Gədəbəy: Sərhəd kəndlərindən gedən yoxdur, ora gələn var

Şınıx, Fərzalı, Düzrəsullu, Çayrəsullu, Təkyemişan, Rəhimli, Göyəmli, Qasımağalı, Bəydəmirli, Turşsu... Gədəbəyin bir-birindən gözəl, səfalı, dağlar qoynuna sığınmış kəndləridir. Hamısı da bədnam qonşularımızla sərhəddə yerləşir. Hələ bu da hamısı deyil. Bütövlükdə, 27 kənd mənfur düşmənlə üzbəüz dayanıb. Sərhədin uzunluğu isə 120 kilometrdən çoxdur.

Qürur hissi duyulur ki, adlarını çəkdiyim kəndlərdən bir nəfər də olsun evini-eşiyini tərk etməyib, heç hara köçüb getməyib. Əksinə, bu kəndlərə gələnlərin sayı onlarcadır. Bir fikir verin. Mutudərə və Qasımağalı kəndlərində bir neçə il qabaq evlərin düşmənlər tərəfindən yandırılmasına baxmayaraq, heç kim doğma elini-obasını tərk etməyib. Bu kəndlərdə yandırılmış evlər müvafiq qurumlar və digər təşkilatlar tərəfindən bərpa olunmuşdur. Mutudərədə 42, Qasımağalı kəndində isə 37 fərdi ev əvvəlkindən də yaxşı vəziyyətə gətirilmişdir. Burada məktəb, digər sosial obyektlər tikilib istifadəyə verilmişdir.

– Belə dövləti, belə Prezidenti olan kəs də kəndi tərk edərmi? -deyə Qasımağalı kənd sakini Fərman Eyyubov sualımıza belə cavab verdi. – Yaşım 90-ı keçib. Dəhşətli hadisələrin, iki müharibənin canlı şahidiyəm. Amma bizi heç nə sarsıtmadı. Qasımağalılar elə həmin qasımağalılardır. Kənd alınmaz səngər kimi, daha mübariz olub, daha da gözəlləşib, abadlaşıb. Erməni kimdir ki, onun qarşısından qaçaq. Bir o tərəfə baxın, evləri bom-boşdur, özləri qaçırlar. Çünki həm qorxurlar, həm də şəraitləri yoxdur, acından ölürlər. Amma bizim kəndlərə baxın, bura çəkilən yol onların prezidentlərinin hər gün gedib-gəldiyi yoldan genişdir, hamardır, rahatdır.

...Hansı kənddə olduqsa, bizə konkret faktlar, rəqəmlər söylədilər. Məsələn, Şınıx kəndindən son iki ildə bir nəfər də olsun kənddən getməyib. Amma 6 nəfər Şınıxa köçüb gəlib, özünə ev -eşik qurub. Yaxud, Çayrəsullu kəndinin 1000 nəfərə yaxın sakini olduğu halda, bir nəfər də olsun kəndi tərk etməyib. Əksinə , əlavə 4 nəfər burada yaşamağa üstünlük verib.

Düzrəsullu kəndi də onun kimi. Əhalisinin sayı 600 nəfəri keçən kənddə son iki ildə 7 nəfər ümumi sahəsi 110 kvadratmetr olan fərdi ev tikdirib. Əhalinin sayı yeni gələnlərin hesabına daha 4 nəfər artıb.

