Tarixi keçmişini qorumaqla

müasirləşən Gədəbəy

Gədəbəy rayonunda olarkən bir məsələni vurğulamaq istəyirəm ki, hər yerdə olduğu kimi, burada da inkişaf gedir, quruculuq vardır, abadlıq işləri aparılır.

İlham Əliyev

Azərbaycan Respublikasının Prezidenti

Əgər ucqar bir dağ rayonunda sənətə, sözə, saza, sənətkara yüksək qiymət verilərək gözəl bir Aşıq Musiqi Məktəbi tikilib istifadəyə verilirsə, demək, qədim bir xalqın, elin, obanın tarixi qorunur, yaşadılır. Yaxud, yüz illərlə nəinki asfalt yolu, heç düz-əməlli torpaq yolu da olmayan kəndlərə asfalt yol çəkilirsə, həyətlərdən içməli su axırsa, kanalizasiya xətləri quraşdırılırsa, evlərdə qaz alovlanırsa, deməli, o dağ rayonu həm də müasirliyə qovuşur. Bəli, tarixi keçmiş qorunmaqla, müasirliyə də geniş meydan verilir. Bu gün Gədəbəydə vəziyyət məhz belədir...

Min nəfərlik amfiteatr

...Rayon icra hakimiyyətinin başçısı Ramiz Yediyarovu kabinetdə tapmaq müşkül məsələdir. Günün əksər hissəsini rayonda tikilən müxtəlif obyektlərdə, kənd və qəsəbələrdə keçirir, adamlarla görüşür, bəzi problemləri elə yerindəcə həll edir, tapşırıqlarını, məsləhətlərini verir. Bu dəfə də şəhərin mərkəzi parkında görüşdük. Qeyd edək ki, ümummilli lider Heydər Əliyevin adını daşıyan bu park son vaxtlar elə gözəl, füsunkar olub ki, günün istənilən vaxtında burada xeyli adam istirahət edir. Uşaqlar üçün hər cür əyləncə var, attraksionlar quraşdırılıb, burada sürətli internetə qoşulmaq mümkündür. Maraqlıdır ki, parkda gəzməyə yaxın rayonlardan, Şəmkirdən, Tovuzdan, hətta Gəncədən gələnlər olur. Burada ulu öndər Heydər Əliyevin abidəsinin ətrafı mərmər daşla kompleks formada tikilmişdir. Heykəlin ön hissəsində yerə mərmər daşlar döşənmiş, kənarları müasir üslubda işlənmiş və işıqlandırma sistemi ilə təchiz edilmişdir.

– Gərək elə edək ki, köhnə, primitiv heç nə qalmasın, yeni tikilənlər isə müasirliyi ilə yanaşı, həm də milli memarlıq ənənələrinə uyğun olsun, - deyə R.Yediyarov parkda və onun ətrafında görülən işlərdən danışır:

– Gördüyünüz bu amfiteatr isə öz görkəmi ilə parkı və ona yaxın kompleksi tamamlayacaqdır.

Sanki, parka söykənən amfiteatr üçün gözəl bir yer seçilib. Bir tərəfində ötən ilin sentyabrında ölkə Prezidentinin iştirakı ilə açılan Aşıq Musiqi Məktəbinin orijinal binası, bir qədər aşağıda yeni inzibati binalar, əsaslı şəkildə yenidən qurulmuş digər obyektlər amfiteatrın əzəmətini daha da artırır. Tamaşaçı sayı 1000 nəfər olan amfiteatrda ən müxtəlif tədbirlər həyata keçirmək mümkün olacaq. Hazırda burada son tamamlama işləri görülür və Gədəbəydə tezliklə daha bir möhtəşəm obyekt öz qapılarını rayon sakinlərinin üzünə açacaqdır. Yeri gəlmişkən, qeyd edək ki, rayon icra hakimiyyəti başçısının özünün gözəl zövqü var. Ona görə də son vaxtlar Gədəbəydə istifadəyə verilən müxtəlif obyektlər, istər yol olsun, istər park və ya bulaq, böyük maraqla qarşılanır. Digər tərəfdən, inşa olunan və ya yenidən qurulan obyektlərə rayon icra hakimiyyəti tərəfindən gündəlik nəzarət var.

