Kulturologiya, təhsil
və milli inkişaf (əvvəli qəzetin 11 və 13 yanvar
tarixli saylarında)
Şəxsiyyət
və liderlərin inkişafı, müxtəlif peşə
xarakterli problemlərin sistemli və situativ təhlili
üçün kulturologiyanın imkanlarından effektiv istifadə
edilməsi, həmçinin inkişaf standartları və tələbatlarına,
insanların gözləmələrinə uyğunluğu
nöqteyi-nəzərindən mədəniyyətin vəziyyətinin
verifikasiya (təsdiq) edilmiş qiymətini nəzərdə
tutan kulturoloji ekspertizanın həyata keçirilməsi məqsədilə
dünya kulturoloji fikrinin öyrənilməsi əsasında tərəfimizdən
ilk dəfə olaraq, “kulturologiya piramidası” universal metodu
işlənib hazırlanmışdır. O, insanın
inkişafı və idarəetmənin konkret və mürəkkəb
problemlərinin sistemli təhlilinə, cəmiyyətin modernləşməsi,
şəxsiyyətin, sosial-mədəni siyasətin təkmilləşdirilməsi,
effektiv idarəetmənin innovativ modelləri və
paradiqmalarının qurulması üçün geniş
imkanlar açan innovativ kulturoloji yanaşmanı ifadə edir.
“Kulturoloji
piramida” öyrənmə və dəyişmənin
üç məntiqi səviyyəsini daxil edir. Bu, cəmdə
- mahiyyət, xüsusiyyətlər, tarix, nailiyyətlər,
inkişaf qanunları, texnologiyalar, yeni imkanlar, gələcəyi
görmə kimi səkkiz kulturoloji pilləni daxil edən,
iyerarxik surətdə qarşılıqlı əlaqəli
“öyrənmə”, “dərk etmə” və “yaratma” səviyyələridir.
Birinci səviyyə - “öyrənmə” - dörd öyrənmə
pilləsinin - mahiyyət, xüsusiyyətlər, tarix və
nailiyyətlərin təhlili əsasında qurulur. İkinci səviyyə
- “dərk etmə” - insanın, cəmiyyətin, dövlətin
və bütövlükdə bəşəriyyətin həyat
fəaliyyətinin müəyyən sahələrində
konkret və ya universal inkişaf qanunları və
texnologiyalarının dərk edilməsi və mənimsənilməsini
nəzərdə tutur. Üçüncü səviyyə -
“yaratma” - yeni imkanların aşkar edilməsini, fəal
kulturogenez metodlarından istifadə etməklə, həyat fəaliyyətinin
yeni, rəqabət qabiliyyətli texnologiyalarının işlənib
hazırlanmasını, həmçinin zaman və məkan
daxilində mədəniyyətin gələcək
inkişafının qurulmasını nəzərdə tutur.
“Kulturoloji
piramida” metodu öz aralarında üzvi surətdə
qarşılıqlı əlaqəli, öyrənilən
obyektin hərtərəfli təhlilinə imkan verən, - məntiqi,
keyfiyyət, kəmiyyət, struktur, funksional, tarixi, məkan,
müqayisəli, situativ, antropoloji, psixoqrafik və demoqrafik
metodlar məcmusunun istifadəsini nəzərdə
tutur.
