Heydər Əliyev və müasir

Azərbaycan dövlətinin yüksəlişi

Mən tam səmimi olaraq etiraf eləmək istəyirəm ki, ulu öndər haqqında düşüncələrimi bölüşməyə, bildiklərimi qələmə almağa hər zaman daxili tələbatım olub. Lakin xatırladıqca əməllərinin əzəməti, xidmətlərinin nəhəngliyi qarşısında özümü zəif hiss etdiyimdən bu dahi şəxsiyyət barəsində söz deməkdə mənəvi acizliyimi hiss edirəm.

Hər dəfə Heydər Əliyevi xatırladıqca xəyalımdan keçən ilk fikir bu olur ki, o, Azərbaycan qurtuluş savaşının öndəridir! Həm də başqalarından məntiqi cəhətdən fərqli olaraq mən ulu öndərin hakimiyyət illərini xalqın dövlətçilik tarixində misilsiz xidmətlərinə görə dövrlərə bölmədən onu azərbaycançılıq ideologiyasının banisi, Azərbaycan dövlətinin yaradıcısı hesab edirəm. Əminəm ki, ulu öndər Azərbaycan tarixinin bütün dövrlərində mübağiləsiz olaraq əbədi lider kimi səciyyələnəcək.

Sovet dönəmində hələ Azərbaycan Dövlət Təhlükəsizlik Komitəsinə rəhbərliyi dövründən Heydər Əliyev azərbaycançılıq məfkurəsinin əsaslarını qoymağa nail olmuş, o vaxta qədər mövcud olan mənfur stereotipləri məhv etməyi bacarmışdır. Yabançı qüvvələri məharətlə Azərbaycanın təhlükəsizlik sistemindən uzaqlaşdırmaq, milli qüvvələri bu orqanlara cəlb etməklə xalqımızın zəka sahiblərinə açılan yollarda mayak olmaq kimi şərəfli bir missiyanın öhdəsindən layiqincə gələ bilmişdir.

Azərbaycan xalqının çox çətin sınaq dövrləri və bu dövrlərin ayrı-ayrı rəhbərləri olmuşdur. Lakin Azərbaycan tarixində öz rəhbərləri tərəfindən törədilən milli faciələr zəminində məhz xalqın təkidi ilə hakimiyyətə gətirilən və “ ...mən Azərbaycanın bu ağır vəziyyətində yükü öz üzərimə götürürəm və yaşadığım müddətdə xalqım üçün çalışacağam...” kimi cəsarətli və taleyüklü fikirləri Heydər Əliyevdən başqa heç kim deməmişdir. Bu kəlmələri işlətmək üçün ulu öndərin timsalında xalqın seçdiyi əvəzsiz lider olmaq tələb olunur.

Xatırlatmaq yerinə düşər ki, hətta Azərbaycan Kommunist Partiyası Mərkəzi Komitəsinin birinci katibi olarkən o zamankı totalitar mühitin sahiblərinə belə azərbaycançılıq ideologiyasının danılmazlığını təlqin edə bilmiş və bunun nəticəsi olaraq 1978-ci ildə ulu öndərin təşəbbüsü və rəhbərliyi ilə Azərbaycan dili Azərbaycan Sovet Sosialist Respublikasının dövlət dili kimi Azərbaycan Konstitusiyasına daxil edilmiş və təsbit olunmuşdur.

Mən bəşəriyyətin ən qorxunc imperiyası olan sovet imperiyası dövründə ulu öndərin bu qəhrəmanlığını Sakarya döyüşlərində Qazi Mustafa Kamal Raşa Atatürkün qəhrəmanlığı ilə eyniləşdirirəm. Zaman hər şeyi arxada qoyur və insanlara unutdurur. Unutmaq istəmədən buna məcbur edildiyimiz tarixi anlar çox olub.

Sovet imperiyasının bizə dilimizi, milli mənsubiyyətimizi unutdurmaq istədiyi məqamda Tanrı ulu öndəri xalqımıza bəxş etdi, şəxsi şücaəti və siyasi ustalığı sayəsində Heydər Əliyev milli yoxluq təhlükəsinin qarşısını almağa nail oldu.

Həmin dövrdə quruculuq, yeni sənaye müəssisələri, yeni yaşayış massivləri, yeni qəsəbələr, İttifaq əhəmiyyətli zavodlar, mədəniyyət və incəsənət sarayları və.s salınmış və təbii ki, bunların hamısı onun adı ilə bağlı olmuşdur. Şübhəsiz, bu işlər müxtəlif mərhələlərdən, həm də o zamankı mərkəzdən israrla tələb olunaraq həyata keçirilirdi.

Bu mərhələlərin hər biri Azərbaycan tarixinin şanlı səhifəsi, ulu öndərin xalqımız qarşısında misilsiz xidmətlərinin çox dəyərli salnaməsidir.

Xalqın öz sevimli oğluna olan dərin inamı günbəgün artır və bu inam hətta xalqın mandatı ilə onun adından ulu öndərin qərarlar qəbul etmək səviyyəsinə qədər yüksəlir.

