Səbail rayonunda ilin birinci rübünün yekunları sevindiricidir

Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin bugünlərdə keçirilən iclasında dövlət başçısının nitqindən irəli gələn vəzifələr Səbail Rayon İcra Hakimiyyəti Başçısı yanında Şuranın geniş iclasında ətraflı müzakirə olunmuşdur. Toplantıda ilin I rübünün sosial-iqtisadi yekunları da nəzərdən keçirilmişdir.

İclası giriş sözü ilə açan Səbail Rayon İcra Hakimiyyətinin başçısı Asif Əsgərov Prezident İlham Əliyevin sədrliyi ilə Nazirlər Kabinetinin 2014-cü ilin birinci rübünün sosial-iqtisadi inkişafının yekunlarına həsr olunmuş iclası barədə ətraflı məlumat verərək qeyd etmişdir ki, bu dövrdə ölkə iqtisadiyyatı 2,5, qeyri-neft sektoru 8,8, orta əmək haqqı 7, əhalinin banklardakı əmanətləri 20 faizdən çox artmışdır. İnflyasiya cəmi 2 faiz təşkil etmiş və əhalinin gəlirləri bu göstəricini 2 dəfədən çox üstələmişdir. Ölkənin valyuta ehtiyatları 53 milyard dollar təşkil edir ki, bu da dövlət başçısı İlham Əliyevin apardığı uğurlu daxili və xarici siyasətin nəticəsidir.

Hesabat dövründə Səbail rayonunda görülən işlərdən danışan Asif Əsgərov bildirmişdir ki, ilin ilk üç ayı ərzində rayonun sənaye müəssisələrində 5 562,8 milyon manatlıq sənaye məhsulu istehsal edilmiş, nəqliyyat müəssisələri 115,5 milyon manatlıq, rabitə müəssisələri 101,7 milyon manatlıq xidmətlər göstərmişdir.

Bütün maliyyə mənbələri hesabına əsas kapitala yönəldilən investisiya 1203,9 milyon manat olmuşdur ki, bu da keçən ilin müvafiq dövrünə nisbətən 16 faiz çoxdur. Tikinti-quraşdırma işlərinə yönəldilmiş investisiyanın həcmi 553,7 milyon manat olmuşdur ki, bu da əvvəlki ilin müvafiq dövrü ilə müqayisədə 54,7 faiz çoxdur. Əhaliyə 56 milyon manatlıq və ya ötən ilin eyni dövründən 22,7 faiz çox istehlak malları satılmış, 67 milyon manatlıq pullu xidmət göstərilmişdir ki, bu da 2,7 faiz çoxdur.

Səbail rayonu üzrə daimi əhalinin sayı 100650 nəfər olmuş, əlavə olaraq rayonda 10615 nəfər məcburi köçkün məskunlaşmışdır. Rayonda çalışan işçilərin sayı 112407 nəfər, orta aylıq əmək haqqının məbləği isə 905,1 manat olmuşdur. 2014-cü ilin I rübündə Səbail rayonu ərazisində 537 daimi iş yeri açılmışdır.

2 saylı şəhər poliklinikasında, “Turac” uşaq bağçasında, Bibiheybət qəsəbə mədəniyyət evi və kitabxanasında aparılan əsaslı təmir-yenidənqurma işləri başa çatdırılmış, 20-ci sahə ərazisində 109 saylı 35 kilovoltluq yeni yarımstansiyanın və Badamdar qəsəbəsində yeni idman kompleksinin və 3 ədəd yeni su anbarının tikintisi davam etdirilir.

Hazırda rayon ərazisində Su İdmanı Sarayının, Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, “Alov qüllələri” kompleksinin, Oksford məktəbi üçün yeni tədris korpusunun, “Cənub” mehmanxanasının yerində 7 mərtəbəli yeni otelin, Qurban Abbasov küçəsində yeni İş mərkəzinin, 20-ci sahədə Səbail Rayon Prokurorluğunun yeni binasının, Əhəd Yaqubov küçəsində Müasir İstedadlar məktəbi üçün idman və yataqxana kompleksinin, 9 saylı Xəzinədarlıq İdarəsi üçün yeni binanın, Badamdar qəsəbəsində xəstəxananın, Əhəd Yaqubov küçəsində kütləvi informasiya vasitələri işçiləri üçün daha bir binanın tikintisi, Bayıl dairəsində genişmiqyaslı abadlıq işləri, dövlət başçısının tapşırıqlarına əsasən Dənizkənarı Milli Parkın Bibiheybət qəsəbəsinə kimi genişləndirilməsi və burada yeni istirahət güşələrinin yaradılması, Neftçilər prospektində İdman Oyunları Sarayının əsaslı təmiri davam edir. Şəhərin mərkəzi və Bayıl yaşayış ərazisində yerləşən çoxmərtəbəli yaşayış binalarının fasadlarının təmiri və üzlənməsi işləri də davam etdirilir.

