Ulu öndərin Azərbaycanda siyasi hakimiyyətə

gəlişinin 45-ci ildönümü regionlarda qeyd olunur

Suraxanı

Suraxanı rayonundakı Heydər Əliyev Mərkəzinin, rayon icra hakimiyyətinin və Yeni Azərbaycan Partiyası rayon təşkilatının birgə təşkilatçılığı ilə keçirilən tədbir Yeni Suraxanı qəsəbəsinin “14 iyul” küçəsində ulu öndərin siyasi hakimiyyətə gəldiyi günü tərənnüm etdirən xatirə kompleksinin nümayişi ilə başlanmışdır.

İctimaiyyət nümayəndələrinin hər il 14 iyul tarixində xatirə kompleksini ziyarət etməsi artıq bir ənənə halını almışdır. Xatırladaq ki, bu kompleks 2008-ci ildə rayon icra hakimiyyəti başçısı yanında şuranın üzvlərinin təşəbbüsü ilə yaradılmışdır.

Tədbir iştirakçıları ümummilli liderin adını daşıyan parkda ucalan abidəsini ziyarət etmiş, önünə tər güllər qoymuş, “Gözəl şəhər: Bakı riqalıların gözü ilə” adlı fotosərgisinə baxdıqdan sonra Heydər Əliyev Mərkəzinin elektron lektoriya zalında ulu öndərin siyasi hakimiyyətə gəlişinin 45 illiyi münasibətilə konfrans öz işinə başlamışdır. Tədbiri giriş sözü ilə açan rayon icra hakimiyyəti başçısının müavini Sevinc Hüseynova qeyd etmişdir ki, 14 iyul xalqımızın tarixi taleyində oynadığı misilsiz rolu ilə həmişə xatırlanır və heç vaxt unudulmayacaq günlərin sırasına həkk olunmuşdur.

Sevinc Hüseynova Azərbaycanı müstəqil dövlət quruculuğuna aparan yolun məhz 1969-cu il iyulun 14-dən – xalqımızın böyük oğlu Heydər Əliyevin ilk dəfə hakimiyyətə gəlişindən sonra başlandığı xüsusi vurğulamışdır. Natiq bildirmişdir ki, dahi şəxsiyyətin yorulmaz fəaliyyəti nəticəsində 1970-1981-ci illər Azərbaycanın quruculuq salnaməsinin ən parlaq səhifəsini təşkil etmişdir.

İcra hakimiyyəti başçısının müavini xatırlatmışdır ki, ümummilli liderin hakimiyyətdə olduğu həmin illər respublikanın hər yerində olduğu kimi, Suraxanı rayonunda da iqtisadiyyatın sürətli inkişafı baxımından xüsusilə yadda qalmışdır. O vaxt rayonda böyük quruculuq işləri görülmüş, yeni istehsal müəssisələri fəaliyyətə başlamış, bir çox sosial təyinatlı obyekt, o cümlədən təhsil, səhiyyə və mədəniyyət ocaqları tikilib istifadəyə verilmiş, yeni yollar, körpülər salınmışdır.

Milli Məclisin deputatı Sevinc Fətəliyeva qeyd etmişdir ki, tarix uzaqlaşdıqca Heydər Əliyev dühasının əzəməti, onun şəxsiyyətinin böyüklüyü daha aydın dərk edilir. Əslində, bu qeyri-adi şəxsiyyət hər zaman bizim əhatəmizdədir. Çünki ulu öndərin layiqli davamçısı Prezident İlham Əliyev Heydər Əliyevin şah əsəri olan müstəqil Azərbaycanı məhz onun miras qoyduğu dövlətçilik prinsipləri ilə idarə edir, ümummilli liderin imkan tapıb həyata keçirə bilmədiyi ideyaları tarixə çevirir.

Yeni Azərbaycan Partiyası Suraxanı rayon təşkilatının sədri Vüqar Seyidov qeyd etmişdir ki, Heydər Əliyevin ömür yoluna, dövlət başçısı kimi fəaliyyət dövrünə nəzər salsaq, onun Azərbaycan xalqına misilsiz xidmətlərinin parlaq nümunələri gözlərimiz önündə canlanar.

Bakı Dövlət Universitetinin tələbəsi Sevda Kərimli, 114 nömrəli tam orta məktəbin 11-ci sinif şagirdi Famil Şirəliyev öz çıxışlarında bildirmişlər ki, bu gün ölkəmizdə Prezident İlham Əliyevin rəhbərliyi altında düşünülmüş və məqsədyönlü gənclər siyasəti uğurla həyata keçirilir.

