Prezident İlham Əliyev

yeni zamanın yeni lideridir

Beynəlxalq Valyuta Fondunun hesablamalarına görə, 2003-cü ildən Azərbaycanda büdcə gəlirlərinin orta illik artımı 20-30 faiz təşkil etmişdir və bu regionda ən yüksək göstərici sayılır. Respublikamızın 2014-cü il dövlət büdcəsi Cənubi Qafqazın ümumi büdcəsinin 76 faizini təşkil edir.

Azərbaycan xalqının tarixi müxtəlif səciyyəli və taleli liderlərin obrazları ilə kifayət qədər zəngindir. Cavanşirdən , Babəkdən, Şəmsəddin Eldəgəzdən və onun hökmdar oğullarından, Uzun Həsəndən, Şah İsmayıl Xətaidən, Nəriman Nərimanovdan Heydər Əliyevə qədər neçə- neçə dövlət başçısı, ictimai- siyasi xadim yetirmiş bir xalqın, həqiqətən, ən yeni tarixini yaradan və yaşayan ölkənin bu mərhələdə də zamanın məzmunu, sürəti, enerjisi və miqyası səviyyəsində siyasi lider yaradacağı heç bir şübhə doğura bilməzdi. Azərbaycan Respublikasının indiki Prezidenti İlham Əliyev mənsub olduğu xalqın və dünyanın gözləri qarşısında belə bir lider kimi yüksəldi, qəbul olundu. Ümummilli lider Heydər Əliyevin həyatının son illərində və aylarında Azərbaycan cəmiyyətini, eləcə də ölkəmizi diqqət mərkəzində saxlayan beynəlxalq dairələri ulu öndərin yaratdığı dövlətə gələcəkdə kimin rəhbərlik edəcəyi, onun hakimiyyət irsini və siyasi kursunu kimin davam etdirəcəyi ciddi düşündürürdü. Və bu barədə düşünəndə dostun da, düşmənin də ağlına birinci növbədə ümummilli liderin ən yaxın və ən sadiq məsləkdaşı İlham Əliyev gəlirdi. Bu, yalnız ona görə deyildi ki, İlham Əliyev dünya miqyaslı ictimai- siyasi xadim, böyük dövlət adamı və nəhayət, ümummilli lider Heydər Əliyevin oğlu idi, həm də ona görə idi ki, ötən 90 - cı illərinin ortalarından başlayaraq İlham Əliyev kifayət qədər böyük siyasi nüfuz qazanmışdı.

Görünür, onun yalnız dostları deyil, artıq hamı etiraf etməyə məcbur idi ki, həmin illərdə İlham Əliyevin siyasi nüfuzu onun potensial rəqiblərinin “münbit tarixi şəraitdə” - ötən əsrin 80— 90 - cı illərində qazandıqları nüfuzu keçmişdi. Və nəzərə aldıqda ki, potensial rəqiblərin vaxtilə göstərdikləri fəaliyyət artıq tarixə çevrilmişdi, yeni tipli siyasi xadim İlham Əliyev isə hər gün yeni bir uğura imza atırdı, onda “tarix” ilə “müasirlik” (və “gələcək”!) arasındakı fərq, şübhəsiz, daha aydın görünürdü...

Azərbaycan dövlətçiliyi həmin dövrdə qarşısıalınmaz bir sürətlə inkişaf edirdi. Artıq dünya da bu və ya digər dərəcədə etiraf etməyə məcbur olurdu ki, Yer üzündə, gerçəkdən, Azərbaycan adlı bir dövlət var. Və bu dövlətlə hesablaşırlar. Azərbaycan dövlətçiliyinin güclənməsi həm xalqımızın, həm də onun böyük rəhbəri Heydər Əliyevin qələbəsi idi. Həmin qələbə isə İlham Əliyev qarşısında yüksək fəaliyyət perspektivləri, yeni siyasi, iqtisadi, mənəvi- ideoloji üfüqlər açırdı. Azərbaycan dövlətçiliyi uğrunda mübarizənin gənc qəhrəmanına belə geniş meydan, təbii ki, hava - su kimi lazım idi.