Rayonun təsərrüfat xidmətləri də bir sıra işlər həyata keçirmişdir. Mənzil-Kommunal Təsərrüfatı Birliyi tərəfindən bir sıra binalara gedən istilik xətlərində, bir sıra binaların dam örtüyündə təmir işləri aparılmış, su və kanalizasiya xətləri dəyişdirilmiş, mərkəzdəki bəzi binaların fasadı təmir olunmuş, rəngləmə işləri və gündəlik abadlıq-təmizlik işləri görülmüşdür.

Badamdar qəsəbəsində hər həftənin şənbə günləri kənd təsərrüfatı məhsulları yarmarkası təşkil edilir.

Elektrik Təchizatı və Satış İdarəsi, Qaz İstismar Sahəsi, Sukanal Departamenti sakinlərin elektrik enerjisi, təbii qaz, içməli su ilə təminatının yaxşılaşdırılması üçün bir sıra tədbirlər həyata keçirmiş, bu istiqamətlərdə narazılığa səbəb ola bilən hallara yol verilməmişdir.

Daha sonra bildirilmişdir ki, Əhalinin Sosial Müdafiəsi Mərkəzinə ünvanlı sosial yardım almaq üçün 398 ailə (1578 ailə üzvü) müraciət etmiş, onların sənədlərinə müvafiq qaydada baxılaraq orta hesabla 122 manat sosial yardım təyin olunmuşdur. Dövlət Sosial Müdafiə Fondu Səbail rayon şöbəsində qeydiyyatda olan 13116 nəfər təqaüdçüyə 3 ay ərzində 9.651,7 min manat təqaüd və müavinət ödənilmişdir. Məşğulluq Mərkəzi tərəfindən 225 nəfər işaxtaran vətəndaş daimi işlə təmin olunmuşdur.

Hesabat dövründə Səbail Rayon İcra Hakimiyyəti tərəfindən bir sıra tədbirlər keçirilmişdir. Novruz bayramı ərəfəsində ictimaiyyət nümayəndələri ənənəvi olaraq rayonun hamilik etdiyi, cəbhənin ön xəttində yerləşən hərbi hissənin şəxsi heyətinə ümumtəhsil məktəbləri şagirdlərinin bayram sovqatlarını çatdırmış, incəsənət ustaları onlara böyük bayram konserti vermişdir. 5530 aztəminatlı ailəyə də bayram payları verilmişdir. Ümumilikdə isə 3 ay ərzində RİH tərəfindən hədiyyə ilə təltif olunanların, müxtəlif yardım, ərzaq bağlamaları alanların sayı 6450 nəfər olmuşdur. Müzakirələrdə RİH başçısının müavini Eldar Ağayev, Rayon Gigiyena və Epidemiologiya Mərkəzinin direktoru Sara Həsənova, MKTB-in rəisi Elbrus Əhmədov, 236 saylı orta məktəbin direktoru Xanlar İmaməliyev, Qaz İstismar Sahəsinin rəisi Sadıx Rəhimov və başqaları çıxış etmiş, ayrı-ayrı sahələrdə qazanılmış uğurlardan, həllivacib məsələlərdən söz açmışlar.

İclasda əldə olunmuş nailiyyətlərlə yanaşı, problemlər, çatışmazlıqlar və onların aradan qaldırılması yolları, nəzərdə tutulan abadlıq tədbirləri, vətəndaşların müraciətləri ilə bağlı görülən işlər də müzakirə olunmuş, məsul şəxslərə konkret tapşırıqlar verilmişdir.

R.TAHİR

Xalq qəzeti.- 2014.- 17 aprel.- S. 4.