Prezident İlham Əliyev: Hər bir

bölgədə quruculuq, inkişaf sürətlə getməlidir

Regionların tarazlı və yüksək inkişafı Azərbaycan dövlətinin həyata keçirdiyi iqtisadi siyasətin başlıca istiqamətlərindəndir. Təsadüfi deyil ki, 2004-cü ildən başlayaraq ölkəmizdə regionların inkişafı ilə bağlı mühüm dövlət proqramları icra olunur. Bunun da nəticəsində ötən müddətdə regionların sosial-iqtisadi inkişafında ciddi dönüşə nail olunmuş, bölgələrdəki mövcud əmək ehtiyatlarından, təbii və iqtisadi potensialdan səmərəli istifadə edilməsi insanların həyat şəraitinin və rifahının yüksəlməsinə gətirib çıxarmışdır.

Azərbaycanda qeyri-neft sektorunun inkişaf etdirilməsi yolu ilə iqtisadiyyatın şaxələndirilməsinə, əhalinin rifah halının yaxşılaşdırılmasına xüsusi önəm verən ölkə Prezidenti İlham Əliyev regionların sürətli inkişafına xüsusi diqqət və qayğı ilə yanaşır, müntəzəm olaraq bölgələrə səfər edir. Həmin səfərlər çərçivəsində yerlərdə görülmüş işlərlə yaxından tanış olan dövlət başçısı sakinlərin də rəyini nəzərə alır, onları narahat edən məsələlərin həlli ilə bağlı təxirəsalınmaz tədbirlər həyata keçirir. Ölkə Prezidentinin dekabr ayının 15-də Sabirabad rayonuna səfəri də bu baxımdan diqqət çəkir.

Aran iqtisadi bölgəsinə daxil olan Sabirabad ölkəmizin mühüm aqrar rayonlarından biridir. Son illər Prezident İlham Əliyevin rəhbərliyi ilə ölkəmizdə həyata keçirilən sosial-iqtisadi inkişaf strategiyası, mühüm dövlət proqramları, bütün rayonlarda olduğu kimi, Sabirabadda da ümumi tərəqqiyə geniş yol açmış, rayonun iqtisadi mənzərəsinə əlavə çalarlar gətirmişdir. Belə ki, son illərdə rayonun sosial-iqtisadi həyatında əsaslı dəyişikliklər baş vermiş, əhalini narahat edən problemlərin həlli və infrastruktur layihələrinin yerinə yetirilməsi sahəsində mühüm tədbirlər həyata keçirilmişdir. Ötən müddətdə Sabirabadda əsas kapitala yönəldilmiş vəsait 168,5 dəfə, o cümlədən tikinti-quraşdırma işləri 178,5 dəfə artmışdır. Olimpiya İdman Kompleksi, Bayraq meydanı, “Asan Xidmət” Mərkəzi tikilmiş, rayon mədəniyyət evi əsaslı təmir olunmuş, 3800 şagird yerlik 12 məktəb, 100 yerlik uşaq bağçası inşa edilmiş, şəhərin su təchizatı sistemi yenidən qurulmuş, yeni kənd təsərrüfatı və emal müəssisələri yaradılmış, 29 modul tipli sutəmizləyici qurğu quraşdırılmış, müasir istixana kompleksləri, 12 min tonluq regional logistik baza istifadəyə verilmiş, avtomobil yolları çəkilmiş, körpülər salınmış, genişmiqyaslı abadlıq-quruculuq işləri aparılmışdır.

Yeri gəlmişkən, müasir Azərbaycan dövlətçiliyinin qurucusu və yaradıcısı, ümummilli lider Heydər Əliyev respublikamızın aparıcı kənd təsərrüfatı rayonlarından sayılan Sabirabadın inkişafına xüsusi diqqət göstərmiş, Azərbaycana rəhbərlik etdiyi illərdə buraya 14 dəfə səfər etmişdir. Bu gün rayonda uğurla fəaliyyət göstərən bir sıra sosial obyektlər ulu öndərin göstərişi və yaxından köməyi sayəsində ərsəyə gəlmişdir. Məhz buna görədir ki, rayon sakinləri Heydər Əliyevin bu tarixi xidmətlərini hər an minnətdarlıqla xatırlayır, onun siyasi kursunu qətiyyətlə müdafiə edirlər. Elə Sabirabad şəhərinin mərkəzi meydanında ümummilli liderimiz Heydər Əliyevin əzəmətli abidəsi də ulu öndərə olan sonsuz el məhəbbətinin parlaq təcəssümüdür.

