Azərbaycan I Avropa Oyunlarına

ev sahibliyi etməklə dünyaya sülhsevər

ölkə olduğunu bir daha göstərdi

Respublikamızın sürətli tərəqqisi və davamlı inkişafının təmin olunması istiqamətində Azərbaycan Prezidenti cənab İlham Əliyevin rəhbərliyi altında son illər ərzində görülmüş genişmiqyaslı işlər və əldə olunmuş böyük nailiyyətlər ölkəmizin sosial-iqtisadi həyatının bütün sahələrini əhatə etmiş, gələcək uğurlarımız üçün möhkəm təməl yaratmışdır.

Dövlət başçımızın diqqət və qayğısı sayəsində hazırda nəqliyyat sektoru da sürətlə inkişaf edir və müasirləşir. Bu sahənin iqtisadi göstəriciləri ildən-ilə yüksəlir, görülən işlərin keyfiyyəti və səmərəliliyi artır, daşımalara olan tələbat tam ödənilir. Bütün sahələrlə yanaşı, ölkəmizin idman sahəsində son illər ərzində dünya miqyasında əldə etdiyi uğurları da xüsusi olaraq vurğulamaq istərdim. Konkret olaraq diqqəti “Bakı-2015" I Avropa Oyunlarına yönəltməyi məqsədəuyğun sayıram. Belə ki, bu il iyun ayının 12-də başlanan I Avropa Oyunları sülh, sabitlik və yüksək bayram ovqatında başa çatdı. Bu möhtəşəm tədbir Azərbaycanın malik olduğu iqtisadi, siyasi və mədəni-intellektual potensialı bir daha bütün dünyaya nümayiş etdirdi. Beynəlxalq ictimaiyyət bir daha ölkəmizin iqtisadi qüdrətinin, müasir şəhər infrastrukturunun, turizm imkanlarının, qlobal tədbirləri yüksək səviyyədə təşkil etmək əzminin, ən nəhayət, yüksək tolerantlığının və qonaqpərvərliyinin əyani şahidi oldu. Bu qlobal idman tədbiri, eyni zamanda, müasir Azərbaycanın dünyaya dolğun şəkildə təqdimatı, qazandığımız uğurların, habelə üzləşdiyimiz münaqişə ilə bağlı əsl gerçəkliklərin dünyaya çatdırılması baxımından da mühüm önəm daşıdı.

Bəli, I Avropa Oyunlarının Bakıda keçirilməsi ölkəmizin böyük nailiyyətidir və bu, dövlətimizin tarixi uğurudur. Əlbəttə, sözügedən tarixi qərarın qəbul edilməsində ölkəmizin beynəlxalq nüfuzu həlledici rol oynamışdır. Başqa sözlə, son illər ərzində Azərbaycan dünya miqyasında özünü dinamik inkişaf edən müasir güclü ölkə kimi təqdim edə bilmişdir. Baxmayaraq ki, Azərbaycan cəmi 24 ildir müstəqil dövlət kimi yaşayır, lakin bu gün Azərbaycan dünya miqyasında çox etibarlı tərəfdaş və dost kimi tanınır. Eyni zamanda, ölkə infrastrukturunun müasirləşməsi və Azərbaycanın mötəbər beynəlxalq tədbirlərin keçirilməsi üzrə mükəmməl təcrübəyə sahib olması da bu tarixi qərarın verilməsinə səbəb oldu. Yəni, ölkəmiz bu tədbirlərdə hər dəfə öz təşkilatçılıq qabiliyyətini göstərməklə bir növ yeni standartlar tətbiq edir. Həmçinin Avropa Oyunları kimi beynəlxalq tədbirin keçirilməsi üçün Azərbaycanın seçilməsi qitə ölkələri içərisində inkişaf və sabitlik göstəricilərinə görə ən əlverişli dövlətlərdən biri olan Azərbaycana qlobal səviyyədə səmimi inamın, etibarın təsdiqi və təntənəsidir. Bu inam və etibarın arxasında isə məhz Azərbaycanın inkişafı, müasir infrastrukturu və təhlükəsiz ölkə olması amili dayanır.

Birinci Avropa Oyunlarının yüksək səviyyədə keçirilməsi böyük təşkilatçılıq işləri tələb edirdi. “Azərbaycan Dəmir Yolları” Qapalı Səhmdar Cəmiyyətində (QSC) də bu məsələyə mühüm önəm verilir, olimpiadanın iştirakçılarına, şəhərimizin qonaqlarına yüksək səviyyəli nəqliyyat xidmətlərinin göstərilməsi üçün xüsusi diqqət yetirilirdi.

