Azərbaycanın
beynəlxalq aləmdə reytinqi sürətlə
artır
Ölkəmizin Avropa Şurası
qarşısında götürdüyü öhdəliklərin
yerinə yetirilməsinə dair məruzə yüksək dəyərləndirilmişdir
Azərbaycanda ictimai - siyasi sabitliyi
pozmaqda maraqlı olan bəzi dairələr ölkəmizin
beynəlxalq aləmdəki nüfuzuna xələl gətirmək
üçün gah icazəsiz aksiyalar keçirir, gah da bir qrup gənci müxtəlif qeyri
- qanuni hərəkətlərə təhrik edirlər. Belə
bəd niyyətli ünsürlər
Avropa Şurası Parlament
Assambleyasının qış
sessiyası ərəfəsində
bir qədər də fəallaşmışdılar.
Məqsədlərini də gizlətmirdilər.
AŞPA- nın qış
sessiyasında Azərbaycanda demokratik
proseslərin inkişafına guya hakimiyyətin əngəl törətməsi,
insan hüquq və
azadlıqlarının pozulması, insanların sərbəst
toplaşmalarına şərait yaradılmaması barədə
rəy formalaşdırmaq niyyətində idilər. Hətta radikal müxalifət nümayəndələri
və Leyla Yunus kimi ermənipərəst
hüquq müdafiəçiləri də
iqtidarı hədələyərək deyirdilər ki, darıxmayın, AŞPA - nın
qış sessiyasında görün sizi necə biabır edəcəyik. Ancaq hər şey əksinə
oldu. Belə antimilli
insanların yalan məlumatları əsasında
Azərbaycandakı “siyasi məhbuslar”la əlaqədar
məruzə hazırlayan
almaniyalı deputat Kristofer
Ştrasserin özü
rüsvay oldu. Radikal müxalifət və Leyla
Yunus kimi üzdəniraq
hüquq müdafiəçisi K.Ştrasseri də öz
səviyyələrinə endirdilər.
AŞPA - nın Strasburqda keçirilən qış sessiyası artıq öz işini başa çatdırdı. Bu sessiyada bir daha təsdiqləndi ki, Azərbaycan artıq bu qurumda mühüm söz sahibinə çevrilmişdir. AŞPA-nın qış sessiyasının müsbət nəticələri Azərbaycan parlamentinin beynəlxalq fəaliyyətinin keyfiyyətcə yeni mərhələyə keçməsini təsdiqlədi.
Azərbaycan parlamenti nümayəndə heyətinin
rəhbəri, Milli Məclisin beynəlxalq münasibətlər
və parlamentlərarası əlaqələr komitəsinin sədri
Səməd Seyidov ölkəmizin AŞPA - da söz sahibinə
çevrilməsini, nüfuzunun artmasını
respublikamızın bu qurum
qarşısında götürdüyü öhdəlikləri
layiqincə yerinə yetirməsi və sessiyadan əvvəl dünyanın
və bir çox Avropa ölkələrinin
parlamentlərində, eləcə də AŞPA-da Azərbaycan
həqiqətlərinin
çatdırılması ilə bağlı
aparılan müzakirələrin müsbət sonluğu
kimi dəyərləndirmişdir.
Azərbaycana təsir göstərmək üçün insan
haqları, demokratiya kimi
ali dəyərlərdən öz məqsədləri naminə istifadə
edən məruzəçi Kristofer Ştrasserin hazırladığı qərəzli
layihə məhz bu sessiyada
səs çoxluğu ilə qəbul
olunmadı. K.Ştrasser də öz məğlubiyyətini etiraf
etdi. Onu da etiraf etdi
ki, onun məruzəsi
radikal müxalifətin və bəzi hüquq müdafiəçilərinin
“faktları” əsasında hazırlanıb. Bunu
artıq avropalı
deputatların böyük əksəriyyəti
də başa
düşüb. Axı, K.Ştrasser heç vaxt Azərbaycanda olmayıb, məhbuslarla
görüşməyib, təcridxanalarda monitorinq
aparmayıb. Bütün bunlardan sonra o, “siyasi məhbuslar”
haqqında necə məruzə hazırlaya bilərdi?
Qış sessiyasında məlum oldu ki, onun məruzəsi Azərbaycana qarşı subyektiv və qərəzli mövqedən
hazırlanıb və əsas məqsəd də ölkəmizdə
gedən prosesləri başqa tərzdə
təqdim etməkdir. AŞPA - nın məruzəçisi istəyinə nail
ola bilmədi. Hətta, K.Ştrasserin
iclasın başlamasına bir neçə
saat qalmış məruzəsində dəyişikliklər
etməsi də avropalı deputatların diqqətindən kənarda
qalmamışdır və onun bu addımı ciddi
narazılıq yaratmışdır.