Əvvəlcə ulu öndərin abidəsini ziyarət edən dövlət başçısı İlham Əliyev səfər çərçivəsində rayonda bir sıra infrastruktur və sosial təyinatlı obyektlərin açılışında iştirak etmişdir.

Son illər ölkəmizdə yol infrastrukturunun əsaslı şəkildə yenidən qurulmasını diqqət mərkəzində saxlayan Prezident İlham Əliyev kənd yollarının da bərpası, xüsusən də yolsuz kəndlərə yeni, rahat yolların çəkilməsi üçün kifayət qədər vəsait ayırır. Məhz bunun nəticəsidir ki, ölkədə kənd yollarının çəkilişi getdikcə geniş vüsət alır. İndi ölkəmizin elə bir rayonu yoxdur ki, orada kənd yollarının çəkilişi ilə bağlı lazımi işlər görülməsin. Sabirabad rayonuna səfəri zamanı Nizami-Əliləmbəyli-Azadkənd-Sarxanbəyli avtomobil yolunun açılışında iştirak edən dövlət başçısı bu barədə demişdir: “...Kənd yolları indi bizim üçün içməli su kimi vacib olan məsələlərdəndir. İnsanların rahatlığı, eyni zamanda, hər bir rayonun inkişafı üçün kənd yolları böyük əhəmiyyət daşıyır. Kənd yolları yaxşı olanda inkişaf da gedir, biznes imkanları da artır. Biz bunu insanların rahatlığı üçün edirik və edəcəyik. Artıq bir çox məsələlər həllini tapıb. Ancaq hələ yaxşı vəziyyətdə olmayan kənd yolları var ki, biz gələcək illərdə onları da həll edəcəyik”. Elə səfər çərçivəsində Prezidentimizin yeni avtomobil yolunun açılışında iştirak etməsi bir daha sübut etdi ki, bu məsələ dövlətin həyata keçirdiyi sosial-iqtisadi strategiyanın əsas hədəflərindəndir. Xatırladaq ki, 22 min nəfərin yaşadığı 12 yaşayış məntəqəsini birləşdirən Nizami-Əliləmbəyli-Azadkənd-Sarxanbəyli avtomobil yolu ən müasir səviyyədə inşa edilmiş, uzunluğu 46 kilometr olan yolun inşası zamanı 36 su keçidi tikilmiş, yol kənarlarında 900-ə yaxın yol nişanı və siqnal dirəyi, 12 dayanacaq quraşdırılmışdır.

Dövlət başçısı əsaslı şəkildə yenidən qurulan Sabirabad rayon Mədəniyyət evində yaradılan şəraitlə də tanış olmuşdur. Xatırladaq ki, bu mədəniyyət ocağı 1976-cı ildə Heydər Əliyevin xüsusi göstərişi əsasında inşa edilmiş və ulu öndər onun açılışında şəxsən iştirak etmişdir. O vaxtdan bəri burada əsaslı təmir işləri aparılmadığı üçün Prezident İlham Əliyevin tapşırığı ilə 2013-cü ilin aprelində Mədəniyyət evinin ikimərtəbəli binasında əsaslı təmir işlərinə başlanılmış və bu ilin dekabrında başa çatdırılmışdır.

