20 sentyabr ölkə neftçilərinin peşə bayramı günüdür

Dəniz neftçilərinin bayram sovqatı

Azərbaycanın neft və qaz sənayesinin inkişafında Azərbaycan xalqının dəyərli insanları – böyük alimləri, mühəndisləri, geoloqları, neftçiləri və başqa mütəxəssisləri zəngin neft və qaz sərvətlərinin Vətən, xalq naminə istifadə edilməsi üçün böyük işlər görmüş, fədakarcasına çalışmış və xalqımızın tarixinə şanlı səhifələr yazmışlar.

Heydər ƏLİYEV

Ümummilli lider

Azərbaycanın yeni neft strategiyasının müəllifi, xalqımızın ümummilli lideri Heydər Əliyevin “Neftçilər Günü” peşə bayramının təsis edilməsi haqqında 2001-ci il avqust ayının 16-da imzaladığı tarixi fərman, ötən illər ərzində neft sənayesindəki fədakar əməklərinə görə fərqlənənlərin orden, medal və fəxri adlarla təltif olunması bu şərəfli peşə sahiblərinə göstərilən dövlət qayğısının parlaq təzahürüdür.

Artıq ölkə neftçiləri peşə bayramlarını on dördüncü dəfədir ki, qeyd edirlər. Hazırda əsl ümumxalq bayramına çevrilmiş “Neftçilər Günü” ölkəmizdə neftçi peşəsinə hörmət və ehtiramı bir qədər də artırmışdır. Əslində isə gecəni gündüzə qatıb yorulmaq bilmədən çalışan bu qəhrəman insanlar hər cür ehtirama layiqdirlər. Elə yüksək dövlət qayğısına əməli işlə cavab verən şərəfli peşə sahibləri də, əvvəlki illərdə olduğu kimi, builki bayramı da uğurlu nəticələrlə, yüksək iqtisadi göstəricilərlə qarşılayırlar.

“Azneft” İstehsalat Birliyinin qabaqcıl neftçıxarma müəssisələrindən sayılan “Neft Daşları” Neft və Qazçıxarma İdarəsində bayram əhval-ruhiyyəsi olduqca yüksəkdir. Elə idarənin 2014-ci ilin yanvar-avqust aylarındakı fəaliyyəti də bu qənaətə gəlməyə əsas verir. Hesabat dövründə 625 min 880 ton “qara qızıl” hasil edən neftçilər proqnoz tapşırığını 100 faiz yerinə yetirmişlər. Xatırladaq ki, bu göstərici əvvəlki ilin müvafiq dövrü ilə müqayisədə 13 min 583 ton artıqdır. Bundan əlavə, “möcüzələr adası”nın sakinləri neftin təhvili planına da artıqlaması ilə əməl etməyə müvəffəq olmuşlar. Belə ki, cari ilin səkkiz ayında idarə üzrə 620 min 125 tondan artıq “qara qızıl” təhvil verilmişdir ki, bu da ötən ilin müvafiq dövrü ilə müqayisədə 13 min 524 min ton çoxdur.

“Neft Daşları” NQÇİ-nin kollektivi qaz hasilatı üzrə də qənaətbəxş nəticəyə imza atmışdır. Belə ki, neftçilər yanvar-avqust aylarında 44 milyon 280 min kubmetr qaz hasil edərək tapşırığa 100 faiz əməl etmişlər. Bununla yanaşı, hesabat dövründə idarə üzrə 475 milyon kubmetrdən artıq əmtəəlik qaz istehsal olunmuşdur. Bu isə nəzərdə tutulduğundan təqribən 10 milyon kubmetr, əvvəlki ilin eyni dövründəkindən isə 120 milyon kubmetr çoxdur.

