Tərtər: uğurlu addımlar daha

böyük hədəflərdən xəbər verir

Uzun illərdən bəri, bəlkə də, ilk dəfədir ki, yazıya hardan və nədən başlamaqda çətinlik çəkirdim. Səbəb isə təkcə o deyildi ki, nəzərdə tutulan mövzuların hər biri, əslində, ayrıca bir yazı ola bilərdi. Səbəb bir də o idi ki, son aylar həyata keçirilən müxtəlif tədbirlərin, genişmiqyaslı tikinti-quruculuq işlərinin hamısı eyni vaxtda başlanmışdı və sözsüz ki, yazılmağa, geniş şərh olunmağa layiq idi. Tərtər Rayon İcra Hakimiyyəti başçısının birinci müavini Ramiz Şabanovun təklifi bu tərəddüdlərə son qoydu:

– İndicə Qapanlı kəndindən xəbər almışıq, – dedi. – Düşmən tərəfi yenə də atəşkəs rejimini pozub. Kənd atəşə tutulub. Yaralanan var...

Cəbhə xəttindən başlamağı qərara aldıq. Düzdür, əvvəllər də bu kənddən, onun cəsur, qəhrəman sakinlərindən yazmışıq. Məsələ burasındadır ki, Qapanlı Tərtər rayonunun cəbhə xəttinə ən yaxın olan yaşayış məntəqəsidir. Əkin sahələri, örüş yerləri, necə deyərlər, düşmənin iki addımlığındadır. Elə bir gün olmur ki, namərdlər kəndi atəşə tutmasınlar. Onların atdığı son güllə isə kombaynçı Natiq Əliyevi ağır yaralamışdı.

Bütün bunlar isə, heç şübhəsiz ki, Qapanlı kəndinin sosial ehtiyaclarını vaxtında və qədərincə ödəməyi, kənd sakinlərinə göstərilən diqqət və qayğını artırmağı tələb edir. Bu cəhətdən son aylar Qapanlıda, o cümlədən Qaraqoyunlu, Qazyan kəndlərində görülən işlər sakinlər tərəfindən dərin razılıqla qarşılanır.

Bizi ərazi icra nümayəndəsi Zakir Əliyev qarşılayır. Son günlər baş verən hadisələr, adamların əhval-ruhiyyəsi, əkin-biçin işlərinin gedişi barədə sualımıza belə cavab verir:

– Gördüyünüz kimi, düşmənlə üz-üzəyik. Elə sahələr var ki, məsafə 60-70 metrdir. Belə vəziyyətdə burada yaşamaq və işləmək, əlbəttə, çətindir. Qapanlı o qədər də böyük kənd deyil. Burada cəmi 101 ev, 720 nəfər əhali yaşayır. Bununla belə, Qarabağ müharibəsində 14 şəhid vermişik. 17 nəfər isə əlil olmuşdur. Bura yaralanları, evləri-eşikləri dağılanları və s. də əlavə etsək, ümumi mənzərə daha aydın olar. Təsəvvür edin ki, biz əkin-biçin işlərini, məcbur olub, gecələr aparırıq. Cəbhə xəttinə yaxın olan elə bir ev yoxdur ki, ora güllə dəyməsin.

Ancaq bütün bu çətinlik və vahimə bizi qorxutmur. Bir nəfər də olsun burdan başqa yerə getməyib. Kənd sakinləri düşmənin namərd hərəkətlərinə baxmayaraq, heç nədən çəkinmir, doğma yurd-yuvalarında yaşayır, əkir-biçir, gün-güzəranlarını yaxşılaşdırırlar. Son vaxtlar rayonun bütün sərhəd kəndlərinə, o cümlədən Qapanlıya diqqət və qayğı daha da artırılmış, bir sıra vacib sosial məsələlər qısa müddətdə həll edilmişdir. Məsələn, kəndə gələn yol asfaltlaşdırılmış, küçələrdə müasir işıqlandırma sistemi quraşdırılmışdır. Cəbhə xətti Qapanlı ərazisində 6 kilometrdir. Həmin məsafədə 4 metr hündürlükdə mühafizə zolağı salınmışdır. İçməli və təsərrüfat suyu cəhətdən də heç bir çətinlik yoxdur. Hazırda burada 10 artezian quyusu işləyir ki, bu da əkin sahələrini tam təmin edir.

