Mədəni-maarif işinin ön sırasında

Hacı Əliyevi çoxdan – 1998-ci ildən tanıyıram. O zaman ölkəmizdə sayca ikinci olan demokratik prezident seçkiləri keçirilirdi. Redaksiya rəhbərliyinin tapşırığı ilə Sabunçu rayonunda Seçki Komissiyalarının səsverməyə hazırlığı barədə material hazırlayır və şəkillər çəkirdim.

Seçki Komissiyasının üzvü Hacı Əliyevlə cəmi 20 dəqiqəlik söhbətimiz zamanı onun milli təəssübkeşlik hisslərinə, üzərinə düşən vəzifəni yerinə yetirmək üçün nümayiş etdirdiyi məsuliyyətə, sənədlərlə işi qurmaq məharətinə, ən başlıcası, insani keyfiyyətlərinə, seçicilərlə ünsiyyətdəki səmimiyyət və mehribanlığına heyran oldum. Sonralar onunla bələdiyyə, parlament və prezident seçkilərində dəfələrlə görüşdük. 2005-ci ildən isə 26 saylı Sabunçu birinci Dairə Seçki Komissiyasının sədridir. Kifayət qədər təşkilatçılığı, işgüzarlığı və siyasi qətiyyəti olan bir soydaşımızdır. Məhz həmin keyfiyyətlərinə görə müxtəlif illərdə çoxsaylı mükafat və təltiflərə, 2011-ci ildə isə dövlət başçısının sərəncamı ilə “Tərəqqi” medalına layiq görülüb.

Hacı Nurəddin oğlu Əliyevin ömür yolu milli mədəniyyətimizin təbliğinə, mədəni-maarif işinin inkişafına həsr olunub – desək, qətiyyən yanılmarıq. 1976-cı ildə o zamankı M.Ə.Əliyev adına Azərbaycan Dövlət İncəsənət İnstitutunun mədəni-maarif fakültəsini bitirən Hacı hərbi xidmətdən sonra Zabratda müəllimlik etmiş, Ağsuda mədəniyyət evində çalışmışdır. Sonralar Bakının Bilgəh və Bakıxanov qəsəbələrindəki mədəni-maarif ocaqlarında işləmiş, 1997-ci ildə isə Sabunçu Rayon İcra Hakimiyyətinin təqdimatı ilə ARDNŞ “Balaxanıneft” NQÇİ-nin Adil İsgəndərov adına Mədəniyyət Mərkəzinin direktoru vəzifəsinə təyin olunmuşdur. Artıq bir neçə ildir həmin mədəniyyət ocağı Fövqəladə Hallar Nazirliyinin struktur vahidi kimi fəaliyyət göstərir. Hacı müəllim də hal-hazıradək həmin mərkəzin direktorudur. Vəssalam. Çox sadə və asanlıqla qələmə alınan əmək fəaliyyəti tarixçəsi. Ancaq bu sadəlik və asanlıq üzdədir. Əslində isə mədəni-maarif işinin kifayət qədər mürəkkəbliyi, məsuliyyəti və çətinlikləri vardır ki, onları da bilavasitə həmin sahələrdə çalışanlar bilərlər.

Həmin məsələlər barədə bilavasitə Hacı Əliyevin özündən eşitmək istədik və eşitdik. Həmsöhbətimiz danışdı ki, Zabratda, Ağsuda, Bilgəhdə və Bakıxanov qəsəbəsində işlədiyi illərin hər birinin öz gözəlliyi, maraq doğuran cəhətləri və məsuliyyəti var idi. İstənilən ünvanda qarşıya qoyulan vəzifəni yerinə yetirirsənsə, işin də, əmək fəaliyyətin də sənə maraqlı olur. Bəlkə də elə ona görədir ki, mənim üçün bütün iş yerlərim maraqlı olub. Həmişə işə getməyə, hansısa planın, tədbirin reallaşdırılmasına tələsmişəm. Adil İsgəndərov adına Mədəniyyət Sarayı isə mənim üçün təkcə iş yeri olmadı. Mən bu sarayı həm özüm üçün məktəb sandım, həm iş yeri, həm də ev. Çünki burada çox şey öyrəndim, çox səmərəli işlədim və günün evə nisbətən daha çox hissəsini burada oldum. Ayrı cür də mümkün deyil.

