Qazax: Qışa ciddi hazırlıq görülüb

Yenicə istifadəyə verilmiş uşaq bağçasındayıq. Körpə uşaqların səsi bir-birinə qarışıb. Müəllimlər və tərbiyəçilər çalışırlar ki, bu yaxınlarda istifadəyə verilmış, hər cür şəraiti olan bağçanın imkanlarindan maksimum istifadə etsinlər. Otaqlarda müxtəlif oyuncaqlar, tədris vəsaitləri var, yataq şəraitlərinə, yeməkxanalarına, oyun zallarına söz ola bilməz. Bayırda soyuq olmasına baxmayaraq, uşaqlar burada yüngül geyimdədirlər, lap yayda olduğu kimi. Bağçanın özünün ayrıca qazanxanasının olması qışda yaranan problemləri birdəfəlik həll edib.

Qeyd edək ki, rayonda 100 yerlik digər belə bir bağça da yaxın günlərdə istifadəyə veriləcəkdir. Artıq burada tamamlama işləri görülür. Heydər Əliyev Fondunun, şəxsən Mehriban xanım Əliyevanın təşəbbüsü ilə istifadəyə verilən bu bağçalar rayonda həmin sahədə olan problemləri xeyli azaldacaqdır.

Qazaxda qışda yaranan problemlər həyata keçirilən məqsədyönlü və ardıcıl tədbirlər nəticəsində, demək olar ki, tədricən aradan qaldırılır. Bunun ən başlıca səbəblərindən biri Qazaxda təbii qaz probleminin birdəfəlik həll olunmasıdır.İndi elə kənd, qəsəbə yoxdur ki, “mavi yanacaq” almasın. Bir vaxtlar meşələrə, necə deyərlər, qənıim kəsilənlər, indi təbii qazın imkanlarından geninə-boluna istifadə edirlər.

Amma burada da müəssisə rəhbərinin təşkilatçılğı, işə can yandırması başlıca amildir. Yəni magistral xətdə qazın olması, o demək deyil ki, hər hansı bina lazımınca qızdırılır. Məsələn, Azərbaycan Müəllimlər İnstitutu Qazax filialının tədris korpusları və yardımçı binaları hətta qazanxana olmasına baxmayraq, qızdırılmırdı. Qış aylarında auditoriyalarda və fənn kabinetlərində normal dərs keçmək mümkün deyildi. Başlı-başına buraxılan bu iş filialın yeni rəhbərliyi tərəfindən birdəfəlik həll edildi. Qazanxana əsaslı şəkildə təmir olundu, lazımi hissələr gətirildi, avadanlıq alındı, borular dəyişdirildi və artıq ötən qışdan başlayaraq filialda bütün işlər sahmana salındı və filialın binası istiliklə təmin olundu. Nəticədə nizam-intizam gücləndirildi, dərsə davamiyyət yüksəldi, tədrisin keyfiyyəti yaxşılaşdı.

Qeyd etmək yerinə düşər ki hazırda bu elm ocağı rayonda əsl ideoloji mərkəzlərdən birinə çevrilib. Ən müxtəlif tədbirlər,görüşlər, yarışlar, müsabiqələr filialın gündəlik həyat tərzinə çevrilib. Çünki burada həm də şərait var. Filialın binasına daxil olanda hiss edirsən ki, müasir bir tədris ocağındasan. Filialın direktoru, dosent Afaq Qasımova bütün bunlara təşkilatçılıq bacarığı və işə hədsiz məsuliyyəti nəticəsində nail olub.