Azərbaycan Respublikasının Avropa Şurası yanında daimi
nümayəndəsi səfir Emin Eyyubov da bu
məsələyə münasibət bildirərkən demişdir ki, almaniyalı deputatın Azərbaycanda “siyasi
məhbuslar”la bağlı təqdim etdiyi
qətnamə layihəsinin qəbul edilməməsi Avropa dəyərlərinin aliliyinin, AŞPA-da sağlam
düşüncənin qələbəsidir. Qətnamə
layihəsinin qəbulu Avropa
Şurasının təşviq etdiyi təməl
prinsiplərə və dəyərlərə, onun nüfuzuna xələl
gətirər, eləcə də təşkilata olan inamı sual altında
qoya bilərdi. Çünki
Kristofer Ştrasserin qətnamə
layihəsi qərəzli idi. AŞPA
deputatlarının onun qətnamə layihəsinin
əleyhinə səs verməsi Avropa dəyərlərinə,
qanunun aliliyinə hörməti ehtiva edir. Onlar
həmin qətnamə layihəsinin əleyhinə səs verməklə
təkcə Azərbaycanın haqlı mövqeyinin
müdafiəsinə deyil, eləcə də
haqqın və ədalətin müdafiəsinə
qalxdılar. Qətnamə layihəsi ilə bağlı səsvermənin
nəticəsi göstərdi ki, Azərbaycanın
mövqeyi Avropa
Şurasında dəstəklənir və nəzərə
alınır. Azərbaycan Avropa
Şurasında yüksək səviyyədə mövqeyini müdafiə etmək
iqtidarındadır və bu istiqamətdə
də işlərini davam etdirəcəkdir.
Bununla həm də sübut olundu ki,
belə təzyiq vasitəsilə Azərbaycanı dünyada və
beynəlxalq təşkilatlarda öz müstəsil siyasətindən
çəkindirmək mümkün deyil və onun getdikcə
artan nüfuzuna xələl gətirmək qeyri -
mümkündür. AŞPA-da Azərbaycanda “siyasi məhbus” məsələsi
ilə bağlı qətnamə layihəsinin əleyhinə
səs verənlər əslində Avropa dəyərlərinə,
ədalətə, hüququn aliliyinə hörmət
nümayiş etdirdilər.
AŞPA-da əldə olunan bu uğur təbii ki, Azərbaycan Prezidenti İlham Əliyevin yürütdüyü xarici siyasətin nəticəsidir. Bir qədər əvvəl Azərbaycanın BMT Təhlükəsizlik Şurasının qeyri - daimi üzvü seçilməsi və bu seçkilərdə 155 dövlətdən dəstək alması artıq bir daha təsdiqlədi ki, Azərbaycan dünya birliyinin layiqli üzvlərindən birinə çevrilməkdədir. Budur, artıq daha bir nüfuzlu beynəlxalq təşkilat da ölkəmizə olan inam və etimadını ortaya qoydu. Dövlətimizin başçısının həyata keçirdiyi məqsədyönlü siyasət, başqa ölkələrlə dostluq münasibətlərinin inkişaf etdirilməsi belə bir nəticənin əldə olunması üçün zəmin yaratmışdır.
Assambleyada
aparılan müzakirələr bir daha göstərdi ki, Azərbaycan
bu qurum qarşısında götürdüyü öhdəlikləri
layiqincə yerinə yetirir, demokratik proseslərin
inkişafı, insan hüquq və azadlıqlarının
qorunması istiqamətində bütün imkanlardan səmərəli
istifadə edir. Ona görə də
Azərbaycana qarşı böhtan və iftiralar, dezinformasiya cəhdləri
artıq Avropanın özünə də təhlükə
yaratdığı üçün qətiyyətlə
rədd edilir. Bütün
bunların nəticəsi olaraq Avropa
Şurası bu sessiyada
sübut etdi ki, Azərbaycanla konstruktiv
əməkdaşlığa hazırdır. Bunu
K.Ştrasser də başa
düşdü və təqdim etdiyi məruzəyə rədd cavabı
verildikdən sonra o, özü də
aldadıldığını və radikal
müxalifətin onu rüsvay
etdiyini anladı.