Hamı bu və ya digər şəkildə etiraf edirdi ki, İlham Əliyev güclüdür! Hər şeydən əvvəl ona görə güclüdür ki, ümummilli lider Heydər Əliyevin həyat və mübarizəsinin təbii varisidir – sağlam, intellektual, mübariz bir genin daşıyıcısıdır. Azərbaycan cəmiyyəti və dünya Heydər Əliyevi neçə onillər idi ki, bu xalqın milli lideri kimi tanıyırdı. Onun qurduğu dövlətin iqtisadi- sosial, mənəvi- ideoloji həyatında oynadığı həlledici rol gənc, təşəbbüskar və enerjili lider üçün böyük siyasi dayaq idi.

Tarix yalnız dostlara deyil, özünün ən müxtəlif formalarda təzahüründə düşmənlərə də göstərdi ki, ümummilli liderə və onun arxalandığı millətə qalib gəlmək, sadəcə olaraq, mümkün deyil. Ona qarşı dayanmaqsa Azərbaycan dövlətçiliyinə, xalqın özünütəsdiqinə qarşı dayanmaq demək idi ki, bu da heç bir siyasi, yaxud psevdosiyasi qüvvəyə nüfuz gətirə bilməzdi.

Ümummilli liderin ən layiqli varisi İlham Əliyev ona görə güclü idi ki, yaxşı təhsil almış, müxtəlif dillərdə sərbəst danışmağı və müxtəlif, xüsusən beynəlxalq mədəniyyət tipologiyaları ilə təmasa girməyi dərindən mənimsəmişdi, dünyanın müasir düşüncə texnologiyalarına yiyələnmişdi. Bu baxımdan onu “rəqibləri” ilə müqayisə etmək çətindir. Həmin dövrdə Azərbaycanda hakimiyyətə can atan qüvvələrin böyük bir hissəsi, əvvəllər tez- tez deyildiyi kimi, adi bir namizədlik dissertasiyası müdafiə edə bilməmiş aspirantlar, yaxud dissertantlar idilər. Onların nə zamansa sistemli, ardıcıl bir iş görə biləcəklərinə inanmaq mümkün deyildi.

Xalq məhz irəliyə baxır, geriyə yox!.. Geriyə baxmaq tarixçilərin işidir. Xalq hərəkatının dalğalarında hakimiyyətə gəlmiş, çox keçmədən, səriştəsizlik ucundan, məğlub olub kənara atılmış oyuncaq qəhrəmanlar özlərini yalnız xəyallarda hakimiyyətdə təsəvvür edə bilərdilər. Xalqın ulu öndərdən sonra taleyini etibar etmək istədiyi lider isə yalnız İlham Əliyev idi.

Gələcəyin lideri İlham Əliyev müxtəlif dövlətlərin siyasilərinin çeşidli mülahizələrilə müşayiət olunan proseslərdə, tez- tez dəyişən olayların çevrəsində dünya şöhrətli atasının bütün fərdi və ideoloji qənaətlərini onunla birgə yaşayırdı. Öndər Heydər Əliyev ölkəsinin müstəqilliyinin on ili ərzində milli, dünyəvi quruluş formasiyasını seçən Azərbaycanın bugününün və sabahının prinsipini, ideya istiqamətini müəyyənləşdirmişdir.