Qazaxda qışa hazırlığın gedişi rayon icra hakimiyyəti aparatının gündəlik fəliyyətinin tərkib hissəsidir desək,yanılmarıq. Əvvəllər bir sıra yaşayış məntəqələrində təbii qazın olmaması rayon icra hakimiyyətini bəzi təşkilat rəhbərlərinə qarşı nisbətən yumşaq davranması ilə müşahidə edilirdisə, hazırda bu işə tələbkarlıq çox yüksəkdir. Rayon icra hakimiyyətinin başçısı Ayaz Əsgərov hər yığıncaqda, şura iclaslarında təsərrüfat rəhbərlərini bir-bir dinləyir, onların hesabatını tələb edir,lazım gəldikdə operativ kömək göstərir. Sonuncu dəfə daha ciddi söhbət keçən ay, 2014-2015-ci il qış mövsümünə hazırlıqla əlaqədar rayonun müəssisə və təşkilatlarında görülmüş işlərə dair məsələnın şura iclasında müzakirəsi zamanı olub. Nəticə də göz qabağındadır. Rayon icra hakimiyyətinin məsul işçiləri Məmməd Alıyev və Məhəmməd Orucovla birlikdə hansı müəssisəyə,məktəbə, uşaq bağçasına, xəstəxanaya baş çəkdiksə adamların qışa necə ciddi hazırlaşdıqlarının şahidi olduq. Doğrudur, nöqsanlar var,heç də hər yerdə vacib məsələyə eyni məsuliyyətlə yanaşmayıblar. Amma başlıcası odur ki,təsərrüfat rəhbərləri haqlı tənqidlərdən nəticə çıxara biliblər, qışda normal şərait yaratmaq üçün müvafiq tədbirlər görüblər. Onlardan biri də kommunal müəssisələri kombinatının direktoru Mahmud Mirzəyevdir. Artıq üçüncü ildir ki,bu vəzifədə çalışır. Şəhərin təmiz,abad saxlanması,yaşıllıqların salınması və qulluq edilməsi onun rəhbərlik etdiyi kollektivdən çox asılıdır. Şəhərin müxtəlif yerlərində, park və xiyabanlarda, yol kənarlarında yenicə əkilmiş ağaclar,gül kolları,yaşıl çəmənliklər (qazonlar) diqqətimizi cəlb etdi. Öyrəndik ki kombinat işçiləri artıq 1000 ədəd sərv ağacı əkib, “İran gülü” adlanan çoxlu kol basdırıblar.Şəhərin təmiz saxlanması da öz yerində. Bu yaxınlarda rayon icra hakimiyyətinin köməyi ilə iki ədəd məişət tullantısı daşıyan maşın alınıb. Qışa lazımi hazırlıq görülüb. Kifayət qədər duz tədarükü edib, texnikanı tam işlək vəziyyətə gətiriblər.

Rayon qaz istismar idarəsi bir sıra küçələrdə və kəndlərdə müxtəlif diametrli qaz xətləri çəkərək, dairəvi birləşmə yarada bilib. Şəhərin müxtəlif yerlərində aşınmaya səbəb olan qaz xətləri yeniləri ilə əvəz olunub. Qazaxbəyli, Xanlıqlar,Yuxarı Salahlı, Aslanbəyli kəndlərində də bu istiqamətdə xeyli iş görülüb.

Rayondakı 27 saylı Yol İstismar İdarəsi də qışa ciddi hazırlaşıb. İdarədəki avtomaşınlar, ekskavatorlar, avtoqreyderlər,buldozerlər və digər mexanizmlər tam işlək vəziyyətə gətirilib,yanacaq, ehtiyat hissələri tədarük olunub. Lakin nəzərə almaq lazımdır ki, ötən qış mövsümündə məhz bu idarənin zəif işi nəticəsində şəhərin küçələrində avtomaşınların hərəkəti pozulmuş və digər xoşagəlməz hallara yol verilmişdir. Gözləyək, görək, heç olmasa bu qış idarənin rəisi H.Hadıyev ona edilən iradlardan nəticə çıxaracaqmı.

Rayonun məktəblərində də qışa hazırlıqla bağlı müəyyən işlər görülmüşdür. Cəfərli və Kəmərli kənd tam orta məktəblərində əsaslı təmir işləri, digər məktəb binalarında isə yerli bələdiyyələr və icra nümayəndəlikləri tərəfindən cari təmir işləri aparılmışdır. Hazırda rayonda 29 məktəb binasının ayrıca istilik sistemi var və bunlardan 25-i təbii qaz, 4-ü isə maye yanacaqdan istifadə edir. Bundan əlavə, 9 məktəbdə odun yanacağından istifadə olunur. Amma burada da problemlər var, rayon təhsil şöbəsi müvafiq qurumların köməyi ilə məktəblərin hamısının normal istiliklə təmin edilməsinə nail olmalıdır.