Ardıcıl
mülahizələrə əsaslanan, şüurlu nəticələrə
gətirib çıxaran məntiqi təhlil, hadisələrin
daxili qanunauyğunluğunu başa düşməyə imkan
verir. Keyfiyyət təhlili keyfiyyət xarakteristikalarına, bu
və ya digər mədəniyyət sahəsinin fəaliyyət
qabiliyyəti və inkişafının
proqnozlaşdırılmasına qiymət vermək imkanı
yaradır. Struktur təhlil öyrənilən obyektin
bütöv orqanizmində
ayrı-ayrı komponentlərin və onların
qarşılıqlı əlaqələrinin nəzərdən
keçirilməsinə yardım edir. Funksional təhlil
öyrənilən obyektin mənalarının, praqmatik xarakteristikalarının,
mahiyyətinin, onun fəaliyyətini təmin edən predmetlər
və hadisələrin xüsusiyyətlərinin dərk edilməsinə
imkan verir. Tarixi təhlil obyektin inkişafını müəyyən
vaxt müddətində tədqiq etməyə yol verir. Məkan
təhlili - sosial mühiti, siyasi rejimi, iqtisadi, iqlim, ekoloji və
digər şərtləri daxil etməklə, obyektin vəziyyətini
və inkişafını müəyyən coğrafi ərazidə
öyrənməyə imkan verir. Müqayisəli təhlil
müxtəlif mədəni obyektlərin və ya hadisələrin
ümumi xassələri və xarakterik xüsusiyyətlərini
müəyyən etməyə yardım edir. Situativ təhlil
öyrənilən obyektin, yaxud insanın həyat fəaliyyətinin
inkişafına təsir göstərən konkret
situasiyaların və ya dəyişən şəraitlərin
düzgün dərk edilməsi imkanını verir. Antropoloji
təhlil mədəniyyətin etnoqrafik və etnoloji
xüsusiyyətlərini, həyat tərzini, adətlər və
ənənələri, sosial münasibətlər sistemini, mədəniyyətin
inkişaf dinamikasını və nəsillər vasitəsilə
onun ötürülmə mexanizmini öyrənməyə
imkan verir. Psixoqrafik təhlil-sosial-mədəni mühit, mədəni
dəyərlər sistemi, mentalitet, həyat tərzi, ənənələr,
insanların anadangəlmə mədəni keyfiyyətləri
ilə şərtlənən motivlərin və
üstünlüklərin öyrənilməsinə yardım
edir. Demoqrafik təhlil tədqiq olunan fərdlərin və ya
sosial insan qruplarının yaşı, cinsi, təhsili, gəlir
səviyyəsi, ömür uzunluğu və digər parametrlər
haqqında informasiya almağa imkan verir.
Bu
metodların cəm halında istifadəsi, daimi və dəyişən
kəmiyyətləri, dövlət qərarlarının qəbulu
və həyata keçirilməsi
prosesi zamanı meydana çıxa biləçək
real situasiya amilləri və qarşılıqlı əlaqələri
nəzərə alan optimal, balanslaşdırılmış
idarəetmə modelinin qurulmasına imkan yaradır. Universal
kulturoloji model çərçivəsi daxilində konkret vəziyyətlərə
operativ reaksiya verərək və
mövcud qeyri-müəyyənliklərin xarakterini tədqiq
edərək dəyişən şəraitin tələblərinə
hansı idarəetmə strukturu və metodlarının daha
artıq cavab verəcəyini, hansı idarəçilik
innovasiyalarının təşkilatın və ya dövlətin
effektivliyini və rəqabət qabiliyyətini təmin edə
biləcəyini permanent olaraq müəyyən etməyə rəhbərə
imkan verən situativ təhlil xüsusi yer tutur. Müvəffəqiyyət-situasiyanın
obyektiv şərhi, qoyulan vəzifənin həlli
üçün lazım olan əsas daxili və xarici “situativ
dəyişənlərin”, məntiqi cəhətdən
nöqsansız və effektiv (verilmiş şəraitdə) tədqiqat
metodlarının düzgün
seçimi ilə müəyyən edilir. Daxili dəyişənlərə
- məqsədlər, vəzifələr, struktur, texnologiyalar,
idarəetmə sistemi əməkdaşları aiddir. Xarici dəyişənlərə-siyasi
proses, iqtisadiyyatın vəziyyəti, elmi-texniki tərəqqi,
sosial-mədəni dəyişikliklər, qrup
maraqlarının təsiri aiddir. Tərəfimizdən təklif
edilən kulturoloji model, cəmdə
insanın həyat fəaliyyətinin strateji sahəsi olan idarəetmə
prosesini xarakterizə edən amillərin bütün spektrini tədqiq
etməyə imkan verir. Model, əsərləri dövlət
idarəetmə mədəniyyəti problemlərinə həsr
edilmiş bir çox sosioloqlar, politoloqlar, psixoloqlar,
iqtisadçılar və digər mütəxəssislərin
elmi nailiyyətlərini
özündə birləşdirir.
Bütövlükdə
kulturologiyanın elmi və tətbiqi imkanları kimi,
“kulturologiya piramidası” universal metodunun effektivliyi, əsasən
kulturoloji metodologiyanın düzgünlüyü ilə şərtlənmişdir.