Xatırladım ki, birinci Avropa Oyunları ilə bağlı Nəqliyyat Nazirliyi tərəfindən kompleks tədbirlər proqramı hazırlanmış və “Azərbaycan Dəmir Yolları” QSC-də öz fəaliyyətini həmin proqrama uyğunlaşdırmışdı. QSC-nin sədri Cavid Qurbanovun rəhbərliyi ilə qarşıya qoyulan bütün vəzifələr vaxtında və yüksək səviyyədə icra edildi. Dəmir yolunda sərnişindaşımada keyfiyyət daha da yüksəldildi. Turistlərin dəmir yolu biletini asan əldə etmələri üçün elektron bilet satışı xidmətləri diqqət mərkəzində saxlanıldı. Dəmir yolu nəqliyyatında xidmət səviyyəsinin yaxşılaşdırılması, sərnişinlərə göstərilən xidmətlərin ən müasir standartlara cavab verməsi üçün bütün istiqamətlərə hərəkət edən sərnişin qatarlarına bilet satışı elektronlaşdırılaraq “onlayn” vasitəsilə təmin edildi. Respublika ərazisində bilet satışı kassaları tam komputerləşdirildi, sərnişinlərin rahat və maneəsiz bilet əldə etmələri üçün bütün lazımi tədbirlər görüldü. “Qaynar xətt” şəbəkəsi yaradıldı, elektron ünvanlar müəyyənləşdirildi. Eyni zamanda, sərnişin təsərrüfatına aid bütün məlumatlar saytda yerləşdirildi. Bundan başqa, Bakı sərnişin stansiyasının kassalarında post terminal aparatları quraşdırıldı. Bakı sərnişin stansiyasında və digər bilet satışı aparan kassalarda respublika daxili bilet satışının hər iki istiqamətə (gediş və gəliş), 2 nömrəli bilet kassasında isə Rusiya və Ukrayna dövlətlərinin ərazisində hərəkət edən sərnişin qatarlarına və geriyə bilet satışının təşkili təmin olundu.

Yuxarıda qeyd edilənlərlə yanaşı, birinci Avropa Oyunlarının keçirilməsi ilə bağlı nəqliyyat-yol kompleksi üzrə tədbirlər planına əsasən, Bakı, Sumqayıt, Biləcəri, Balakən və Lənkəran dəmir yolu vağzallarında da təmir işləri həyata keçirildi. Biləcəri, Lökbatan, Baş Sumqayıt dəmir yolu vağzallarında sərnişinlər üçün lazımi şərait yaradıldı. Balakən dəmir yolu vağzalının dam örtüyü tam, Gəncə vağzalı isə əsaslı təmir edildi.

Yarışlarla bağlı ölkəmizə çoxsaylı qonaqların gələcəyi nəzərə alınaraq dəmir yolu stansiyalarında məlumatların xarici dillərdə oxunmasını təmin etmək üçün Bakı və Sumqayıt sərnişin stansiyalarında, eyni zamanda, Gəncə vağzalında səsli məlumatların yayılması üçün hazırlıq işləri başa çatdırıldı.

Azərbaycana gələn qonaqların dəmir yolunun xidmətlərindən də istifadə edəcəyi, ölkəmizin səfalı guşələrinə səfərlər təşkil olunacağı nəzərdə tutulduğundan qatarlarda xidmətin daha da yaxşılaşdırılması üçün bir sıra tədbirlər reallaşdırıldı.

Yarışların keçiriləcəyi müddətdə əcnəbi turistlərin qarşılanması, onların yönləndirilməsi məqsədi ilə Bakı sərnişin stansiyasında Mədəniyyət və Turizm Nazirliyinin müvafiq qurumları ilə birlikdə informasiya mərkəziləri yaradıldı və lazımi avadanlıqlarla təchiz olundu.Eyni zamanda, Bakı sərnişin stansiyasında rəsmi nümayəndələr zalına ingilis və rus dillərində tərcüməçi işə götürüldü. Vaqon bələdçiləri və bilet kassirləri yeni xüsusi geyim formaları ilə təmin olundular.

Bir sözlə, cənab Prezident İlham Əliyevin qarşıya qoyduğu əsas vəzifənin - I Avropa Oyunlarının Yay Olimpiya Oyunları səviyyəsində baş tutması üçün hər birimiz vəzifəsindən, sosial statusundan, milli etnik və dini mənsubiyyətindən asılı olmayaraq, əməli fəaliyyətimizlə töhfəmizi verdik. Sonda isə əldə edilən uğurlar bütün dünyaya yayıldı. Buna görə də hər birimiz xalqımıza I Avropa Oyunlarının həyəcanını, sevincini yaşatdığı üçün Prezident İlham Əliyevə, Azərbaycanın birinci xanımı, Heydər Əliyev Fondunun prezidenti, I Avropa Oyunlarının Təşkilat Komitəsinin sədri Mehriban xanım Əliyevaya minnətdarıq.

Xeyrulla HÜMBƏTOV,

Yeni Azərbaycan Partiyasının

“Azərbaycan Dəmir Yolları”

Qapalı Səhmdar Cəmiyyəti üzrə

ilk təşkilatının sədri

Xalq qəzeti.- 2015.- 2 iyul.- S.4.