Şabran: Ölkə iqtisadiyyatına yeni

töhfələr vermək üçün səylər artırılır

Şabran Rayon İcra Hakimiyyətinin 2014-cü ilin sosial-iqtisadi inkişafının yekunları və 2015-ci ildə qarşıda duran vəzifələrlə bağlı hesabat yığıncağı toplantı iştirakçılarının ulu öndər Heydər Əliyevin şəhərin mərkəzində ucaldılmış abidəsinin ziyarəti ilə başladı.

Sonra Şabran rayonunda fəaliyyət göstərən özəl şirkət və müəssisələrin istehsal məhsullarının konfrans zalının foyesində düzənlənən sərgisinə, royonda aparılmış tikinti-quraşdırma və abadlıq işlərinin gerçək mənzərəsini nümayiş etdirən foto stendlərə baxış keçirildi. Yığıncaqda geniş hesabat məruzəsilə çıxış edən Şabran Rayon İcra Hakimiyyətinin başçısı Novruz Novruzov əvvəlcə ölkənin siyasi, soaial- iqtisadi həyatında əldə edilən uğurlardan danışaraq qeyd etdi ki, 2014-cü il Azərbaycanın davamlı iqtisadi inkişafı, makroiqtisadi sabitliyin möhkəmlənməsi, əhalinin rifahının daha da yüksəlməsi, eləcə də ölkəmizin beynəlxalq aləmdə nüfuzunun artması ili kimi tarixə düşdü. Şübhəsiz, bu nailiyyətlər ulu öndər Heydər Əliyevin müəyyənləşdirdiyi sosial-iqtisadi inkişaf strategiyasının Azərbaycanın dövlət başçısı cənab İlham Əliyev tərəfindən müasir dövrün reallıqlarına uyğun çox böyük uğurla davam etdirilməsi nəticəsində mümkün olmuşdur.

Son illər dünyada davam edən və səngimək bilməyən siyasi-iqtisadi böhran proseslərinə baxmayaraq, Azərbaycanın dinamik inkişafı davam etmiş, makroiqtisadi sabitlik qorunmuş, iqtisadiyyatın rəqabət qabiliyyəti artmış, nəzərdə tutulmuş bütün sosial proqramlar uğurla yerinə yetirilmişdir. 2014-cü ildə dünya bazarında neftin qiyməti sürətlə aşağı düşsə də respublikanın iqtisadiyyatı 3 faizdən çox artmışdır.

İl ərzində inflyasiya cəmi 1,4 faiz olmuş, manatın məzənnəsi sabit qalmış, əhalinin pul gəlirləri 4,8 faiz artaraq inflyasiyanı 3 dəfə üstələmişdir. Orta aylıq əmək haqqı 600 dollara çatmış, yoxsulluq səviyyəsi 5 faizə enmiş, işsizlik 5 faizdən aşağı düşmüşdür. Ölkənin valyuta ehtiyatları artaraq 50 milyard dolları ötmüşdür.

Məruzədə qeyd olundu ki, Prezident İlham Əliyevin rəhbərliyi ilə hökumətin həyata keçirdiyi nəhəng işlərdən Şabran rayon zəhmətkeşləri də kənarda qalmamış və hər il olduğu kimi 2014-cü ildə də qarşıya qoyulan vəzifələrə layiqincə əməl etməklə regionun sosial-iqtisadi inkişafına uğurlu töhfələr vermişlər. Rayonumuzda sosial-iqtisadi və mədəni quruculuq sahəsində inkişaf davam etmiş, rayon mərkəzi, kəndlərimiz xeyli abadlaşmış, sosial əhəmiyyətli bir çox vacib məsələlər öz həllini tapmışdır.

Şəhərdaxili yolların çəkilişi, küçələrin işıqlandırılması diqqət mərkəzində olmuşdur. Şəhərin cənub girişində rayonun tarixi keçmişini əks etdirən abidənin və şəhərin şimal girişində qapının tikintisi başa çatmışdır. Ağalıq kəndində 12 mənzilli 2 mərtəbəli yeni yaşayış binası tikilib sakinlərin istifadəsinə verilmişdir. Rayonun daxili imkanları hesabına “Uşaq Gənclər İstirahət və Əyləncə Kompleksi”nin tikintisinə başlanmışdır.