Sonda Suraxanı rayonundakı Heydər Əliyev Mərkəzinin sifarişi ilə hazırlanmış “Əyilməz iradə” filmi nümayiş etdirilmişdir.

Nərimanov

Xalqımızın ümummilli lideri Heydər Əliyevin Azərbaycanda siyasi hakimiyyətə gəlişinin 45-ci ildönümü paytaxtın Nərimanov rayonunda da əsl ümumxalq bayramı kimi qeyd olundu. Bu münasibətlə metronun “Nəriman Nərimanov” stansiyasının yanındakı parkda möhtəşəm bayram konserti təntənəli şəkildə keçirildi.

Bayram tədbirində qeyd olundu ki, ulu öndər Heydər Əliyev öz xalqının taleyində müstəsna rol oynayan, Vətənin ağır günündə xilaskarlıq və quruculuq missiyasını üzərinə götürərək çətin və kəşməkeşli mücadiləsini qələbə ilə başa vuran siyasət dahilərindən biridir. Dahi şəxsiyyət Heydər Əliyev 1969-1982-ci illərdə Azərbaycana rəhbərlik etdiyi illərdə daim ölkəmizin inkişafı naminə, xalqın gələcəyi uğrunda əlindən gələni etmiş, Azərbaycan tarixini, ensiklopediyasını, dilini, ədəbiyyatını, hərbi və təhlükəsizlik sistemini, elmini, kənd təsərrüfatını, sənayesini inkişaf etdirmişdir.

Bildirildi ki, Azərbaycan 1991-ci ildə müstəqillik əldə etdikdən sonra Heydər Əliyevə böyük ehtiyacın olduğunu dərk edən Azərbaycan xalqı çətin bir şəraitdə onu ölkə rəhbərliyinə gətirmişdir. Yalnız Heydər Əliyev fenomeni bu ağır məsuliyyətin öhdəsindən gələ bildi və onun fövqəladə siyasi iradəsi, zəngin dövlətçilik təcrübəsi, əsl liderlik keyfiyyətləri sayəsində xalqımız və dövlətimiz onu gözləyən böyük bəlalardan və təhlükələrdən xilas oldu.

Ümummilli liderimizin gərgin əməyi sayəsində ölkədə siyasi zərurətə çevrilmiş ictimai-siyasi sabitlik 90-cı illərin ortalarından etibarən təmin edilmiş, bununla da, gələcək uğurların əsası qoyulmuşdur. Müstəqil Azərbaycanın memarı və qurucusu Heydər Əliyevin 1993-2003-cü illərdə ölkəyə rəhbərliyi dövründə konstitusiya qəbul edilmiş, respublikada ölüm hökmü ləğv olunmuş, xarici şirkətlər neft-qaz yataqlarının birgə işlənməsinə cəlb edilmiş və Xəzər nefti dünya bazarına çıxarılmışdır. Dahi rəhbərin fəaliyyəti nəticəsində respublikada həyatın elə bir sahəsi qalmamışdır ki, orada inkişaf və yeniliklər olmasın.

Nərimanov rayonunda keçirilən bayram konsertində ölkəmizin tanınmış incəsənət ustalarının, eləcə də qardaş Türkiyənin məşhur müğənnisi Soner Sarıkabadayının ifa etdikləri rəngarəng musiqi nömrələri paytaxt sakinləri və şəhərimizin qonaqları tərəfindən böyük maraqla izləndi, yüksək bayram əhval-ruhiyyəsi və hərarətlə qarşılandı. Bayram tədbiri gecə yarısı möhtəşəm atəşfəşanlıqla sona çatdı.

Zaqatala

Heydər Əliyev Mərkəzində Azərbaycan xalqının ümummilli lideri Heydər Əliyevin ilk dəfə hakimiyyətə gəlməsinin 45-ci il dönümünə həsr olunmuş “Milli inkişafımızın başlanğıc günü” adlı elmi-praktik konfrans keçirilmişdir.