AŞPA - nın qış sessiyasında Ermənistan nümayəndələri həmişə olduğu kimi,bu dəfə də öz iddialarını yeridə bilmədilər. Bunun əsas səbəblərindən biri rəsmi Bakının AŞPA ilə əməkdaşlıqda, o cümlədən insan haqları məsələsində hər zaman siyasi iradə nümayiş etdirməsi olmuşdur. Sessiyada Azərbaycan üzrə məruzəçilərin təqdim etdiyi məruzənin müzakirəsi zamanı ermənilərin bir neçə dəfə sənədə müdaxilə etmək cəhdi boşa çıxmışdır. AŞPA-nın Monitorinq Komitəsinin Azərbaycan üzrə həmməruzəçisi Pedro Aqramunt çıxışında Ermənistanın Azərbaycan torpaqlarını işğal etdiyini, 1 milyona yaxın azərbaycanlının öz yurdundan didərgin düşərək qaçqın və məcburi köçkün şəraitində yaşadığını diqqətə çatdırmışlar. Ən maraqlısı isə o olmuşdur ki, ermənistanlı deputat çıxış edərək demişdir ki, səslənən rəqəmlər şişirdilmişdir. İşğal olunmuş torpaqlar 20 deyil, 14 faiz təşkil edir, qaçqın və məcburi köçkünlərin sayı isə 700 minə qədərdir. P.Aqramunt isə dərhal onlara cavab olaraq bunun rəsmi etiraf olduğunu və həqiqətən də Ermənistanın Azərbaycan torpaqlarını işğal etməsinin fakt olduğunu sessiya iştirakçılarının diqqətinə çatdırmışdır. Erməni deputatın etirafı təkcə onların özlərini deyil, havadarlarını da pis vəziyyətə salmışdır.
Azərbaycandakı real vəziyyət,
qəbul olunmuş qanunların Avropa standartlarına
uyğunlaşdırılması, korrupsiyaya qarşı
mübarizə, dini dözümlülük konkret faktlarla diqqətə
çatdırılmışdır. Bakıda
başqa dini
icmaların nümayəndələri üçün
yaradılmış şərait, sinaqoqların və katolik kilsənin tikilməsi, rus
pravoslav kilsənin əsaslı təmir
olunması barədə məlumatlar avropalı deputatlar tərəfindən xüsusi
qeyd olunmuş və
yüksək qiymətləndirilmişdir. Assambleyada çıxış edən deputaların əksəriyyəti
Azərbaycanda gedən demokratik prosesləri
dəstəklədiyini bildirmişdir.
Almaniyalı deputat Robert
Valter 1918-ci ildə Azərbaycanda ilk dəfə qadınlara seçmək və
seçilmək hüququnun verildiyini, gənc respublikada
demokratiyanın inkişaf etdiyini
diqqətə çatdırmışdır. Fransalı deputat Jan-Mari Bokelin çıxışı xüsusi maraq doğurmuşdur. O demişdir:
“Mən bir çox məsələlərə
diqqəti cəlb etmək istərdim. İlk
növbədə, ölkənin malik olduğu iqtisadi potensial hazırda demokratiyanın
inkişafına rəvac verir.
Bu
gün digər həssas bir məsələni - Ermənistan-Azərbaycan,
Dağlıq Qarabağ münaqişəsini xüsusi qeyd etmək
lazımdır. Münaqişə demokratiyaya
doğru yönələn səyləri əngəlləyir. Azərbaycan
xalqının 10 faizini təşkil edən
qaçqın və məcburi köçkünlər məsələsinə
diqqət yetirilməlidir. Biz bu məsələdə ATƏT-in Minsk qrupunun səylərini
dəstəkləyərək münaqişənin həlli üçün
çalışmalıyıq. Bizim təşkilatımızın
tərkibində münaqişə şəraitində olan iki ölkə
vardır. Parlament diplomatiyası
demokratiyanın inkişafına kömək edəcək nəticələrin
əldə olunmasına gətirib çıxarmağa imkan verməlidir. Qeyd edim ki, Avropa
İttifaqı da məsələlərə
bu prizmadan
yanaşır, çünki bu yaxınlarda tərəfləri
münaqişəyə dair
danışıqları sürətləndirməyə
çağırmışdır. Avropa İttifaqının genişlənmə
üzrə komissarı da bir
neçə həftə əvvəl bu
ölkədə demokratiyanı gücləndirmək üçün göstərilən səyləri
xüsusi qeyd etmişdir. Eyni zamanda, avropalı komissar Brüssel ilə Bakı arasında enerji sahəsində əməkdaşlığın
inkişafını alqışlamışdır”.
