Azərbaycanlı pianoçunun adına beynəlxalq müsabiqə keçirilmişdir

Fransada yaşayan həmyerlimiz Adilə Əliyevanın adına pianoçuların 9-cu Beynəlxalq müsabiqəsi keçirilmişdir. Hər iki ildən bir Fransanın Qayar şəhərində keçirilən müsabiqə Fransa hökuməti və müxtəlif sponsorların dəstəyi ilə baş tutmuşdur.

Diasporla İş üzrə Dövlət Komitəsindən aldığımız məlumatda deyilir ki, müsabiqədə ABŞ, Avropa ölkələri, Braziliya, Yaponiya, Cənubi Koreya, Çin və digər ölkələrin musiqiçiləri təmsil olunmuşlar. Adilə Əliyevanın rəhbərliyi ilə tanınmış musiqiçilərdən ibarət münsiflər heyəti 255 səs yazısı arasından 36 nəfəri seçərək yarımfinal və finalda iştirak etmək üçün Qayara dəvət etmişdir. Adilə Əliyeva adına pianoçuların 9-cu Beynəlxalq müsabiqəsinin qalibləri bir çox tanınmış müsabiqələrin laureatlarıdır. Müsabiqənin laureat və diplomantları Fransa, Almaniya, Rusiya, İngiltərə, həmçinin Azərbaycanın istedadlı pianoçuları olmuşlar. Yekun konsertdə şəhərin meri, Fransa parlamentinin deputatları, Azərbaycan səfirliyinin və diasporunun nümayəndələri iştirak etmişlər. Müsabiqə Fransa, İsveçrə, Rusiya mətbuatında geniş işıqlandırılmışdır.

Qeyd edək ki, Azərbaycanın əməkdar artisti, istedadlı pianoçu Adilə Əliyeva Fransa Ali Beynəlxalq Musiqi Akademiyasının direktorudur. Hazırda Fransada yaşayan musiqiçi Bakı şəhərində dünyaya gəlmişdir, sonradan Moskvaya köçərək orada Çaykovski adına Moskva Konservatoriyasını bitirmişdir.

Samirə ƏLİYEVA,

“Xalq qəzeti”. - 2014. - 10 iyun. - S. 5.