“Tale yolu”nun izi ilə

Şair, publisist Muxtar Qasımzadənin yenicə çapdan çıxmış kitabı “İllərdən illərə” adlanır. Müəllif bu kitabda ilk mətbu nümunələrini – şeir, poema, hekayə, resenziya, zarisovka və fotoları oxuculara təqdim edir. “Tale yolu”adlanan giriş hissədə şair keçdiyi həyat və yaradıcılıq yolu ilə bizi tanış edir.

Kitabın “Resenziyalar” bölməsində müəllifin tanınmış şair və yazıçılar—Kəmalə Ağayeva, Hüseyn Razi, Əhməd Qəşəmoğlu, Əbülfəz Naxçıvanlı, Cavanşir Eloğlu və başqalarının Bakıda, Moskvada çap olunan kitablarına ayrı-ayrı illərdə yazdığı rəylərlə tanış oluruq.Bu resenziyalarda söz ustadlarının poeziya və nəsr kəhkəşanında tutduqları yer, vətəndaşlıq mövqeyi, Vətən, torpaq, xalq sevgisi, sənət dünyasında axtarışları, poetik duyğuları böyük məhəbbətlə təhlil olunur.

Kitabda Naxçıvanda xalq qəhrəmanı Babəkin 14 metrlik heykəlini ucaldan rəssam-heykəltaraş Elman Cəfərov, ecazkar təbiət mənzərələrinin ən yaxşı nümunələrini yaratmış rəssam Babək Abuzərli, ömrü boyu qədim nəfəsli musiqi alətini el şənliklərində, bayramlarda, respublika və beynəlxalq festivallarda səsləndirib ifaçılıq məharətini göstərən Əli Sevdimalıyev, elləri, obaları gəzib dastan danışmış çobankərəli Aşıq Qulu, tarixin yadigarı, tərtibatçı-rəssam, heykəltaraş Arif Qədimin yaratdığı zəngin qalereyadan ibarət Naxçıvan xalça muzeyi, xalq sənətini yaşadanlar haqqında məqalələr qəlbimizdə iftixar və məhəbbət duyğuları yaradır. “Səyahət dəftəri”ndən “Bizim idarədə şeytan yoxdur” adlı hekayə öz mövzu aktuallığı və oxunaqlığı ilə şairin nəsr yaradıcılığının yeni bir səhifəsini təşkil edir.

“Poeziya” bölməsində şair bizi ecazkar Naxçıvan təbiəti ilə yanaşı, yaxın və uzaq ünvanlara aparır. Öz dəsti-xətti, poeziya aləmi olan şair “Avtoportret” ,"Gülüstan türbəsi", “Naxçıvanım”, “Mərhum şairlərə məktub”, “Şeir”, “Mən itmərəm”, "Telli saz" , “Fəhlə ömrü”, “İllərin qanadında”, " Nə bilim" və digər şeir və qəzəllərində özünəməxsus poetik fikirlər çələngini təqdim edir. Doğma torpağa, yurda məhəbbət, xalqımızın qəhrəmanlıq tarixi, gələcək nəsillər üçün yaradılan yadigarlar, Vətən, millət sevgisi şairin iç dünyasından süzülüb gələn misralara çevrilir.

“Yaradan əllər” poemasında müəllif müasir abidələr," göydələn"lər, binalar inşa edən, yeni ünvanlar yaradan, zəhmət meydanında gecə-gündüz zəfər yazanların əməyini ilhamla tərənnüm edir.

Muxtar Qasımzadənin şeirləri rus, ingilis, fransız, fars və digər dillərə tərcümə olunmuş və bu poeziya nümunələri də yaddaşlara yazılmışdır. Kitabda onun xarici dillərdə nəşr olunmuş şeirlərindən nümunələr öz əksini tapmışdır. Akademiklər Bəkir Nəbiyev, İsa Həbibbəyli, görkəmli şairlər Cabir Novruz, Hüseyn Razi, Fikrət Qoca, Nüsrət Kəsəmənli və başqaları M.Qasımzadənin yaradıcılığına yüksək qiymət vermişlər.

“Xatirə körpüsü” adı altında verilmiş foto-şəkillər, məktublar, əlyazmaların hər biri dəyərli xatirədir.

“Əcəmi” Nəşriyyat-Poliqrafiya Birliyində çapdan buraxılmış yeni nəşr M.Qasımzadənin respublika qəzet və jurnal səhifələrində dərc olunan məqalə və şeirlərinin, radio və televiziya verilişlərinin yalnız bir hissəsini təşkil edir.

Afət SADIQOĞLU

Xalq qəzeti.- 2015.- 6 noyabr.- S.7.