Cəbhə xəttində düşmənin gözünə ox kimi batan, mərd və qəhrəman övladları ilə haqlı olaraq fəxr etdiyimiz Qapanlı kəndindən beləcə nikbin duyğularla, ümid və intizarla ayrılıb Tərtər Rayon Mərkəzi Xəstəxanasına gəldik. Namərd gülləsindən yaralanan Natiq Əliyev burada müalicə olunur. Yarası ağır olsa da, həkimlər Natiqlə görüşüb söhbət etməyə razılıq verdilər. İçəri girən kimi tanıdım. Keçən il taxıl yığımı ərəfəsində görüşmüşdük. Onda da erməni əsgərləri əvvəlcə Qapanlı kəndini, sonra isə taxılçıları atəşə tutmuşdular. Düzdür, o zaman heç kim yaralanmamışdı. Ancaq namərd gülləsi Natiqin idarə etdiyi traktoru sıradan çıxartmışdı. İndi isə güllə özünə dəymişdi...

– Axı biçini gecələr aparırsınız... Hadisə isə gündüz olub...

Natiq, görünür, bu sualı gözləmirdi. Ona görə də tələsik, bir az da əsəbi cavab verdi:

– Düzdür, vəziyyət gərginləşəndə sahələrə gecələr çıxırıq. Bu gün isə qərara gəldik ki, biçini gündüz aparmalıyıq. Bilirsiniz, adama ağır gəlir. Öz torpağında, kəndində çölə-bayıra çıxa bilmə, məhsulunu toplamağa qoymayalar... Belə də dərd olar? Nə olur-olsun, qərarımız qətidir. Hamımız sözü bir yerə qoymuşuq. Əkini-biçini gündüz aparacağıq. Qoy namərd düşmən, nəhayət, bilsin ki, onun gülləsindən qorxub-eləmirik. Əliyalın adama güllə atmağa nə var? Hünəri var, bizim əsgərlərə cavab versin. Güllə atılan kimi bizim əsgərlər ayağa qalxdılar. Düşmən dərhal adəti üzrə qınına çəkildi.

– Yaran necədir? Həkimlər nə deyir?

– Həkimlərin deməsinə görə, qorxulu bir şey yoxdur. Sağ olsun kənd camaatı. Dərhal məni xəstəxanaya çatdırdılar. Yoxsa, qanaxmanı kəsmək olmazdı. Həkimlərə, tibb işçilərinə minnətdaram. Gecikmədən əməliyyata götürdülər. İndi yaxşıyam.

Otağa Tərtər Rayon Mərkəzi Xəstəxanasının cərrahı Mübariz Mahmudov daxil oldu.

– Qəhrəmanımızın kefi necədir? – deyib gülə-gülə Natiqə yaxınlaşdı.

Qısa müayinə həkimi razı saldı. İstilik normada idi, xəstənin ümumi vəziyyəti də qənaətbəxşdir. Həkim bizə tərəf çevrildi:

– Güllə sol ayağına dəymişdi. Belə hallarda bizi daha çox qan itkisi narahat edir. Xoşbəxtlikdən, hadisə kənddən xeyli aralıda, taxıl sahəsində olsa da, onu tezliklə xəstəxanaya çatdıra biliblər. İndi gördüyünüz kimi, vəziyyəti yaxşıdır. Belə igid oğullara erməni gülləsi nə edə bilər ki?!

Mübariz həkimin dediyi son sözlər bayaq Qapanlı kəndində görüşdüyüm əsgərlə söhbətimi yadıma saldı. Əli avtomatlı, qıvraq görkəmli, qarayanız əsgər qətiyyətlə, bir qədər də əsəbi danışırdı:

– Düşmən heç vaxt bizimlə üzbəüz döyüşə bilmir. Onlar yalnız orda-burda gizlənib dinc əhaliyə güllə atırlar. Eybi yox, vaxt gələr, onlara layiq olduqları cavabı verərik...

Tərtərdə son vaxtlar önəmli məsələlərdən biri də abad məhəllələrin yaradılmasıdır. Artıq çoxdan vaxtı çatmış bu vacib sosial məsələ şəhərin, demək olar ki, bütün çoxmərtəbəli binalarının həyətlərində aparılır.

