Yolunuz Ağdaşa düşsə...

Son vaxtlar Ağdaşa yolu düşənlər təəccüb və heyrətlərini gizlədə bilmirlər: şəhər, az qala, sökülüb təzədən tikilir. Söhbət, əlbəttə, təkcə şəhərin kənarında, “Ağdaş - Bakı” yolunun sağ tərəfində tikilən müxtəlif təyinatlı ictimai və yaşayış binalarından, salınan küçə və səkilərdən, meydan və yaşıllıq zolaqlarından getmir. Yeri gəlmişkən, deyək ki, ağdaşlılar, haqlı olaraq, buranı “Yeni Ağdaş” adlandırırlar.

Bu gün Ağdaşın, demək olar ki, sökülməyən, bərpa və təmir olunmayan küçəsi yoxdur. Yəqin ki, həssas oxucu bayaqkı heyrət və təəccübün əsl səbəbini hiss etdi. Doğrudan da, Ağdaş gözlərimiz qarşısında tikilir, yeniləşir, daha abad, müasir və gözəl olur.

Elə buradaca inkişaf dinamikasını, sürət və irəliləyişi əks etdirən fakt, rəqəm və göstəriciləri yada salmaq yerinə düşərdi. Ümumiyyətlə, son iki ilin statistikasına nəzər yetirsək, aydın şəkildə görmək olar ki, bütün sahələri əhatə edən inkişaf və yüksəliş əvvəlki illərlə müqayisədə qat-qat artıq olmuşdur. Belə ki, yeni inzibati mərkəzdə Heydər Əliyev Mərkəzinin, “Bayraq” meydanının, rayon icra hakimiyyəti, Yeni Azərbaycan Partiyası rayon təşkilatı və yanğından mühafizə hissəsi üçün inzibati binaların tikintisi davam etdirilmişdir. Azərbaycan Respublikasının Prezidenti İlham Əliyevin sərəncamı ilə ayrılmış vəsait hesabına rayonun 11 yaşayış məntəqəsini birləşdirən, 20 min nəfərin istifadə etdiyi 34 kilometr uzunluğunda Ləki - Pirəzə - Xınaxlı avtomobil yolunun yenidən qurulmasına başlanılmışdır. Ləki qəsəbəsində yeni dəmir yolu vağzalının tikintisində də son tamamlama işləri görülür.

Bundan başqa, Heydər Əliyev parkında əsaslı yenidənqurma işləri davam etdirilmişdir. Burada ana və uşaq otağı, kölgəlik, gənclər kafesi, kinozal elektron oyunlar, tir-atıcılıq mərkəzi, 200 metr uzunluğunda uşaq dəmiryol şəhərciyi, “Şeytan çarxı” və digər attraksionlar qurulmuşdur. Parkın ətrafı 900 metr məsafədə hasara alınaraq, əyləncəli rəsmlərlə bəzədilmiş, işıqlandırma sistemi yenidən qurulmuşdur. 15 minədək gül kolu, 18 minədək dekorativ ağac əkilmiş, 10 min kvadratmetr sahəyə plitə döşənmişdir.

Ümumiyyətlə, ötən il rayonda 303,7 milyon manatlıq - 2012-ci ildəkindən 20,9 faiz çox ümumi məhsul, 7 milyon 32 min manatlıq - 0,1 faiz çox sənaye məhsulu, 112,5 milyon manatlıq - 2,1 faiz çox kənd təsərrüfatı məhsulu istehsal olunmuşdur. Rayonda aparılan tikinti işlərinin həcmi 48,8 milyon manat artaraq 108,7 milyon manat təşkil etmişdir.

Son 10 ildə rayonda 20278 yeni iş yeri yaradılmışdır ki, bunun da 7420-i daimidir.