...Rayona daxil olanda hiss edirsən ki, həm qədim, həm də müasir bir şəhərə gəlmisən. Müasir avtobus dayanacaqları, orijinal qəzet köşkləri, qülləli saat və digər tikililər son ayların obyektləridir. Əvvəllər heç vaxt olmayıb. Yolların kənarlarındakı səkilər, istinad divarları, müasir işıqlandırma sistemi və sair elementlər də Gədəbəydə işlərin təkcə bu gün üçün deyil, onilliklər üçün nəzərdə tutulduğundan xəbər verir. Hələ tezliklə şəhərdə çirkab və içməli su xəttinin tikilib istifadəyə verilməsi infrastrukturun tamamilə yeniləşəcəyini göstərir. Əslində, belə də olmalıdır. Çünki əsrarəngiz təbiəti, zəngin maddi və mənəvi sərvətləri olan Gədəbəydə turizmin inkişaf etdirilməsi üçün müasir nə varsa, tətbiq olunmalıdır. Sevindirici haldır ki, işlər də bu istiqamətdə çox uğurla aparılır.

Dağların qoynunda dolanan yollar...

Ölkə Prezidentinin 20 sentyabr 2013-cü il tarixli sərəncamı ilə tikilən 13,3 kilometrlik Qarıkənd-Miskinli-Çalburun avtomobil yolunda aparılan işlərlə hələ ötən ilin noyabrında tanış olmuşduq və düzü, heyran qalmışdıq. Cəmi iki ay ərzində dağların qoynuna dolanıb ta Çalburuna kimi gedib çıxan yolun böyük bir hissəsi asfaltlaşdırılmışdı. Qışda və yazın əvvəllərində işlərə bir qədər fasilə verilsə də, indi yenidən böyük canlanma var idi. Müxtəlif texnika-traktor, ekskavatorlar yollara səpələnmişdi. Bir tərəfdə torpaq-hamarlama işləri görülür, digər tərəfdə asfaltlaşdırmaya hazırlıq gedirdi. Elə yolsalanlarla kənd camaatı da, necə deyərlər, qaynayıb–qarışıb. Kimisi fəhlələrə yemək təklif edir, kimisi meyvə uzadır, bir başqası su gətirir. Yolun kənarında əlindəki əsaya söykənib yolsalanlara baxan qoca kişinin səsini ekskavatorun gur səsindən zorla eşididrəm:

– Allah Prezidentimizin ömrünü uzun eləsin, ölmədim bu günü də gördüm ki, kəndimizə asfalt yol çəkilir...

Qeyd edək ki, uzunluğu beş kilometr olan Qızıltorpaq-Ağbaşlar avtomobil yolunda isə asfaltlaşdırma işləri başa çatdırılmışdır.

Gədəbəydə başqa bir yolun tikintisi isə əsl möcüzədir. Onun uzunluğu, nə az, nə çox, düz 56 kilometrdir. Söhbət Gədəbəy-Novosaratovka-Qaravəlilər avtomobil yolundan gedir. Azərbaycan Respublikası Prezidentinin 6 sentyabr 2012-ci il tarixli sərəncamına əsasən çəkilir. Artıq bu yolun 48 kilometri asfaltlaşdırılmışdır, yerdə qalan 8 kilometrində qrunt işləri aparılıb və işlər tezliklə başa çatdırılacaq. Yəqin ki, sentyabr ayında gədəbəylilər çoxdan həsrətində olduqları yoldan tamamilə istifadə edə biləcəklər.

