Nizami rayonu: humanitar aksiyalar uğurla həyata keçirilir

Nizami rayonu üzrə əhalinin tibbi müayinədən keçirilmə vəziyyətinə dair məruzə ilə çıxış edən rayon icra hakimiyyəti başçısının müavini Gülnaz İsrafilova bildirdi ki, ölkəmizdə əhalinin sağlamlığının qorunması dövlətimizin sosial siyasətinin əsas prioritetlərindən biridir. Dövlət başçısı İlham Əliyevin fevralın 17-dən may ayının 1-dək bütün ölkə vətəndaşlarının pulsuz tibbi müayinədən keçirilməsi ilə bağlı tapşırığını xəstəliklərin profilaktikası istiqamətində atılan uğurlu addımlardan biri kimi dəyərləndirən natiq qeyd etdi ki, bu humanitar aksiya xəstəliklərin erkən aşkara çıxarılması baxımından çox vacibdir və belə tədbirlərin keçirilməsi ölkə rəhbərinin xalqımızın sağlamlığının qorunması üçün göstərdiyi qayğının bariz nümunəsidir.

Qeyd olundu ki, dövlət başçısının tapşırığının icrası ilə əlaqədar Nizami Rayon İcra Hakimiyyətində operativ tədbirlər görülmüş, başçının yanında idarə, təşkilat, səhiyyə müəssisələri, xidmət sahələri rəhbərlərinin və rayon fəallarının iştirakı ilə keçirilən müşavirədə səhiyyə müəssisələrinin rəhbərlərinə tibbi avadanlıqların işlək vəziyyətdə olması, tibbi heyətin hazırlığı barədə tapşırıqlar verilmişdir.

G. İsrafilova dedi ki, sakinlərin tibbi müayinəsinin yüksək səviyyədə və mütəşəkkil təşkili məqsədilə müvafiq komissiya yaradılmış, xüsusi qrafik tərtib edilmiş, rayon üzrə 18 yaşdan yuxarı 115 mindən çox sakinin bu kampaniyadan faydalanması nəzərdə tutulmuşdur. Bu məqsədlə 18 və 32 nömrəli birləşmiş şəhər xəstəxanalarında, eləcə də 26 nömrəli şəhər poliklinikasında bütün lazımi hazırlıq işləri görülmüşdür. 11 nömrəli Birləşmiş Şəhər Xəstəxanasında yenidənqurma işləri aparıldığından isə həmin tibb müəssisəsi hazırda öz fəaliyyətini müvəqqəti olaraq 32 nömrəli Birləşmiş Şəhər Xəstəxanasında davam etdirir və ərazi üzrə sakinlərin müayinəsi burada aparılır.

Bildirildi ki, fevralın 17-dən martın 31-dək rayonun 18 yaşdan yuxarı 40151 nəfər əhalisi icbari tibbi müayinəyə cəlb olunmuş, onlardan 31991 nəfəri poliklinika və xəstəxanalarda, 8160 nəfəri isə evlərdə müayinədən keçmişlər. Bu müddət ərzində 3648 nəfər rentgen, 7508 nəfər laborator, 3815 nəfər ultrasəs, 3381 nəfər isə elektrokardioqram müayinəsindən keçmiş, həmçinin 2273 nəfər ambulator, 133 nəfər isə stasionar müalicəyə qəbul olunmuşdur. Rayondakı səhiyyə müəssisələrinin gündəlıik qəbul gücü 950 nəfər təşkil etsə də, bu humanitar aksiyaya start verildiyi vaxtdan etibarən hər gün orta hesabla1293 nəfər tibbi müayinədən keçmişdir ki, bu da tədbirin mütəşəkkil təşkilinin nəticəsi kimi qiymətləndirilə bilər.

