İstedadlı alim, pedaqoq və psixoloq
Ölkəmizin elmi-pedaqoji ictimaiyyəti görkəmli alim, psixologiya elmləri
doktoru, əməkdar elm xadimi, təvazökar insan, gözəl
ziyalı, professor Əbdül Əlizadənin
80 illik yubileyini qeyd edir.
Sənədlərdə
Əbdül Əlizadənin Bakıda dünyaya gəldiyi qeyd
olunub. Onun haqqında yazılmış bir sıra məqalələrdə
də bu “fakt” təkrarlanır. Ancaq özünün
yazdığı tərcümeyi-halında Əbdül müəllim
Şuşanın Malıbəyli kəndində
doğulduğunu, hələ körpəykən ailəsinin
Bakıya köçdüyünü göstərir. Bakıdakı
31 nömrəli orta məktəbdə təhsil almış,
1950-ci ildə Azərbaycan Dövlət Universitetinin filologiya
fakültəsinin məntiq-psixologiya şöbəsinə
daxil olmuşdur.
Gənc
Əbdül hələ tələbəykən elmi
araşdırmalara maraq göstərir və
üçüncü kursda oxuyanda psixologiya tarixinə dair ilk
məqaləsi “Universitetin elmi əsərləri” məcmuəsində
dərc olunur. Beşinci kursda isə Ə.Əlizadə Cəfər
Cabbarlının yaradıcılığı əsasında
“Bədii yaradıcılığın psixoloji məsələləri”
mövzusunda diplom işi yazaraq 1955-ci ildə universiteti fərqlənmə
diplomu ilə bitirir.
Ali təhsilini
başa vurduqdan sonra Ə.Əlizadə bir müddət Əzim
Əzimzadə adına Rəssamlıq Məktəbində
pedaqoq və “Azərbaycan məktəbi” jurnalında ədəbi
işçi kimi çalışmışdır. Psixologiya
təlimini daha dərindən öyrənmək, elmi tədqiqatlarla
peşəkar səviyyədə məşğul olmaq istəyi
ilə 1959-cu ildə APİ- nin (indiki Azərbaycan Dövlət
Pedaqoji Universitetinin) aspiranturasına daxil olur. Bu illərdə görkəmli alimlərin
qayğısı ilə Ə.Əlizadə pedaqogika və
psixologiya elmlərinin incəliklərini, elmi araşdırma
üsullarını dərindən
mənimsəyir.
Ə.Əlizadə
1962-ci ildə “Şagirdlərin təxəyyül fəaliyyətində
analiz-sintez proseslərinin xüsusiyyətləri” mövzusunda
namizədlik dissertasiyasını uğurla müdafiə edir.
Sonrakı dövrdə Ə.Əlizadənin elmi fəaliyyəti
bir müddət Elmi-Tədqiqat Pedaqogika İnstitutu ilə
bağlı olmuşdur. O burada baş elmi işçi vəzifəsində
çalışmış, elmi araşdırmalarında nəzəri
psixologiya ilə məktəb praktikası məsələlərini
əlaqələndirməyə xüsusi diqqət
yetirmişdir. Bu mərhələdə alim psixoloqların bir
sıra ümumittifaq və beynəlxalq toplantılarında Azərbaycanı
ləyaqətlə təmsil etmiş, elmimizin
respublikamızdan kənarda tanınmasında müəyyən
rol oynamışdır. O 1963-cü ildə SSRİ
psixoloqlarının ikinci qurultayında xüsusi məruzə
ilə çıxış etmiş, sonrakı illərdə
də analoji forumların fəal iştirakçısı
olmuşdur. Bu dövr onun elmi
yaradıcılığının çox məhsuldar bir mərhələsini
təşkil edir. Gənc alim bir-birinin ardınca “Uşaqlarda
diqqətin tərbiyəsi”, “Uşaqlarda kollektivçilik hislərinin
tərbiyəsi”, “Yoldaşlıq və dostluq tərbiyəsi”,
“Şagirdlərdə təxəyyülün inkişafı və
tərbiyəsi”, “Ailədə uşaqların cinsi tərbiyəsi”,
“Şagirdlərin yaradıcılıq fəaliyyətinin
psixologiyası”, “İlk addımlar”, “Məhəbbət aləmində”
və digər elmi-tədqiqat əsərlərini nəşr
etdirir.
1976-cı
ildə cox aktual sayılan “Cinsi dimorfizm və şəxsi
qarşılıqlı münasibətlərin
formalaşmasının psixoloji xüsusiyyətləri”
mövzusunda doktorluq dissertasiyası müdafiə edən Ə.Əlizadə
növbəti ildə Pedaqoji Universitetin Ümumi psixologiya
kafedrasının professoru və müdiri seçilir. O vaxtdan
bu günəcən 37 ildir ki, Əbdül müəllim
ölkəmizdə psixologiya elminin əsas mərkəzlərindən
biri olan bu kafedraya rəhbərlik edir.