Məlum olduğu kimi, son illər ölkəmizdə dövlət qurumlarının fəaliyyətində informasiya-kommunikasiya texnologiyalarının tətbiqi istiqamətində əhəmiyyətli işlər görülmüş, müvafiq hüquqi baza formalaşdırılmışdır. Artıq əksər dövlət orqanlarında əhaliyə elektron xidmətlərin göstərilməsi təmin edilmişdir. Xatırladaq ki, bürokratik əngəllərin və mümkün korrupsiya hallarının aradan qaldırılması məqsədi daşıyan bu kimi xidmətlər vətəndaşlar tərəfindən dərin razılıqla qarşılanır. 2012-ci il iyulun 13-də isə ölkəmizdə ilk dəfə Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi və onun tabeliyində olan “ASAN xidmət” mərkəzləri yaradıldı. Vətəndaşlara birbaşa xidmət göstərəcək “ASAN xidmət” mərkəzlərinin vahid şəkildə idarə edilməsini qarşısına məqsəd qoymuş agentliyin funksiyasına xidmət mərkəzlərinə qoşulan dövlət orqanlarının əməkdaşlarının fəaliyyətinin əlaqələndirilməsi, nəzarət və qiymətləndirmənin aparılması, dövlət qurumlarının informasiya bazalarının qarşılıqlı inteqrasiyası, elektron xidmətlərin təşkili prosesinin sürətləndirilməsi və bu sahədə idarəetmə sisteminin təkmilləşdirilməsi daxildir. Artıq 10 dövlət orqanı tərəfindən vətəndaşlara 30 növ xidmət göstərilir. Ötən müddətdə “ASAN xidmət” mərkəzləri, əsasən, paytaxt Bakıda fəaliyyət göstərirdilərsə, dövlət başçısının xüsusi tapşırığı əsasında ölkənin digər bölgələrində də əhaliyə bu sahədə səyyar xidmətlər təşkil olunurdu. Yeri gəlmişkən, 2014-cü ilin ötən dövrü ərzində 25 məntəqədə 30 rayonun əhalisinə səyyar xidmət göstərilmiş, 59 mindən çox müraciətin 90 faizə yaxını təmin olunmuşdur.

Son zamanlar isə “ASAN xidmət”in coğrafiyası genişlənməyə başlamışdır. Elə dövlət başçısı İlham Əliyevin Vətəndaşlara Xidmət və Sosial İnnovasiyalar üzrə Dövlət Agentliyinin Sabirabad regional “ASAN xidmət” mərkəzinin açılışında iştirak etməsi onu deməyə əsas verir ki, yaxın illərdə ölkənin bütün vətəndaşları bu xidmətdən yararlana biləcəklər.

Xatırladaq ki, Sabirabad regional “ASAN xidmət” mərkəzinin dördmərtəbəli binasının tikintisi ən yüksək standartlara uyğun həyata keçirilib. Həyətdə uşaq avtoşəhərciyi yaradılıb və burada balacaların yol hərəkəti qaydalarını öyrənmələri və yol nişanlarını tanımaları üçün bütün şərait var. Mərkəzin fəaliyyətindən Sabirabadla yanaşı, Saatlı, İmişli, Kürdəmir, Hacıqabul, Salyan, Beyləqan rayonlarının və Şirvan şəhərinin 900 minə yaxın sakini yararlanacaq. Ölkəmizdə fəaliyyət göstərən digər “ASAN xidmət” mərkəzlərində olduğu kimi, burada da internetə açıq olan kompüterlər qoyulmuş və vətəndaşların bütün növ elektron xidmətlərdən yararlanmaları üçün hərtərəfli şərait yaradılmışdır.

Yeri gəlmişkən, dekabrın 16-da Sabirabadda, Heydər Əliyev Mərkəzində ASAN Könüllülərinin birinci ümumrespublika forumunun açılış mərasimində iştirak edən Prezident İlham Əliyev tədbirdə geniş nitq söyləmişdir. Ölkəmizdə iki il əvvəl yaradılmış “ASAN xidmət”in ötən müddətdə uğurlu yol keçdiyini diqqətə çatdıran dövlət başçısı qeyd etmişdir ki, artıq bu xidmətə 3 milyon 500 min müraciət daxil olmuş, 3 milyona yaxın vətəndaşa müxtəlif sənədlər verilmişdir. Prezident İlham Əliyev demişdir: “Yəni, bu, ictimai xidmətlər sahəsində ciddi dönüş olmuşdur və deyə bilərəm ki, təkcə Azərbaycanda deyil, dünya miqyasında “ASAN xidmət” kimi nadir müəssisə, nadir təsisat yoxdur. Azərbaycan bu sahədə də liderlik keyfiyyətlərini göstərmişdir və biz intellektual məhsulun yaradılmasına nail ola bilmişik... Mən bu təşəbbüsə çox böyük dəstək verirəm və səmimiyyətlə deyə bilərəm ki, son illər ərzində Azərbaycanda aparılan islahatlar arasında “ASAN xidmət”in xüsusi yeri vardır. “ASAN xidmət”in yaradılması Azərbaycanda, ümumiyyətlə, islahatların aparılmasında önəmli hadisə olmuşdur və bizim islahatlarımızın təzahürüdür. Çünki bugünkü Azərbaycanın reallıqları ondan ibarətdir ki, əldə etdiyimiz uğurlar məhz düşünülmüş islahatlar nəticəsində mümkün olmuşdur”.

