LAÇIN: Vətənpərvərlik tərbiyəsi sahəsində qazanılmış müsbət

təcrübə yeni dərs ilində də uğurla davam etdiriləcək

Söhbət “Hər ailədən orduya bir zabit” təşəbbüsünün konkret nəticələrindən gedir|

Əvvəlcə kiçik bir statistikaya nəzər salaq: 2014-cü ildə orta məktəbləri bitirən laçınlı məzunların 469 nəfəri ali məktəblərə qəbul imtahanlarında iştirak etmiş və onlardan 54 faizi tələbə adı qazanmışdır. Qeyd edək ki, bu, son 22 il ərzində ən yüksək göstəricidir. Məzunların 21 nəfəri 500-dən, 8 nəfəri isə 600-dən yuxarı bal toplamışdır.

Bütün bunlar, əlbəttə, sevindiricidir və rayonda təhsilə dövlət qayğısının bəhrəsini, sahənin müasir metodlarla idarə olunmasını, yeni, qabaqcıl təcrübənin bacarıqla tətbiq edilməsini göstərir. Ancaq biz burada məsələnin başqa tərəfinə də toxunmaq istəyirik. Bu il 10 abituriyent Heydər Əliyev adına Ali Hərbi Məktəbə, 3 məzun isə C.Naxçıvanski adına Hərbi Liseyə qəbul olunmuşdur. Başqa güc strukturlarının ali məktəblərinə qəbul olunanlar da var.

Əldə edilən nəticələr, rəqəmlərin artan dinamikası yadımıza, istər-istəməz, neçə ay əvvəl Laçın Rayon İcra Hakimiyyətinin irəli sürdüyü və bütövlükdə respublikada, xüsusilə qaçqın və məcburi köçkün rayonlarında geniş maraq doğuran “Hər ailədən orduya bir zabit” təşəbbüsünü saldı. Bu nəcib vətənpərvərlik təşəbbüsü, əlbəttə, heç də öz-özünə yaranmamışdı. O zaman aparılan təhlil və araşdırmalar nəticəsində məlum olmuşdu ki, məcburi köçkün rayonların şagirdləri arasında hərbi ixtisaslara yiyələnməyə və xüsusi təyinatlı təhsil müəssisələrində oxumağa maraq respublikanın digər şəhər və rayonlarına nisbətən aşağıdır.

Bu isə, sözsüz ki, ciddi narahatlıq doğurur və bir sıra əsaslı tədbirlər işlənib həyata keçirilməsini tələb edirdi. Geniş və hərtərəfli təşkilati tədbirlərlə, izahat- maarifləndirmə işləri ilə yanaşı, rayonda maddi həvəsləndirmə vasitələrindən də istifadə edildi. Məsələn, Laçın Rayon İcra Hakimiyyəti qərara aldı ki, Hərbi Akademiyaya qəbul olunan hər bir laçınlı gəncin ailəsinə hər ay 200 manat, hərbi liseyə daxil olanların ailəsinə isə 100 manat verilsin.

Əlbəttə, təşəbbüs irəli sürmək, məsələnin necə deyərlər, birinci tərəfidir. Əsas cəhət bu istiqamətdə əsaslı və ardıcıl iş aparmaq, pedaqoji kollektivlər, xüsusilə, yuxarı sinif şagirdləri arasında vətənpərvərlik hisslərini daha da gücləndirmək tələb olunurdu. Laçın Rayon Təhsil Şöbəsinin müdiri Malik Vəliyev bu yöndə görülmüş və görüləcək işlər barədə danışarkən dedi:

– Əvvəlcədən onu bildirmək istəyirəm ki, son aylar cəbhə bölgəsində baş verən hadisələr Laçın Rayon İcra Hakimiyyətinin “Hər ailədən orduya bir zabit” təşəbbüsünün nə qədər zəruri bir tələblə bağlı irəli sürüldüyünü, torpaqlarımızın işğaldan azad olunması üçün gənclər arasında vətənpərvərlik ruhunun yüksəldilməsinin çox mühüm vəzifə olduğunu bir daha hamıya göstərdi. Onu da əlavə edim ki, bu təşəbbüs mövsümü xarakter daşımır, bir, yaxud bir neçə tədris ilini əhatə etmir. “Hər ailədən orduya bir zabit” təşəbbüsü müqəddəs ata-baba torpaqlarımızın düşmən caynağından azad olunacağı günə qədər, hətta ondan sonra da davam etməlidir.

İndi isə artıq ilkin nəticələr məlumdur və bu barədə ürəklə danışmaq olar. Belə ki, yuxarıda da qeyd edildiyi kimi, bu il 10 nəfər laçınlı gənc Heydər Əliyev adına Ali Hərbi Məktəbə, 3 nəfər isə C.Naxçıvanski adına hərbi liseyə qəbul olunmuşdur. Onu da əlavə edim ki, bu göstəricilər əvvəlki illərdən 2-3 dəfə çoxdur. Bununla belə, biz heç də həmin rəqəmləri son hədd hesab etmirik. Aparılan müşahidələr onu deməyə əsas verir ki, gələcək illərdə ali hərbi təhsil almaq istəyən laçinlı gənclərin sayı qat-qat çox olacaqdır.