İlham Əliyev siyasi meydanda çoxdan olsa da, tam aydınlığı ilə Avropa Şurasının Parlament Assambleyasında Azərbaycan nümayəndə heyətinin rəhbəri qismində vətənpərvər fəaliyyəti ilə nəzərə çarpdı. Sonradan isə cəmiyyət onu Baş nazir kimi qəbul etdi. Və unutmamalıyıq ki, Avropa Şurası ölkəmiz üçün beynəlxalq aləmə açılan pəncərədir. Bununla yanaşı, Azərbaycana qarşı geniş təbliğat kampaniyası aparan erməni diasporunun bəzi iri xarici dövlətlərdə güclü təsirləri görünürdü. Belə bir zamanda ölkəmizi Avropada təmsil edəcək heyətə elə bir geniş və müasir dünyagörüşlü şəxs lazım idi ki, dünyada gedən siyasi proseslərdən düzgün baş çıxara bilsin.

Əslində, bu qədəmi sayalı başlanğıc Heydər Əliyev siyasi, ictimai, əxlaqi məfkurəsi və mədəniyyəti üzərində formalaşmış, Avropa və Şərq dəyərlərinin sintezindən yaranan, monolit kökü olan özünəməxsus siyasi əxlaqın - mədəniyyətin gəlişi idi. Siyasi düşərgəyə, cəmiyyətimizin idarəçiliyinə yeni ictimai ruhun gəlişi təzə ideyaların axını demək idi. Bütün bunların bəhrəsi isə təkcə əldə olunmuş inkişaf tempini qoruyub saxlamaq deyil, həm də qazanılacaq yeni uğurlar, növbəti təcrübə olacaqdı. İlham Əliyevin keçdiyi mənəvi, mədəni, intellektual, siyasi məktəb bütöv bir tarix idi.

Nadir siyasi və dövlət xadimi Heydər Əliyevin həyat və mübarizə məktəbinin bilavasitə yetirməsi olan, parlaq siyasətçi, gerçək əməl adamı İlham Əliyevin hələ ölkəyə rəhbərlik etməyə başlamamışdan əvvəl iqtisadi, sosial- siyasi, ideoloji sahələrdə qazandığı böyük uğurlar onun qarşısında geniş perspektivlər açır, hakimiyyət uğrunda hər hansı konyuktur mübarizə formasına əl atılmasını istisna edirdi.

Belə bir tarixi şəraitdə həyatı şam kimi sönməkdə olan ümummilli lider 2003-cü ilin prezident seçkilərinin həlledici dövründə canından artıq sevdiyi xalqına müraciətlə bildirdi: “Üzümü sizə – həmvətənlərimə tutaraq, qarşıdan gələn prezident seçkilərində prezidentliyə namizəd, mənim siyasi varisim, Yeni Azərbaycan Partiyası sədrinin I müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, eneryili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”.

Müstəqil dövlətin yenicə qurulmuş, nizamlanmış hakimiyyətinin yeni siyasi varisə ötürülməsi kimi taleyüklü bir keçid mərhələsində İlham Əliyevin böyük səs çoxluğu ilə Azərbaycan Prezidenti seçilməsi göstərdi ki, əvvəla, Azərbaycan xalqı ümummilli liderin milli dövlət quruculuğu siyasətinin perspektivliliyinə dərindən inanır; ikincisi, İlham Əliyevi məhz həmin siyasətin daşıyıcısı (və davamçısı!) kimi qəbul edir; nəhayət, gələcəkdə milli dövlət quruculuğu qarşısına çıxa biləcək qaçılmaz problemlərin həllində onun siyasi intellektinə, uzaqgörənliyinə və iradəsinə şübhə etmir.

Azərbaycan Prezidenti İlham Əliyev ölkəyə rəhbərlik etdiyi 11 illik bir müddətdə xalqın böyük etimadını qazanaraq bir daha sübut etdi ki, Azərbaycanı həm daxili, həm də beynəlxalq miqyasda yalnız o təmsil edə bilərdi. İlk gündən hər bir azərbaycanlının prezidenti olacağını vəd edən, verdiyi sözü uğurla yerinə yetirən dövlət başçısı İlham Əliyev öz fəaliyyəti ilə ümummilli liderin başladığı işi davam etdirməyə qadir olduğunu sübut etməklə yanaşı, həm də özünü yeni zamanın yeni lideri kimi göstərdi. Ötən 11 ildə bir tərəfdən, mövcud ənənələr müdafiə olundu, digər tərəfdən isə dövlət idarəçiliyinə zəruri novatorluq gətirildi.