Biz Nizami küçəsində yerləşən beşmərtəbəli binaların həyətində yaradılmış abad məhəllədə olduq. Etiraf edək ki, hazırda burada görülüb başa çatdırılmış işləri cəmi 2 ay əvvəlki vəziyyətlə heç cür müqayisə etmək olmaz. Ürək bulandıran mənzərələrdən, yöndəmsiz köşk və budkalardan, qarajlardan, toyuq damlarından, zibilliklərdən əsər-əlamət yoxdur. İndi beşmərtəbəli binaların həyəti, sözün əsl mənasında, abad və yaraşıqlı parkı xatırladır. Bura əlavə su xətti çəkilmiş, dörd yerdə bulaq tikilmiş, 30 oturacaq qoyulmuş, uşaq-idman meydançası salınmış, ağac gül-çiçək əkilmişdir.

Məzahir Cəfərovla söhbət edirik. Qarşıdakı beşmərtəbəli binada yaşayır.

– Açığını deyim ki, cəmi bir neçə ay bundan əvvəl həyətə düşmək istəmirdik. Qonaq-qara gələndə də natəmizlikdən utanırdıq. Kim harda nə istəsə tikmişdi. Ayaq basmağa yer yox idi. Uşaqları həyətə buraxmağa qorxurduq. Zibil tayaları xəstəlik mənbəyi idi. İndi isə görürsünüz, adamın ürəyi açılır. Hara baxırsan, təmizlik, səliqə-sahman göz oxşayır. İndi biz dincəlmək, əylənmək üçün başqa yerə getmirik. Sadəcə olaraq, ailə-uşaqla həyətə düşür, normal şəkildə dincələ bilirik. Mən, yeri gəlmişkən, sakinlərimiz adından bu nəcib və xeyirxah işin təşkilatçılarına dərin təşəkkürümüzü bildirirəm.

Vətəndaşların qəbulu, onların arzu, təklif və məktublarına həssas və qayğıkeş münasibət, insan amili, sosial problemlərin vaxtında aradan qaldırılması Tərtər Rayon İcra Hakimiyyətinin başçısı Müstəqim Məmmədovun ilk gündən diqqət mərkəzində saxladığı vacib məsələlərdən biridir. Bu cəhətdən yerlərdə keçirilən səyyar qəbulların əhəmiyyəti xüsusilə böyükdür. Belə qəbul və görüşlər imkan verir ki, yerlərdə həqiqi vəziyyət, vətəndaşları narahat edən məsələlər daha obyektiv və operativ şəkildə araşdırılsın və konkret ölçü götürülsün.

Belə bir cəhət xüsusilə razılıq doğurur ki, icra başçısı qısa müddət ərzində rayon ağsaqqalları, ziyalıları, gəncləri ilə ayrı-ayrılıqda görüşlər keçirmiş, Qapanlı, Zolgəran, Sarıcalı, Qaradağlı, Qarağacı kəndlərində təşkil edilən səyyar qəbullarda iştirak etmişdir. Məni isə məsələnin başqa tərəfi daha çox maraqlandırırdı. Həmin görüş və qəbullarda irəli sürülən arzu və təkliflərin yerinə yetirilməsi nə vəziyyətdədir? Rayon icra hakimiyyətindən aldığım arayış məni sevindirdi: Qaldırılan məsələlərin, demək olar ki, hamısı öz müsbət həllini tapmışdır.

Əlbəttə, işin bu cür təşkili, insanlara göstərilən diqqət və qayğı, yaradıcı və təşəbbüskar fəaliyyət bütün sahələrdə əsaslı yüksəlişə səbəb olur, dinamik inkişafa yol açır. Son aylar Tərtər şəhərində və ayrı-ayrı yaşayış məntəqələrində aparılan geniş tikinti-quruculuq işləri buna yaxşı misaldır. Belə ki, şəhərin ümummilli lider Heydər Əliyevin adını daşıyan mərkəzi meydanı yenidən qurulur. 8200 kvadratmetr sahəsi olan mərkəzi meydan keyfiyyətli tamet daşları ilə yenidən üzlənməyə başlanmışdır. Meydanda yağış sularının axıdılması üçün 400 metr yeni kanalizasiya xətti çəkilmiş, prospektdə 1420 metr su xətti yenilənmişdir. Heydər Əliyev meydanında və Heydər Parkının ətrafında müasir tipli işıqlandırma sistemi quraşdırılmışdır. Uzunluğu 4 kilometr olan səkilərdə yenidənqurma işləri aparılır. Burada əyləncə mərkəzi yaradılmış, karusellər quraşdırılaraq uşaqların istifadəsinə verilmişdir.