Prof.
Ə.Əlizadənin pedaqoji psixologiya ilə bağlı
araşdırmalarının əsas qayəsi mütərəqqi
psixoloji ideyaların, qabaqcıl elmi-nəzəri prinsiplərin
təhsil prosesinə, yeni vətəndaş yetişdirilməsi
işinə daha dərindən nüfuzunun təmin edilməsidir.
Onun elmi-pedaqoji fəaliyyətinin mahiyyətini də həmişə
bu amil - elmi ideyalarla əməli iş prinsiplərinin, nəzəri
psixologiya ilə praktik pedaqogikanın üzvi surətdə
qovuşdurulması təşkil etmişdir. Bu cəhət
1986-cı ildə çap olunmuş “Uşaq və yeniyetmələrin
cinsi tərbiyəsi”, həmçinin 1989-cu ildə
işıq üzü görmüş “Ailə həyatının
etika və psixologiyası” kitablarında xüsusilə
qabarıq nəzərə çarpır.
Onun psixoloji sistemində şagird, tələbə
ilk növbədə fərdi xarakterə və fərqli təbiətə
malik olan, sayğılı yanaşma tələb edən
şəxsiyyət kimi dəyərləndirilir. Ümumiyyətlə,
Əbdül müəllim özünün həyat tərzi və
fəaliyyət prinsipləri ilə bir daha sübut edir ki,
insanların hörmətini qazanmağın ən
dürüst yolu onlara hörmətlə yanaşmaqdır. Bir
pedaqoq və kafedra müdiri kimi də Əbdül müəllimin
başlıca iş prinsipi şəxsi nümunə metodudur.
Xarakterində, rəftarında nə qədər mülayim, nəzalətli
olsa da, elmi məsələlərdə,
həyat prinsnplərinə sadiqlikdə bir o qədər
inadkar və dönməzdir.
Həyat
və fəaliyyətinin ölkəmizin müstəqillik
dövrünə düşən yetkin çağlarında
prof. Ə.Əlizadə təhsil psixologiyası, xüsusən
də etnopsixologiya ilə bağlı tədqiqatlarında
xalqımızın klassik psixoloji irsinin öyrənilməsini
diqqət mərkəzində saxlayır, bu sahədə
böyük Azərbaycan alimi Nəsirəddin Tusinin konseptual
ideyalarını dünya elminə dəyərli töhfə
kimi qiymətləndirir. “Nizaminin psixoloji görüşləri”
və “Xəmsə”də yaş və pedaqoji psixologiya məsələləri”
monoqrafiyaları da məhz bu istiqamətli
araşdırmaların məhsulu kimi meydana
çıxmışdır. Bu mərhələdə prof. Ə.Əlizadənin
təhsil psixologiyasına aid tədqiqatlarını təkmilləşdirməklə
yanaşı, etnopsixoloji problemlərin araşdırılmasını
da ön plana çəkməsi qanunauyğun hal idi.
Bütün pedaqoci və elmi fəaliyyəti boyu gənc nəslin milli mənəvi dəyərlərə
sadiqlik ruhunda tərbiyə olunmasını vacib hesab edən
alimin müstəqil dövlət quruculuğu illərində
şəxsiyyətin milli psixologiya zəminində
formalaşdırılması ideyasını elmi tədqiqatlarının
aparıcı xətti kimi qəbul etməsi tamamilə təbii
görünür. Prof. Ə.Əlizadənin mövqeyinə
görə, həyatın bütün sahələri kimi milli
təhsil sistemini də yenidən quran Azərbaycanda təlim-tərbiyə
işinin optimal inkişaf istiqamətlərinin düzgün
seçilməsi, şəxsiyyət tərbiyəsinin elmi əsaslarda
həyata keçirilməsi, ailədə,
məktəbdə və cəmiyyətdə
qarşılıqlı münasibətlərin humanist prinsiplərlə
qurulması xüsusi əhəmiyyət daşıyır.