— Rayon icra hakimiyyəti başçısının müavini Vüsal Musayevlə yolun bir kənarına çəkilib dağların ətəyində yerləşən Qarıkəndə, Misginliyə, Çalburuna tərəf baxırıq. Tarixində asfalt yol görməyən kəndlərdir. Adam heç inana da bilmir ki, bu reallıqdır. Əslində, bu günümüzdür, inkişafımızdır, yüksəlişimizdir. Yadıma keçən il sentyabrın 10-da ölkə Prezidenti İlham Əliyevin Gədəbəydə ictimaiyyət nümayəndələri qarşısında çıxış edərkən dediyi sözlər düşdü: - “Bu gün buraya gələrkən körpünün açılışında iştirak etmişəm. Kənd yolu çəkilir. Təqdimatda göstərildiyi kimi, heç vaxt yol olmayan yerlərdə 56 kilometr uzunluğunda kənd yolları tikilir. Torpaq yol olmuşdur, insanlar əziyyət çəkirdilər. İndi kənd yolu çəkilir...Şəmkir-Gədəbəy yolu yaxşı vəziyyətdədir, rahat yoldur. Növbəti illərdə yeni kənd yollarının tikintisi də nəzərdə tutulub. Bu gün mənə bu məsələ təqdim olundu. Göstəriş veriləcəkdir ki, bütün kəndlərə gedən yollar yenidən qurulsun, Gədəbəy rayonu daha da sürətlə inkişaf etsin, burada insanlar daha da rahat, xoşbəxt, rifah, əmin-amanlıq içində yaşasınlar”.

Yeni bina, yeni iş, yeni həyat

Gədəbəydə hər hansı bir inzibati binanı barmaqla saymaq olardı. Onlar da nə vəziyyətdə idi, təsvir etməyə ehtiyac qalmır. Amma indi tamamilə başqa bir mənzərədir. Gədəbəyə hər səfərimdə yaraşıqlı, milli üslubda inşa olunmuş yeni bir bina görürəm. Bax, elə götürək bu yaxınlarda tikilib istifadəyə verilmiş Uşaq Yaradıcılıq Mərkəzinin binasını. Eyni vaxtda 336 uşağın məşğul olduğu mərkəzdə hər cür şərait var. Artıq qısa vaxt ərzində Gədəbəydə neçə-neçə istedadlı uşaq üzə çıxıb. Xeyirxah, gözəl bir işdir, alqışa layiqdir. Rayon polis şöbəsinin, baytarlıq idarəsinin, Fövqəladə Hallar Nazirliyinin yanğından nəzarət xidmətinin rayon şöbəsinin yeni inzibati binaları da tezliklə istifadəyə veriləcək və Gədəbəydə gözəl binaların sayı daha da artacaqdır.

Sosial obyektlərin binaları da bir-birinin ardınca istifadəyə verilir və rayona xüsusi gözəllik gətirməklə həmin sahələrdə nəzərdə tutulan işlərin daha dolğun həyata keçirilməsinə imkan yaradır. Heydər Əliyev Fondu hesabına tikilən hər biri 100 uşaq üçün nəzərdə tutulan bağçaların tikintisində olduq. Gözəl, keyfiyyətli iş gedir, uşaqlar üçün hər cür şərait nəzərə alınıb. Digər bağça Novosaratovka kəndində inşa olunur. Kənd sakinləri deyirlər ki, körpələrimiz tezliklə müasir bir bağçaya qədəm qoyacaqlar.

Məktəb binalarının təmiri, yenidənqurulması, bərpası, o cümlədən yenilərinin tikilməsi işi geniş vüsət alıb. May ayında Arıxdam kəndində 480 yerlik, Samanlı kəndində 180 yerlik tam orta məktəblər tikilib istifadəyə verilib. İsalı kəndində isə biri tikilir. Digər kəndlərdə də yeni məktəblərin, uşaq bağçalarının tikintisi nəzərdə tutulub.

...Gədəbəydən çıxarkən yolumu 20 Yanvar küçəsindən saldım və səmimi deyirəm, gözlərimə inanmadım. Hamar yol, gözəl səki, yaraşıqlı istinad divarları, müasir işıqlandırma sistemi küçəni tanınmaz edib. Həm bu küçədə, həm də şəhərin mərkəzi hissəsində yol kənarlarında yerləşən, müasir memarlıq tələblərinə cavab verməyən ticarət köşkləri tədricən götürülür və onlar üçün başqa yerdə torpaq sahələri ayrılır.

Gədəbəyə müasirlik gətirilir. Amma tarixi keçmiş də unudulmur, onun hər daşı, qalası qorunur, təbliğ olunur. Ölkə Prezidentinin bu sahədə qarşıya qoyduğu vəzifələr yerli icra orqanları tərəfindən uğurla həyata keçirilir. Uğur olsun, Gədəbəy!

Hamlet QASIMOV

Xalq qəzeti.- 2014.- 10 iyul.- S.6.