Həmişə ermənilərə gözdağı olan, alınmaz qala hesab olunan Laçın dağları, çox təəssüf ki, 21 ildən çoxdur ki, yağı düşmən əlindədir. Bu, əlbəttə, hər bir laçınlı, hər bir azərbaycanlı üçün olduqca ağır və dözülməzdir. Bununla belə, dağlar diyarının övladları, bir gün də olsun, özlərini laçınsız təsəvvür etməyiblər. Laçın onların yurd sevgisində, həsrətində və mübarizəsində yaşayır. Coğrafi mövqeyinə görə Dağlıq Qarabağla Ermənistan arasında yerləşən Laçın rayonunun mərd və igid övladları bu ərazini tarix boyu göz bəbəyi kimi qorumuş, Azərbaycan torpaqlarına göz tikən, türk və müsəlman qanına susayan ermənilərə həmişə tutarlı cavab vermiş, dəfələrlə onları məğlub edərək geri otuzdurmuşlar.

1905, 1918, 1920-ci illərdə Xosrov bəy və Sultan bəy qardaşlarının rəhbərliyi altında yurdumuzun qəhrəman övladları Qarabağda erməni təcavüzkarlarına ağır zərbələr edirmişlər. Onlar uzun müddət ermənilərin çirkin niyyətlərinin həyata keçməsinin qarşısını almış, misilsiz qəhrəmanlıq nümunələri göstərmişlər. Bu gün laçınlılar, haqlı olaraq, böyük qürur hissilə ata-babaların qəhrəmanlığı qarşısında baş əyir, onların keçdiyi şərəfli döyüş yolunu özlərinə örnək bilirlər.

1988-ci ildən ermənilərin ölkəmizə təcavüzünün növbəti mərhələsi başlandı. Müharibənin ilk günlərdən laçınlılar eyni vaxtda iki cəbhədə – həm Ermənistanın sisremli hücumlarına qarşı, həm də Dağlıq Qarabağdakı separatçı ermənilərlə mübarizə aparmalı oldular. Rayonun minlərlə mərd və qorxmaz övladı silaha sarılaraq, düz dörd il düşmənin bu müqəddəs torpaqlara ayaq basmasına imkan vermədi.

Tarix boyu ermənilər Laçını “Qarabağın qara qapısı” adlandırıblar. Laçın həmişə ermənilərin gözündə qorxulu və sehrli bir yer idi. Onlar heç xəyallarına da gətirə bilməzdilər ki, nə vaxtsa bu yerlərin əhalisini dədə-baba torpaqlarından didərgin sala biləcəklər. Təəssüf ki, bu, 1992-ci ildə hakimiyyətdə olanların səriştəsizliyi və xəyanətkarlığı üzündən baş verdi. Laçın Azərbaycanda siyasi böhranın, hakimiyyətsizliyin, AXC-Müsavat cütlüyünün vəzifə hərisliyinin qurbanı oldu.

Rayonun işğalı nəticəsində 1 şəhər, 1 qəsəbə, 125 kənd, 13745 fərdi yaşayış evi, 48 sənaye, 63 kənd təsərrüfatı obyekti, 109 təhsil, 142 səhiyyə, 217 mədəni maarif müəssisəsi, 460 ticarət obyekti, 30 rabitə qovşağı, erməni vandalları tərəfindən dağıdılaraq yandırıldı. Bütövlükdə, rayonun işğalı ilə əlaqədar əhaliyə dəyən ziyan 7,1 milyard ABŞ dolları təşkil edir.

Çox təəssüf ki, bu itkilər içərisində ən ağırı və əvəzolunmazı rayonun müdafiəsi uğrunda ayağa qalxan igid oğul və qızlarımızdan 267 nəfərinin şəhid olması, 65 nəfərinin isə itkin düşməsi oldu. Doğma Azərbaycanımızın ərazi bütövlüyü uğrunda döyüşlərdə xüsusi qəhrəmanlıq göstərmiş Laçın oğullarından 5 nəfəri Azərbaycan Respublikasının Milli Qəhrəmanı adına layiq görüldü.

Göründüyü kimi, “Hər ailədən orduya bir zabit” təşəbbüsünün məhz Laçın rayonundan irəli sürülməsinin böyük rəmzi mənası var. Qartallar oylağı, igidlər məskəni bu torpağın hamıya nümunə olan biləcək qəhrəmanlıq ənənələrini layiqincə yaşatmaq bu gün xüsusilə vacibdir. Heç də təsadüfü deyildir ki, həmin təşəbbüs hər yerdə olduğu kimi, laçınlılar arasında da dərhal böyük əks-səda doğurdu. Rayonda bu istiqmatədə ardıcıl və sistemli iş quruldu.

