Dövlətimizin iqtisadi qüdrəti artdıqca

mədəniyyətimizin xarici ölkələrdə təbliği genişlənir

Ulu öndər Heydər Əliyev respublikamızda siyasi hakimiyyətə qayıdandan sonra, digər sahələr kimi, mədəniyyətimiz də özünün yeni inkişaf mərhələsinə qədəm qoymuşdu. İşinin çoxluğuna və ölkədəki ictimai-siyasi vəziyyətin gərgin olmasına baxmayaraq, ümummilli liderimiz daim mədəni tədbirlərdə iştirak edir, mədəniyyət, incəsənət sahəsində çalışanların yaradıcılığı ilə maraqlanır, onların xidmətinin qiymətləndirilməsini diqqət mərkəzində saxlayırdı.

Mən incəsənət adamları ilə daha çox ünsiyyətdə olduğuma görə onların Heydər Əliyevdən eşitdikləri çoxsaylı ifadələri dönə-dönə təkrar etdiklərinin şahidinə çevrilmişəm. Məsələn, ulu öndər teatr tamaşalarının birindən sonra yaradıcı heyətlə görüşərkən deyibmiş ki, siyasətdə, iqtisadiyyatda, elm və texnikada bir adam başqasının layiq olduğu yeri tuta bilər, mədəniyyətdə, xüsusən, yaradıcılıqda isə bu, mümkün deyil. Yaradıcılıqda kim hansı səviyyəyə layiqdirsə, gec də olsa, mütləq həmin yeri tutacaq. Yaxud, ulu öndərin başqa bir fikri də incəsənət adamları tərəfindən tez-tez yada salınır. Ümummilli lider demişdir ki, vaxt gələcək, müstəqil Azərbaycan Respublikası qüdrətli dövlətə çevriləcək və o zaman dövlətimiz milli mədəniyyətimizin həqiqətən dəyərli olan nümunələrinin beynəlxalq aləmdə təbliğ edilməsi üçün heç nəyi əsirgəməyəcək. Biz şadıq ki, həmin vaxt gəlib və həm dövlətimiz, həm də ulu öndərin adını daşıyan fond Azərbaycan mədəniyyətinin dünya miqyasında təbliğ edilməsi üçün lazım olan bütün addımları atır.

Bununla yanaşı, qətiyyətlə deyə bilərik ki, son illər Azərbaycan mədəniyyətinin ən müxtəlif qollarının dünyada davamlı təbliğatının həyata keçirilməsi onu deməyə əsas verir ki, dövlət mədəniyyətimizi təbliğ etdiyi kimi, mədəniyyətimiz də ölkəmizi yüksək səviyyədə təmsil edə bilir. Təbii ki, bu təbliğatın önündə Heydər Əliyev Fondu və onun rəhbəri, ölkəmizin birinci xanımı,

UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyeva durur.

Fondun fəaliyyəti barədə mətbuatda verilən məlumatlardan aydın olur ki, Azərbaycan musiqiçilərinin, xalq musiqisi ustalarının konsertləri, rəssamların sərgiləri, xalçalarımızın nümayişi və başqa mədəniyyət nümunələrimiz xarici ölkələrdə təqdim edilib və özünə minlərlə insanı cəlb edib. Azərbaycan mədəniyyətinin təbliği ilə bağlı tədbirlərin geniş miqyas alması, təbii ki, hər bir azərbaycanlının sevincinə səbəb olur, bundan qürur hissi keçirir.

Fikrimizi konkret faktlarla davam etdirək. Qeyd edim ki, peşə fəaliyyətimlə əlaqədar müxtəlif tədbirlərdə milli mədəniyyətimizin təbliğini diqqətlə izləyirəm. Məsələn, sentyabrda Parisdə Heydər Əliyev Fondunun təşkilatçılığı ilə “Azərbaycan şəhərciyi”nin açılışı zamanı dünya şöhrətli fotoqraf Reza Deqatinin “Azərbaycan tolerantlıq ölkəsi” adlı fotosərgisi də nümayiş etdirilmişdi. Qəzetlərdə oxudum ki, Parisin Pale Royal meydanında Heydər Əliyev Fondunun təşkil etdiyi “Azərbaycan şəhərciyi”nin rəsmi açılışı əcnəbi seyirçilərin böyük marağına səbəb olub. Fransa mətbuatının yazdığına görə, Azərbaycanın birinci xanımı, Heydər Əliyev Fondunun prezidenti Mehriban Əliyevanın da iştirak etdiyi tədbirlərə Fransanın tanınmış dövlət və mədəniyyət xadimləri qatılıblar.