Jan-Mari
Bokel almaniyalı deputat K.Ştrasserin məruzəsinin Azərbaycanın
tutduğu demokratiya yolunu əks etdirmədiyini söyləmişdir.
Bildirilmişdir ki, həyata keçirilən səyləri və
əldə edilən irəliləyişləri görmədən həmin ölkəni tənqid etmək
düzgün deyildir.
Fransalı deputat demişdir: “Mən,
habelə diqqəti Azərbaycanın yerləşdiyi geopolitik
vəziyyətə və Ermənistan ilə müharibə vəziyyətinə
çəkmək istəyirəm. Azərbaycanda mövcud olan və model xarakteri daşıyan
bəzi elementləri xüsusi qeyd etməliyəm. Ölkədə mövcud olan dünyəvilik,
dinlərarası birgəyaşayış da
xüsusi qeyd edilməlidir.
Bu səbəblərdən mən Monitorinq Komitəsinin hazırladığı
məruzənin lehinə səs verəcəyəm. K.Ştrasserin məruzəsi isə qərəzli
və natamam olduğuna
görə ona səs verməyəcəyəm”.
Azərbaycan
ərazilərinin 20 faizinin Ermənistan silahlı qüvvələri
tərəfindən
işğal olunması nəticəsində
bir milyondan artıq azərbaycanlının qaçqın və
məcburi köçkün həyatı yaşadığı,
onların hüquqlarının pozulduğu avropalı
deputatlar tərəfindən açıq şəkildə
pislənildi. Fransalı deputatlardan
Rene Ruke, Jak Ruke, Terri
Marianinin çıxışları Ermənistan
nümayəndələrini pat vəziyyətinə
saldı. Avropalı deputatlar K.Ştrasserin başqa yol tutduğunu, bu
haqsızlıqlara laqeyd münasibətini
kəskin tənqid etdilər. Çıxış edənlər
Azərbaycanda iqtisadi yüksəlişin göz qabağında olduğunu
və bu yüksəlişin demokratik proseslərdən xəbər verdiyini, müsəlman ölkəsi
olmasına baxmayaraq, Azərbaycandakı tolerantlığın
Avropa ölkələrinin əksəriyyətinə
nümunə olduğunu bildirmişlər.
Polşadan,
Rusiyadan, Türkiyədən, Macarıstandan, Sloveniyadan və
başqa ölkələrdən olan deputatlar “siyasi məhbus”
anlayışının müəyyənləşmədiyi
halda, onun Azərbaycana tətbiq edilməsini pisləmiş və
Azərbaycanın son illər bütün sahələrdə əldə
etdiyi nailiyyətlərdən, beynəlxalq aləmdə
nüfuzunun artmasından söhbət açmışlar. Bəzi
avropalı deputatların ermənilərə havadarlıq etmələrinin
heç bir nəticəsi
olmamışdır. Onların çıxışları ciddi narazılıqlarla
qarşılanmışdır.
AŞPA-nın
budəfəki qış
sessiyasında Azərbaycanın bu qurum qarşısında
götürdüyü öhdəliklərin yerinə yetirilməsi
ilə bağlı həmməruzəçilər
Pedro Aqramunt və Cozef Debono Qrexin hazırladığı məruzənin
yüksək səs çoxluğu ilə qəbul edilməsi ölkəmizin beynəlxalq miqyasda
artan nüfuzundan xəbər verir. Azərbaycanın Avropa
Şurası qarşısında
götürdüyü öhdəliklərin icrası ilə
bağlı dördillik hesabatı
müsbət qiymətləndirilmiş, heç bir əlavə və dəyişiklik
olmadan qəbul edilmişdir.
Göründüyü kimi, radikal müxalifətin və ermənipərəst hüquq müdafiəçilərinin prezident seçkisi ilində beynəlxalq təşkilatlarda ölkəmiz haqqında mənfi rəy formalaşdırmaq cəhdləri iflasa uğradı. Onların yalanları bu dəfə də ayaq tutmadı. Avropa Şurası Azərbaycan həqiqətlərini olduğu kimi dəyərləndirdi və ölkəmizdə demokratik proseslərin inkişafının yüksələn xətt üzrə inkişaf etdirildiyi bir daha təsdiqləndi. Həmçinin insan hüquq və azadlıqlarının yüksək səviyyədə qorunması da öz əksini tapdı. Bütün bunlar Azərbaycanın beynəlxalq aləmdəki reytinqinin getdikcə artmasından xəbər verir.
Əliqismət Bədəlov
Xalq qəzeti.- 2013.- 29 yanvar.- S. 3.