Məlumat üçün bildiririk ki, bu il “Neft Daşları” yatağının istismara daxil edilməsinin 65-ci ildönümüdür. Azərbaycanın dəniz yataqları sırasında öz zənginliyi ilə seçilən bu yataqda çıxarılması mümkün olan ehtiyatlar hələ çoxdur. Məhz buna görədir ki, ölkə Prezidenti İlham Əliyev “Neft Daşları” yatağında illik hasilatın bir milyon tona çatdırılmasını neftçilərin qarşısında mühüm vəzifə kimi qoymuşdur. Elə ada sakinləri olan qəhrəman neftçilər də çətin dəniz şəraitinə baxmayaraq, dövlət başçısının qarşıya qoyduğu vəzifənin öhdəsindən layiqincə gəlməyə çalışırlar. Hazırda idarənin istismar fondunda 448 quyu vardır. Həmin quyulardan 449-u işlək quyulardır. Son illər fəaliyyətsiz quyuların yenidən işlək fonda qaytarılması sahəsində məqsədyönlü tədbirlər həyata keçirilir. Təkcə onu qeyd etmək kifayətdir ki, cari ilin yanvar-avqust aylarında fəaliyyətsiz fonddan 9 quyu yenidən istismara daxil edilmişdir ki, bu da nəzərdə tutulduğundan bir quyu çoxdur. Bu, həm də yüksək iqtisadi səmərə ilə müşayiət olunmuşdur. Belə ki, fəaliyyətsiz fonddan istismara qaytarılan həmin quyulardan əvvəlcədən proqnozlaşdırılmış 4162 ton əvəzinə 6429 ton əlavə neft alınmışdır. Hazırda isə daha bir quyu mənimsəmədədir. Bundan əlavə, “Neft Daşları” NQÇİ üzrə hasilatın artırılması üçün qazma işlərinə də xüsusi diqqət yetirilir. Təkcə onu qeyd etmək kifayətdir ki, ötən ilin səkkiz ayında qazmadan 7 quyu alınmışdırsa, cari ilin müvafiq dövründə onların sayı iki dəfə artmışdır. Qazmadan alınmış yeni quyulardan 27 min 667 ton neft hasil olunması isə “Neft Daşları” yatağının ehtiyatlarla zənginliyini bir daha təsdiqləyir.

Quyularda hasilatın sabit saxlanması məqsədilə geoloji və texniki tədbirlərə diqqət getdikcə artırılır. Cari ilin səkkiz ayında idarə üzrə nəzərdə tutulmuş 80 əvəzinə 93 geoloji tədbir həyata keçirilmişdir. Nəticədə əvvəlcədən proqnozlaşdırılmış 39 min 626 ton əvəzinə 40 min 900 ton əlavə neft çıxarılmışdır. Bu da həyata keçirilmiş geoloji tədbirlərin yüksək iqtisadi səmərə ilə müşayiət olunmasını sübut edir. Ötən səkkiz ayda quyularda 216 əvəzinə 272 texniki tədbir həyata keçirilmişdir ki, bu da 8973 ton əlavə neft hasilatına imkan yaratmışdır. İdarənin istismar etdiyi yataqlarda quyuların sabit rejimdə işləməsini təmin etmək məqsədilə əsaslı və yeraltı təmirlərə də xüsusi diqqət yetirilir. 2014-cü ilin yanvar-avqust aylarında 160 quyuda əsaslı təmir işləri aparılmış və bunun da hesabına yüksək səmərə əldə olunmuş, 64 min 933 ton əlavə neft hasil olunmuşdur. Bununla yanaşı, ötən səkkiz ayda quyularda 421 yeraltı təmir işi həyata keçirilmişdir.

Hazırda Dövlət Neft Şirkəti üzrə yeni texnika və texnologiyaların istehsalata tətbiqinə xüsusi diqqət yetirilir. Bu da neft və qaz hasilatında yüksək iqtisadi səmərənin əldə olunmasına səbəb olur. Bu baxımdan dünya üzrə ilk dəfə olaraq açıq dənizdə neftçıxarmaya başlanılmış “Neft Daşları” NQÇİ-də də mühüm tədbirlər həyata keçirilir. Bundan əlavə, çətin dəniz şəraitində yüksək fədakarlıq nümunəsi göstərərək gecə-gündüz yorulmadan çalışan neftçilərin fərdi mühafizə vasitələri ilə təminatına xüsusi diqqət göstərilir, işçilərin əmək və yaşayış şəraitinin yaxşılaşdırılması istiqamətində lazımi tədbirlər görülür. İdarənin rəisi Qoçalı Mahmudov dedi:

