Lerik: ulu öndərin ruhuna böyük ehtiram

Ölkəmizin hər yerində olduğu kimi, Lerik rayonunda da ulu öndər Heydər Əliyevin anadan olmasının 91-ci ildönümünə həsr edilmiş silsilə tədbirlər keçirilib.

Ümumrayon tədbirinin iştirakçıları öncə dahi şəxsiyyətin adını daşıyan mərkəzi meydanda ulu öndərin abidəsini ziyarət edərək önünə tər gül-çiçək dəstələri düzdülər.

Sonra Heydər Əliyev Mərkəzində elmi-praktik konfrans keçirildi.

Lerik Rayon İcra Hakimiyyətinin başçısı Rövşən Bağırov “Heydər Əliyev Azərbaycan xalqının milli qürurudur” mövzusunda çıxış edərək qeyd etdi ki, ulu öndərin zəngin bioqrafiyası, ideya-nəzəri irsi Azərbaycan xalqı üçün, gənc nəsil üçün böyük örnəkdir. Heydər Əliyev Azərbaycana rəhbərlik etdiyi illərdə uzaqgörən daxili və xarici siyasəti ilə ölkənin hərtərəfli inkişafına nail olmuş, müstəqilliyimizi əbədi və dönməz etmişdir. Bu gün Azərbaycanda Prezident İlham Əliyevin rəhbərliyi altında Heydər Əliyev siyasəti uğurla davam etdirilir, ölkəmizin nüfuzu beynəlxalq arenada getdikcə artır, insanlarımızın rifahı yaxşılaşır. Çünki Heydər Əliyev siyasəti Azərbaycanın uğurlarının möhkəm əsasıdır. Cənab İlham Əliyevin rəhbərliyi ilə ölkəmizdə bütün sahələrdə aparılan uğurlu islahatlar, əldə olunan nəticələr xalqın sabaha inamını qat-qat artırmışdır.

Daha sonra gənclər və idman idarəsinin rəisi Rövşən Rüstəmov “Heydər Əliyev və Azərbaycanda dövlət gənclər siyasəti” mövzusunda, rayon mərkəzləşdirilmiş kitabxana sisteminin əməkdaşı Arzu Əzizova “Azərbaycan Respublikasının ümummilli lideri Heydər Əliyev və dövlət qadın siyasəti” mövzusunda məruzələr etdilər.

Konfrans iştirakçıları sonda ulu öndərin zəngin həyat və fəaliyyətindən bəhs edən “ Böyük ömrün anları” filminə tamaşa etdilər.

Ə.ƏLİYEV

Xalq qəzeti.- 2014.- 13 may.- S. 10.