Azərbaycan Gözdən Əlillər Cəmiyyətinin yığıncağı keçirilmişdir

Dünən Bakıdakı “Ambassador” mehmanxanasında Azərbaycan Gözdən Əlillər Cəmiyyətinin illik hesabat yığıncağı keçirilmişdir. Yığıncaqda Azərbaycan Gözdən Əlillər Cəmiyyətinin prezidenti Səmyar Abdullayev geniş məruzə ilə çıxış etmişdir. O, çıxışında son illər ölkəmizdə əlil insanlara qayğının artırıldığı, Prezident İlham Əliyevin bu sahədə imzaladığı sərəncamların əlillərin həyat şəraitinin yaxşılaşdırılmasında və onların cəmiyyətə inteqrasiyasında əhəmiyyətli rol oynadığını diqqətə çatdırmışdır.

Sonra o, Azərbaycan Gözdən Əlillər Cəmiyyətinin 2013-cü ildə öz üzvlərinin həyat şəraitinin yaxşılaşdırılması istiqamətində reallaşdırdığı tədbirlər və layihələr barədə məlumat vermişdir. Bildirmişdir ki, bu cəmiyyət bir sıra dövlət təşkilatları ilə, o cümlədən Əmək və Əhalinin Sosial Müdafiəsi Nazirliyi, Təhsil Nazirliyi, Rabitə və İnformasiya Texnologiyaları Nazirliyi, Gənclər və İdman Nazirliyi, Respublika Baş Məşğulluq Mərkəzi ilə mütəmadi əlaqələr saxlayır, onların kömək və yardımları ilə mühüm layihələr reallaşdırır. Ancaq Heydər Əliyev Fondu ilə əlaqələr daha genişdir. Biz həm əvvəlki illərdə, həm də ötən il bu təşkilatın köməkliyini daha yaxından hiss etmişik.

Heydər Əliyev Fondu və Rabitə və İnformasiya Texnologiyaları Nazirliyinin, eləcə də, BMT-nin İnkişaf Proqramının birgə həyata keçirdiyi layihə əsasında məhdud imkanlı insanların İKT-dən yararlanması məqsədilə Gəncə və Naxçıvan şəhərlərində Regional İnformasiya Mərkəzləri yaradılmışdır. Bu layihədən 60 min əlil insan bəhrələnəcəkdir. Onlar arasında gözdən əlil insanlar da vardır. Anoloji mərkəz ötən il Yevlax şəhərində də yaradılmışdır ki, buradan da gözdən əlil insanlar faydalana bilirlər. Cəmiyyətin rəhbərliyi də ötən il bu mərkəzin açılışında iştirak etmişdir. Burada oxu zalı, təlim-tədris mərkəzi, kitabxana, gözdən əlillər üçün nəzərdə tutulmuş kompyuter mərkəzi və s. yaradılmışdır ki, bu da müasir tələblərə uyğundur. Mərkəzin internet saytı yaradılmış və bir sıra kitablar brayl əlifbası ilə çap olunaraq kitabxananın səsyazma studiyasının köməyi ilə audioformata çevrilməsi nəzərdə tutulur.

Natiq vurğuladı ki, Heydər Əliyev Fondu tərəfindən cəmiyyətə hədiyyə edilən “Mini informasiya laboratoriyası” əlil vətəndaşlara göstərilən qayğının bariz nümunəsidir.

2013-cü ildə Dövlət Məşğulluq Mərkəzinin maliyyə dəstəyi ilə birgə həyata keçirilən “Gözdən əlillərə xüsusi kompyuter və ingilis dili kursları”, Qeyri-Hökumət Təşkilatlarına Dövlət Dəstəyi Şurası ilə birgə “ Məhdudiyyətsiz Həyat” və digər layihələri qeyd etmək olar. Layihələrdən 200-ə yaxın gözdən əlil faydalanmışdır.

Məruzədə qeyd olundu ki, GƏC-in rəhbərliyinin təşəbbüsü ilə respublikamızda tikilən və Qafqazda analoqu olmayan Reabilitasiya Mərkəzi bütün gözdən əlil vətəndaşların istifadəsinə veriləcək ən mükəmməl və məhz gözdən əlillər üçün xüsusiləşdirilmiş məkana çevriləcək. Cari ildə həmin mərkəzin açılışı nəzərdə tutulmuşdur.

Cəmiyyət üzvlərinin ötən il əldə etdikləri ən gözəl töhfələrdən biri də Rabitə və İnformasiya Texnologiyaları Nazirliyinin “Dilmanc” layihəsi çərçivəsində gözdən əlillər üçün xüsusilə işlənib hazırlanmış DİLMANC mini kompyuteri olmuşdur. Nazirlik tərəfindən 200 ədəd səsli kompyuter cəmiyyət üzvlərinə təqdim edilmişdir. Qeyd olundu ki, gözdən əlil insanların həyat səviyyəsinin ümumi inkişafını təmin etmək məqsədi ilə geniş əhəmiyyətli tədbirlər həyata keçirilir.

Gözdən əlil vətəndaşların mənzil probleminin həlli istiqamətində aparılan işlər də diqqətəlayiqdir. Əmək və Əhalinin Sosial Müdafiəsi Nazirliyi tərəfindən hazırda gözdən əlillər üçün tikilən bina cari ildə bu ailələrin istifadəsinə veriləcək. 132 mənzilli yaşayış binasında əlil vətəndaşlar üçün bütün lazımi şərait yaradılmaqdadır.

O bildirdi ki, bütün bu nailiyyətlərimiz məhz ölkə rəhbərliyinin, xüsusən də Prezident İlham Əliyevin və ölkənin birinci xanımı Mehriban xanım Əliyevanın xüsusi diqqət və qayğısı ilə reallaşdırılmışdır.

Sonra çıxış edənlər ötən il Gözdən Əlillər Cəmiyyətinin fəaliyyətindən, ölkə rəhbərinin əlil insanlara göstərdiyi qayğıdan ətraflı bəhs etmişlər. Tədbirdə müxtəlif nazirliklərin nümayəndələri, cəmiyyətin rayon təşkilatlarının rəhbərləri, ictimaiyyət nümayəndələri iştirak edirdilər.

M.MÜKƏRRƏMOĞLU

Xalq qəzeti.- 2014.- 29 yanvar.- S. 8.