Prezident İlham Əliyev ümummilli lider Heydər Əliyevin şəxsində təzahür edən “əbədi zaman”dan (özünün də iştirak etdiyi “zaman”dan) doğulmuşdu. Onu hakimiyyətə hansısa subyektiv istək, yaxud maraq, kütləvi hərəkatın konyuktur mənafeləri gətirməmişdi. İlham Əliyevi siyasi liderlik mövqeyinə qaldıran zamanın özü idi. Heydər Əliyev idarəçiliyi, dövlət (və millət!) quruculuğu təcrübəsini yaşatmaq tələbatı – millətin ruhundan gələn bu qarşısıalınmaz ehtiyac İlham Əliyevi israrla Prezident kürsüsünə gətirmişdi. Onun üzərinə elə bir tarixi məsuliyyət qoyulmuşdu ki, həmin missiyadan qaçmaq, sadəcə olaraq, mümkün deyildi. Və bu, yalnız bir şəxsin, yaxud siyasi liderin taleyi məsələsi də sayıla bilməzdi – burada söhbət bütöv bir millətin aqibətindən gedirdi.

İlham Əliyev bir dövlət xadimi kimi, milləti özünə (və dünyaya) tanıtmağın ən modern üsullarını, formalarını cəsarətlə tətbiq etməyə başladı. Ölkənin maddi sərvətini sürətlə artırmaqla yanaşı, onu mənəvi- mədəni sərvətə çevirməyin uğurlu praktikasını da verdi. Çəkilən yollar, tikilən və ya təmir olunan xəstəxanalar, təhsil, mədəniyyət, idman müəssisələri; sosial, siyasi- ideoloji ziddiyyətlərin aradan qadırılması, milli barış və mütəşəkkilliyin təmin olunması, dünya azərbaycanlılarının birliyi uğrunda aparılan ardıcıl mübarizə... Bütün bunlar adi bir dövlət rəhbərinin deyil, böyük dövlət və millət qurucusunun görə biləcəyi işlərdir ki, onların öhdəsindən məhz ümummilli liderin müzəffər siyasi varisi İlham Əliyev gələ bildi.

Azərbaycanın yeni siyasi lideri, bir tərəfdən, ulu öndərin strateji ideyalarını həyata keçirirsə, digər tərəfdən, zamanın diktə elədiyi yeni ideyalar irəli sürür, bu gün olmasa da sabah reallaşacaq perspektivli texnologiyalar üzərində düşünür və bütün cəmiyyəti də düşünməyə və çalışmağa səfərbər edir.

Prezident İlham Əliyev ölkənin maddi, mənəvi sərvətlərini, xaricdə beynəlxalq nüfuzunu, daxildə isə vətəndaşlıq hisslərini gücləndirməklə Azərbaycanın ən ağrılı problemini - Dağlıq Qarabağ (və zəbt olunmuş rayonlar) probleminin ədalətli həllini prinsip etibarilə həll edir, əməli baxımdan yaxınlaşdırır. Heydər Əliyevin böyük siyasəti və onun qətiyyətlə davam etdirilməsi Azərbaycan neftinə olan ənənəvi beynəlxalq marağın ölkənin mənafeyi naminə istifadə olunmasının tarixdə görünməyən təcrübəsini verdi. Bu müstəqil və mötəbər siyasət yüzillər boyu məkrli siyasi iddialarla, amoral texnologiyalarla Azərbaycana (və ümumən türklərə) meydan oxuyan erməni təcavüzünün (və onun havadarlarının) qarşısına qüdrətli bir müdafiə və hücum mexanizminin modern formalarını çıxartdı.

