Musiqi kollecinin bəstəkara konsert hədiyyəsi

Azərbaycan Milli Konservatoriyası tərkibində fəaliyyət göstərən Musiqi Kollecində bir çal-çağır, bayram əhval-ruhiyyəsi vardı. Dəhlizdə, eləcə də kollecin konsert salonunda müxtəlif alətlərdə şövqlə ifa edən tələbələr, sanki, hamını möhtəşəm musiqili gecəsinə dəvət edirdilər.

Bəli, kollecin müəllim və tələbə kollektivi bu dəfə Azərbaycan musiqisinin tanınmış siması, neçə-neçə əsərlərin müəllifi, bir çox filmlərin bəstəkarı, Xalq artisti, Azərbaycan Konservatoriyasının rektoru, professor Siyavuş Kəriminin 60 illik yubileyinin işığına toplaşmışdılar.

Milli musiqimizdə özünəməxsusluğu ilə seçilən bəstəkarın yubileyi münasibətilə Musiqi Kollecinin bir qrup istedadlı tələbəsinin ifasında konsert proqramı təqdim edildi. Bir çox tanınmış mədəniyyət xadimlərinin də iştirak etdiyi tədbirdə əvvəlcə kollecin direktoru, Əməkdar incəsənət xadimi, professor Nazim Kazımov yubilyarın yaradıcılıq yolundan danışdı. Bildirdi ki, Siyavuş Kərimi istər bəstəkar, istərsə də pedaqoq kimi musiqimizin inkişafı, tədrisi, tədqiqi və təbliğində mühüm işlər görür. Natiq yubilyarın hələ Bülbül adına Orta İxtisas Musiqi Məktəbinin tar sinfində oxuyarkən ustad musiqiçi Əhsən Dadaşovdan dərs aldığını xatırlatdı. Qeyd etdi ki, bəstəkarın yaradıcılığında nailiyyətlərindən biri də milli musiqimizin beynəlxalq aləmdə tanıdılması və digər xalqların musiqisi ilə uğurlu sintezidir.

Təsadüfi deyil ki, Azərbaycan–Norveç vokal musiqi layihəsi -2001, Azərbaycan və Cənubi Amerika musiqiçiləri ilə müştərək yaradılan “Salam hola” beynəlxalq lahiyəsi -2002 məhz Siyavuş Kəriminin rəhbərliyi ilə həyata keçirilmiş, musiqisevərlər tərəfindən maraqla qarşılanmışdır.

Siyavuş Kərimi həmçinin “Sarı gəlin”, “Sonuncu döyüş”, “Əlvida, cənub şəhərim”, “Girov” və s. bədii filmlərə, 9 seriyadan ibarət “Heydər Əliyev” televiziya filminə, 2 animasiya filminə və 10-dan artıq teatr tamaşasına musiqi bəstələmişdir. “Hamlet” əsərinin musiqisinə görə o, “Qızıl Dərviş” mükafatına (2003) layiq görülmüşdür.

Musiqi Kollecinin direktor müavini Gülzar Hətəmzadə pedaqoji və tələbə kollektivi adından yubilyarı təbrik etdi, ona yaradıcılığında və şəxsi həyatında daha böyük nailiyyətlər arzu etdi. O, Prezident İlham Əliyevin sərəncamı ilə S.Kəriminin “Şöhrət” ordeninə layiq görülməsini dövlətimizin bəstəkarın fəaliyyətinə, eləcə də musiqimizin inkişafı və təbliğinə dərin ehtiram və qayğısı kimi qiymətləndirdi.

Pedaqoji kollektiv adından yubilyara qızıl medal təqdim edildi. Sənət dostları da ürək sözlərini, arzularını söylədilər.

Bəstəkar Rauf Babayev yubilyarla dostluq münasibətlərindən, onun yüksək mənəvi keyfiyyətlərindən söz açdı. Aralarında yaş fərqinin olmasına baxmayaraq, onun dostluğa möhkəm və sadiq olduğunu vurğuladı. Teatr Xadimləri İttifaqının sədri, Xalq artisti Azərpaşa Nemətov yubilyarı təbrik etdi. Qeyd etdi ki, bəstəkarın yaradıcılığının bir hissəsi də teatrla bağlıdır. Onun bir çox tamaşalara yazdığı musiqilər təsiredicidir. Əməkdar artist Ağacəbrayıl Abasəliyev bildirdi ki, musiqimizin inkişafında əməyi olan insanlara dövlət qayğısının olması təqdirəlayiq haldır.

Səməd Vəkilovun dirijorluğu və bədii rəhbərliyi ilə kollecin nəfəs və zərb alətləri orkestrinin ifasında “Gecə səyahətçiləri”, kollec tələbələrinin ifasında F. Şopenin “Etüd”ü ( Eldəniz Ələkbərzadə), S. Kəriminin “Ömrümün istəyi” ( Nicat Məsimov), “ Şahnaz təsnifi” ( Sədəf Budaqova), “Qatar təsnifi” ( Ruhanə Aslanlı), Niyazinin “Arzu”su (Kamal Qədirov), respublikanın əməkdar artisti Z. Mirzəyevin “Bəxtəvər rəqsi” (Həmid Şahmərdanov), Rossininin “Vilhelm Tell” əsərindən “Üvertüra” ( Rəhilə Məhərrəmova) alqışlarla qarşılandı.

Piano arxasına keçən bəstəkarın müşayəti ilə gənc müğənni, Əməkdar artist Anar Şuşalı musiqisevərlərə xoş ovqat bəxş etdi.

Sonda Azərbaycan Milli Konservatoriyasının rektoru, professor Siyavuş Kərimi hər kəsə təşəkkür etdi.

Əfsanə BAYRAMQIZI

Xalq qəzeti.- 2014.- 23 noyabr.- S.5.