- Ümummilli liderimiz Heydər Əliyevin rəhbərliyi ilə işlənib hazırlanmış yeni neft strategiyası uzun illərdir ki, ölkəmizin iqtisadi qüdrətinin artırılmasına, xalqımızın rifah halının getdikcə yaxşılaşdırılmasına xidmət edir. Hazırda ölkə Prezidenti İlham Əliyevin rəhbərliyi ilə uğurla reallaşdırılan neft strategiyası biz neftçilərin üzərinə mühüm vəzifələr qoyur. Ölkəmizdə neft sənayesinə, neftçilərə göstərilən dövlət qayğısının ilbəil gücləndirilməsi neft və qaz hasilatının artırılması kimi çətin və şərəfli vəzifənin öhdəsindən gəlməyə imkan yaradır. Yeri gəlmişkən, Dövlət Neft Şirkəti, eləcə də “Azneft” İstehsalat Birliyi rəhbərliklərinin neftçilərin sosial qayğıları ilə maraqlanmaları, onların əmək şəraitlərinin daha da yaxşılaşdırılması üçün həyata keçirdikləri tədbirlər kollektivimizi yeni-yeni nailiyyətlərə ruhlandırır. 20 Sentyabr-“Neftçilər Günü”nü və “Əsrin müqaviləsi”nin imzalanmasının 20-ci ildönümünü yüksək nailiyyətlərlə qeyd edən neftçilərimiz 2014-cü ili də uğurlu göstəricilərlə başa vurmaq əzmindədirlər...

Dövlət qayğısı yeni nailiyyətlərə ruhlandırır

“Azneft” İstehsalat Birliyinin qabaqcıl neft-qazçıxarma müəssisələrindən olan Ə.Əmirov adına Neft və Qazçıxarma İdarəsinin kollektivi də “Əsrin müqaviləsi”nin 20 illiyini və “Neftçilər Günü”nü yüksək iqtisadi göstəricilərlə, əsl bayram əhval-ruhiyyəsi ilə qeyd edir.

Azərbaycan neft sənayesinin qocaman neftçıxarma müəssisələrindən olan və ötən illər ərzində ölkəmizin neft sənayesinə mühüm töhfələr vermiş bu idarənin adı həmişə qabaqcıllar sırasında çəkilib. Artıq idarənin istismar etdiyi yataqlar neftçıxarmanın son mərhələsini yaşamasına baxmayaraq, kollektiv bu gün də neft və qaz hasilatına dair proqnoz tapşırıqlarını vaxtından əvvəl və artıqlaması ilə yerinə yetirir. Bu baxımdan ötən ili uğurla yola salan neftçilər həmin nailiyyətləri cari ildə də təkrarlamaq niyyətindədirlər. Elə müəssisənin bu ilin ötən dövründə əldə etdiyi yüksək iqtisadi göstəricilər də bunu deməyə əsas verir.

Son illər neft və qaz hasilatına dair proqnoz tapşırıqlarına artıqlaması ilə əməl edən bu şərəfli peşə sahibləri ənənəyə sadiq qalaraq cari ilin ötən dövründə də yüksək nailiyyətlər qazanmışlar. Belə ki, idarənin “qara qızıl” ustaları yanvar-avqust aylarında 53 min 477 ton neft hasil etməyə müvəffəq olmuşlar ki, bu da nəzərdə tutulduğundan 2207 ton, keçən ilin eyni dövründəkindən isə 4976 ton çoxdur. Cari ilin ötən dövründə hasil olunmuş ümumi neftin 52 min 677 tonu keçici, 445 tonu isə fəaliyyətsiz fondun payına düşmüşdür. Bundan əlavə, qazmadan alınmış bir quyudan nəzərdə tutulmuş 765 ton əvəzinə 3557 ton neft çıxarılmışdır. Bütövlükdə isə idarənin kollektivi neft hasilatına dair səkkiz aylıq proqnoz tapşırığına 104,3 faiz əməl etmişlər. Bu, həm də “Əsrin müqaviləsi”nin 20-ci ildönümünə və “Neftçilər Günü”nə əsl bayram töhfəsi sayıla bilər. Hesabat dövründə idarə üzrə neft hasilatı ilə yanaşı, neftin təhvili sahəsində də uğurlu nəticəyə nail olunmuş, 53 min 267 ton “qara qızıl” təhvil verilmişdir. Bu isə nəzərdə tutulduğundan 2265 ton artıqdır.

İdarənin qaz hasilatı və təhvili üzrə əldə etdiyi göstəricilər isə daha uğurludur. Belə ki, 2014-cü ilin səkkiz ayında mədənlərdən 25 milyon 825 min kubmetr qaz hasil edilərək proqnoz tapşırığına 104,4 faiz əməl olunmuşdur. Bu da nəzərdə tutulduğundan 1 milyon 85 min kubmetr, əvvəlki ilin eyni dövründəkindən isə 808 min kubmetr çoxdur. Bundan əlavə, hesabat dövründə idarə üzrə 21 milyon kubmetr əvəzinə 23 milyon 21 min kubmetr “mavi yanacaq” təhvil verilmişdir.