Rayon icra hakimiyyətinin inzibati binasında əsaslı təmir işləri aparılır. Şəhərin V.Hüseynov küçəsindəki 5 mərtəbəli 36 mənzilli yaşayış binasının əsaslı təmirinə başlanılmışdır. Bundan başqa, Nizami küçəsində 4 ikimərtəbəli 16 mənzilli yaşayış binalarının dam örtüklərinin dəyişdirilməsinə isə yaxın vaxtlarda başlanılacaqdır.

Şəhərin Nizami küçəsində 100 yerlik körpələr evi uşaq bağçasının, Olimpiya idman kompleksinin tikintisinə başlanılmışdır. Qarabağ müharibəsi əlilləri və şəhid ailələri üçün 54 mənzilli yaşayış evinin, qaz istismarı idarəsinin, YAP rayon təşkilatının inzibati binalarının tikintisində isə son tamamlama işləri aparılır. 420 yerlik Qazyan kənd, 150 yerlik Borsunlu kənd, 150 yerlik Rəcəbli ümumi orta məktəblərində əsaslı təmir işləri başa çatdırılmışdır. Şəhərdə 12 kilometr uzunluğunda daşıyıcı qaz, 650 metr uzunluğunda paylayıcı qaz xətləri qaydaya salınmışdır.

Kəndarası yollarda da əsaslı və cari təmir işlərinə başlanılmışdır. Belə ki, uzunluğu 6 kilometr olan 4 yaşayış məntəqəsini birləşdirən Qapanlı - Seysulan yolunun çınqıl örtüyü bərpa olunmuş, bir hissəsinə asfalt örtüyü salınmışdır. Hazırda yola asfalt döşənməsi davam etdirilir. 4 kəndi birləşdirən Qaradağlı - Xoruzlu yolunun 6,5 kilometrlik hissəsi, uzunluğu 10 kilometr olan Sarov - Borsunlu yolu, 10 kilometrlik Qaynaq - Qazyan kəndarası yollarının çınqıl örtüyü bərpa edilmişdir.

Uzun illər içməli su sarıdan əziyyət çəkən Tərtər şəhərinin Səməd Vurğun və Rövşən Kərimov küçələrinin sakinlərinin su problemini həll etmək üçün subartezian quyusunun qazılmasına başlanmışdır. Cəmilli, Seydimli, Balakəngərli, Hacıqərvənd və Hüsənli kəndlərində 5 içməli subartezian quyusu istifadəyə verilmişdir. Müxtəlif kəndlərdə əkin və həyətyanı sahələrin suvarılması üçün 20 subartezian quyusunda artıq son tamamlama işləri aparılır. 9,3 kilometr uzunluğunda olan kanalda əsaslı təmir işləri aparılmış və yenidən qurulmuşdur. Saniyədə 3 kub su tutumu olan kanal 8 kənddə 3,6 min hektar əkin sahəsini suvaracaqdır. Bundan başqa, Prezident İlham Əliyevin sərəncamı ilə rayonun Hüsənli, Küçərli, Qazyan, Kəbirli, Xoruzlu və Sarıcalı kəndlərində 6 subartezian quyusunun qazılmasına başlanılmışdır.

Göründüyü kimi, Tərtər öz inkişafının yeni mərhələsinə qədəm qoymuşdur. Rayonda həyatın axarı gurdur, hər addımda yeniliklə rastlaşırsan, tikinti-abadlıq və quruculuq işləri yeni vüsət alır. Qısa müddət ərzində əldə edilmiş uğurlu nəticələr, dinamik inkişaf və yüksəliş, rayonda hökm sürən sağlam mənəvi-psixoloji mühit, yaradıcı və təşəbbüskar ab-hava belə deməyə əsas verir ki, cəbhə xəttində yerləşən bu bölgənin daha abad və xoşbəxt günləri hələ qabaqdadır. Tərtərlilər haqlı olaraq, bütün uğurlar, gündəlik diqqət və qayğı üçün, ilk növbədə, ölkə Prezidenti İlham Əliyevə öz dərin təşəkkür və minnətdarlığını bildirir, onun rəhbərliyi ilə aparılan müdrik, qətiyyətli daxili və xarici siyasət xəttini daim dəstəkləyəcəklərini bəyan edirlər.

Ziyəddin SULTANOV

Xalq qəzeti.- 2014.- 8 iyul.- S.6.