Prezident İlham Əliyev indiki və gələcək dövr üçün dövlətin və vətəndaşların vəzifələrindən danışarkən soydaşlarımızın doğma vətənləri ilə hər cür faydalı əlaqələrində hüquqi, mədəni, mənəvi əsasların möhkəmləndirilməsini zəruri istiqamət kimi vurğulayır. Prezident dövlətimizin inkişafı müqabilində maddi-mənəvi imkanlardan istifadə edərək dünya azərbaycanlılarının normal səviyyədə bəhrələnməsinə imkan yaratmağı, onların milli və vətəndaş hüquqlarının qorunması yolunda səyləri gücləndirməyi çağdaş dövr üçün vacib amillərdən sayır.

Millilik Prezident İlham Əliyevin siyasi düşüncəsinin, təfəkkürünün əsas mənbəyidir. Onun öz xalqının ruhuna uyğun, eləcə də Avropa və Qərb təmayüllü siyasəti Azərbaycanın əzəli milli maraqlarından mayalanır.

Önəmlisi odur ki, Azərbaycandakı siyasi, sosial, mədəni xətt doğma dəyərlərə münasibətdə millətin keçmiş dövlətçilik və yaşam təcrübəsindən istifadəyə söykənir.

Prezident İlham Əliyev Azərbaycan dövlətinin başına təkcə ümummilli liderin varisi, davamçısı, onun məktəbinin ardıcılı kimi yox, həm də yenilikçi—yeni zamanın yeni lideri olaraq gəlmişdi. O, idarəçiliyin elə demokratik və optimal yolunu seçmişdir ki, hər bir zəkalı ölkə vətəndaşının dövlətçiliyin inkişafında yeri vardır. Və dövlət quruculuğunda bu yer hər kəsin məhz vətənpərvərliyinə, biliyinə, sağlam düşüncəsinə, qabiliyyətinə görə müəyyənləşmişdir.

Hələ prezidentlikdən əvvəl cənab İlham Əliyevin gənclik maraqlarıyla uyğun olaraq Azərbaycanda idmanın intibahını qısa zamanda gerçəkləşdirməsi, mühüm məsələ kimi millətin fiziki və əqli sağlamlığına qayğı ilə yanaşması da sırf milli xarakterlidir.

Ölkəmizdə müasir idman siyasəti fiziki hazırlıq çərçivəsini genişləndirərək mənəvi təbiətin güclənməsi anlamına keçmişdir və ictimai, ideoloji əhəmiyyətini ilbəil artırır.

Respublikamızın bütün regionlarında möhtəşəm olimpiya komplekslərinin, idman qurğularının beynəlxalq standartlar səviyyəsində tikilməsi, nəticədə yarışların müntəzəm, planlı şəklə düşməsi dövlətimizin başçısının gəncləri çağdaş dünyanın nəfəs aldığı ideallarla yetişdirmək ideyasından irəli gəlir. Müstəqil Azərbaycan dövlətinin yeni lideri İlham Əliyevin əsaslı və zəruri eksperimentləri ölkənin real iqtisadi, sosial, siyasi vəziyyətini dəqiqliklə nəzərə almaqla yanaşı, cəsarətliliyi ilə də seçilir. Onun məhz yenilikçi idarəetmə texnologiyalarına ardıcıl, inamlı müraciətinin nəticəsidir ki, respublikanın iqtisadi inkişafı indiyə qədər görünməmiş bir sürət və miqyas almış, ölkədə sağlam sosial- siyasi, mənəvi- mədəni əhval- ruhiyyə güclənmişdir. Bu gün ən qərəzkar, ən aqressiv, hətta ən dağıdıcı bir müxalif qüvvə belə İlham Əliyevin qazandığı çoxspektrli uğurları görməmək, yaxud inkar etmək gücündə deyil.