Hazırda Ə. Əmirov adına Neft və Qazçıxarma İdarəsi “Lökbatan-Puta-Quşxana”, “Şabandağ-Şubanı-Yasamal dərəsi-Atəşgah”, “Korgöz-Qızıltəpə-Şonqar”, “Qalmaz”, “Qaradağ” və “Bəndovan” yataqlarının istismarını həyata keçirir. “Lökbatan-Puta-Quşxana” yatağı isə məhsuldarlığı ilə seçilir. Təsadüfi deyil ki, idarə üzrə hasil edilən ümumi neftin 75 faizini məhz bu yataq verir. Bütövlükdə isə idarənin istismar etdiyi yataqlardan uzun illər neft və qaz çıxarılmasına baxmayaraq, ehtiyatlar hələ tükənməyib. Mütəxəssislərin rəyinə görə, bu yataqlarda 13 milyon 261 ton qalıq ehtiyatları mövcuddur. Məhz buna görədir ki, işlənmənin son mərhələsində olan yataqlarda hasilatın sabit saxlanması üçün məqsədyönlü tədbirlər həyata keçirilir.

Hazırda idarənin istismar fondunda 432 quyu var ki, onların da 417-si fəaliyyətdə olan quyulardır. Həmin quyulardan 356-sı ştanqlı dərinlik nasosu, 32-si elektrik dalma nasosu, 13-ü isə fontan üsulu ilə istismar olunur. Son illər fəaliyyətsiz fond quyularının yenidən istismara qaytarılması istiqamətində mühüm tədbirlər həyata keçirilir. Hazırda həmin quyulardan ikisi istismara hazırlanır, daha 9 quyunun isə əsaslı təmiri nəzərdə tutulur. Mədənlərdə neft hasilatının səviyyəsini sabit saxlamaq məqsədilə geoloji və texniki tədbirlərin həyata keçirilməsinə də xüsusi diqqət yetirilir. Belə ki, cari ilin səkkiz ayında idarə üzrə 151 texniki tədbir həyata keçirilmiş, bunun da nəticəsində əvvəlcədən proqnozlaşdırılmış 1224 ton əvəzinə 1658 ton neft hasil olunmuşdur. Bundan əlavə, hesabat dövründə mədənlərdə aparılmış 85 geoloji tədbir hesabına 5650 ton əvəzinə 6322 ton əlavə neft çıxarılmışdır. Bu isə həyata keçirilmiş texniki və geoloji tədbirlərin yüksək səmərə verdiyini sübut edir. Hasilatın səviyyəsini sabit saxlamağın əsas şərtlərindən biri də quyuların ahəngdar rejimdə işləməsini təmin edən yeraltı və əsaslı təmirlərin vaxtlı-vaxtında aparılması ilə bağlıdır. Neft təsərrüfatı üçün son dərəcə vacib olan bu sahədə çalışan təmir briqadaları tapşırılan işin öhdəsindən layiqincə gəlirlər. Təkcə onu qeyd etmək kifayətdir ki, idarənin təmir briqadaları bu ilin səkkiz ayında quyularda 111 əsaslı təmir işi həyata keçirmiş, bu da 6885 ton əlavə neft hasilatına imkan yaratmışdır. Bununla yanaşı, hesabat dövründə idarə üzrə 2841 yeraltı təmir işi aparılmışdır. Cari ilin əvvəlindən üç quyuda ikinci lülə üsulu ilə aparılmış qazma işləri 325 ton əlavə neft hasilatına imkan yaratmışdır. Ə. Əmirov adına NQÇİ-nin ümumi istismar fonduna daxil olan quyuların əksəriyyəti köhnə quyular olduğu üçün burada lay təzyiqinin sabit saxlanılması xüsusi diqqət tələb edir. İlin əvvəlindən başlayaraq idarə üzrə bu istiqamətdə zəruri tədbirlər həyata keçirilmiş, bir sıra quyularda 3-cü təsir üsulları tətbiq olunmuş, bu da həmin quyuların ahəngdar rejimdə işləməsini təmin etmişdir.