Ölkəmizdə korrupsiyaya qarşı təsirli tədbirlərin həyata keçirildiyi indiki şəraitdə cəza tədbirlərinin, inzibati tədbirlərin bəzən yetərli olmadığını vurğulayan dövlət başçısı İlham Əliyev bu cür hallarda sistem xarakterli, institusional tədbirlərin görülməsinə də böyük ehtiyac olduğunu qeyd etmiş, “ASAN xidmət”i burada nadir bir vasitə kimi dəyərləndirmişdir. Çünki “ASAN xidmət”də korrupsiya, rüşvətxorluq yoxdur və bu, onu deməyə əsas verir ki, hər bir sahədə belə bir sistem yarana bilər.

Forumda gənclərdən ibarət könüllülər qarşısında çıxış edən Prezident İlham Əliyev Azərbaycanın nadir inkişaf modelini ortaya qoyduğunu və öz təcrübəsini bölüşməyə hazır olduğunu vuğulayaraq demişdir: “ Hər bir gənc haqlı olaraq fəxr edir və fəxr etməlidir ki, Azərbaycan vətəndaşıdır. Hər bir gənc çalışmalıdır ki, ölkəmiz daha da möhkəmlənsin, daha da güclü olsun, bizim təsir imkanlarımız artsın. Hər bir gənc milli köklərə, milli ənənələrə, bizim adət-ənənələrə bağlı olmalıdır. Xarici təsirdən azad olmalıdır. Biz müstəqil siyasət aparırıq. Heç bir kənar qüvvə bizim iradəmizə təsir edə bilməz. Biz heç kimin diktəsi ilə oturub durmuruq və oturub durmayacağıq. Öz sözümüzü daim açıq deyəcəyik və prinsipial mövqeyimizi nümayiş etdirəcəyik. Həmişə də belə olmalıdır. Siz də bu ruhda böyüməlisiniz, tərbiyə almalısınız ki, heç bir kənar qüvvə bizim iradəmizə təsir edə bilməsin və Azərbaycan inkişaf, azadlıq, müstəqillik yolu ilə getsin”.

Səfər çərçivəsində Prezidenti İlham Əliyev Sabirabad şəhərinə içməli suyun verilməsi mərasimində iştirak etmişdir. Məlumat üçün bildiririk ki, Sabirabad şəhərinin su təchizatı və kanalizasiya sistemlərinin yenidən qurulması Azərbaycan hökuməti və Dünya Bankı tərəfindən birgə maliyyələşdirilən “Milli su təchizatı və kanalizasiya xidmətləri” layihəsi çərçivəsində həyata keçirilir. Layihə 2030-cu ilə qədər perspektiv inkişaf nəzərə alınmaqla Sabirabad şəhəri, Qalaqayın, Suqovuşan, Kürkənd, Əsədli, Bulaqlı, Balakənd kəndlərində 50 min nəfərdən artıq insanın su təchizatının yaxşılaşmasına hesablanıb. Sabirabad və Saatlı şəhərlərində istehlakçıların keyfiyyətli və dayanıqlı su təchizatının təmin edilməsi məqsədilə Hacıqabul rayonu ərazisində yerləşən və Abşeron yarımadasını içməli su ilə təmin edən Kür sutəmizləyici qurğularından 62 kilometr uzunluğunda magistral su kəməri tikilib.