Gündəlikdə duran ikinci məsələ – rayonun ümumtəhsil məktəblərində ulu öndər Heydər Əliyev irsinin öyrənilməsi vəziyyətinə dair məruzə ilə rayon icra hakimiyyəti başçısı aparatının ictimai-siyasi və humanitar məsələlər şöbəsinin müdiri Əli Axundov çıxış etdi. Qeyd olundu ki, cari ilin mart-may ayları ərzində ümumtəhsil məktəblərinin XI sinif şagirdlərinə dəsrdənkənar vaxtlarda iki akademik saat ərzində müasir Azərbaycan tarixinin daha səmərəli öyrənilməsi məqsədilə Təhsil Nazirliyi tərəfindən müəyyən edilmiş “Ulu öndər Heydər Əliyev müstəqil Azərbaycanın qurucusu və memarıdır” və “Ümummilli lider Heydər Əliyevin ideyaları müasir Azərbaycanın sosial-iqtisadi inkişafının təminatçısıdır” mövzuları üzrə əlavə açıq dərslərin tədris olunması nəzərdə tutulmuşdur. Belə bir əhəmiyyətli addımın atılmasında məqsəd isə ölkəmizin müasir tarixinin şagirdlər tərəfindən hərtərəfli öyrənilməsinə maraq oyatmaqla onlarda fəal həyat mövqeyinin, vətəndaşlıq və vətənpərvərlik hisslərinin daha da gücləndirilməsinə etibarlı zəmin yaratmaqdan ibarətdir.

Natiq dedi ki, mart ayında Yeni Azərbaycan Partiyası Nizami rayon təşkilatının Heydər Əliyev lektoriya zalı və 220 nömrəli məktəb-liseyin akt zalında keçirilmiş açıq dərslərə rayonun 23 ümumtəhsil məktəbinin 1581 şagirdi ilə yanaşı, Füzuli, Zəngilan, Ağdam, Cəbrayıl, Qubadlı və Laçın rayonlarının 9 köçkün məktəbinin 94 şagirdi də cəlb edilmişdir. Rayonun 15 məktəbindən tədrisə cəlb edilən 21 nəfər qabaqcıl tarix müəllimi tərəfindən birinci dərslərdə ulu öndərin həyat və fəaliyyətinin müxtəlif aspektləri geniş təhlil olunmuş, müstəqil Azərbaycan dövlətinin qurucusu və memarı Heydər Əliyevin tarixi xidmətləri barədə şagirdlərə ətraflı məlumat verilmiş, ikinci saatlarda isə sənədli filmlər nümayiş etdirilmişdir. Dərslərdə ölkə qtisadiyyatının yenidən qurulması, kənd təsərrüfatının dirçəlişi, peşəkar ordunun yaradılması, uğurlu siyasi kursun həyata keçirilməsi, səhiyyə, elm, təhsil, mədəniyyət, incəsənət sahələrinin tərəqqisi, hüquqi və demokratik dövlət quruculuğunun ulu öndər Heydər Əliyevin adı və fəaliyyəti ilə bilavasitə bağlı olması şagirdlərə bir daha izah edilmiş, müxtəlif mövzularda aparılan mühazirələr gənclər tərəfindən böyük maraqla qarşılanmışdır. Bildirildi ki, gənclərin dünyagörüşünün formalaşdırlmasında və mənəvi tərbiyəsində mühüm rol oynayacaq bu dərslərin yüksək səviyyədə təşkili üçün rayon icra hakimiyyəti tərəfindən ciddi nəzarət təmin edilmiş, aparatın əməkdaşları bu mühüm tədbirə cəlb olunmuşlar.

Şura iclasında çıxış edən digər natiqlər müzakirə olunan məsələlərin aktuallığını qeyd etməklə yanaşı, bu sahədə həyata keçirdikləri tədbirlər haqqında ətraflı məlumat verdilər.

Nizami Rayon İcra Hakimiyyətinin başçısı Tahir Budaqov iclasa yekun vuraraq ölkə başçısının tapşırığı ilə əhalinin sağlamlığının qorunması məqsədilə reallaşdırılan aksiyanın yüksək səviyyədə başa çatdırılmasının vacibliyini, eləcə də ulu öndər Heydər Əliyevin irsinin yetişməkdə olan gənc nəslə çatdırılmasının xüsusi əhəmiyyət daşıdığını diqqətə çatdırdı, hər iki məsələ ilə bağlı konkret tövsiyə və tapşırıqlarını verdi.

Tədbirdə Milli Məclisin deputatları Sədaqət Vəliyeva və Rasim Musabəyov iştirak edirdilər.

Mirbağır YAQUBZADƏ

Xalq qəzeti.- 2014.- 5 aprel.- S. 5.