Son 11 ildə Prezident İlham Əliyev ulu öndərin yaratdığı əsaslara söykənərək Azərbaycanda iqtisadi- sosial tərəqqini fenomenal bir gerçəyə çevirib. Bu illərdə milli iqtisadiyyatımız onun qətiyyəti və novator idarəçiliyi sayəsində 3 dəfədən çox artıb. Bu, dünyada ən sürətli inkişaf göstəricisidir. Yoxsulluq onun müstəsna səyləri ilə 10 dəfəyə qədər azalaraq 5 faiz səviyyəsinə enib. İlham Əliyevin rəhbərliyi dövründə ölkəmizdə 1,3 milyon yeni iş yeri açılıb.

Dünyada əsl qurucu lider kimi tanınan İlham Əliyevin yeritdiyi siyasətə ölkə daxilində və xaricdə olan yüksək inamın, möhkəm etibarın nəticəsidir ki, son 11 ildə Azərbaycana 170 milyard dollardan çox sərmayə yatırılıb. Ötən il bu göstərici rekord səviyyədə – 28 milyard dollar olub. Bu rəqəmin

70 faizi yerli sərmayədir.

Beynəlxalq Valyuta Fondunun hesablamalarına görə, 2003-cü ildən Azərbaycanda büdcə gəlirlərinin orta illik artımı 20-30 faiz təşkil edib və bu regionda ən yüksək göstərici sayılır. Hazırda respublikamızın 2014-cü il dövlət büdcəsi Cənubi Qafqazın ümumi büdcəsinin 76 faizini təşkil edir. Gələn ilin büdcəsində də bu nisbət qorunub saxlanır. Azərbaycandakı qanunvericilik bazasının demokratikliyi günün, proseslərin gedişatı müqabilində təbii bir axarda təkmilləşməkdə, səviyyəsini artırmaqdadır. Hətta, xüsusilə vurğulamaq yerinə düşər ki, keçmiş İttifaq məkanındakı müstəqil respublikalarla müqayisədə Azərbaycanda məbuata, azad sözə verilən demokratiya, imkanlar daha çoxdur. İndi əsas məsələ odur ki, təqdim olunan, gerçəkləşdirilən demokratik şəraitdən, ümdəsi isə dövlət başçısı İlham Əliyevin kifayət qədər aydın demokratizmindən xalqın, ölkənin imicinin yüksəlməsi üçün səmərəli istifadə edilsin.

Mən həmişə Heydər Əliyevin Azərbaycanından bəhs etmişəm. Elə bilirəm ki, artıq İlham Əliyevin Azərbaycanından da danışmaq vaxtı çatıb. Ölkəyə rəhbərlik etdiyi illərdə İlham Əliyev bütün aydınlığı ilə göstərdi ki, Heydər Əliyevin Azərbaycanı heç vaxt lidersizlik problemi ilə üzləşməyəcək, ötən əsrin 80 - ci illərinin sonu, 90 - cı illərinin əvvəllərində olduğu kimi daxili çəkişmələr, xarici müdaxilələr obyektinə çevrilməyəcək. Bu isə o deməkdir ki, Azərbaycan xalqı yüzillər boyu yığılıb qalmış taleyüklü məsələlərin həllinə səfərbər edilir, Azərbaycan insanı zaman- zaman itirilmiş, yaxud qəsb olunmuş milli “mən”ini özünə qaytarır.

İlham Əliyevin siyasi portretini onun söhbət açacağımız fərdi obrazının əlamətdar ştirixləri tamamlayır. Və özəllik ondadır ki, həmin cizgilərin genetik qaynaqları Azərbaycan xalqının özünüdərkində əvəzsiz rolu olmuş bir dahinin ömürlüyündən irəli gələrək formalaşmışdır. Prezident İlham Əliyev bilir ki, insanları sevmək, onlara xeyirxahlıq, mənəvi-ruhi, hüquqi, sosial baxımdan problemlərinin həllində doğmalıq göstərmək, dayaq durmaq- layiqli rəhbər olmaqdır.