20 Yanvar faciəsindən dərhal sonra Moskvada xalqla birgə olduğunu, onun ağır günündə ona mənəvi dayaq durduğunu nümayiş etdirdi. Ulu öndərin Azərbaycanın Moskvadakı Daimi Nümayəndəliyinə gələrək tarixi çıxış etməsi xalqı yenidən düşünməyə, Heydər Əliyevin timsalında xilaskar və həqiqi liderin mövcudluğu barədə gerçəkliklərlə hesablaşmağa bir stimul verdi. Bu, ulu öndərin öz xalqına, Azərbaycanın dövlətçilik və milli ənənələrinə bağlılığının bariz nümunəsidir. Qürbətdə, özü müəyyən sıxıntılar içində olduğu halda, hər şeyi milli qürur və milli dəyərlərə qurban verərək, o zamankı rejim və onun rəhbərlərini ittiham edən ulu öndər bir də Naxçıvan Muxtar Respublikasının Ali Sovetinin binası üzərində ucaltdığı üçrəngli bayrağımızla təkrarən tarixi dövlətçilik ənənələrinə, milli əqidəmizə sədaqətini və sarsılmaz bağlılığını göstərdi. Bu, o zaman ulu öndərin Naxçıvan Muxtar Respublikası Ali Məclisinin sədri olarkən xüsusi qərarla həyata keçirilən ilk presidenti idi.

Azərbaycan ərazisində 1918-20-ci illər Xalq Cümhuriyyətinin bayrağı ilk dəfə rəsmi olaraq Heydər Əliyev tərəfindən dalğalandırılmışdır. Bunun əlavə şərhə ehtiyacı yoxdur.

Ulu öndər təkrarsız lider olduğunu müstəqil Azərbaycan dövlətini qurduğu illərdə bir daha sübut etdi.

Doğrudur, keçmiş sovet geosiyasi məkanında mövcud olan respublikalar müstəqillik əldə etdilər. Lakin onların əksəriyyətindən fərqli olaraq, Azərbaycan formal deyil, faktiki olaraq öz müstəqilliyini qoruyub saxladı. Heydər Əliyev parlaq dühası qarşısında məkrli daxili və xarici qüvvələr Azərbaycanın tam müstəqil dövlət kimi mövcudluğuna mane ola bilmədilər.

Azərbaycan xalqının milli xüsusiyyətlərini dərindən bilən Heydər Əliyev xalqa güvənərək bu qüvvələri tərkisilah edə bildi, dövlətin bütün mövqelərdə tam müstəqilliyini qoruyub saxladı və müstəqillik prinsipini bir milli ideologiyaya çevirməyi bacardı.

Ulu öndərin taleyinə ikinci dəfə də dövlət qurmaq kimi tarixi bir missiya düşdü və o, bu təhəddüdlərin öhdəsindən layiqincə, mən dəyərdim ki, hələ artıqlaması ilə gəldi. Ölkədə əvvəlki hakimiyyətlərin miras qoyub getdiyi hərc-mərclik, xaos, separatizm, silahlı qruplaşmalar, Azərbaycanın müstəqilliyinə ikrah hissi ilə baxan və onun mövcudluğu üçün real təhlükə yaradan bütün qüvvələr neytrallaşdırıldı. Dövlətə məxsus ən sivil, dünyəvi, demokratik prinsiplərə söykənən atributların təsbit olunması istiqamətində ulu öndər səylərini əsirgəmədi. Nəticədə xalqın milli maraqlarına uyğun bir unitar dövlət qurmağa müyəssər oldu.

Bütün bunlar ulu öndərin gərgin fəaliyyəti və tükənməz enerjisi hesabına başa gəlirdi. Bir tərəfdən, Qarabağ münaqişəsinin həllində ətaləti aradan qaldıraraq, məsələyə yeni müstəvidən yanaşmaq xəttini qəbul elətdirmək, digər tərəfdən, sosial-iqtisadi sistem formalaşdırmaq və müstəqil dövlətə xarakterik olan özünəməxsus ictimai-siyasi mühit yaratmaq lazım idi. Bütün bunları Heydər Əliyevin şəxsiyyəti fonunda həyata keçirmək, həm də çox qısa bir zamanda başa çatdırmaq mümkün oldu.

“Bişkek paktı”, Heydər Əliyevin rəhbərliyi ilə müstəqil Azərbaycan Respublikasının yeni Konstitusiyasının qəbul olunması, Milli Ordunun qurulması, yeni dövlət təsisatlarının yaradılması, “Əsrin müqaviləsi” və.s kimi tarixi mərhələləri xalqımız Heydər Əliyevin rəhbərliyi altında qısa bir zaman kəsiyində başa vura bildi.

İndi bütün bunları xatırladıqca anlamaq olur ki, ulu öndər üçün dövlət başçısı olmaq, vəzifə, rəhbər işlər milli maraqlar naminə olan məqsədlərə çatmaqda bir vəsilə rolunu oynamışdır.

Təbii ki, nəinki bir yazıya, heç cildlərlə ədəbiyyatlara sığışmayan bu və ya digər xidmətlərinə görə Heydər Əliyev xalqımızın böyük və dahi oğlu olaraq qalacaq, Azərbaycan dili, müstəqil Azərbaycan dövləti yaşadıqca, o da yaşayacaqdır.

Mürsəl ƏLİYEV,

Ekologiya və Təbii Sərvətlər Nazirliyi Mineral

Xammal Elmi-Tədqiqat İnstitutunun direktoru,

texnika elmləri doktoru, professor

Xalq qəzeti.- 2014.- 14 dekabr.- S.5.