Bayram ovqatı

Qazax

Ölkəmizin hər yerində olduğu kimi, Qazaxda da Novruz bayramına xüsusi hazırlıq işləri görülmüş, hər yer bayramsayağı bəzədilmişdir.

Bayram şənliyi rayon Mədəniyyət Mərkəzinin qarşısında başlamışdır. Tədbiri rayon icra hakimiyyətinin başçısı Ayaz Əsgərov açmış və xalqımızı bayram münasibətilə təbrik etmiş, Novruzun əhəmiyyəti, son on ildə ölkəmizin keçdiyi böyük inkişaf yolu, rayonda aparılan tikinti-quruculuq və abadlıq işləri barədə geniş məlumat vermişdir.

Sonra bayram şənliyi başlamışdır. Kosa və Keçəlin, Bahar qızının söylədikləri məzəli əhvalatlar, göstərdikləri tamaşalar, Novruzla bağlı adətlər, rəngarəng mahnılar və rəqslər rayon əhalisinin və tamaşaçıların sevincinə səbəb olmuş, onların bayram əhval-ruhiyyəsini daha da artırmışdır. Bayram şənlikləri günün sonunadək davam etmişdir. Novruz bayramı ilə əlaqədar rayonda yaşayan 300-dən çox imtiyazlı və aztəminatlı ailələrə bayram sovqatı, hərbi hissənin əsgərlərinə isə Novruz xonçası verilmişdir.

Samux

Samux rayonunda Azərbaycan xalqının milli bayramı – Novruz münasibətilə ümumrayon şənliyi keçirilmişdir. Şənlik Heydər parkında təşkil edilmişdir.

Rayon icra hakimiyyəti tərəfindən təşkil edilmiş şənlikdə müəssisələrin kollektivləri, ictimaiyyət nümayəndələri, Qarabağ müharibəsi əlilləri, şəhid və aztəminatlı ailələr, idmançılar, musiqiçilər və kütləvi informasiya vasitələrinin nümayəndələri də iştirak edirdi.

Rayon icra hakimiyyətinin başçısı Alı Qocayev şənlik iştirakçılarını Azərbaycan xalqının uzaq qədimlərdən bu günədək sevə-sevə qeyd etdiyi Novruz bayramı münasibətilə təbrik etdi. Bahar bayramının xalqımıza ruzi-bərəkət gətirməsini arzuladı.

Sonra başçı bayramın rəmzi Novruz tonqalını alovlandırdı. Milli geyimli uşaqlar tonqalın ətrafında halay vurdular. Alı Qocayev hər bir kollektivə yaxınlaşaraq bayram münasibətilə təşkil edilmiş süfrələrlə tanış oldu və onları bir daha təbrik etdi. Eyni zamanda, rayon idmançılarının nümunəvi çıxışlarına tamaşa etdi.

Novruz bayramının əsas personajları olan Kosa, Keçəl və Bahar qız atlıların müşaiətilə faytonda meydana daxil oldular. Kosa və Keçəl şənlik iştirakçılarını bayram münasibəti ilə təbrik etdilər. Dəvət olunmuş kəndirbazlar isə xüsusi əyləncəli nömrələrlə çıxış etdilər.

Şənlik rayon uşaq musiqi məktəblərinin hazırladığı rəngarəng konsert proqramı ilə davam etdirildi.

Hamlet QASIMOV

Xalq qəzeti.- 2014.- 20 mart.- S. 6.