Sahibkarlığın inkişafı sahəsində ardıcıl tədbirlər görülmüşdür. 2013-cü ilin avqust ayında rayonda Azərbaycan Respublikası İqtisadiyyat və Sənaye Nazirliyinin Sahibkarlığa Kömək Milli Fondu tərəfindən “Sahibkarlığın inkişafına dövlət dəstəyi” mövzusunda tədbir və kredit yarmarkası keçirilmiş, 24 sahibkara 333 min manat güzəştli kredit verilmişdir. Sahibkarlığa Kömək Milli Fondunun vəsaiti hesabına 83 layihə üzrə 1 milyon 523 min manat həcmində kredit verilmişdir. Maliyyə dəstəyinin yaxşılaşdırılması məqsədilə 4 bankın və 2 kredit təşkilatının filialları yaradılmışdır. Sahibkarlığa Kömək Milli Fondunun maliyyə dəstəyi ilə Ərəbocağı kəndi ərazisində 1200 başlıq heyvandarlıq kompleksinin, 80 başlıq atyetişdirmə məntəqəsinin, yeni beton zavodunun, meyvə qurusu istehsalı sahəsinin, “Şirvan-göl” istirahət mərkəzinin tikintisi başa çatmışdır.

Aqrar sahənin inkişafı ilə bağlı məqsədyönlü tədbirlərin həyata keçirilməsi, fermerlərə güzəştli kreditlərin ayrılması məhsul istehsalının artmasına və kənd təsərrüfatı məhsulları istehsalı ilə məşğul olan insanların yaşayış səviyyəsinin daha da yaxşılaşmasına səbəb olmuşdur. Təkcə ötən il rayon üzrə 44 min tona yaxın taxıl istehsal olunmuşdur ki, bu da əvvəlki illərdəkindən xeyli çoxdur. Bu müddətdə ət istehsalı 430,3 ton artaraq 11 min 904 ton, süd 1650 ton artaraq 39 min 789 ton, yun isə 6,6 ton artaraq 183 ton olmuşdur.

Əhalinin elektrik enerjisi, təbii qaz və içməli su təminatının daha da yaxşılaşdırılması sahəsində işlər uğurla davam etdirilir.

Tikintisinə 2010-cu ildə başlanılmış 220/110 kilovatlıq Ağdaş regional elektrik yarımstansiyasında inşaat işləri başa çatmaq üzrədir.

Son vaxtlar şəhər, qəsəbə və kəndlərdə 43 min 698 metr uzunluğunda müxtəlif ölçülü qaz xətləri yeniləşdirilmiş, 989 ədəd yeni qaz sayğacı quraşdırılmış, Tofiqi, Əmirmahmud, Qarağan - Saatlı, Güvəkənd, Əmirarx və Bəylik kəndlərinə təbii qaz verilişi bərpa olunmuşdur.

Heydər Əliyev Fondunun prezidenti, millət vəkili Mehriban Əliyevanın təhsilə və mədəniyyətə qayğısı bütün digər bölgələr kimi, Ağdaş rayonunda da öz konkret nəticələrini verir. Belə ki, son illər Heydər Əliyev Fondu tərəfindən rayonun Pirkəkə kəndində 200 yerlik yeni məktəb binasının tikintisi, Maqsud Şeyxzadə adına təbiət, texniki və humanitar fənlər təmayüllü gimnaziyanın binasının əsaslı təmiri, Habil Əliyev adına Musiqi Məktəbi üçün yeni binanın inşası və ən müasir avadanlıqlarla təchiz olunması bu qayğının bariz nümunəsidir.

Ümumiyyətlə, son 10 ildə Azərbaycan Respublikası regionlarının sosial-iqtisadi inkişafı dövlət proqramları çərçivəsində, eləcə də Heydər Əliyev Fondu tərəfindən rayonda 16 yeni məktəb binası və 7 əlavə sinif otağı inşa edilmiş, 7 ümumtəhsil məktəbinin binaları əsaslı təmir olunmuş, bütövlükdə 8 min nəfər şagirdin təhsil şəraiti yaxşılaşdırılmışdır. Təkcə ötən il rayonun Qəribli, Eymur, Cardam və Kotanarx kəndlərində 4 tam orta məktəb, Şordəhnə və Qaradağlı kəndlərində 2 ümumi orta məktəb, Qaraoğlan kəndində isə 1 ibtidai məktəb üçün yeni bina tikilib istifadəyə verilmişdir. Bundan əlavə, 5 kənddə – Birinci Aral, Qarağan-Şıxlar, Qülbəndə, Ərəbşəki və Tofiqi kəndlərində orta məktəb binasının tikintisinə başlanmışdır.

