Gənc rəssamlar “Böyük

sənət astanası” sərgisində

Bakı Şəhər Gənclər və İdman Baş İdarəsinin (BŞGİBİ) təşkilatçılığı ilə Abşeron Rəsm Qalereyasında “Böyük sənət astanası” layihəsi çərçivəsində yeniyetmə və gənclərin rəsm işlərindən ibarət sərgi keçirilib.

Sərginin açılış mərasimində çıxış edən BŞGİBİ-nin rəis müavini Aydın Yusifov ölkəmizdə gənclərin hərtərəfli inkişafı, bütün sahələrdə onların daha fəal iştirakının təmin edilməsi, bilik və bacarıqlarının üzə çıxarılması üçün dövlət tərəfindən göstərilən diqqət və qayğıdan danışıb. Qeyd edib ki, bu diqqətin bariz nümunəsi olaraq yaradıcı gənclərimizin sorağı dünyanın müxtəlif arenalarından gəlir. Aydın Yusifov “Böyük sənət astanası” layihəsi çərçivəsində təşkil olunan sərgidə yeniyetmə və gənclərimizin yaratdıqları tabloların xarakterinə uyğun rənglər seçməklə müxtəlif janrlarda bir-birindən maraqlı rəsm əsərləri yaratdıqlarını vurğulayıb. Abşeron Rəsm Qalereyasının direktoru Eldəniz İbrahimov gənclərimizin potensialının üzə çıxmasında belə sərgilərin təşkilinin vacibliyini vurğulayıb.

Sərgidə 35 gənc rəssamın 50-dən çox rəsm əsəri nümayiş etdirilib. Rəsm işləri rəngkarlıq və qrafika texnologiyası üzrə işlənmiş və burada milli motivlər, portretlər, Azərbaycan təbiəti və mənzərələri əks olunub. Sərgiyə baxış keçirildikdən sonra ən yaxşı rəsmlərə görə gənclərə BŞGİBİ tərəfindən sertifikat və xatirə hədiyyələri təqdim edilib.

Leyla QURBANOVA

Xalq qəzeti.- 2014.- 16 oktyabr.- S.6.