Alman-fransız mədəniyyət tədbirləri

Yelisey müqaviləsinin imzalanmasının 50 illiyi münasibətilə Almaniya Federativ Respublikasının və Fransa Respublikasının Bakıdakı səfirlikləri birgə mədəni proqram təşkil etmişdir. Bu məqsədlə öncə Azərbaycan Diplomatik Akademiyasında konfrans keçirilmişdir.

Alman-Azərbaycan Mədəniyyət Birliyi “Kapellhaus”da keçirilən konsertin əvvəlində Almaniyanın Azərbaycandakı səfiri Herbert Kvelle və Fransanın Azərbaycandakı səfiri Paskal Mönye Fransa və Almaniya arasında səmərəli ikitərəfli əlaqələri əks etdirən bu hadisə münasibətilə qonaqları salamlamış, hər iki ölkə arasında qarşılıqlı əməkdaşlığın genişlənməsində “Yelisey” müqaviləsinin mühüm əhəmiyyətini qeyd etmişlər. Azərbaycan musiqiçiləri: əməkdar artistlər Fəridə Məmmədova (soprano), İlahə Sadıqzadə (piano) və Salman Qəmbərovun (solo caz) konserti olmuşdur. İki hissədən ibarət konsertdə klassik musiqi əsərləri və caz musiqisi səslənmişdir. Tanınmış musiqiçilər fransız və alman bəstəkarları Debussy, Mendelsson-Bartold, Ştraus, Lehar, Martini, Brams, Trenet və digərlərinin əsərlərindən ibarət seçilmiş repertuar ilə çıxış etmişlər.

Axırıncı gün “Kapellhaus”da məşhur alman xoreoqrafı Pina Bauş haqqında “Pina” sənədli filminin nümayişi olmuşdur. Rejissor Vim Vendersin 3D formatında ilk filmi fransız subtitrlərlə, yeni və orijinal üslubda çəkilmişdir. 2011-ci ildə ekranlara buraxılmış filmin premyerası Berlin festivalında keçirilmişdir. Rejissor bu filmi hələ Pina Bauşun sağlığında çəkməyə başlamışdı. Lakin 2009-cu ildə xoreoqraf vəfat etdi. Rejissor film üzərində işini başa vurmaq istədi. Lakin gördü ki, rəqqaslar çıxışlarını davam etdirirlər və hətta Pinanın partiyalarını məşq etməyə başlayıblar. Ona görə də çəkilişi yenidən başladı: “Mən başa düşdüm ki, çəkilişdən imtina etmək düzgün qərar deyil və biz hamımız Pinaya son borcumuzu verməliyik. Beləliklə, film memoriala çevrildi və Pina Bauşun bir frazası filmin devizi oldu: “Oyna, oyna, yoxsa biz batarıq”.

Filmin çəkilişləri Almaniyada Şimali Reyn-Vestfaliya torpağının Vuppertal, Zolinqen və Essen şəhərlərində aparılmışdır. Filmdə Pina Bauşun iştirak etdiyi sənədli kadrlardan, onun müasir rəqslərdən ibarət vuppertal truppasının rəqqasları ilə müsahibəsi, xoreoqrafiya tamaşalarından fraqmentlərdən istifadə edilmişdir.

Sənədli ekran əsəri alman, fransız, ispan, xorvat, italyan, portuqal, rus və koreya dillərində səsləndirilmişdir. Almaniya ( Berlin), Rusiya (Moskva), İspaniya (San-Sebastyan) kinofestivallarında müsabiqədən kənar proqramlarda nümayiş etdirilərək 2011-ci ilin ən yaxşı sənədli filmi və ən yaxşı rejissor işi üzrə nominasiyalarda qalib hesab edilmiş, Almaniya ilə yanaşı, Böyük Britaniya, ABŞ, Avropa ölkələrində kino müsabiqələrdə ən yaxşı sənədli film mükafatlarına layiq görülmüşdür.

A.Sadıqoğlu

Xalq qəzeti.- 2013.- 27 yanvar.- S. 7.