Rayon mərkəzində 4,5 kilometr uzunluğunda 10 küçəyə 28 min 850 kvadratmetr asfalt beton döşənmişdir. 12 mənzilli 2 mərtəbəli 3 yaşayış binasının dam örtüyü təzələnmiş, 2 mərtəbəli 12 mənzilli 2 yaşayış binası əsaslı təmir olunmuş, fasadları alkoponla üzlənmişdir.

“Qəhrəmanlar seyrəngahı”nın Şəhidlər xiyabanı tikintisinin əsas hissəsi başa çatdırılmışdır. Həmin ərazidə 1400 kvadratmetr dekorativ daş, 370 kvadratmetr mişar daşından divar hörülərək üzlük çəkilmiş, 85 şəhidin mərmər üzərində şəkli əks etdirilmiş, iki milli qəhrəmanın büstü üçün təməl qoyulmuş, bulaq kompleksi tikilmiş və ərazidə müasir işıqlandırma sistemi quraşdırılmış, mindən çox ağac əkilmişdir. Şəhərdə piyadalar üçün 1,9 kilometr yeni yol salınmış, yeni salınmış səkilərə 4,2 min kvadratmetr, park və meydanlara isə 1,4 min kvadratmetr dekorativ üzlük daş döşənmişdir. Şəhərin park, meydan və seyrəngahlarında 6,9 kilometr uzunluğunda müasir işıqlandırma sistemi quraşdırılmışdır.

Sahibkarlar tərəfindən Padar kəndi ərazisində yeni özəl asfalt-beton zavodu tikilib istifadəyə verilmiş, “Qalaaltı Hotel SPA” mərkəzinin, “Əlincə” futbol klubu üçün təlim məşq düşərgəsinin, Şabran şəhərində məişət xidməti və ticarət mərkəzinin tikintisi davam etdirilmişdir. Bütövlükdə 2014-cü ildə rayonda 18,4 milyon manat həcmində tikinti-quruculuq işləri aparılmışdır ki, bu da 5 il əvvəlkindən 7 milyon manat və ya 40 faiz, 10 il əvvəlkindən isə 18 dəfə çoxdur.

N.Novruzov rayonun iqtisadi nəticələrindən danışarkən bildirmişdir ki, hesabat ilində məhsul buraxılışının ümumi həcmi 158,2 milyon manat, o cümlədən sənaye məhsulu istehsalı 7,9 milyon manat, kənd təsərrüfatı məhsulları istehsalı isə 83,1 milyon manat olmuşdur. Ötən 10 ildə rayonda məhsul buraxılışının həcmi 4,8 dəfə, sənaye məhsulu istehsalı 36 faiz, kənd təsərrüfatı məhsulları istehsalı isə 4 dəfədən çox artmışdır.

Buna mütənasib olaraq, 2014-cü ildə əhalinin pul gəlirləri də 3,1 faiz artaraq 109,6 milyon manat, adambaşına düşən pul gəlirləri 1 faiz artaraq 1949 manat, orta aylıq əmək haqqı 19,3 faiz artaraq 355, manata çatmışdır. 10 il bundan əvvəl isə orta aylıq əməkhaqqı 62 manat olmuşdur.

Yola saldığımız ildə rayonun emal müəssisələrində 18,4 min ton un və kəpək, özəl quşçuluq təsərrüfatlarında 17,9 min ton quş əti istehsal olunmuşdur. Rayonda istehsal olunan sənaye məhsulunun 84,8 faizi, kənd təsərrüfatı məhsullarının 99,8 faizi özəl sektorun payına düşür ki, bu da sahibkarlığın necə inkişaf etdiyini göstərən əyani misaldır.

2014-cü ildə 1113 yeni iş yeri açılmışdır ki, onlardan 978-i daimi iş yerləridir. Bu əvvəlki illə müqayisədə 2 dəfə çoxdur. Ümumiyyətlə, son 11 ildə 8304 yeni iş yeri açılmışdır ki, onun da 4998-i daimidir.

Azərbaycan Prezidenti cənab İlham Əliyevin regionların sosial-iqtisadi inkişaf strategiyası sayəsində ötən 10 ildə rayonumuzda sənaye məhsulu istehsalı 36 faiz, kənd təsərrüfatı məhsulları istehsalı 4 dəfə, tikinti quraşdırma işlərinin həcmi 18 dəfə, ümumilikdə məhsul buraxılışının həcmi isə 4,8 dəfə artmışdır. Nəticədə Şabran rayonu sosial-iqtisadi inkişafa görə bu gün tərəqqi etmiş bölgələrlə bir sırada qərarlaşmışdır.