Tərəfimizdən seçilən, sistemli yanaşmanın əsasını
təşkil edən kulturoloji metodologiyanın ən
mühüm məğzini: məntiq, tarixilik prinsipi, dialektika
təşkil edir. Bu elmi yanaşmaların məcmusu obyektiv
elmi dünyagörüşünün formalaşmasına,
dünya mədəniyyəti və sivilizasiyasının
tarixi dəyişikliklər panoramını, zaman və məkan
daxilində insanın, cəmiyyətin, dövlətin və
dünya birliyinin texnoloji inkişaf imkanlarını tam şəkildə
görməyə imkan verir. Təfəkkür formaları və
qanunları haqqında elm olan məntiq bəşəriyyətin
tərəqqisi naminə mədəniyyətin obyektiv
inkişaf proseslərini düzgün dərk etməyə
imkan yaradır. Burada bir sıra alimlərin, əsasən,
Aristotelin deduktiv məntiqi və Frensis Bekonun induktiv məntiqi,
Kantın formal, metafizik məntiqi və Hegelin dialektik məntiqi
istifadə edilir. Kulturoloji tədqiqatlarda tərəfimizdən
ilk dəfə olaraq Lütfi-Zadənin qeyri-səlis məntiq
nəzəriyyəsi də istifadə edilmişdir. Tarixilik
prinsipi üç əsas: dərk etmə, metodoloji və
dünyagörüşü funksiyalarını yerinə
yetirir. Dərk etmə funksiyası insanın təbiətə,
cəmiyyətə və özünə qarşı
münasibətdə yerini və rolunu müəyyən edir.
Metodoloji funksiya mədəni təzahürləri və hadisələri
keçmişdən gələcəyə hərəkət
kimi nəzərdən keçirməyə, zamanın müxtəlif
dövrlərində mədəniyyətin məzmun və
struktur dəyişikliklərini aşkar və müqayisə
etməyə, müxtəlif mədəniyyətlərin
komporativ təhlilini aparmağa imkan verir.
Dünyagörüşü funksiyası, dünyanın
bütün milli mədəniyyətləri üçün
ortaq olan mədəniyyətlərin, insanın norma və
prinsiplərinin ümumi məntiqi ilə şərtlənən
obyektiv elmi dünyagörüşünün
formalaşmasına, mədəni universalların aşkar edilməsinə
yardım edir. Dialektika, materiya və ruhun inkişaf
qanunlarına əsaslanaraq, hadisələrin mahiyyətini,
onların hərəkəti, ziddiyyətləri və əlaqələrini
aşkar edir.
Müasir
kulturologiyanın nailiyyətlərini daxil edən keyfiyyətli
təhsil, yüksək dövlətçilik və dövlət
idarəçiliyi mədəniyyətinin, həyat keyfiyyətini
təmin edən sosial-mədəni siyasətin effektivlik şərtlərindən
biridir, mədəni irsin qorunması, intellektual, etik,
hüquqi, idarəçilik, iqtisadi, tibbi, bədii mədəniyyətin
və insanın həyat fəaliyyətinin digər sahələrinin
inkişaf etməsidir.
Sistemli
kulturoloji yanaşma, metodologiya və tədqiqat metodları,
ölkəmizin modernləşməsi, Azərbaycan dövlətinin
davamlı, rəqabət qabiliyyətli və təhlükəsiz
strateji inkişaf problemlərinin həlli üçün zəruri
olan innovativ sosial-mədəni texnologiyaların işlənib
hazırlanması üçün tükənməz
imkanlarını özündə ehtiva edir. Bu imkanların dərk
edilməsini nəzərə alaraq, ötən əsrin
90-cı illərindən Azərbaycan Respublikasında
kulturoloji tədqiqatlar genişləndi. Bu gün bu tədqiqatlar
Azərbaycan Milli Elmlər Akademiyasında, AR Prezidenti
yanında Dövlət İdarəçilik Akademiyasında,
“Simurq” Azərbaycan mədəniyyət assosiasiyasında, Mədəniyyət
və İncəsənət Universitetində, Mədəniyyət
və Turizm Nazirliyinin Kulturologiya Mərkəzində, həmçinin
respublikanın bir sıra ali məktəb müəssisələrində
aparılır. Tədris fənni kimi kulturologiya, bu və ya
digər formatda, Mədəniyyət
və İncəsənət Universitetində, Bakı Dövlət
Universitetində, Rəssamlıq Akademiyasında, Slavyan
Universitetində, Turizm İnstitutunda, Bakı Musiqi
Akademiyasında və digər ali təhsil müəssisələrində
tədris edilir.
