasət aparılacaqdır ki, Ermənistan-Azərbaycan, Dağlıq Qarabağ münaqişəsi tezliklə öz həllini tapsın, Azərbaycan öz ərazi bütölüyünü bərpa etsin”.

Bu il yanvarın 15-də Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunumuş iclasında da Prezident İlham Əliyev ordu quruculuğu sahəsində görülən işlərdən bir daha ətraflı bəhs etmiş, dövlət büdcəsindən hərbi sahəyə ayrılan ümumi xərclərin cari ildə də artırıldığını bildirmiş və hərbi qulluqçuların peşəkarlığının yüksəldilməsini başlıca məqsəd kimi dəyərləndirmişdir.

Bu gün ordumuzun döyüş hazırlığının artırılması ilə bağlı Azərbaycan Prezidenti, Ali Baş Komandan İlham Əliyevin verdiyi bütün əmr və tapşırıqlar Müdafiə Nazirliyi rəhbərliyi tərəfindən daim diqqət mərkəzində saxlanılır və yüksək səviyyədə icra olunur. Silahlı Qüvvələrimizin şəxsi heyəti müvafiq istiqamətdə daha böyük uğurlara yiyələnmək məqsədilə müdafiə nazirinin təsdiq etdiyi döyüş hazırlığı planına əsasən hər il birlik və birləşmələrdə təşkil olunan 70-dək komanda-qərargah təlimlərində iştirak edir. Şəxsən müdafiə naziri general-polkovnik Səfər Əbiyevin rəhbərliyi və ciddi nəzarəti altında keçirilən, ordumuzun taktiki döyüş tətbiqini əhatə edən müxtəlif səviyyəli bu təlimlərə beynəlxalq standartlara cavab verən və kifayət qədər yüksək döyüş imkanlarına malik hərbi texnikanın, modern radiolokasiya stansiyalarının, avtomatlaşdırılmış komanda məntəqəsinə malik zenit-raket bölmələrinin, kompyuter və multimedia avadanlığı ilə təmin olunmuş mobil komanda-qərargah və rabitə kunqlarının, simulyator və kompyuter şəbəkələrinin intensiv cəlb olunması isə bu tədbirlərin səmərəliliyini ikiqat artırmışdır.

Təlimlərdə döyüş təyyarə və vertolyotlarının yüksək pilotaj nümayiş etdirməsi, hədəflərə dəqiq aviasiya zərbələri endirməsi hava məkanımızın etibarlı müdafiəsindən xəbər verir. Artilleriya bölmələrinin və ağır texnikaların şəxsi heyəti ixtiyarlarında olan qurğuların manevr və atəş imkanlarından məharətlə istifadə edərək şərti düşmənin hərəkətdə olan piyadalarını, tank və PDM-lərini tamamilə zərərsizləşdirməklə əsl peşəkarlıq nümayiş etdirir. Ayrı-ayrı qoşun növlərinin mobil fəaliyyətinin təmin olunmasında əhəmiyyətli rol oynayan bu təlimlərdə Hava Hücumundan Müdafiə Qüvvələrinin hərbi qulluqçuları da xüsusilə fərqlənirlər. Əldə olunan nəticələr əsgər və zabitlərimizin mənəvi-psixoloji cəhətdən yüksək döyüş hazırlığına yiyələnməsini bir daha təsdiq edir. Təsadüfi deyil ki, əsasən təmas xəttində həyata keçirilən bu təlimləri düşmən ordusunun şəxsi heyəti bir qayda olaraq dərin qorxu və həyacan içində izləyir.

Ordu quruculuğu işinin ən mühüm sahələrindən biri də kadr məsələlərilə bağlıdır. Ali hərbi məktəblərimizdə təlim-tədris işi “Ali hərbi məktəblər haqqında əsasnamə”nin və Bakalavr təhsili standartlarının müasir tələblərinə uyğun təşkil edilir. Təhsildə müasir informasiya texnologiyalarının tətbiqi, semestr imtahanlarının test üsuli ilə keçirilməsi və onlarla elmlər doktoru, professor, elmlər namizədi və dosentin iştirakı görülən işin yüksək keyfiyyətinə zəmanət verir. Hərbi təhsil ocaqlarımızın müəllim və kursant heyəti hər il onlarla müxtəlif səviyyəli beynəlxalq tədbirlərdə öz bilik və təcrübəsini uğurla təkmilləşdirir. Təsadüfi deyil ki, bir sıra xarici ölkələrin gəncləri bu gün məhz bizim ali hərbi məktəblərimizdə hərb elminin sirlərinə yiyələnirlər.