2015-ci il üçün rayon büdcəsinin yerli gəlirləri 4 milyon 732 min manat, yerli xərcləri 12 milyon 136 min manat, yerli gəlir və xərcləri tənzimləmək üçün dotasiya 7 milyon 446 min manat proqnozlaşdırılmışdır.

Natiq xüsusi vurğuladı ki, Prezident cənab İlham Əliyev Nazirlər Kabinetinin iclasında və “Regionların sosial-iqtisadi inkişafı Dövlət Proqramı”nın I ilinin yekunlarına həsr olunmuş konfransdakı nitqində büdcə vəsaitindən qənaətlə və səmərəli istifadəni ciddi vəzifə kimi qarşıya qoymuşdur. Dövlət başçısının bu tələbinə rayonun hər bir müəssisə rəhbəri, həm də hər bir dövlət məmuru məsuliyyətlə yanaşmalı, dövlət vəsaitinin qədrini bilməli, əyintilərə imkan yaratmamalıdır.

Son illərdə rayonumuzda meyvəçilik, üzümçülük sürətlə inkişaf edir. Ötən 10 ildə meyvə bağları 3 dəfə artaraq sahəsi 1752 hektara, meyvə istehsalı 6 dəfə artaraq 4333 tona, üzüm bağları 11 dəfə artaraq sahəsi 388 hektara, üzüm istehsalı on dəfədən artaraq 977 tona çatmışdır.

Məhsuldarlıq üçün çətin olan yola saldığımız 2014-cü ildə rayonda 25,8 min ton taxıl istehsal edilmişdir. Rayonun fermer təsərrüfatlarında 23 min 858 baş iri buynuzlu, 47 min 598 baş xırda buynuzlu mal-qara vardır. Ət istehsalı 721 ton artaraq 19,8 min tona, süd istehsalı 2,4 min ton artaraq 15,4 min tona, yumurta istehsalı 470 min ədəd artaraq 22 milyon 38 min ədədə çatmışdır. Yüksək məhsul əldə edən rayonun fermerləri il ərzində yarmarkalara 22 adda 515 ton kənd təsərrüfatı məhsulu çıxarmışlar.

Bu, bir daha onu göstərir ki, Şabranın kənd zəhmətkeşləri Prezident İlham Əliyevin Nazirlər Kabinetinin ötən ilin yekunlarına və cari ilin vəzifələrinə həsr olunmuş hesabat yığıncağında qeyd etdiyi “Ərzaq təhlükəsizliyi hər bir ölkə üçün enerji təhlükəsizliyi qədər önəmlidir, əlbəttə, Azərbaycanın bəzi ərzaq məhsullarını xarici bazarlardan idxal etməsinə baxmayaraq, biz çalışmalıyıq ki, öz daxili istehsalımızı maksimum artıraq, fövqəladə hallardan özümüzü qoruyaq” fikirlərinin mahiyyətini yaxşı dərk edirlər.

İcra başçısı əhalinin enerji daşıyıcıları ilə təminatından danışarkən bildirdi ki, son illər rayon əhalisinin dayanıqlı elektrik enerjisi ilə təminatı daha da yaxşılaşmışdır. İl ərzində istehlakçılara fasiləsiz elektrik enerjisi verilmişdir. Qaz təchizatı ilə bağlı tədbirlər də davam etdirilir. Ötən il Zeyvə kəndinə təbii qaz verildi. Pirəbədil, Ağalıq, Rəhimli, Uzunboyad, Taxtalar, Söhbətli, Xırdaoymaq, Şahnəzərli və Sincanboyad kəndlərini əhatə edən 2650 metr qaz xətti əsaslı təmir olundu. Ağalıq, Rəhimli, Padar və Uzunboyad kəndlərinə 1225 metrlik yeni qaz xətləri çəkilmişdir. 2015-ci ildə Pirəbədil, Pirəmsən Günəşli, Xəlilli, Dağbilici, Zöhramı, Sumaqova kəndlərinə təbii qazın verilməsi planlaşdırılmışdır.

Payız-qış mövsümü ilə əlaqədar 17 ümumtəhsil məktəbi, 2 uşaq bağçası, iki 16 mənzilli yaşayış evi, mərkəzi rayon xəstəxanası və inzibati binaların əksər hissəsi müasir istilik sistemi ilə təchiz edilmişdir.

