Rasim Müseyib oğlu Dadaşov

Respublikanın neft-kimya sənayesi işçilərinə ağır itki üz vermişdir.

Qocaman neftçi, ölkənin neft-kimya sənayesinin tanınmış simalarından biri, bacarıqlı mütəxəssis və alim Rasim Müseyib oğlu Dadaşov 2013-cü il yanvarın 29-da ömrünün 81-ci ilində vəfat etmişdir.

R.Dadaşov 1933-cü ildə Bakı şəhərində anadan olmuşdur. Orta məktəbi bitirdikdən sonra Azərbaycan Sənaye İnstitutunun (indiki Azərbaycan Dövlət Neft Akademiyası) geoloji-kəşfiyyat fakültəsində təhsil almışdır. İnstitutu 1957-ci ildə bitirmiş, əmək fəaliyyətinə “Gürganneft” Neft Mədənləri İdarəsində (indiki “Neft Daşları” NQÇİ) neft və qaz quyularının tədqiqatçı operatoru kimi başlamış, sonra isə quyuların istismarı üzrə mühəndis, geoloji şöbənin geoloqu vəzifələrində çalışmışdır.

1964-1966-cı illərdə Rasim Dadaşov Çilov adasında “Cənub” neft-qaz mədəninin baş geoloqu, 1966-1981-ci illərdə Bakı arxipelaqında “Səngəçal-Duvannı-Bulla adası” neft-qaz yataqları bazasında yeni yaradılmış N.Nərimanov adına NQÇİ-nin geoloji şöbəsinin rəisi və baş geoloqu olmuşdur. Onun Neft Daşlarında topladığı zəngin təcrübə, yenilikçi və əsl tədqiqatçı geoloq kimi istedadı məhz Çilov adasında və N.Nərimanov adına NQÇİ-də özünü parlaq şəkildə göstərmişdir.

1981-ci ildə Rasim Dadaşovun həyatında və neftçi kimi fəaliyyətində əlamətdar hadisə baş vermişdir. Ümummilli liderimiz Heydər Əliyevin bilavasitə təşəbbüsü ilə o, Azərbaycan SSR Nazirlər Sovetində neft, neft emalı, neft-kimya və kimya şöbəsinin müdiri vəzifəsinə təyin edilmişdir. Bu vəzifədə R.Dadaşov özünü yüksək ixtisaslı mütəxəssis kimi göstərmişdir. O, respublikamızda yeni neft və qaz yataqlarının işlənilməsi, yeni neft və qaz kəmərlərinin çəkilməsi, Heydər Əliyev adına Bakı Dərin Özüllər Zavodunun tikilməsi, dəniz neftçilərinin xüsusi texnika ilə təmin olunması, yeni kompressor stansiyalarının və qaz anbarlarının istifadəyə verilməsi kimi mühüm layihələrin həyata keçirilməsində yaxından iştirak etmişdir.

Rasim Dadaşov müstəqil Azərbaycanın Nazirlər Kabinetində neft və kimya şöbəsinə rəhbərlik edəndə də əsl gənclik həvəsi ilə çalışmış, ulu öndərimiz Heydər Əliyev tərəfindən işlənib hazırlanmış və Prezident İlham Əliyev tərəfindən uğurla davam etdirilən yeni neft strategiyasının, “Əsrin müqaviləsi”nin həyata keçirilməsinin fəal iştirakçısı olmuşdur.

Elmi araşdırmalarına hələ Neft Daşlarında işləyərkən başlamış R.Dadaşov sonralar dissertasiya müdafiə etmiş, geologiya-mineralogiya elmləri namizədi alimlik dərəcəsinə layiq görülmüşdür. O, 100-dən çox elmi işin, bir çox ixtiraların və səmərələşdirici təkliflərin müəllifi olan nüfuzlu elm xadimi kimi də tanınmışdır. Xəzər dənizində bir sıra neft-qaz yataqlarının kəşf edilməsində onun mühüm xidmətləri olmuşdur. Axtarış-kəşfiyyat quyularının qazılmasında, neft və qaz-kondensat yataqlarının işlənilməsində, məhsuldar layların seçilməsində və öyrənilməsində onun təklif və tövsiyələrinə neftçilərimiz bu gün də müraciət edirlər.

R.M.Dadaşovun ölkəmizin neft-kimya sənayesinin inkişafındakı çoxillik xidmətləri keçmiş SSRİ-nin “Xalqlar dostluğu” və müstəqil Azərbaycanın 3-cü dərəcəli “Vətənə xidmətə görə” ordenləri ilə, medallarla, Azərbaycan SSR Ali Soveti Rəyasət Heyətinin, Azərbaycan Respublikası Dövlət Neft Şirkətinin fəxri fərmanları, “SSRİ neftçıxarma sənayesi əlaçısı” döş nişanı, Ümumittifaq Xalq Təsərrüfatı Nailiyyətləri Sərgisinin bürünc medalı ilə qeyd olunmuşdur.

2011-ci ildə pensiyaya çıxmış 2-ci dərəcəli dövlət müşaviri Rasim Dadaşov öz həmkarları ilə tez-tez əlaqə saxlayır, respublikamızda sənayenin neft və kimya sahələrinin işini diqqətlə izləyir, ümumi işimizə öz məsləhətləri ilə kömək etməyə çalışırdı.

Səmimi, təvazökar və qayğıkeş insan Rasim Dadaşovun əziz xatirəsi onu tanıyanların, ölkəmizin neft və kimya sənayesi işçilərinin qəlbində daim yaşayacaqdır.

Allah rəhmət eləsin!

Rövnəq ABDULLAYEV,

Xoşbəxt YUSİFZADƏ,

Əsgər ASLANOV,

Rəhman QURBANOV,

Davud MƏMMƏDOV,

Süleyman QASIMOV

Xalq qəzeti.- 2013.- 31 yanvar.- S. 4.