Nizami rayonunda məktəblilərin “Heydər Əliyev və müasir Azərbaycan” mövzusunda rəsm müsabiqəsi keçirilmişdir

Ümummilli lider Heydər Əliyevin anadan olmasının 91-ci ildönümü münasibətilə Nizami Rayon İcra Hakimiyyəti, Yeni Azərbaycan Partiyası Nizami rayon təşkilatı və Uşaq-Gənclər Yaradıcılıq Mərkəzinin məktəblilər arasında birgə keçirdikləri “Heydər Əliyev və müasir Azərbaycan” mövzusunda rəsm müsabiqəsinə yekun vurulmuşdur.

Qaliblərin mükafatlandırılması mərasimində YAP Nizami rayon təşkilatının aparat rəhbəri Ramil Vəlibəyov bildirmişdir ki, müsabiqənin keçirilməsində məqsəd ümummilli lider Heydər Əliyevin Azərbaycan xalqı və dövləti qarşısında misilsiz xidmətlərinin, ulu öndərin ideya və əməllərini Prezident İlham Əliyevin uğurla davam etdirməsinin uşaq və yeniyetmə yaradıcılığında bədii əksinə yardımçı olmaqdır.

Nizami Rayon Uşaq-Gənclər Yaradıcılıq Mərkəzinin direktoru Lalə Qəti qeyd etmişdir ki, rəsm müsabiqəsi şagirdlərimizin ulu öndər Heydər Əliyevə sonsuz sevgilərini, ümummilli liderin çağdaş nəsillərə ən böyük yadigarı olan müasir Azərbaycanın həqiqətlərini necə təsəvvür etdiklərini bədii lövhələrlə üzə çıxartmışdır. Məktəblilər gələcəklə bağlı arzularını da fırça ilə ifadə etmişlər.

Sonra məktəblilərin rəsm işlərindən ibarət ekspozisiyaya baxış keçirilmiş, müsabiqənin qalibləri müəyyənləşdirilmişdir.

I, II və III yerə çıxanlar mükafatlandırılmış, iştirakçı şagirdlərə həvəsləndirici hədiyyələr təqdim olunmuşdur.

Xalq qəzeti.- 2014.- 19 aprel.- S. 2.