Şabran şəhərinin içməli su və kanalizasiya şəbəkələrinin tikintisi başa çatdığını bildirən N.Novruzov bildirdi ki, hazırda rayon icra hakimiyyətinin müraciəti əsasında yaşayış məhəllələri, fərdi mənzillər hissə-hissə yeni şəbəkəyə qoşulur. Ancaq bu işin sürətini artırmaq lazımdır. “Azərsu” tərəfindən Pirəbədil, Zöhramı, Sumaqova, Dağbilici, Sumaqova-Qazma kəndlərinin içməli su təchizatı şəbəkəsinin layihə smeta sənədləri hazırlanmış və layihənin icrası üçün müvafiq tədbirlər görülür.

2014-cü ildə sosial obyektlərin, təhsil, səhiyyə, mədəniyyət müəssisələrinin tikintisi və təmiri davam etmişdir. Dövlət investisiya vəsaiti hesabına 80 şagird yerlik Xəlilli ümumi orta məktəbi tikilib istifadəyə verilmiş, 80 şagird yerlik Taxtalar ümumi orta məktəbinin tikintisi isə başa çatmaq üzrədir.

Dövlət büdcəsinin yerli xərcləri hesabına şəhər 1 və 4 nömrəli tam orta, şəhər 1 nömrəli ümumi orta və Leyti kənd ibtidai məktəbləri cari təmir, 2870 yerlik 4 məktəb binası və 2 uşaq bağçası əsaslı təmir olunmuşdur. Hazırda “Cücələrim” uşaq bağçası üçün əlavə korpusun tikintisi davam edir.

İcra başçısı sonda qeyd etdi ki, ölkə başçısının vətəndaş-məmur münasibətiləri ilə bağlı tələbkarlığına uyğun olaraq rayon icra hakimiyyəti vətəndaşlarla müntəzəm əlaqəni daim diqqətdə saxlamış, sakinlərin müraciətlərinə, ərizə və şikayətlərinə diqqətlə yanaşmağa səy göstərmişdir.

Ötən il ərzində rayon icra hakimiyyətinə ümumilikdə 686 müraciət, o cümlədən icra hakimiyyəti başçısının ünvanına 366 ərizə, şikayət və təklif daxil olmuşdur. Azərbaycan Respublikasının Prezidenti Administrasiyasından rayon icra hakimiyyətinə daxil olmuş 251 müraciət araşdırılmışdır.

İcra başçısı məruzəsini bu sözlərlə tamamladı:

- Prezident cənab İlham Əliyevin Nazirlər Kabinetinin 2014-cü ilin sosial-iqtisadi inkişafının yekunları və qarşıda duran vəzifələrlə bağlı müşavirədə, “Regionların sosial-iqtisadi inkişafına dair 2014-2018-ci illər” Dövlət Proqramının I bölümünə həsr edilmiş konfransındakı proqram xarakterli nitqlərində qarşımıza çox mühüm vəzifələr qoyulur. Ona görə də mövcud ehtiyatlardan məhsuldar şəkildə istifadə etməli, xüsusən dövlət vəsaitinin xərclənməsində, səmərəli sərf edilməsində qayda-qanuna ciddi riayət etməliyik. Rayonumuzun böyük imkanlarından yaradıcılıqla faydalanmalı, ölkənin iqtisadiyyatına yeni töhfələr vermək üçün səylərimizi artırmalıyıq.

Hesabat məruzəsi ətrafında çıxışlar zamanı Azərbaycan Respublikası Prezident Administrasiyasının məsul əməkdaşı Arif Novruzov, Milli Məclisin deputatı Tahir Süleymanov və digər natiqlər bütövlükdə görülən işləri qənətbəxş hesab etdilər. Qeyd olundu ki, indiki vaxtda uğurlardan arxayınlaşıb ölkənin ümumi inkişaf dinamikasından bir addım belə geri qalmaq olmaz. İnkişafın göstəricisi olan uğurlar əhalinin firavanlığına və ölkənin çiçəklənməsinə xidmət edir.

Sonda 2015-ci ildə qarşıda duran vəzifələrlə bağlı qərar layihəsi qəbul olundu və yığıncaq iştirakçılarının Azərbaycan Respublikasının Prezidenti cənab İlham Əliyevə müraciəti qəbul olundu.

İlqar RÜSTƏMOV

Xalq qəzeti.- 2015.- 7 fevral.- S.6.