İsalı kəndinin sakini 75 yaşlı Eyvaz Mustafayev, Dördlər kəndinin sakini, 80 yaşlı Fikrət Allahverdiyev, Cücənli ağsaqqalı Qara Mehdiyev və başqaları söhbət zamanı bu kəndlərə göstərilən diqqət və qayğıdan danışdılar, ölkə Prezidentinə, rayonun müvafiq strukturlarının rəhbərlərinə öz dərin minnətdarlıqlarını bildirdilər. Dedilər ki, onlarda dövlətə, dövlətçiliyə, Prezidentə böyük inam var. Gədəbəyin sərhəd kəndlərinin siması hər gün dəyişir, desək, – yanılmarıq. Qaz, elektrik enerjisi kimi problemlər, demək olar ki, həll olunub. Elə il, ay olmur ki, hansısa yolun və yaxud körpünün açılışı olmasın. Ölkə Prezidentinin müvafiq sərəncamı ilə uzunluğu 56 kilometr olan Gədəbəy-Novosaratovka-Qaravəllər avtomobil yolunun tikintisinə vəsait ayrılmışdır. Orada işlər artıq sona çatmaq üzrədir. Həmin avtomobil yolu üzərində Novosaratovka kəndi ərazisində, Fındıqlı çayı üzərində mühüm strateji əhəmiyyətli nəhəng körpü tikilmiş və istifadəyə verilmişdir. Hazırda Çayrəsullu kəndi ərazisində də ikiaşırımlı körpünün tikintisi aparılır. Bundan əlavə, sahibkarların və digər maliyyə mənbələrinin hesabına Arabaçı kəndində dəmir körpü, Düzrəsullu kəndində həkim məntəqəsi və digər sosial obyektlər də tikilib istifadəyə verilmişdir. Əhalinin elektrik enerjisinə olan tələbatını tam ödəmək üçün Düzrəsullu kəndində 35/10 kilovoltluq yarımstansiya tikilmiş və artıq istismara buraxılmışdır. Bu il digər sərhəd kəndi olan İsalıda inşa olunan 180 şagird yerlik yeni məktəb binasının tikintisi başa çatdırılacaqdır.

Həm sərhəd kəndlərinin, həm də bütövlükdə Gədəbəyin hər bölgəsində aparılan abadlıq-quruculuq işləri elə geniş vüsət alıb ki, bu ucqar dağ rayonunu tanımaq olmur. Arıxdam kəndində 480 şagird yerlik tam orta məktəb, Gədəbəy şəhərində Uşaq Yaradıcılıq Mərkəzi, Heydər Əliyev Parkında möhtəşəm amfiteatr, ayrı-ayrı küçə və xiyabanlar, yeni yollar, digər sosial obyektlər bu il istifadəyə verilmiş tikililər sırasındadır. Bir çox nazirlik və baş idarələrin rayondakı təşkilatları üçün bir-birindən gözəl inzibati binalar tikilir və tezliklə istifadəyə veriləcəkdir.

...Sərhəd kəndlərində olarkən adamların ruh yüksəkliyi, yerli icra orqanlara olan inamı diqqətimizi daha çox cəlb etdi. Dedilər ki, elə ay olmur ki, rayon icra hakimiyyətinin başçısı Ramiz Yediyarov bizimlə görüşüb söhbət etməsin, müraciətlərimizi dinləməsin. Problemlərimizin bir çoxunu elə yerindəcə həll edir.

Rayon icra hakimiyyəti başçısının təkcə bu ilin aprel ayında Düzrəsulluda, mayda Göyəllidə, iyunda Mormor və Çayrəsulluda, avqustda Qaravəllilərdə və Göyəllidə keçirdiyi səyyar qəbul–görüşlərin böyük təsiri olub. Ötən ayın 6-da Şınıx zonasının sakinləri ilə Göyəlli kəndində keçirilən görüşdə kənd sakini Firudin İsmayılovun çıxışını olduğu kimi veririk: “Siz bu kəndə gələndə özümüzü daha cəsarətli, inamlı hiss edirik. Bilirik ki, biz rayon mərkəzindən nə qədər uzaq olsaq da, hər gün düşmən gülləsinin səsini eşitsək də, tək deyilik, arxamızda siz varsınız, ölkə Prezidentimiz var, güclü ordumuz var. Buna görə sağ olun. Hər gəlişiniz bizi göylərə qaldırır”.

...Gədəbəy indiyədək düşmənə bir qarış torpaq verməyib. Necə deyərlər, burada onların ağzı yanıb və bir də bu rayonun ərazisinə müdaxiləsi mümkün deyil. Bir də ki, ən ucqarda olan kiçik bir yaşayış yeri belə unudulmur. Bax elə həm də buna görə sərhəd kəndlərindən gedən yoxdur, gələn isə çoxdur.

Hamlet QASIMOV,

“Xalq qəzeti”.- 2014.- 2 sentyabr.- S. 7.