Səhiyyə sahəsində islahatların həyata keçirilməsi və aparılan profilaktik tədbirlər nəticəsində yoluxucu xəstəliklərin yayılmasının qarşısı alınmış, tibb müəssisələrinin müasir avadanlıqlarla təchizatı davamlı xarakter almışdır. 100 çarpayılıq müasir xəstəxanada əhaliyə nümunəvi tibb xidmətləri göstərilir. Əsas diqqət tibb müəssisələrinin maddi-texniki bazasının daha da gücləndirilməsinə yönəldilmişdir. Məsələn, təkcə son aylar ərzində Qolqəti, Ərəbocağı və Tofiqi kəndlərində yeni həkim məntəqələrinin tikintisi başa çatmışdır.

Son illər Ağdaş rayonunda həyatın bütün sahələrində əldə edilmiş böyük uğurlardan, dinamik inkişaf və yüksəlişdən, genişmiqyaslı tikinti-abadlıq və quruculuq işlərindən danışarkən bir vacib məsələ üzərində ayrıca dayanmaq lazım gəlir. Bu da rayon icra hakimiyyətinin, onun yerli strukturlarının təşəbbüskar və yaradıcı fəaliyyəti, ardıcıl və sistemli icra intizamı, daha çox elmi münasibətə əsaslanan iş üslub və metodlarıdır. Belə bir cəhət xüsusilə diqqəti cəlb edir ki, insan amili, onun vacib sosial ehtiyaclarının vaxtında və dolğun ödənilməsi, bu zaman həssas və qayğıkeş münasibət ön plandadır. Təkcə ötən il rayon icra hakimiyyəti başçısı aparatına 632 təklif, ərizə və şikayət daxil olmuşdur ki, bu da əvvəlki illə müqayisədə 39 ədəd azdır.

Burada bir çox digər amillərlə yanaşı, müntəzəm olaraq yerlərdə keçirilən səyyar-qəbulların rolu böyük olmuşdur. Müvafiq idarə, müəssisə və təşkilatların, hüquq-mühafizə orqanlarının rəhbərlərinin də iştirak etdikləri belə səyyar-qəbullarda vətəndaşlar təkcə onları narahat edən məsələlər barədə danışmırlar. Açıq söhbət və səmimi diskussiya şəraitində keçən görüşlərdə öz qəsəbə və kəndlərinin inkişafı ilə bağlı fikir və təkliflər bildirir, maraqlı təşəbbüslər irəli sürülür. Bu isə aydındır ki, işin daha yaxşı təşkilinə kömək edir. Ötən il rayon icra hakimiyyətinin başçısı 1184 nəfəri qəbul etmişdir. Onu da əlavə edək ki, qaldırılan məsələlərin böyük əksəriyyəti öz müsbət həllini tapmışdır.

...Ağdaşa son səfərimiz zamanı, əgər belə demək mümkünsə, şəhəri “sökülən”, tikilən, qurulan gördük. Sakinlər – ağsaqqallar, ziyalılar, gənclər aparılan genişmiqyaslı tikinti-abadlıq işlərindən böyük razılıqla danışır, bu bölgənin daha abad və xoşbəxt gələcəyindən həvəslə söhbət açır, sabaha dərin inam və ümidlə baxırlar.

Bəli, bu gün Ağdaşda həyatın axarı gurdur. İşin ahəngi bir an belə zəifləmir, şəhər öz simasını hər gün dəyişir, yeni hədəflər, arzu və təşəbbüslər meydana çıxır. Ağdaşlılar bu yüksəliş və inkişaf, gündəlik diqqət və qayğı üçün, ilk növbədə, ölkə Prezidenti İlham Əliyevə öz dərin təşəkkür və minnətdarlıqlarını bildirir, aparılan ardıcıl və qətiyyətli daxili və xarici siyasət xəttini ürəkdən bəyəndiklərini və müdafiə etdiklərini bəyan etdilər.

Ziyəddin SULTANOV

Xalq qəzeti.- 2014.- 23 fevral.- S. 4.