90-cı illərdən başlayaraq
prof. Ə.Əlizadənin elmi fəaliyyətində
aparıcı rol oynayan istiqamətlərdən biri də
ölkəmizdə milli təhsil quruculuğunun elmi-nəzəri
platfomasının yaradılmasında, eləcə də yeni
təhsil konsepsiyasının tələblərinə cavab verən
dərslik və tədris vəsaitlərinin hazırlanmasında
yaxından iştirak etməsidir. O, həmmüəllifləri
ilə birgə “İlk addımlar”, “Ailə”,
“İnsan və cəmiyyət”, “Psixologiya” və “Sosial
psixologiya” dərsliklərinin müəllifidir. Həmin
dövrdə onun pedaqoji psixologiya problemləri haqqında 200-ə
yaxın elmi məqaləsi çap olunmuşdur. Əbdül
müəllimin “Xalq qəzeti”ndə dərc olunmuş polemik
xarakterli “Milli təhsil quruculuğu: problemlər, perspektivlər”
adlı məqaləsi ən ciddi mütəxəssislərin
iştirakı ilə geniş diskussiyanın
başlanmasına yol açmış, ölkəmizdə
milli təhsil konsepsiyasının formalaşmasında müəyyən
rol oynamışdı.
Həmin
konsepsiyanın həyata keçirilməsində Əbdül
müəllimin özü də dəyərli elmi əsərləri
ilə yaxından iştirak edir. “Yeni pedaqoji təfəkkür”,
“İstedadlı uşaqlar: psixoloji məsələlər”,
“İdrak prosesi və hisslər”, “Təxəyyül: psixoloji
etüdlər” kitablarını bu fəaliyyətin məhsulu
kimi qiymətləndirmək olar. 1998-ci ildə nəşr
olunmuş “Müasir Azərbaycan məktəbinin psixoloji
problemləri” adlı fundamental əsəri isə
çağdaş psixologiya elminin ən yüksək səviyyədə
dayanan bir nümunəsidir.
Dərslik
yaradıcılığı sahəsində ümumən 20-dən
artıq kitabın müəllifi olan Əbdül müəllimin
2010-cu ildə prof. H.Əlizadə ilə birgə çap
etdirdiyi “Pedaqoji psixologiya” dərsliyini mütəxəssislər
müasir Azərbaycan psixologiyasının ən böyük
nailiyyəti kimi qiymətləndirirlər. Kitab
özünün pedaqoji, psixoloji, metodiki göstəriciləri
ilə müasir təhsil nəzəriyyəsinin, yeni pedaqoji təfəkkürün
prinsiplərinə tam cavab verir.
Əbdül
müəllim ömrünün bu ahıl çağında
da fəal elmi yaradıcılıqdan ayrılmır. Professor
hazırda “Qadın psixologiyasına giriş” monoqrafiyası
üzərində işləyir. Maraqlı və ibrətamiz
faktdır. Görünür, psixologiyanın ən qəliz və
mürəkkəb probleminə həsr olunmuş belə bir əsəri
yazmaq üçün uzun illərin bəxş etdiyi həyat
təcrübəsi və alim səriştəsi zəruri
imiş...
Professor Əbdül Əlizadənin
elmi və pedaqoji fəaliyyəti dövlət və cəmiyyət
tərəfindən yüksək qiymətləndirilib. Sovet
dönəmində
“Qırmızı Əmək Bayrağı”, müstəqillik
dövründə isə “Şöhrət” ordenləri ilə
təltif olunub. Gənclik illərində “Qabaqcıl maarif
xadimi”, yetkinlik çağlarında “Əməkdar elm xadimi” fəxri
adlarına layiq görülüb. Prezident təqaüdçüsüdür.
Müəllim adını
ömrü boyu ləyaqətlə daşıyan, müəllimlik
şərəfini hər şeydən uca tutan Əbdül Əlizadə
pedaqoji fəaliyyəti müddətində minlərlə tələbənin,
işlədiyi kollektivin, ölkəmizin bütün ziyalı
mühitinin dərin hörmət və ehtiramını
qazanmışdır. Onların hamısının fikrini Azərbaycanın
təhsil naziri prof. Misir Mərdanovun sözləri ilə
ümumiləşdirmək olar: “Son dərəcə səmimi,
geniş ürəkli, humanist insan kimi tanıdığım Əbdül
müəllim istər elmdə, istərsə də həyatda
çoxları üçün əlçatmaz zirvələr
fəth etmiş xoşbəxt taleli həqiqi
ziyalılarımızdandır.” Dəyərli fikirdir, ancaq mən
yazını Əbdül müəllimin öz sözləri
ilə bitirmək istərdim: “Xalqımızın birliyi, Vətən
torpaqlarının azad edilməsi, Azərbaycanımızın
daha da çiçəklənməsi mənim ən
böyük arzum, istəyimdir. Mən bir psixoloq kimi
xalqımın qüdrətinə inanıram və ona
övlad məhəbbətimlə fəxr edirəm.”
Biz də
belə böyük bir insanın, böyük vətəndaşın
müasiri olmağımızla fəxr edirik.
İlham Abbasov
Xalq qəzeti.- 2013.- 27 yanvar.- S. 6.