Yubiley gecəsi

Tanınmş yazıçı və haqsevər ziyalı Xeyrəddin Qocanın anadan olmasının 65 illiyi münasibətilə Azərbaycan Yazıçılar Birliyinin Beynəlxalq Muğam Mərkəzində təşkil etdiyi ədəbi- musiqili yubiley gecəsində ədibin çağdaş həqiqətlərə işıq salan bədii və publisistik yaradıcılığı, milli ədəbiyyatımızın məfkurəvi- estetik ideallarına bağlılığı, torpaqlarımızın bütövlüyünün qorunması, dövlət müstəqilliyinin qazanılması və möhkəmləndirilməsi uğrunda ulu öndər Heydər Əliyevin rəhbərlik etdiyi ümumxalq mübarizəsində fəal iştirakı, onu çoxlarının sevimlisinə çevirən nəcib insani xüsusiyyətləri diqqət mərkəzində oldu.

Azərbaycanda Atatürk Mərkəzinin rəhbəri, Milli Məclisin Mədəniyyət komitəsinin sədri, AMEA-nın müxbir üzvü, professor Nizami Cəfərov, xalq şairləri Nəriman Həsənzadə, Zəlimxan Yaqub, Milli Məclisin üzvü Elmira Axundova yubiliyarın mənalı ömür yoluna qısa nəzər saldılar, onun milli maraqlarımızla səsləşən, vətəndaşlıq duyğularından qaynaqlanan ədəbi-bədii yaradıcılığından söz açdılar.

Gecə milli müsiqimizi ürəkdən sevən, yazılarında və teleradio çıxışlarında daim bu misilsiz mənəvi xəzinəni qorumağa və zənginləşdirməyə çağıran yubilyarın arzusuna uyğun olaraq, seçmə muğam və xalq mahnılarının ifası ilə davam etdi. Xalq artisti Möhlət Müslümovun rəhbərlik etdiyi xalq çalğı alətləri ansamblının müşayiəti ilə Xalq artisti Mələkxanım Əyyubovanın, Əməkdar artist Cabir Abdullayevin, xanəndələrdən Ehtiram Hüseynovun, Zakir Quliyevin və başqa ifaçıların səsləndirdikləri muğam və xalq mahnıları gecəyə bədii əlvanlıq gətirdi.

Tahir AYDINOĞLU

Xalq qəzeti.- 2015.- 1 fevral.- S.7.