Azərbaycanda
“mədəniyyətin nəzəriyyəsi və tarixi” fənni
respublikada ilk dəfə 1990-cı ildə Bakı Sosial
İdarəetmə və Politologiya İnstitutunda və
“Simurq” Azərbaycan Mədəniyyət Assosiasiyasında tədris
edilməyə başlanmışdır. 1992-ci ildə İncəsənət
Universiteti Mədəniyyət və İncəsənət
Universiteti kimi yenidən təşkil edildı ki, burada bir il
sonra, 1993-cü ildə mədəni-maarif fakültəsinin
adı kulturologiya fakültəsinə dəyişdirildi.
Yüksək ixtisaslı mütəxəssis-kulturoloqların
hazırlığı ilə yanaşı, tezliklə burada və
respublikanın digər ali təhsil müəssisələrində
kulturologiya sahəsində tədqiqatlara, məqalələr,
kitablar və dərs vəsaitlərinin nəşrinə
başlandı. 1990-cı ilin sonundan universitetdə kulturologiya
elmləri namizədi və doktoru alimlik dərəcəsinin təqdim
edilməsi üçün dissertasiyaların müdafiələri
başlandı. 2001-ci ildən Mədəniyyət və
İncəsənət
Universiteti tərəfindən “Mədəniyyət
dünyası” kulturoloji jurnalı da buraxılmağa
başlandı. 30 yanvar 2006-cı ildə ləğv
edilmiş nazirliklərin - Mədəniyyət Nazirliyi və Gənclər,
İdman və Turizm Nazirliyinin əsasında Mədəniyyət və Turizm
Nazirliyi yaradıldı. Elə həmin il nazirin kulturologiya sahəsində
fəlsəfə doktoru Əbülfəs Qarayevin təşəbbüsü
ilə, milli kulturologiyanın inkişafına dövlət dəstəyi
həyata keçirilməyə başlandı. Nazirliyin tərkibində
kulturoloji tədqiqat mərkəzi yaradıldı, kulturoloji
forumların, tədqiqat işlərinin müsabiqələri
keçirilməyə başlandı, Rusiya Kulturologiya
İnstitutu ilə əməkdaşlıq təşkil edildi.
Azərbaycanda
kulturologiyaya dövlət dəstəyinə görə Əbülfəs
Qarayevə, “Simurq” beynəlxalq
medalının təltif edilməsi ilə “Sülh səfiri”
fəxri adı verilmiş, 2010-cu ildə isə o,
“Simurq”AMA-nın Fəxri üzvü seçilmişdir. “Mədəniyyət tarixi və nəzəriyyəsi”
(Manafova M., Bakı, 2006); “Mənəviyyət fəlsəfəsi”
(Xəlilov Səlahəddin, Bakı, 2007); “Müasir şəraitdə
Azərbaycan dövlətinin mədəni siyasəti və mənəvi
dəyərlərin inkişaf amilləri” (Abbasov Namiq,
Bakı, 2008); “İdarəetmə mədəniyyəti. Xarici
ölkələrin təcrübəsi” (Fuad Məmmədov,
Bakı, 2009); “Azərbaycanın kulturoloji fikir tarixindən (XX
əsrin əvvəli) (Süleymanlı M. A., Bakı, 2009), “Mədəniyyət
tarixi və nəzəriyyəsi” (Dərslik, Bakı, 2009) və
s. kimi əsərlər dərc edilmişdir.
Azərbaycanda
kulturoloji elmin və maarifin banisi “Simurq” Azərbaycan Mədəniyyət
Assosiasiyasıdır. Azərbaycanda kulturologiyanın
inkişafının başlanğıcı müəllif tərəfindən
xüsusi tədqiqatlarla hələ 1989-cu ildə
qoyulmuşdur. Bu tədqiqatların genişləndirilməsi və
dərinləşdirilməsi məqsədilə 1990-cı ildə
Azərbaycan Milli Elmlər Akademiyası tərəfindən Azərbaycan
elmi, təhsili və maarifinin inkişaf tələblərinə,
ölkənin milli maraqlarına cavab verən kulturologiya sahəsində məqsədyönlü
elmi və elmi - maarifçilik fəaliyyətini genişləndirən
“Simurq” Azərbaycan Mədəniyyət
Assosiasiyası təsis edildi.
