Duman köç edirdi dağlar boyunca...

Bu sərlövhəni ədəbi aləmdə o qədər də tanınmayan, amma öz şeirlərində Azərbaycan təbiətinin istənilən gözəlliyini böyük səmimiyyətlə vəsf etməyi bacaran bir qələm sahibinin Zaqatalada olarkən yazdığı “Dağ qara tələsir, dərə bahara” adlı şeirindən seçmişəm. Mənim üçün nəinki tanış, hətta, doğma olan məqamlar idi.

Duman köç edirdi dağlar

boyunca,

Bilmirdim hayana, ya hara

gedir.

Ürəkdə arzular qaynar

olanda,

Qar yüklü dərələr...bahara

gedir.

“Kitabi Dədə Qorqud” dastanında qış fəslini, qar-şaxtanı əks etdirən lövhələrin hansı şəkildə qələmə alındığını o qədər də dəqiq bilmirəm. Amma Zaqataladakı Dədə Qorqud parkında Tanrının bəxş etdiyi təbii gözəlliklə insan qüdrətinin, sözün həqiqi mənasında, möcüzəli bir qış lövhəsi yaratdığının şahidiyəm. İnanmıram ki, bu mənzərəni görən kimsə “Zaqatalaya ürəkdən vuruldum” ifadəsini dilinə gətirməmiş olsun. Torpağın, dağın-daşın bəxtindəndirmi ki, o torpaqda belə insanlar yaşayır, ya insanlar bu qədər şanslıdırmı ki, belə gözəlliklərlə əhatə olunublar? Bilmirəm. Onu bilirəm ki, Zaqatalanın yazı da, yayı da, payızı da gözəldir. Amma bu diyarın qışı, həqiqətən, ələ düşən deyil. Özüm özümü təkrar edirəmsə, hörmətli oxucu bağışlasın. Təkrar ola bilər. Çünki Zaqatala barədə nə qədər, neçə dəfə yazdığımı özüm də bilmirəm, bu diyardakı dostlarım da unudublar. Qərəz...

Son 15-20 gündə bu rayonda iştirakçısı olduğum tədbirlərin hər biri ayrıca bir aləm idi. Mənim Zaqatala ilə bağlı təəssüratlarımın daha da zənginləşməsində bu görüşlərin hansı rolu oynadığını ifadə etmək həqiqətən çox çətindir. Bir yay günündə rayon icra hakimiyyətinin başçısı Mübariz Əhmədzadə ilə ən ucqar dağ kəndi olan Cımcımağa getməyimizi, bölgədə baş vermiş zəlzələnin nəticələrini aradan qaldırmaq üçün yaradılan qərargahda keçən gecələrimizi heç zaman unuda bilməyəcəyimi dəqiq bilirəm. Elə zəlzələnin dağıtdığı yüzlərlə mənzilin və sosial obyektin yenidən tikilib istifadəyə verilməsinin sevincini də bütün zaqatalalılarla birlikdə yaşamışıq.

Bir sözlə, yuxarıda qeyd etdiyim kimi, Zaqataladan çox yazmışam. Burada görülən işləri sevə-sevə qələmə almışam. Bəli, Zaqatala hər ay, hər gün dəyişib. Burada yaşayan insanların üzündəki sevinc hissini görəndə ürəyim dağa dönüb. Neçə-neçə məktəbin, uşaq bağçasının, sosil obyektlərin açılışında iştirak etmişəm. Hara getmişiksə, rayon icra hakimiyyətinin başçısı Mübariz Əhmədzadəni doğma adamları kimi qarşılayıblar. Ehtiram göstəriblər. Bu, təsadüfi deyil. Onalr həmişə bir problemlə üzləşəndə məhz onun qapısını döyüblər. Biliblər ki, peşman qayıtmayacaqlar.

Ayrı-ayrı görüşlərdə şahidi olduğum hadisələr barədə çox söhbət açmışam. Rayonda çıxan “Zaqatala” qəzeti həmin tədbirlərə bəzən bir nömrə həsr edib. Qəzetin adını çəkdim. Keçən ilin son günlərində onun 90 illik yubileyinə həsr olunmuş tədbir yadıma düşdü. Buraya kimlər gəlməmişdilər. Mənim əlimdən tutub yazmağı öyrədən Əhməd İsayev, əziz müəllimim Cahangir Məmmədli, neçə-neçə tələbə yoldaşımız, həmkarımız...