Ekoloji tarazlığın təmin edilməsi və itkilərin qarşısının alınması sahəsində görülmüş işlər də qənaətbəxşdir. Belə ki, ölkə Prezidenti İlham Əliyevin Bakı ətrafındakı süni göllərin qurudulması və abadlaşdırılması ilə bağlı müvafiq tapşırığından sonra Lökbatan ərazisindəki çirkab su sahələrinin qurudulması istiqamətində işlər xeyli intensivləşdirilib. Artıq 8 hektar ərazi qurudularaq abadlaşdırılıb. Bu istiqamətdə işlər hazırda da davam etdirilir. Bundan əlavə, idarənin yığım-nəql sisteminin təkmilləşdirilməsi sahəsində xeyli iş görülüb, 8 kilometr neft kollektoru və 12 kilometr kiçik diametrli neft xətləri dəyişdirilib. Bununla yanaşı, atmosferə atılan qazların yığılaraq emal prosesinə yönəldilməsi, eləcə də lay sularının təkrar laylara vurulmasını təmin etmək məqsədilə yeni xətlər çəkilib, mədəndaxili yollar təmir olunub.

İdarə üzrə sağlamlıq və əməyin təhlükəsizliyinin qorunması, həmçinin işçilərin əmək şəraitinin yaxşılaşdırılması üçün mühüm tədbirlər həyata keçirilir. Bu ilin ötən dövründə idarənin 1,2,3 və 4 saylı neft qazçıxarma sexlərinin mərkəzi neftyığma məntəqələri əsaslı şəkildə yenidən qurularaq istifadəyə verilib. İdarənin 3 və 4 saylı neft-qazçıxarma sexləri üçün yeni inzibati binalar tikilib, quyuların əsaslı və yeraltı təmiri, istehsal proseslərinin avtomatlaşdırılması və neftölçmə cihazları, istismar avadanlıqlarının təmiri və qaz-kompressor, eləcə də elmi-tədqiqat və istehsalat işləri sexlərinin inzibati binaları isə yenidən qurularaq neftçilərin istifadəsinə verilib. Həmin binalar hər cür məişət cihazları və mebellə təchiz olunub. Bundan əlavə, işçilər normativə uyğun olaraq fərdi mühafizə vasitələri ilə tam təmin olunublar.

İdarənin rəisi Ramin Quliyev kollektivin əldə etdiyi uğurların başlıca səbəbini neft sənayesinə, bu şərəfli peşə sahiblərinə göstərilən dövlət qayğısı ilə əlaqələndirdi. Bildirdi ki, son illər ölkə Prezidenti İlham Əliyev Dövlət Neft Şirkətinin qarşısında neft və qaz hasilatının artırılması kimi mühüm vəzifə qoymuşdur. Bu vəzifənin yerinə yetirilməsi neftçilərin məsuliyyətini birə-beş artırır. Məhz bunun nəticəsində də idarə üzrə neft və qaz hasilatına dair tapşırıqları vaxtında və artıqlaması ilə yerinə yetirmək üçün bütün imkanlar səfərbər olunub. Bundan əlavə, Dövlət Neft Şirkəti və “Azneft” İstehsalat Birliyi rəhbərliklərinin yaxından köməyi də qarşıya qoyulmuş vəzifələrin öhdəsindən gəlməyə imkan verir...

Neft sənayesi inşaatçılarının uğurları

Azərbaycanın neft sənayesinin, ölkənin qaz təsərrüfatının bugünkü uğurlu inkişafında inşaatçılar da böyük pay sahibidirlər. Son illər ölkədə neft və qaz hasilatının artırılması üçün yaradılan və hər cür imkanlara cavab verən ən müasir infrastruktur obyektləri məhz bu fədakar insanların gərgin əməyinin nəticəsidir.

Dövlət Neft Şirkəti “Neftqaztikinti” Trestinin ayrı-ayrı əmək kollektivləri kimi 2 saylı tikinti quraşdırma idarəsinin inşaatçıları da ölkənin neft-qaz sənayesinin inkişafına mühüm töhfələr verirlər. Təsadüfi deyil ki, son illər uğurlu fəaliyyəti, dövlət sifarişlərinin vaxtında və keyfiyyətlə yerinə yetirilməsi sahəsindəki misilsiz nailiyyətləri ilə seçilən kollektivə həmişə yüksək etimad göstərilir, dənizdə və quruda bir sıra vacib tikinti-quraşdırma işlərinin, neft-qaz sənayesi üçün son dərəcə mühüm əhəmiyyət kəsb edən layihələrin icrası məhz bu idarəyə həvalə olunur. Bu etimadı layiqincə doğruldan, adı həmişə qabaqcıllar sırasında çəkilən 2 saylı tikinti-quraşdırma idarəsinin kollektivi “Əsrin müqaviləsi”nin imzalanmasının 20-ci ildönümünü və “Neftçilər Günü”nü də yüksək nailiyyətlərlə, əsl bayram ovqatı ilə qeyd edirlər.

