Soydaşımızın yaradıcılığı türk dünyasında yüksək qiymətləndirilir

Bu gün beynəlxalq aləmdə terrorizm, separatçılıq, korrupsiya, rüşvətxorluq, məmur özbaşınalığı, narkomaniya və bu kimi digər halların çoxalması, eləcə də bəşəri dəyərlərə bilərəkdən və ya nadanlıq üzündən ağır zərbələr vurulması günün reallıqları sırasındadır. Çox təəssüf ki, bir çox hallarda ən tanınmış insanlar belə bu fəlakətlərin törətdiyi fəsadlara biganə qalır, onlara qarşı aparılan mübarizəyə dəstək vermirlər.

Təbii ki, hamı belə deyil və həmin mənfiliklər həmişə laqeydliklə qarşılanmır. Tarixin bütün dönəmlərində olduğu kimi indi də dünyanın müxtəlif yerlərində aqil siyasətçilər və yaradıcı ziyalılar meydana çıxır və onlar istənilən mübarizəni bilavasitə sözün qüdrəti, müdrik fikirin təsiri ilə aparmaq istəyirlər. Sözün qalib gəlməsi isə tamamilə təbiidir. Bu baxımdan müasir kəlam məktəbinin yaradıcılarından biri, azərbaycanlı yazıçı-filosof Hacı Fərhad Mirzənin atdığı addımlar daha çox uğurlar qazanır. Bu soydaşımızın dünyadakı eybəcərlikləri kəlamın gücü ilə islah etmək istəyi artıq həm Avropada, həm də Asiyada mütəxəssislər tərəfindən böyük maraqla qarşılanır. Onun cəmiyyət həyatının bütün sahələrinə aid olan minlərlə kəlamı Azərbaycan, ingilis, rus, türk və alman dillərində artıq bütün dünyanı dolaşmaqdadır.

Qardaş Türkiyə Cümhuriyyətində fəaliyyət göstərən kütləvi informasiya vasitələrinin, fond, akademiya və dərnəklərin, eləcə də ayrı-ayrı alimlərin Hacı Fərhad Mirzə yaradıcılığına xüsusi diqqətlə yanaşması, onu yüksək qiymətləndirməsi də bir həqiqətdir. Türk Dünyası Araşdırmaları Beynəlxalq Elmlər Akademiyası Hacı Fərhad Mirzənin “Kəlamlar” kitabını Azərbaycandan kənarda nəşr etdirən ilk beynəlxalq elmi təşkilat olmuşdu. Ondan sonra Rusiya Federasiyası Yazıçılar İttifaqı, Avropa Təbiyyat Elmləri Akademiyası, İtaliya Sosial- İqtisadi Akademiyası, Avrasiya Yazıçılar Liqası və bir çox başqa yaradıcı qurumlar “Kəlamlar”la maraqlanmış, soydaşımızın yaradıcılığına yüksək qiymət vermişdilər. Son günlər isə Türkiyədən bu istiqamətdə daha bir neçə xəbər eşitdik.

Ankaradan aldığımız xəbərdə bildirilir ki, yaxın günlərdə qardaş ölkənin paytaxtında “Dünya Söz Akademiyası”nın təşkilatçılığı ilə “ Birinci Ankara Kəlam Günləri” adlı beynəlxalq elmi-fəlsəfi tədbir keçiriləcək. Xatırladaq ki, bu akademiyanı təkcə Türkiyədən olan alimlər deyil, bütövlükdə türk dünyasını təmsil edən 77 nəfər görkəmli alim və yaradıcı ziyalılar təsis etmişlər. Akademiyanın rəhbəri, professor Xeyrətdin İvgin mətbuat təmsilçiləri ilə söhbəti zamanı qeyd edib ki, biz “DÜSA” nı formalaşdırarkən azərbaycanlı yazıçı-filosof Hacı Fərhad Mirzənin yaratdığı kəlam məktəbinin təsirlərindən bəhrələndiyimizi açıq etiraf etmişdik. Odur ki, “Birinci Ankara Kəlam Günləri”nin türk dünyasının bütün ölkələrindən olan çoxsaylı qonaqları arasında ən nüfuzlu qonaqlarından biri məhz Hacı Fərhad Mirzə olacaq.

Qeyd edək ki, adıçəkilən tədbirdə müasir dünyada kəlamların əhəmiyyəti, “Kəlamlar” kitabının dünyanın bir çox kitab sərgilərində uğur qazanmasının səbəbləri, kəlamın mövzu əhatəsi barədə ətraflı söhbət açılacaq, kəlamlar səsləndiriləcək, Hacı Fərhadın kəlamları əsasında yazılmış şeirlər oxunacaq, bəstələnmiş musiqilər təqdim olunacaq və mükafatlandırma mərasimləri keçiriləcək. Xatırladaq ki, “Dünya Söz Akademiyası”nın nizamnaməsində xüsusi mükafatlandırma mərasimləri nəzərdə tutulur ki, bu tədbirlər də görkəmli alimlərdən ibarət münsiflər heyətinin geniş müzakirələrindən sonra reallaşdırılır.

Ancaq adıçəkilən tədbirə qədər də türk ziyalıları yuxarıda qeyd etdiyimiz kimi Hacı Fərhad Mirzənin yaradıcılığına xüsusi diqqət ayırırlar. Məsələn, yazıçı-alim Çələbi Öztürkün ədəbiyyat, mədəniyyət, incəsənət və təhsil sahələrini əhatə edən “Ədəbiyyat üfüqü” internet saytında (www.edebiyatufku.com) verilmiş “Hacı Ferhat Mirza ve Kelamlar” adlı geniş elmi-ədəbi yazısı Türkiyə ədəbi ictimaiyyəti tərəfindən böyük maraqla qarşılanmış, kifayət qədər əks-səda yaratmışdır. Məqalədə göstərilir ki, Hacı Fərhad Mirzə müdrik kəlam və dərin fəlsəfi düşüncə sahibidir. Maraqlıdır, bu ifadə 2013-cü il yanvarın ikinci ongünlüyündə Türkiyədə qələmə alınıb. Elə həmin günlərdə Azərbaycan Respublikası Ağsaqqallar Şurasının Hacı Hərhad Mirzəyə ünvanladığı “Fəxri fərman”da da qeyd edilir: “Müdrik kəlamlı, fəlsəfi düşüncəli, incə duyğulu, vətənpərvər xeyriyyəçi Hacı Fərhad Mirzəyev vətənimiz və xalqımız üçün etdiyi xeyirxah əməllərə görə təltif olunur.” Görünür, kəlam müəllifimiz haqqında hamının səsləndirdiyi qiymətləndirmələr üst-üstə düşür. Uğurlar olsun.

Şəkildə : Hacı Fərhad Mirzə İstanbulda keçirilən beynəlxalq simpoziumlardan birində.

Natəvan İSMAYILLI

Xalq qəzeti.- 2013.- 31 yanvar.- S. 6.