Beynəlxalq
səviyyədə tanınan assosiasiya tərəfindən
dünya kulturologiyasında ilk dəfə Lütfi-Zadənin
qeyri-səlis məntiq nəzəriyyəsinin istifadə
edildiyi yeni “kulturoloji piramida” universal metodu ilk olaraq işlənib
hazırlanmış, insanın həyat fəaliyyətinin
müxtəlif sahələri və müxtəlif inkişaf səviyyələrində
konkret və mürəkkəb problemləri qoymağa və həll
etməyə imkan verən kulturoloji tədqiqat
metodlarının məcmusu müəyyən edilmişdir.
“Simurq”
AMA-nın fəaliyyətinin əsas istiqamətləri -
sistemli kulturoloji tədqiqatlar, monoqrafiyaların, tədris vəsaitlərinin,
kitabların, məcmuə və broşürlərin
hazırlanması və nəşr edilməsi, dünya mədəniyyəti
və sivilizasiyası tarixi və nəzəriyyəsi üzrə
“Simurq” beynəlxalq kulturoloji jurnalının dərc edilməsi,
milli və dünya sivilizasiyasının zaman və məkanı
daxilində bəşəriyyətin həyat fəaliyyətinin
aktual mədəniyyət problemlərini əks etdirən beynəlxalq
kulturoloji konfransların, seminarların, diskussiyalar və dəyirmi
masaların, kulturoloji televiziya verilişlərinin
hazırlanması və aparılmasıdır.
Assosiasiya
tərəfindən, Azərbaycan, Almaniya, Rusiya, İraq,
ABŞ, Yaponiya, Çin, Norveç, İtaliya, İran, Fransa,
Macarıstan, Mərakeş, Misir və digər ölkələrin
mədəniyyətlərinə, həmçinin kulturologiya,
idarəetmə mədəniyyəti, iqtisadi mədəniyyət,
hüquqi mədəniyyət, vətəndaş cəmiyyəti
mədəniyyəti, məsuliyyət mədəniyyəti,
insanın davamlı inkişafı, alternativ energetika, tibb mədəniyyəti,
ekoloji mədəniyyət, fərdi və beynəlxalq
münasibətlər mədəniyyəti və s. problemlərinə
həsr edilmiş “Mədəniyyət və cəmiyyət”
ümumi adı altında 300-dən artıq respublika və
beynəlxalq konfrans və seminar keçirilmişdir.
“Simurq”
AMA tərəfindən milli və dünya mədəniyyəti
və sivilizasiyasının tarixi və nəzəriyyəsi
sahəsində onlarca əsər dərc edilmiş, “Menecment və
biznes məktəbi”ndə, “Şəfqət bacıları məktəbi”ndə,
“Gənclər üçün mədəniyyət məktəbi”ndə,
kulturologiya üzrə xüsusi seminarlarda mütəxəssislər
hazırlanmışdır.
Azərbaycanda
kulturologiyanın inkişafında 2008-ci ildən Milli Elmlər
Akademiyası ilə birgə Azərbaycan Mədəniyyət
Assosiasiyası tərəfindən nəşr edilən, milli
və dünya mədəniyyəti və sivilizasiyası
tarixi və nəzəriyyəsi məsələlərinə
həsr edilmiş “Simurq” beynəlxalq kulturoloji jurnalı
mühüm rol oynayır. Jurnal Azərbaycan AAK-nın reyestrinə
daxil edilmişdir. 2010-cu ildə Azərbaycan televiziyasında
ilk dəfə olaraq, “Kulturologiya və insanın
inkişafı” (“İdrak”) stasionar kulturoloji veriliş
aparılmağa başlandı. “Simurq” AMA-nın kulturologiya
sahəsindəki nailiyyətləri yalnız respublikanın
elmi ictimaiyyət dairələrində deyil, həm də
“İntellektual İnkişaf Problemləri” Beynəlxalq Elmlər
Akademiyasının və Rusiya Pedaqoji və Sosial Elmlər
Akademiyasının yüksək
qiymətini
almışdır.
İnsan
kapitalının inkişafı, şəxsiyyət və
liderlərin hazırlanması, permanent dialektik dəyişikliklər
şəraitində dövlətin strateji problemlərinin həlli
üçün kulturologiyanın əvəzsiz elmi, metodoloji
və praktik əhəmiyyəti, Azərbaycan Respublikasında
kulturoloji elmin və təhsilin qabaqlayıcı
inkişafını zəruri edir. Bunu nəzərə alaraq,
milli təhsil işçilərinin, vətəndaşların
sosial və şəxsi həyatında kulturoloji təfəkkür,
bilik və metodoloji yanaşmaların yeni mədəni ənənəyə
çevrilməsinə yardım etməsi zəruridir.