Sözsüz ki, bütün ölkə vətəndaşları kimi, laçınlılar da Prezident, Ali Baş Komandan İlham Əliyevin Qarabağ müharibəsinin sülh danışıqları, diplomatik səylərlə həll olunması yolunda qətiyyətli və uzaqgörən siyasətini ürəkdən bəyənir və müdafiə edirlər. Qan tökülməsini, fəlakət və faciələrin baş verməsini, kəndlərin, şəhərlərin dağıdılmasını heç kim istəmir. Ancaq bununla yanaşı, atəşkəs rejimi də əbədi ola bilməz.

Erməni təcavüzü qurbanlarından olan Laçın rayonunun əhalisi aparılan danışıqlar səmərə vermədiyi təqdirdə, Ali Baş Komandanın əmri ilə uşaqdan-böyüyə kimi işğal altında olan torpaqları azad etmək,necə deyərlər, qisası qiyamətə qoymamaq əzmindədir. Onlar Dağlıq Qarabağ münaqişəsi ilə bağlı aparılan sülh danışıqlarında Prezidentin uğurla apardığı siyasəti birmənalı şəkildə bəyənir, eyni zamanda, müharibə şəraitində döyüşə hazırlığın başlıca şərt olduğunu da unutmurlar.

Buna görə də rayonun təhsil müəssisələrində bir qayda olaraq vətənpərvərlik mövzusunda söhbətlər aparılır, Qarabağ savaşında igidlik göstərmiş laçınlı döyüşçülərlə gənclərin müntəzəm görüşləri təşkil olunur. Eləcə də yuxarı sinif şagirdlərinin hərbi hissələrdə əsgər və zabitlərlə görüşləri təşkil edilir, hərbi həyatla tanışlıq istiqamətində müxtəlif formatlı tədbirlər keçirilir. Hərbi dərslərin tədrisi zamanı şagirdlərin bacarıqları, sağlamlığı, psixoloji durumu, fənnə maraqları ilə yanaşı, onlarda vətənpərvərlik hisslərinin aşılanması da diqqətdə saxlanılır.

Rayonun orta məktəblərində hərbi biliklərə yiyələnmək istiqamətində təhsil proqramının imkanlarından bacarıqla istifadə olunur. Azərbaycan tarixinin məktəblərdə daha dərindən öyrənilməsinə böyük əhəmiyyət verilir. Mükəmməl elmi biliyə malik zabit kadrların hazırlanması istiqamətində məqsədyönlü işlər aparılır. Gənclərdə hərbiyə maraq və həvəsi daha da artırmaq üçün məktəblərdə tədrisin səmərəliyinə ciddi fikir verilir.

Vətənpərvərlik təbliğatının təsirli olmasının bir yolu da keçmiş döyüşçülərə diqqət və qayğının artırılmasıdır. Rayonda bu məsələyə də önəm verilir – keçmiş döyüşçülərlə görüşlər keçirilir, onların problemlərinin həlli, xüsusən, işlə təmin olunmaları üçün hər vasitədən istifadə olunur. Qarabağ müharibəsi veteranlarına lazımi maddi və mənəvi dəstək verilir, onların mənzil problemlərinin yaxşılaşdırılması üçün daxili imkanlardan istifadə edilir.

Rayon 21 ildən artıq işğal altında olduğundan, şagirdlərin Laçınla bağlı təsəvvürlərinin zənginləşdirilməsi məqsədilə bütün tədris ocaqlarında təbliğat-təşviqat işləri gücləndirilmişdir. Belə formalardan biri də məktəblərdə ata-baba yurdlarına aid mənzərələri əks etdirən stendlər hazırlanmasıdır. Həmin stedlərin qarşısında müxtəlif tədbirlərin keçirilməsi artıq ənənəyə çevrilib. Rayon icra hakimiyyətinin təşəbbüsü ilə hazırda hər bir məktəb üçün Laçın rayonunun işğaldan əvvəlki kəndlərinin adları yazılan və haqqında qısa məlumat verilən xəritənin əks olunduğu stendlər də hazırlanır.

Bütün bunlar ötən dərs ilində Laçın rayonunda gənclərin vətənpərvərlik tərbiyəsi sahəsində əldə edilmiş uğurları əks etdirir. İşin gedişi ilə yaxından tanışlıq, müsahiblərimizin dedikləri göstərir ki, cari dərs ilində rayonda bu istiqamətdə daha geniş tədbirlər nəzərdə tutulmuş, konkret hədəflər müəyyən edilmişdir. Əsas cəhət odur ki, laçınlıların hərbi ixtisaslara yiyələnmək barədə nəcib vətənpərvərlik təşəbbüsü hər bir gəncin qəlbində Vətən, torpaq və millət sevgisini daha da artırmış, ata-baba yurd yerlərimizin düşməndən azad olunmasına, yağıya layiqli cavab veriləcəyinə olan inam və ümidi daha da artırmışdır.

Ziyəddin SULTANOV

Xalq qəzeti.- 2014.- 10 sentyabr.- S.5.