Qaz təsərrüfatının infrastruktur imkanlarının genişləndirilməsi məqsədilə nəzərdə tutulmuş tədbirlərin reallaşdırılmasında mühüm rol oynayan 2 saylı tikinti-quraşdırma idarəsinin kollektivi magistral qaz kəmərlərinin, qaz anbarlarının, kompressor stansiyalarının və digər obyektlərin tikintisi ilə bağlı dövlət sifarişlərini vaxtında və keyfiyyətlə yerinə yetirmək üçün bütün imkanları səfərbər etmişlər. Bu baxımdan 2014-cü ilin ötən dövrünü də kollektiv üçün uğurlu hesab etmək olar. Belə ki, cari ilin səkkiz ayında ölkənin neft-qaz sənayesində, sözün əsl mənasında, xariqələr yaradan inşaatçılar bir sıra dövlət əhəmiyyətli obyektlərin tikintisini müvəffəqiyyətlə davam etdirərək tapşırılan işləri vaxtında və yüksək keyfiyyətlə yerinə yetirməyə müvəffəq olmuşlar. Əvvəlki dövrlərdə olduğu kimi, cari ilin səkkiz ayında da ölkənin qaz təsərrüfatının infrastruktur imkanlarının genişləndirilməsi istiqamətində mühüm işlər görən inşaatçılar əhalinin və iqtisadiyyatın “mavi yanacağa” olan tələbatının ödənilməsini təmin etmək məqsədilə qəbul olunmuş xüsusi proqramın icrasına mühüm töhfələr vermişlər. Məhz bunun nəticəsidir ki, ölkənin qaz təsərrüfatının yaxın illər üçün əsas prioritetlərini müəyyənləşdirən həmin proqram çərçivəsində nəzərdə tutulmuş mühüm tədbirlərin xeyli hissəsi artıq reallığa çevrilmişdir.

Hazırda Dövlət Neft Şirkəti tərəfindən ölkə regionlarının qazlaşdırılmasını nəzərdə tutan tədbirlərin reallaşdırılması sahəsində işlər sürətlə davam etdirilir. Bu baxımdan “Qazıməmməd-Qazax magistral qaz kəmərinin yenidən qurulması” layihəsini xüsusi qeyd etmək olar. Xatırladaq ki, sözügedən kəmərin 210 kilometrlik hissəsinin 1020 millimetrlik borularla dəyişdirilib yenidən qurulması işləri “Neftqaztikinti” Tresti tərəfindən məhz 2 saylı tikinti-quraşdırma idarəsinə həvalə olunmuşdur. Onu da qeyd edək ki, bu, adıçəkilən idarənin hazırda quruda həyata keçirdiyi ən iri layihədir. Layihənin məqsədi isə magistral qaz kəməri vasitəsilə Şirvan düzünün yamaclarından başlayaraq Böyük Qafqaz sıra dağlarının cənub yamaclarına qədər yerləşən ərazilərdə qazın itkisiz və fasiləsiz ötürülməsini təmin etməkdən ibarətdir. Layihənin icrasına 2013-cü ilin noyabr ayında başlanmışdır. Boruların qaynaq olunmasında “Neftqaztikinti” Tresti tərəfindən alınmış müasir avtomat və yarımavtomat qaynaq aparatlarından istifadə olunur. Bu da iş vaxtına qənaət olunmasına, layihənin icrasının sürətləndirilməsinə və qaynaq işlərinin keyfiyyətlə aparılmasına imkan yaradır.

Ötən müddətdə bu sahədə xeyli iş görən inşaatçılar kəmərin Göyçay rayonunun ərazisindən keçən 24 kilometrlik hissəsinin yenidən qurulmasını uğurla tamamlamışlar. Tikintinin birinci mərhələsinə daxil olan 114-138 kilometrlik yenidən qurulmuş hissə layihənin parametrlərinə uyğun olaraq möhkəmliyə və kipliyə görə sınaqdan keçirilmişdir.