Mədəniyyət ocaqlarının fəaliyyəti və idarə olunması kifayət qədər mürəkkəb məsələdir. Çünki bizim fəaliyyətimiz istedadlı gənclərin ortaya çıxarılması, özfəaliyyət kollektivlərinin yaradılması, hansısa tədbirlərin keçirilməsi ilə məhdudlaşmır. Bizim fəaliyyətimizin böyük bir hissəsi gündəlik həyatımızdakı ictimai-siyasi proseslərlə bağlıdır. Ölkə müharibə vəziyyətindədir. Dövlət başçımızın qətiyyəti və müdrikliyi nəticəsində daxili sabitlik təmin olunsa da, torpaqlarımızın 20 faizdən çoxu hələ işğal altındadır. Bir milyondan çox qaçqın-köçkünümüz var, cəbhədə atəşkəsin pozulmadığı gün olmur və sairə. Yəni bizim spesifik fəaliyyət sahələrimizin hamısına gündəlik vətənpərvərlik və hərbi-vətənpərvərlik istiqamətləri də əlavə olunur.

Biz sarayda ilk növbədə kadrların seçilib yerləşdirilməsi, kurs və dərnək rəhbərlərinin müəyyənləşdirilərək təyin edilməsi, dinləyicilərin qəbul edilməsi, kollektiv üzvlərinin sənədləşdirilməsi, ödənişli kurs və dərnəklərdən yığılan üzvlük haqlarının müvafiq ünvana köçürülməsi məsələlərini sistemli şəkildə qaydaya salmışıq. İlin əvvəlində “Nizami” Kino Mərkəzində təşkil etdiyimiz möhtəşəm yeni il tədbirlərində sarayımızın bütün kollektivləri iştirak etmiş, ədəbi-bədii kompozisiyalarımız bir neçə telekanal və yazılı mətbuat vasitələri tərəfindən əhatəli şəkildə işıqlandırılmışdır. 20 Yanvar faciəsinin ildönümü münasibətilə Sabunçu Rayon İcra Hakimiyyəti ilə birlikdə təşkil etdiyimiz “Şəhidlik bir zirvədir” adlı ədəbi-bədii gecəni “Kristal” şadlıq sarayının akt zalında reallaşdırmışdıq. “Xocalı qan yaddaşımızdır” və “Xocalı, ay Xocalı” adlı tədbirlərimiz də bilavasitə hərbi-vətənpərvərlik tərbiyəsi xəzinəmizə töhfə kimi ərsəyə gəlmişdi. 8 Mart, Novruz bayramı, 9 May Qələbə bayramı, 10 May Gül Bayramı, 28 May Respublika Günü münasibətiylə hazırladığımız silsilə tədbirlər də müvafiq qurumlar tərəfindən yüksək qiymətləndirilib. İndiyədək fəaliyyət göstərən bədii özfəaliyyət və yaradıcılıq kollektivlərimizin sırasına tezliklə “Kukla teatrı”mız da daxil olacaq. Bu istiqamətdə kifayət qədər işlər görülüb. Sarayda fəaliyyət göstərən “Mahur” xalq çalğı alətləri ansamblı isə bilavasitə Fövqəladə Hallar Nazirliyinin istedadlı əməkdaşlarından ibarətdir.

Bir sözlə, Adil İsgəndərov adına Mədəniyyət Sarayı bu gün Fövqəladə Hallar Nazirliyinin adına layiq fəaliyyət göstərir. Sarayın bütün kollektivləri və ayrı-ayrı əməkdaşları zamanın səsinə səs verərək və dövlətimizin qarşıya qoyduğu vəzifələri reallaşdıraraq sübut edirlər ki, mədəni-maarif ocaqları gənc müstəqil respublikamızın daha da qüdrətlənməsinə yönəlmiş siyasəti dəstəkləyənlərin önündədir.

Rafiq SALMANOV

Xalq qəzeti.- 2014.- 20 iyun.- S.7.