Xatırladaq ki, Reza Deqati Azərbaycana ilk dəfə 1987-ci ildə səfər edib. 1997-ci ildə isə bir neçə ay Azərbaycanda yaşayıb, ölkəni gəzərək sadə insanların gündəlik həyatını, məişətini, adət-ənənələrini fotolarda əbədiləşdirib. Onun “Talelərin qovuşması”, “Müharibə+Sülh”, “Ümid”, “Qəlbin pəncərəsi” kimi layihələri dünyada məşhurdur. O, ABŞ-ın Milli Coğrafiya Cəmiyyətinin üzvü, bir sıra nüfuzlu universitetlərin fəxri doktoru, Fransa Respublikasının “Xidmətlərə görə” ordeninin laureatıdır.

“Xalqların, insanların daha yaxın olmasında mədəniyyət tədbirləri böyük əhəmiyyət daşıyır”, - deyən Mehriban xanım Əliyeva həmin tədbirdəki çıxışında əlavə edib ki, Fransada mütəmadi olaraq Azərbaycan mədəniyyəti günləri keçirilir: “İndi Fransanın ali məktəblərində Azərbaycan dili, tarixi, mədəniyyəti tədris olunur. Bakıda fransız liseyi fəaliyyət göstərir, Azərbaycan-Fransa universitetinin yaradılmasına dair niyyət məktubu imzalanıb, 3 ildir ki, Kann şəhərində Azərbaycanın mədəniyyət günləri keçirilir və bu, gözəl ənənəyə çevrilib”.

Qədim İpək Yolu üzərindəki ölkələr arasında tarixən mövcud olmuş mədəni əlaqələri yenidən bərpa və inkişaf etdirmək, habelə mədəniyyət mübadiləsi ilə dünyada sülh prosesinə töhfə vermək məqsədi daşıyan beynəlxalq tədbirlər davam edir. Məsələn, avqustun son günlərində BMT-nin Dünya Turizm Təşkilatının dəstəyi ilə keçirilən və Koreyanın qədim mədəniyyət mərkəzlərindən olan Qyonqcu şəhərindəki Dünya Mədəniyyət Parkında təşkil olunan festivalda 30-dan çox ölkə, o cümlədən Azərbaycan təmsil olunurdu.

İnternet resurslarında oxuyuruq ki, Koreya Respublikasının Baş naziri Hvanq Kyo-Ahn öz çıxışında bu cür tədbirlərin xalqları, ölkələri bir-birinə daha da yaxınlaşdırmaq baxımından əhəmiyyətini vurğulayıb. Qeyd edib ki, müxtəlif mədəniyyətləri, adət-ənənələri təmsil edən insanların mədəniyyət mübadiləsi xalqlar arasında yeni əməkdaşlıq imkanlarını ortaya çıxarmağa kömək edəcək. Dünyada müharibələrin, zorakılıq hallarının çoxaldığı bir vaxtda bu cür mədəni tədbirlərə daha böyük ehtiyac olduğunu deyən Baş nazir, ölkəsinin gələcəkdə də belə təşəbbüslərə dəstək verəcəyini bildirib.

Ancaq bizim üçün ən maraqlı məqam həmin tədbirdə dövlətimizin və mədəniyyətimizin təmsil olunması idi. Azərbaycan bu festivalda dövlət rəqs və qədim musiqi alətləri ansambllarının üzvlərindən, pianoçu və solistlərdən, saz ifaçılarından ibarət böyük bir heyətlə iştirak edirdi. Açılış konsertinin maraqlı məqamlarından biri kombinasiyalı kompozisiyalar olub. Koreyalı və azərbaycanlı rəqqasların birgə çıxışları mərasimə toplaşanlarda böyük maraq doğurub. Birgə məşq üçün kifayət qədər vaxtın olmamasına baxmayaraq, rəqqaslar Azərbaycan və Koreya rəqslərini yüksək səviyyədə ifa ediblər.

Qeyd edək ki, incəsənət ustalarımızın festivalda iştirakı Azərbaycan Mədəniyyəti Fondunun və SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının təşkilatçılığı, Mədəniyyət və Turizm Nazirliyinin, ölkəmizin Seuldakı səfirliyinin dəstəyi ilə baş tutmuşdu. Xatırladaq ki, festival çərçivəsində “Azərbaycan günü” adlı konsert təşkil olunmuş, habelə incəsənət ustalarımız bir həftə ərzində hər gün iki dəfə mədəniyyət proqramı ilə çıxış etmişdilər.

İndi isə yazının əvvəlində ulu öndərdən gətirdiyimiz sitatı bir daha yada salaq və təkrarən vurğulayaq ki, həqiqətən, ümummilli liderimizin arzuladığı qüdrətli Azərbaycan dövləti formalaşdırılıb və bu dövlət milli mədəniyyətimizin beynəlxalq aləmdəki təbliğini sürətləndirmək üçün lazım olan bütün addımları atır. Əminik ki, gələcəkdə bu addımların sayı daha da çox olacaq.

Rafiq SALMANOV

Əməkdar mədəniyyət işçisi

Xalq qəzeti.- 2015.- 10 oktyabr.- S.6.