Əlbəttə, yuxarıda sadalanan uğurlarda hərbi qulluqçuların sosial və məişət şəraitinin yaxşılaşdırılması, həyat səviyyəsinin ildən-ilə gücləndirilməsi istiqamətində dövlət rəhbərliyinin həyata keçirdiyi ardıcıl tədbirlər həlledici rol oynayır. Bu tədbirlərin hərbi xidmətlə bağlı insanların bütün təbəqələrini əhatə etməsi ömrü Vətənin müdafiəsində keçən insanlara ciddi stimul verir. Hərbi qulluqçuların sığorta məbləğinin birdən-birə on dəfə, aylıq vəzifə və rütbə maaşlarının, o cümlədən ərzaq əvəzinə ödənilən kompensasiyanın isə ayrı-ayrı illərdə dəfələrlə artırılması, onlara verilən güzəşt və imtiyazların miqyasının daim genişləndirilməsi, hərbi tibb xidmətinin ən müasir dünya standartları səviyyəsində yenidən qurulması Silahlı Qüvvələrimizdə daha böyük keyfiyyət göstəricilərinin əldə olunması ilə nəticələnmişdir.

Azərbaycan Respublikası Silahlı Qüvvələrinin hərbi qulluqçularının sosial müdafiəsinin gücləndirilməsi tədbirləri barədə Azərbaycan Respublikası Prezidentinin 28 dekabr 2011-ci il tarixli Fərmanı bu qəbildən son dərəcə mühüm və strateji əhəmiyyətə malik tarixi bir sənəddir. Ordu sıralarında 20 təqvim ili və daha çox qüsursuz xidmət etmiş hərbi qulluqçuların dövlət vəsaiti hesabına yaşayış sahəsilə təmin olunmasını nəzərdə tutan müvafiq Fərmana əsasən artıq onlarla hərbçi geniş yaşayış sahəsinə malik yeni mənzillərlə təmin olunmuşdur. Müharibə əlilləri və şəhid ailələri üçün Azərbaycan Respublikası Prezidentinin təqaüdünün artırılması haqqında ölkə başçısının imzaladığı digər fərmanlar da ordu quruculuğunda xüsusi xidmətləri olan insanlara verilən yüksək dəyərdir.

Silahlı Qüvvələrimizdə hərbçilərin xidmət şəraitinin yaxşılaşdırılmasını nəzərdə tutan tikinti-quruculuq işləri də intensiv şəkildə həyata keçirilir. İndiyədək ordumuzun 45-dək hərbi şəhərciyində inşa olunan onlarla əsgər yataqxanası, yeməkxana, camaşırxana, qazanxana, transformator yarımstansiyaları və qərargah korpusları xidmətin daha yüksək səviyyədə təşkilində önəmli rol oynamışdır. Bu obyektlərdə mühəndis kommunikasiya xətlərinin yenidən qurulması və ətraf ərazilərin təyinatı üzrə tamamilə abadlaşdırılması isə Silahlı Qüvvələrimizdə ən müasir hərbi təcrübənin tətbiqinə şərait yaratmışdır.

Bütün bunlar indiyədək ordu quruculuğu sahəsində qazanılmış nailiyyətlərin yalnız bir qismidir. Hər il olduğu kimi, dövlət büdcəsindən Silahlı Qüvvələrimizə ayrılan maliyyə vəsaitinin cari ildə də artırılaraq 3,7 milyard dollara çatdırılması müvafiq sahədə yeni keyfiyyət göstəricilərinin əldə olunmasına əsaslı zəmin yaradır. Həyata keçirilən bu möhtəşəm tədbirlərin ümumi fonunda bir sıra qara qüvvələrin hər addımbaşı ordumuza çamur atması isə indiki məqamda heç nəyi dəyişmir. Ən azı ona görə ki, öz arxasında dövlətin və xalqın sarsılmaz dəstəyini hiss edən ordu tarixin yaddaşında hər zaman basılmaz və qalib bir ordu kimi qalıb. O üzdən bu gün əynində əsgər libası gəzdirən və ölkəmizin ərazi bütövlüyünün bərpasını öz həyat amalı kimi dəyərləndirən hər bir hərbi qulluqçunun ürəyinə yalnız bir hiss hakimdir: “Bizə cəsur olmaq əmri verilib”.

İbrahim RÜSTƏMOV,

əməkdar jurnalist

Xalq qəzeti.- 2013.- 24 yanvar.- S. 6.