Səhiyyə, mədəniyyət müəssisələrində qışa hazırlıqla bağlı az iş görülməyib və nəticədə keçən il baş verən nöqsanlar hələ ki, özünü büruzə vermir. Doğum evində, Ruhi əsəb xəstəlikləri xəstəxanasında, poliklinikalarda, bir sıra kənd tibb və həkim məntəqələrində aparılan cari təmir işləri qışda arzuolunmaz problemlərin ortaya çıxmasının yəqin ki, qarşısını almağa kömək edəcək.

Şəhərdəki 1 saylı uşaq musiqi məktəbinin 10 sinif otağına qaz xətti çəkilməsi nəticəsində uzun illərdən belə davam edən problem aradan qaldırılmışdır. Amma digər otaqların elektrik cihazları ilə qızdırılması bir o qədər də etibarlı deyil və yəqin ki, tezliklə digər otaqlara da təbii qaz xətti çəkiləcəkdir. Rayon mədəniyyət mərkəzinin özünün binasında köhnə pəncərə çərçivələri yeni plastik çərçivələrlə əvəz edildiyi üçün otaqlarda hərarət normallaşıb.

Qazax həm də iri heyvandarlıq rayonu olduğundan qışlamanın yüksək səviyyədə keçirilməsi üçün qabaqlayıcı tədbirlərin görülməsi çox vacibdir. Bu baxımdan rayondakı baytarlıq idarəsi kollektivinin də üzərinə böyük məsuliyyət düşür. Xüsusilə heyvanların saxlanma şəraiti,yanacaq ehtiyatı yaratmaq üçün təsərrüfat rəhbərləri ilə lazımi söhbətlər aparılması,profilaktik tədbirlər görülməsi çox vacibdir. Doğrudur,rayon baytarlıq idarəsi bu sahədə müəyyən işlər görsə də, bütövlükdə, onun fəaliyyətindən narazılıqlar var. İstər yazılı,istərsə də şifahi müraciətlərdə idarənin rəisi İlqar Orucovun nəzarət etməli olduğu işlərin bir sıra hallarda başlı-başına buraxıldığı bildirilir. Şəhər bazarında,digər yerlərdə kəsilən və satılan ətlərə,digər məhsullara nəzarət yoxdur. Yoxlamalar və satışa icazə bir çox hallarda formal xarakter daşıyır və bu, ayrıca yazının mövzusu olduğu üçün hələlik deyilənlərlə kifayətlənirik.

...Qazaxda elə bir sahə yoxdur ki, inkişaf etməsin və ya nəzarətdən kənarda qalsın.

Ölkə Prezidenti İlham Əliyevin sərəncamları ilə bu rayona kifayət qədər vəsait ayrılmış və nəticədə son illər rayonda infrastuktur əməlli-başlı yenilənmiş, yollar salınmış, çoxlu digər sosilal obyektlər tikilib istifadəyə verilmiş, qaz, elektrik enerjisi problemləri həll olunmuşdur. Mənfur qonşu ölkənin rayonları (Qazaxın Ermənistanla 168 kilometr məsafədə sərhədi var) bütün bunları görür və özlərində olan şəraitsizliyə dözməyərək, yurdlarını tərk edirlər.

Qazax bütün fəsillərdə gözəldir. Payız-qışın isə öz füsunkarlığı var. Təbiət o zaman adama xoş təsir bağışlayır ki, evində- ocağında şəraitin olsun, hər cür qayğılardan uzaq olasan. Bax, bu gün Qazaxda vəziyyət belədir. Rayon icra hakimiyyətinin başçısı Ayaz Əsgərovun dediyi sözlərlə qeydlərimizi yekunlaşdırırıq:

– Bu gün hər bir Qazax sakininin önünə alnıaçıq, üzüağ çıxa bilməyimizə görə möhtərəm Prezidentimiz cənab İlham Əliyevə olduqca minnətdarıq.

Hamlet QASIMOV

Xalq qəzeti.- 2014.- 4 dekabr.- S.10.