Mədəniyyət evində keçirilən həmin tədbirdə hamı qəzetin Zaqatalanın həyatında böyük rol oynadığından danışdı. Rayon icra hakimiyyətinin başçısına mətbuata belə diqqət göstərdiyinə görə minnətdarlıq bildirildi. Çox səmimi bir tədbir keçirildi. Mən də danışdım. Ürək sözlərimi dedim.

Elə çıxış məqamında ağlıma qəribə bir fikir gəldi. Deyim, siz də bilin. Azərbaycanda universitetin jurnalistika fakültəsi kimi ikinci bir yer olmayıb ki, orada gənclər bilavasitə öz tələbə yoldaşları ilə ailə qursunlar. Çoxlarının adını sadaladım və Cahangir müəllimin orada olmasından istifadə edərək belə bir təklif də irəli sürdüm. Bu cütlüklərin fakültəyə dəvət edilməsi və onlarla görüş keçirilməsi doğrudan çox maraqlı hisslər yaradardı. Həmin görüşə dəvət alacaq cütlüklərin arasında bu gün 90 illik yubileyinə toplaşdığımız qəzetin redaktoru, əməkdar mədəniyyət işçisi İbrahim İbrahimov və onun əvəlcə tələbəlik, indi isə ömür-gün yoldaşı olan əməkdar jurnalist Elmira Mehdiyeva da mütləq olacaq.

Bu tədbirdən cəmi dörd gün sonra- dekabrın 30-da isə rayon mərkəzindəki “Qaladüzü” restoranında Dünya Azərbaycanlılarının Həmrəyliyi Günü və Yeni il münasibətilə böyük bayram tədbiri keçirildi. Aradan neçə gün keçsə də, rayon icra hakimiyyətinin başçısı Mübariz Əhmədzadənin həmin tədbirdəki çıxışında söylədiyi bir fikir hələ də yadımdan çıxmır ki, çıxmır. Mübariz müəllim bütün zaqatalalıları hər iki bayram münasibətilə təbrik etdikdən və rayonun 2013-cü ildə qazandığı uğurlardan əhatəli şəkildə söz açandan sonra çıxışını bu sözlərlə bitirdi: Hamıya arzu edirəm ki, illər bizi yox, biz illəri bax belə uğurlarla yola salaq. Nə deyəsən, gözəl sözlərdir, deyilmi?

Bəli, biz illəri yola salaq. Yola saldığımız sonuncu – 2013-cü il isə Zaqatala və zaqatalalılar üçün bir çox məqamlarla yadda qalıb. Ən yaddaqalan hadisələr isə məhz dövlət başçımızın adı ilə bağlı olub. Avqustun 17-də bölgəyə səfər edən Prezident İlham Əliyev Zaqatala şəhərinin tarixi mərkəzinin yenidənqurma və bərpadan sonrakı vəziyyəti ilə tanış olub. Sonra isə Zaqatala şəhərinə və ətraf kəndlərə içməli suyun verilməsi mərasimində, Heydər Əliyev Fondu hesabına inşa edilən 600 şagird yerlik Bəhmətli kənd tam orta məktəbinin yeni binasının və “Tumurcuq” uşaq bağçasının açılışlarında iştirak edib. Bu gün Zaqatalada istənilən adamla söhbət edərkən həmin səfərin təəssüratları barədə danışır, rayonun gündən-günə inkişaf etməsindən məmnunluq hissləri yaşadığını dilə gətirir. Bundan başqa, cənab İlham Əliyevin fevral və avqust aylarında Zaqatala rayonunun sosial-iqtisadi inkişafının sürətləndirilməsinə dair əlavə tədbirlər haqqında sərəncamlar imzalayaraq Prezidentin ehtiyat fondundan Zaqatala-Danaçı-Aşağı Çardaxlar avtomobil yolunun tikintisi məqsədilə 5,5 milyon manat və Zaqatala şəhərində abadlıq-quruculuq işlərinin davam etdirilməsi məqsədilə isə 2,0 (iki) milyon manat vəsait ayırması da rayon ictimaiyyəti tərəfindən böyük razılıqla qarşılanıb.