Tədbir Azərbaycan Respublikasının Dövlət himninin səsləndirilməsi ilə başlanmış, ulu öndərin həyat və yaradıcılığına həsr olunmuş film nümayiş etdirilmişdir. Sonra rayon icra hakimiyyətinin başçısı Mübariz Əhmədzadənin “Milli inkişafımızın başlanğıc günü” adlı geniş məruzəsi dünya şöhrətli siyasi xadimin Vətən və xalq qarşısındakı xidmətlərindən, zəngin dövlət idarəçiliyi təcrübəsindən danışmış, ölkəmizin müstəqilliyinin qorunub saxlanmasında, Azərbaycanın parçalanma təhlükəsindən xilas edilməsində, iqtisadiyyatımızın, elm və təhsilimizin inkişafında, respublikamızın dünya birliyinə inteqrasiyasında müstəsna rolunu nəzərə çatdırmış, həmçinin ulu öndərimizin respublikamızın bu günü və gələcəyi naminə müəyyənləşdirdiyi inkişaf strategiyasının əhəmiyyətini vurğulamışdır. Natiq ümummilli liderimizin siyasi xəttinin bu gün də dövlətimizin başçısı İlham Əliyev tərəfindən əzmlə və uğurla davam etdirildiyini və xalqımızı parlaq, firavan gələcək gözlədiyini yığıncaq iştirakçılarının diqqətinə çatdırmışdır.

Konfransda çıxış edən digər natiqlər ümummilli liderimiz Heydər Əliyevin Azərbaycanın idarəçilik sükanı arxasına keçdikdən sonra milli dövlətçilik ideyalarını dirçəltdiyini, xalqımızı qardaş qırğınından, vətəndaş qarşıdurmasından, müstəqilliyimizi itirmək təhlükəsindən xilas etdiyini, müasir tariximizə dövlətçiliyimizin xilaskarı, banisi və qurucusu kimi daxil olduğunu qeyd etmişlər.

Həmin gün axşam Heydər Parkında rayonun incəsənət ustalarının iştirakı ilə bayram konserti təşkil edilmişdir.

Qax

Ulu öndər Heydər Əliyevin Azərbaycanda siyasi hakimiyyətə gəlişinin 45-ci ildönümü ilə bağlı ümümrayon tədbiri İçəribazarda təşkil olunmuşdu.

Tədbirdə bayram münasibətilə rayon sakinlərini təbrik edən rayon icra hakimiyyətinin başçısı Musa Şəkiliyev bildirdi ki, 45 il əvvəl Heydər Əliyevin gəlişi ilə Azərbaycanın gələcək müstəqilliyinə hesablanmış məqsədyönlü tədbirlər nəticəsində xalqımızın milli şüurunun oyanışı, bütün sahələrdə sosial-iqtisadi inkişaf dövrü başladı. Respublikamız qısa müddətdə SSRİ-nin böyük sənaye-mədəniyyət mərkəzlərindən birinə çevrildi. Beləliklə, 80-ci illərin əvvəllərində Sovet İttifaqının ən inkişaf etmiş ölkəsinə çevrilən Azərbaycan artıq müstəqilliyə hazır idi.

Əslində, ulu öndərimizin memarı və qurucusu olduğu bugünkü müasir Azərbaycanın müstəqilliyinin təməli də məhz, həmin illərdə onun tərəfindən qoyulmuşdur. Ona görə də qədirbilən Azərbaycan xalqı hər il dünya şöhrətli siyasi xadim, türk dünyasının böyük oğlu, ümummilli liderimiz Heydər Əliyevin ölkəmizdə ilk dəfə siyasi rəhbərliyə gəldiyi günü haqlı olaraq, özünün əziz bayramı kimi qeyd edir.

Heydər Əliyevin xalqımız qarşısındakı xidmətlərindən biri də onun İlham Əliyev kimi siyasi varis yetişdirməsidir. Hazırda Azərbaycan Respublikası Prezidenti İlham Əliyevin rəhbərliyi ilə dinamik inkişaf yolu ilə uğurla addımlayır.

Çıxışının sonunda rayon sakinlərinə xoş arzularını çatdıran Musa Şəkiliyev qeyd etdi ki, Azərbaycan xalqı yaşadıqca Heydər Əliyev də yaşayacaqdır.

Sonra bayram münasibətilə rayonun mədəniyyət kollektivləri iştirakçılar qarşısında böyük konsert proqramı ilə çıxış etdilər.

Vaqif BAYRAMOV,

Mirbağır YAQUBZADƏ,

İlqar HƏSƏNOV

Xalq qəzeti.- 2014.- 15 iyul.- S.6.