Kulturologiyanın hərtərəfli inkişafı, xalqın
mədəni səviyyəsi və həyat keyfiyyətini, dəyişən
fərdi və milli tələbatları nəzərə
almaqla qəbul edilən qərarlar mədəniyyətini daim yüksəltməyə imkan
verəcəkdir.
Qloballaşma
çağırışları respublikanın təhsil və
elm xadimlərindən, alimləri və mütəxəssislərindən,
diplomatları və ictimai xadimlərindən yalnız milli və
dünya mədəniyyəti nailiyyətlərini bilməyi,
onda cəmləşən insanın inkişaf qanunları və
həyat fəaliyyəti texnologiyalarını dərk etməyi
deyil, həm də milli inkişaf naminə mədəniyyət
və kulturologiyanın qeyri-məhdud dəyişdirici
imkanlarından effektiv istifadə etməklə, həmrəyliyi
və məhsuldar əməkdaşlığı tələb edir.
Kulturologiyanın
strateji əhəmiyyətini nəzərə alaraq, Azərbaycanın
milli maraqlarına əsaslanaraq, kulturologiyanı məktəbəqədər,
məktəb, xüsusi orta və ali təhsilə tətbiq
etmək, xüsusi universitetlər və akademiyalar, fakültələr
və kafedralar, tədqiqat institutları, kulturoloji şura Azərbaycan
Dövlət Mədəniyyət və İncəsənət
Universitetində 1999-cu ilin sonunda yaradılmışdır.
Assosiasiyanın
kulturoloji tədqiqatlarının nəticələri
Norveç, Rusiya, Azərbaycan, ABŞ, Tayland, Cənubi Koreya,
Fransa, Macarıstan və İranda keçirilən dünya mədəniyyəti
və nəzəriyyəsi, liderlik, üçüncü
sektor, konfliktologiya, sülh və qlobal idarəetmə problemləri
üzrə onlarca beynəlxalq konfransda məruzə edilmiş
və bəyənilmişdir. Kulturologiyanın və dünya
mədəniyyətinin inkişafına assosiasiyanın
töhfəsi, mədəniyyət siyasəti üzrə
ekspertlərin Avropa Şurası Məlumat Bazasına daxil
edilməklə, “İntellektual İnkişaf Problemləri”
Beynəlxalq Elmlər Akademiyası və Rusiya Pedaqoji və
Sosial Elmlər Akademiyası tərəfindən
tanınmş, Azərbaycan Respublikasının “Humay”,
“İntellekt”, “Qızıl qələm” milli ictimai
mükafatları ilə qeyd
edilmişdir.
Belə
siyasət sosial mədəniyyət institutlarının
inkişafına, ideoloji və informasiya təminatına, qloballaşma şəraitində
milli tərəqqinin hüquqi və etik tənzimlənməsinə
yardım edəcəkdir. Kulturologiya elmi, təhsili və
maarifinin bütün səviyyələrdə
qabaqlayıcı inkişafının hüquqi təminatı,
mütəxəssislər və respublika əhalisinin müxtəlif
təbəqələri arasında universal kulturoloji biliklərin
yayılması Azərbaycan cəmiyyəti və dövlətinin
strateji resursu olan insan kapitalının inkişafı
üçün yeni imkanlar açar.
Kulturologiyanın
milli təhsil sisteminə geniş tətbiqi, kulturologiya
institutları, kafedraları, mərkəzlərinin və
müxtəlif səviyyəli və istiqamətli məktəblərdə
kulturologiya kabinetlərinin açılması - insanın həyat
fəaliyyəti texnologiyalarının təkmilləşdirilməsi
üçün zəruri olan universal
və xüsusi biliklərə malik şəxsiyyətlər,
liderlər və ekspertlərin formalaşdırılmasına
yardım edəcəkdir. Bu, insan kapitalının
inkişafına, dövlət və sosial idarəçilik mədəniyyətinin
yüksəldilməsinə, milli inkişaf maraqlarına cavab
verən innovativ fəaliyyətin inkişafına imkan yaradacaqdır.
Fuad MƏMMƏDOV,
Azərbaycan Respublikası Prezidenti
yanında Dövlət İdarəçilik
Akademiyasının
professoru, kulturoloq, “Simurq” Azərbaycan
Mədəniyyət
Assosiasiyasının prezidenti
Xalq qəzeti.- 2013.- 27 yanvar.- S. 5.