Söhbətimiz zamanı rayon rəhbəri bir çox məqamlardan söz açdı. Xüsusilə vurğuladı ki, təkcə ötən il deyil, bütövlükdə fəaliyyətimizin əsas istiqaməti insana – rayon sakininə xidmət etmək olub. Çünki bu, cənab Prezidentin tapşırığı, dövlətin bizim qarşımıza qoyduğu vəzifədir. Dövlət başçımız insanlar üçün normal həyat şəraiti yaradılmasını, yeni iş yerlərinin açılmasını, əmək haqlarının, təqaüd, pensiya və müavinətlərin artırılmasını daim diqqət mərkəzində saxlayır. Biz də öz fəaliyyətimizdə bu prinsipləri əsas götürürük. “Azərbaycan Respublikası regionlarının 2009-2013-cü illərdə sosial-iqtisadi inkişafının Dövlət Proqramı”nda Zaqatala rayonu üçün nəzərdə tutulan tədbirlərin icra olunması nəticəsində rayonda 826-sı daimi olmaqla 908 yeni iş yeri açılıb. Bu məqsədlə rayonda sahibkarlığın inkişafı diqqət mərkəzində saxlanılıb. Sahibkarlığa Kömək Milli Fondunun vəsaiti hesabına 38 layihə üzrə 542 min manat həcmində güzəştli kredit verilib. Sentyabr ayında rayonda əmək yarmarkası keçirilib, məşğulluq xidməti orqanları tərəfindən 620 nəfər işaxtaran kimi qeydiyyata alınıb, 474 nəfər münasib işlə təmin olunub. Faktı təkrar etmək istəyirəm ki, işsizlik probleminin həlli istiqamətində yeridilən dövlət siyasəti Zaqatala Rayon İcra Hakimiyyətinin gündəliyindəki əsas məsələlərdəndir.

Bu gün ölkənin hər yerində böyük vüsət alan tikinti-quruculuq və abadlıq işləri Zaqatalada da xüsusi bir təşəbbüskarlıqla davam etdirilir. Bunu zaman tələb edir. Yeni tikintilər, abadlıq işləri yerli təbiətin gözəlliklərini daha da artırır. Məsələn, ötən il rayonda keçid obyektləri olan rayon Polis şöbəsinin, Zaqatala Hərbi Prokurorluğunun və qaz istismar sahəsinin yeni inzibati binalarının tikintisi başa çatdırılaraq istifadəyə verilib, Yeni Suvagil və Göyəm kəndində sahə baytarlıq məntəqələrinin, rayon Maliyyə İdarəsinin inzibati binasının və “Araz” hazırlıq kurslarının binasının tikintisi davam etdirilib. Zaqatala şəhərində 500 nömrə tutumu olan elektron ATS binası, 100 yerlik uşaq bağçası, Zilban kəndində yeni tibb məntəqəsi tikilib, Heydər Əliyev Mərkəzi və şəhərin Sülh küçəsində 4 saylı poçt şöbəsi üçün yeni binaların tikintisi aparılıb.

Tikinti -quruculuq işləri bunlarla qurtarmır. Yenə də sadalaya bilərəm. Məsələn, 3960 şagird yerlik 11 məktəb binası istifadəyə verilib, 6 məktəb binasında bərpa-gücləndirmə işləri aparılıb, 4 məktəb binasında, Azərbaycan Müəllimlər İnstitutunun Zaqatala filialında, Milli Təhlükəsizlik Nazirliyinin Zaqatala rayon şöbəsinin inzibati binalarında tikinti işləri davam etdirilib və zəlzələdən sonra Fövqəladə Hallar Nazirliyi tərəfindən 3900 fərdi yaşayış evinin tikintisi başa çatdırılaraq istifadəyə verilib. İndi bu rəqəm və faktları sadalamaq çox asandır. Ancaq həmin işlərin görülməsi prosesində şəxsən iştirak etmiş bir mətbuat təmsilçisi kimi mən şahid olmuşam ki, il boyu rayon rəhbərliyinin gecəsi-gündüzü olmayıb. Qeyd etdiyim kimi, Mübariz müəllimin sakinlərlə görüşlərinin, rayonda keçirilən tədbirlərin əksəriyyətində iştirak etmiş və qəzetimiz üçün əhatəli yazılar hazırlamışam. Eşitdiyim fikir və mülahizələrin hamısı belə olub ki, Zaqatalanın indiki inkişafının bir səbəbi də cənab Prezidentin bu rayona düzgün kadr seçimi olub.