“Sabirabad şəhərinin su təchizatı və kanalizasiya sistemlərinin yenidən qurulması” layihəsinin icrasına başlanandan indiyə qədər şəhərdə layihələşdirilmiş 151 kilometr uzunluğunda daxili su şəbəkəsinin 130 kilometrlik hissəsi tikilib, 3640 ünvana ev birləşmələri verilib. İçməli su və kanalizasiya xidmətlərindən istifadənin dəqiq uçotunun aparılması məqsədilə hər bir abunəçinin “smart-kart” tipli sayğacla təmin edilməsi nəzərdə tutulur. Hazırda paylayıcı su şəbəkəsinin və hər birinin tutumu 5 min kubmetr olan iki su anbarının inşası davam etdirilir. Layihənin davamı olaraq Sabirabad şəhərində 135 kilometr uzunluğunda kanalizasiya şəbəkəsi inşa olunacaq. Tullantı suların təmizlənib zərərsizləşdirilməsi məqsədilə Sabirabad şəhərinin kənarında məhsuldarlığı sutkada 80 min kubmetr olan çirkab sutəmizləyici qurğu tikiləcək. Gələcəkdə Saatlı şəhərinin tullantı suları da burada təmizlənib zərərsizləşdiriləcək. Layihənin icrası 2017-ci ildə başa çatdırılacaq. Yeri gəlmişkən, Kür sutəmizləyici qurğuları, Sabirabad-Saatlı magistral su kəməri 2030-cu ilə perspektiv inkişaf nəzərə alınmaqla Sabirabad şəhəri və rayonun 28 kəndinin 100 min, Saatlı şəhəri və rayonun 12 kəndinin 47 min, Hacıqabul rayonunun 4 kəndinin 10 min əhalisinin içməli suya olan tələbatını ödəyəcək. Sabirabad və Saatlı şəhərlərinin dayanıqlı su təchizatına nail olmaq üçün magistral kəmərin üzərində ümumi tutumu 20 min kubmetr olan 4 anbarın inşası davam etdirilir.

Bu münasibətlə keçirilən mərasimdə çıxış edən Prezident İlham Əliyev demişdir: “İçməli su bu bölgədə və bütövlükdə Azərbaycanın müxtəlif bölgələrində ən ciddi məsələlərdən biridir. Biz bunu da tədricən həll edirik. Azərbaycanda içməli su layihələri geniş vüsət almışdır və o cümlədən bu zonanın problemləri də öz həllini tapır. İçməli su, bildiyiniz kimi, insan orqanizmi üçün başlıca amildir. Təmiz, keyfiyyətli içməli su insanın sağlamlığı üçün böyük əhəmiyyətə malikdir. Beləliklə, bu böyük sosial məsələnin həlli artıq reallaşır”.

Yazının əvvəlində qeyd etdiyimiz kimi, Prezident İlham Əliyev regionlara səfərləri zamanı sakinlərlə görüşərkən onları diqqətlə dinləyir, rəylərini nəzərə alır. Məhz bu görüşlər zamanı qaldırılan məsələlərə həssaslıqla yanaşan dövlət başçısı paytaxta qayıdan kimi bununla bağlı müvafiq sərəncamlar imzalayır, əlaqədar təşkilatlara konkret göstərişlər verir. Sabirabad rayonuna səfərin məntiqi nəticəsi olaraq imzalanmış sərəncamlar da bunu bir daha təsdiq edir. Belə ki, “Sabirabad rayonun sosial-iqtisadi inkişafının sürətləndirilməsinə dair əlavə tədbirlər haqqında” sərəncama əsasən, rayonunun sosial-iqtisadi inkişafının daha da sürətləndirilməsi məqsədilə Sabirabad Rayon İcra Hakimiyyətinə Azərbaycan Respublikasının 2014-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan 2 milyon manat ayrılmışdır. Dövlət başçısının imzaladığı digər sərəncamla isə 20 min nəfər əhalinin yaşadığı 10 yaşayış məntəqəsini birləşdirən Suqovuşan-Qaralar-Qəfərli-Əhmədabad- Nərimankənd-Həşimxanlı avtomobil yolunun tikintisi üçün ilkin olaraq 3 milyon manat ayrılmışdır.

Ölkə Prezidentinin imzaladığı hər iki sərəncam, heç şübhəsiz, Sabirabadın sosial-iqtisadi inkişafına təkan verəcək, rayonda mövcud problemlərin həllini xeyli sürətləndirəcək və sakinləri yeni həyat standartlarına qovuşduracaq.

Mirbağır YAQUBZADƏ,

“Xalq qəzeti”

Xalq qəzeti.- 2014.- 21 dekabr.- S.1.