Vətənpərvərlik - hələ millət vəkili olaraq Avropa Şurasında nümayəndə heyətinin rəhbəri kimi fəaliyyəti onun haqqında bu imici yaratmışdı. İlham Əliyev dünyanı bir həqiqətə inandırmağa çalışır ki, Ermənistan terrorçu dövlətdir, zəbt etdiyi Azərbaycanın ayrılmaz hissəsi olan Dağlıq Qarabağ ərazisindən narkotik maddələrin tranziti və biznesi məqsədilə istifadə edir. Bu isə təkcə Azərbaycan, Cənubi Qafqaz üçün deyil, bütün dünya üçün təhükə mənbəyidir.

İlham Əliyev ardıcıl olaraq Avropa Şurası kimi mötəbər qurumun üzvü olan ölkələrin hamısına üz tutaraq bu suallara cavab istəyir: “Ermənistan Avropa Şurasının üzvü ola-ola, beynəlxalq hüququn normalarına məhəl qoymaya bilərmi? Ermənistan Avropa Şurasının üzvü ola-ola, digər AŞ üzvünün ərazilərini 20 ildən artıq bir müddətdə işğal altında saxlaya bilərmi? Ermənistan AŞ üzvünün qaçqın və köçkünə çevrilmiş bir milyondan artıq vətəndaşının insan haqlarını açıq-aydın poza bilərmi?”

Xalqımız onun himayədarlığını kifayət qədər hiss etmişdir. İlham Əliyev, bəlkə də, insanları nəinki mənəvi- sosial sıxıntılarla üz-üzə qoymamış, yerlərdə adamlarla müntəzəm görüşlər keçirərək ümumi əhval-ruhiyyənin yüksəkliyinə nail olmağa çalışır. İlham Əliyev rəsmi və ictmaiyyətlə görüşlərində siyasətçiləri, müxtəlif zümrədən olan insanları nəzakətlə, hörmətlə dinləməyi, məsələyə aydın münasibət bildirməyi ilə tərəf müqabillərini özü haqqında sayğılı düşünməyə vadar edir. O, dialoq zamanı həmsöhbətini özünün təbii səmimiyyətinə və obyektivliyinə inandırır. Mətbuat nümayəndələri ilə təmasda da sadə və konkretdir.

Mən böyük məmnuniyyətlə türk dünyasının İlham Əliyevindən və İlham Əliyevin türk dünyasından da bəhs etmək istəyirəm. Azərbaycan Respublikasının Prezidenti seçildikdən sonra dəfələrlə türk respublikalarına - Qazaxıstana, Özbəkistana, Türkiyəyə rəsmi səfərlərə gedən, Türküstanla (Orta Asiyanın türk dövlətləri ilə) əlaqələrdəki soyuqluğu aradan qaldıran, Şimali Kipr məsələsinə münasibətdə, mövcud maneələrə baxmayaraq, ən cəsarətli addım atan, türk dövlətlərinin və xalqlarının birliyi üçün müasir mübarizə texnologiyaları nümayiş etdirən və yeni təcrübə verən İlham Əliyev artıq Azərbaycanın— Bakının sovet dövründə unutdurulmuş türk dünyasının mərkəzi şöhrətini özünə qaytarıb. Azərbaycan rəhbəri İlham Əliyev bu gün Qafqaz regionunun şəriksiz lideri sayılır, onun razılığı olmadan bu bölgədə heç bir ciddi layihəyə və addıma start verilə bilməz.