Ötən il Zaqatalada ən çox diqqət mərkəzində saxlanılan məsələlərdən biri də təhsil sektorunun inkişaf etdirilməsi olub. Doğrudur, bu barədə il boyu dönə-dönə yazmışıq. Ancaq təhsil sahəsi elə bir mühüm sahədir ki, o barədə nə qədər yazsaq, azdır. Ona görə də xatırlatmaq istəyirəm. Rayonun ümumtəhsil məktəblərində təlimin keyfiyyətinin yüksəldilməsi istiqamətində həyata keçirilən tədbirlər nəticəsində orta məktəblərin Azərbaycan və rus bölmələrini bitirən 1352 nəfər məzundan 547 nəfəri ali məktəblərə qəbul üçün sənəd verib, onlardan 315 nəfəri tələbə adını qazanıb. Rayon üzrə 11 nəfər 600-dən, 32 nəfəri 500-dən yuxarı bal toplayıb, şəhər 1 saylı tam orta məktəbin məzunu Şahin Allahverdiyev Azərbaycan Respublikası Təhsil Nazirliyi tərəfindən “Qızıl” medala və Azərbaycan Respublikasının Prezidenti İlham Əliyevin sərəncamı ilə Prezident təqaüdünə layiq görülüb.

2013-cü ildə Azərbaycanın folklor paytaxtı elan edilən Zaqatalada xüsusi tədbirlər planına əsasən təntənəli mərasimlər, respublika səviyyəli konfranslar, konsetlər, festivallar keçirilib, rayonun “Hudulki” xalq kollektivi Masallıda keçirilən II Beynəlxalq folklor festivalında və Belarusun Babruysk şəhərində keçirilən festivalda uğurla iştirak edib. Həmin tədbirlər çərçivəsində Azərbaycan Respublikası Mədəniyyət və Turizm Nazirliyi və mədəniyyətşünaslıq üzrə elmi-metodiki mərkəz, AMFA folklor institutunun təşkilatçılığı ilə Zaqatalada “Azərbaycan folkloru milli sərvətimizdir” mövzusunda dəyirmi masa təşkil edilib, rayonda “Avropa İrs günləri” keçirilib, tədbirdə Qax, Şəki, Balakən və Zaqatalanın folklor kollektivləri iştirak edib, Dədə Qorqud meydanında Azərbaycan Dövlət simfonik orkestrinin konserti təşkil olunub.

Zaqatala ölkənin elə rayonlarındandır ki, burada payız-qış və yaz-yay mövsümlərinə hazırlıq məsələləri barədə yazı hazırlayarkən hansısa problem barədə cümlələr qələmə almağa ehtiyac olmur. Bu isə rayonun bütün idarə və müəssisələrinin qarşıya qoyulan vəzifəyə məsuliyyətlə yanaşmasının nəticəsidir. Başqa cür mümkün də deyil. Çünki onların hamısı görür ki, qabaqda rayon rəhbərliyinin nümunəsi var. Təbii ki, nümunə varsa, bütün işlər gözlənilən nəticəni verəcək. Necə ki, Zaqatalada verir.

Yuxarıda qeyd etdiyimiz kimi, 2013-cü ilin son günləri Zaqatala üçün əlamətdar hadisələrlə yadda qaldı. Nə yaxşı ki, , 2014-cü il də pis başlamadı. Bu ilin ilk günlərində Zaqatalada, sözün həqiqi mənasında, bizim hər birimiz üçün dəyərli olan bir toy məclisi quruldu. Dövlət Televiziyasının Şəki-Zaqatala zonası üzrə bölgə müxbiri Esmira Sultanovanın toyu. O Esmiranın ki, Zaqatalada şahidi olduğu sosial-iqtisadi inkişafın bütün mərhələlərini və istənilən məqamını elə sevə-sevə tərənnüm edib ki, sanki bu işlərin hamısı rayon üçün deyil, məhz onun özü üçün görülür. Bəlkə də onun ürəyindəki təəssübkeşlik hisslərinə həsədlə baxmayan həmkarımız yoxdur. Həmin toyda hamımız ürəklə iştirak etdik. Mən təbrik və ürək sözlərimi söyləyəndən sonra “Vağzalı”nın təranələri altında bir şeir də dedim. Xoşbəxt idim ki, Zaqatalanın Yeni ili bax beləcə toy-düyünlə, çal-çağırla başlanırdı. Əminəm ki, belə də davam edəcək. Ona da məmnunam ki, çalışdığım bölgələrdəki toy-düyünlər barədə sətirləri də öz yazılarına əlavə edən qələm sahiblərinin biri, bəlkə də birincisi elə mənəm. Hər toy yeni bir Azərbaycan ailəsinin təməlinin qoyulması deməkdir. Zaqatalada isə ailəyə sadəcə ailə kimi deyil, müqəddəs bir dəyər kimi baxırlar. Mübarək olsun!

İlqar HƏSƏNOV,

“Xalq qəzeti”nin bölgə müxbiri

Xalq qəzeti.- 2014.- 12 yanvar.- S.6.