Son illər istehlakçıların payız-qış mövsümündə “mavi yanacaq”la fasiləsiz təminatına nail olunması ölkənin qaz təsərrüfatının qarşısında duran mühüm vəzifələrdəndir. Bu məqsədlə yeraltı qaz anbarları genişləndirilir, infrastruktur əsaslı şəkildə yeniləşdirilir. 2 saylı tikinti-quraşdırma idarəsinin kollektivi bu sahədə də yaxından iştirak edir. Hazırda inşaatçılar “Qaradağ yeraltı qaz anbarında qazpaylama məntəqəsinin genişləndirilməsi” layihəsinin icrasını həyata keçirirlər. Xatırladaq ki, bu obyekt Bakı-Ələt magistral avtomobil yolundan 250 metr cənubda, dənizin 400-500 metr yaxınlığında yerləşir. Genişləndirilməsi nəzərdə tutulan sahədə qazsaxlama anbarları, müxtəlif diametrli borular və s. mövcuddur. Layihənin texnoloji hissəsinə əsasən, layihə tapşırığı ilə nəzərdə tutulan texnoloji kompleksə daxil olan obyektlər, onların təyinatı və qarşılıqlı yerləşmə mövqeyi müəyyənləşdirilmişdir. Artıq layihə çərçivəsində nəzərdə tutulmuş işlərin əksəriyyəti uğurla yerinə yetirilmişdir. Obyektin ilin sonunadək təhvil verilməsi nəzərdə tutulur.

Azərbaycanda qaz tədarükünün artırılmasına mühüm töhfələr verəcək “Ümid” yatağının neft və qaz hasilatının nəqli sisteminin layihələndirilməsi obyekti də 2 saylı tikinti-quraşdırma idarəsinə həvalə olunub. Xatırladaq ki, bu, adıçəkilən idarənin son illərdə dəniz akvatoriyasında həyata keçirdiyi ən iri layihədir. Bu layihə “Ümid” yatağından hasil olunan qazın və mayenin Nəriman Nərimanov adına NQÇİ-nin istismar etdiyi 82 saylı stasionar dəniz özülünə fasiləsiz nəql olunmasını təmin etmək məqsədi daşıyır. Layihəyə əsasən, “Ümid-1” platformasından 82 saylı özülədək 16 düyməlik qaz və 12 düyməlik maye kəmərlərinin çəkilməsi nəzərdə tutulur. Ümumi dəyəri 45 milyon manat təşkil edən layihə çərçivəsində nəzərdə tutulmuş boru kəmərlərinin çəkilişi artıq yekunlaşmaq üzrədir. Obyektin bu ayın sonlarında təhvil verilməsi planlaşdırılır.

2 saylı tikinti-quraşdırma idarəsinin kollektivi ilin ötən dövründə iri layihələrin icrası ilə yanaşı, bir sıra obyektlərin təmiri ilə bağlı sifarişləri də vaxtında və keyfiyyətlə yerinə yetirməyə müvəffəq olmuşdur. Bütövlükdə isə cari ilin yanvar-avqust aylarında kollektivin gücü ilə 41,5 milyon manatlıq tikinti-quraşdırma və təmir işləri həyata keçirilmişdir. İdarənin rəisi Elxan Salmanov dedi:— Son illər Dövlət Neft Şirkətinin, eləcə də “Neftqaztikinti”Trestinin rəhbərlikləri tərəfindən kollektivimizə yüksək etimad göstərilir, bir sıra iri layihələrin icrası bizə həvalə olunur. Bu etimadı doğrultmaq isə idarəmizin bütün işçilərindən xüsusi məsuliyyət tələb edir. Bundan əlavə, həyata keçirdiyimiz tikinti-quraşdırma işlərinə rəhbərlik tərəfindən göstərilən diqqət, eləcə də dövlət qayğısı kollektivin məsuliyyətini birə- beş artırır. Yeri gəlmişkən, onu da deyim ki, ulu öndər Heydər Əliyevin müəllifi olduğu neft strategiyasının uğurları və Prezident İlham Əliyevin rəhbərliyi ilə ölkəmizdə davam edən sürətli inkişaf və tərəqqi bizi yeni-yeni nailiyyətlərə ruhlandırır...

Səhifəni hazırladı:

Mirbağır YAQUBZADƏ

Xalq qəzeti.- 2014.- 19 sentyabr.- S.8.