Çağdaş Azərbaycan dövlətini qurmaq missiyasına ümummilli lider Heydər Əliyev “Öz ömrümün qalan hissəsini də xalqıma bağışlayıram” söyləməklə başlamışdı. Azərbaycanın müstəqilliyi Tanrının xalqımızın gələcəyinə verdiyi bir şans, istək və arzularına açdığı yol idi. Və nə yaxşı ki, Heydər Əliyev kimi böyük mütəfəkkir həmin şansdan istifadə edərək xalqını da öz arxasınca bu yolla apara bildi. Xalq seçdiyi, ümidvar olduğu öndərin bu tarixi quruculuq missiyasından azadlığını və liderini qazandı.

Xalq 1993-cü ildə Heydər Əliyevi yenidən özünün alternativsiz rəhbəri olaraq ali hakimiyyətə tələb edəndə nə qədər ağıllı, təkidli hərəkət etmişdisə, üçüncü minilliyin üçüncü ilində İlham Əliyevin şəxsində öz yeni Prezidentini - yeni liderini seçəndə də o səviyyədə mübarizlik göstərdi.

İlk mərhələdə Azərbaycan xalqı dövlətçiliyin xilaskarının missiyasından lazımınca bəhrələnərək öz varlığını, Vətənin müstəqilliyini qorudu və milli dövlətini qurdu. İkinci mərhələdə isə Azərbaycan cəmiyyəti böyük zəhmətlər, ağrı-acılar bahasına yaradılmış ideoloji ənənə və dövlətçilik təcrübəsini dağılmağa, müstəqilliyi naməlum talenin oyunları ilə üz-üzə qalmağa qoymadı. Bu, müasir Azərbaycanda siyasi varislik ənənəsinin nə qədər ehtiyac duyulan həyati məsələ olduğuna mükəmməl sübut idi.

Prezident İlham Əliyevin müasir azərbaycanlı təfəkküründə Vətən və Xalq təəssübkeşliyi, Şərqin müsbət ənənələri, türk mənəvi-əxlaqi dəyərləri, Qərb və Avropa modellərinə münasib intellekt möhkəm bir özüldür. O, milli- mənəvi, ideoloci dəyərlərimizin hamısında, mədəni, elmi, etno-kulturoloji, eləcə də yaradıcılıq sahələrində irəliləyişi, mənəviyyat məsələlərinə dövlət himayəsini yalnız və yalnız iqtisadi-sosial tərəqqi ilə ayrılmaz şəkildə bağlayır. Biz qəlbən rahatlıq hissi keçirməli və ümidvar olmalıyıq ki, xalqın intellektual, mədəni, mənəvi perspektivi Azərbaycanın potensial iqtisadi-sosial rifahına hesablanmışdır. Prezident İlham Əliyevi müasir insanların, ziyalıların, gənc nəslin fəal surətdə dəstəkləməsi, ona böyük ümidlər bəsləməsi nəticə etibarilə, göz qabağındakı praktik işlərin inikası və perspektivə güclü inamdan irəli gəlir. Gəncliyin, xüsusən də ötən əsrin ortalarında dünyaya gələn nəslin düşüncəsində onun siyasətindəki demokratikliyin, milliliyin, intellektin güclü obrazı var.

Müasir dövrdə İlham Əliyev liderlik yolunda cəmiyyəti də özü ilə birlikdə ucaltmağa qadir olan yeganə dövlət adamıdır.

Prezident İlham Əliyevin geniş düşüncəsində Azərbaycanın indiki inkişaf mərhələsini dönməz prosesə çevirmək və islahatları uğurlu sonluqla tamamlamaq, ölkəni yeniləşdirmək məramı durur. Cəmiyyətin sağlam qüvvələrinin qəbul etdiyi siyasi kursun davamı da elə bundan - ənənələrin etibarlı səviyyədə qorunmasının özünün də bir ənənəyə çevrilməsi ideyasından qaynaqlanır. Bu yol Azərbaycanı daha böyük uğurlara doğru aparır.

Nizami CƏFƏROV,

Milli Məclisin komitə sədri,

AMEA-nın müxbir üzvü

Xalq qəzeti.- 2014.- 24 dekabr.- S.3.