Təhsil ocaqlarında yeni dərs ili başlandı

Bakı Ali Neft Məktəbi

Tədbirdə Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev, Tələbə Qəbulu üzrə Dövlət Komissiyasının (TQDK) sədri Məleykə Abbaszadə, bp-nin Azərbaycan, Gürcüstan və Türkiyə üzrə regional prezidenti Qordon Birrell, ARDNŞ-in vitse-prezidentləri və struktur rəhbərləri, ölkəmizdə fəaliyyət göstərən bir çox yerli və beynəlxalq transmilli şirkətlərin rəhbərləri, eyni zamanda, Bakı Ali Neft Məktəbinin (BANM) professor-müəllim heyəti, tələbələr və valideynlər iştirak ediblər.

Bakı Ali Neft Məktəbinin rektoru Elmar Qasımov bu təhsil ocağının qısa zamanda əldə etdiyi uğur, görülən işlər və perspektivlər haqqında məlumat verib. Bildirib ki, bu il TQDK-nın ali məktəblərə keçirdiyi qəbul imtahanlarında bu ali məktəb üzrə minimal bal 659, ümumi orta bal isə 676 olub. Bunun respublika üzrə ən yüksək nəticə olduğunu bildirən Elmar Qasımov ötən illərə nisbətən bütün göstəricilərdə dinamikanın müşahidə olunduğunu qeyd edib. Birinci qrup üzrə keçirilmiş test imtahanlarında 700 bal toplayan 7 tələbədən 3-ü Bakı Ali Neft Məktəbinə qəbul olub.

Rektor Elmar Qasımov Prezident İlham Əliyevin Bakı Ali Neft Məktəbinin yaradılması haqqında 29 noyabr 2011-ci il tarixli fərmanına toxunaraq, ali məktəbin ölkə başçısının “Biz neft kapitalını insan kapitalına çevirməliyik” sözlərinin reallaşması istiqamətində bariz nümunə olduğunu qeyd edib. Rektor E.Qasımov ulu öndər Heydər Əliyevin 16 avqust 2001-ci il tarixli fərmanı ilə təsis edilmiş “Neftçilər günü” münasibətilə bütün Azərbaycan neftçilərini ürəkdən təbrik edib və BANM-ın tələbələrinin gələcəkdə yüksək ixtisaslı mütəxəssislər kimi bu sahəyə öz töhfələrini verəcəyinə əminliyini ifadə edib.

ARDNŞ-in prezidenti Rövnəq Abdullayev qısa müddət ərzində Bakı Ali Neft Məktəbində kadr potensialının formalaşdırılması istiqamətində böyük işlərin görüldüyünü və yüksək nailiyyətlər əldə edildiyini bildirib. Qeyd edib ki, 2014-2015-ci tədris ilində Bakı Ali Neft Məktəbi beynəlxalq şirkətlərlə yeni əməkdaşlıqlara başlayıb, tədrisin yüksək səviyyədə aparılması üçün müasir texnologiyaların tətbiqini genişləndirməklə yeni uğurlara imza atıb. Rövnəq Abdullayev 2015-2016-cı tədris ilində də BANM-da aparılan işlərin davam etdiriləcəyinə, fəaliyyətinin daha da genişlənəcəyinə inamını ifadə edib.

TQDK-nın sədri Məleykə Abbaszadə BANM-ın bir çox göstəricilərə görə ali məktəblər arasında lider olduğunu diqqətə çatdırıb. Bildirib ki, BANM-a qəbul olmuş tələbələrin topladığı minimal bal 659 olub. Bunun yüksək nailiyyət olduğunu bildirən M.Abbaszadə tələbələri dövlətimiz tərəfindən yaradılan əlverişli şəraitdən bəhrələnməyə çağırıb.

bp-nin Azərbaycan, Gürcüstan və Türkiyə üzrə regional prezidenti Qordon Birrell Bakı Ali Neft Məktəbi ilə təmsil etdiyi şirkətin əlaqələrindən söz açaraq, ikitərəfli əməkdaşlığın inkişafından məmnunluğunu bildirib. Qordon Birrell BANM-ın yüksək səviyyəli gənc peşəkar kadrların hazırlanmasında rolunu yüksək qiymətləndirib. Bildirib ki, BANM bp-nin ən yaxın tərəfdaş ali təhsil ocağıdır.

Bakı Ali Neft Məktəbinə 700 bal toplayaraq qəbul olunan tələbələr və onların valideynləri yüksək səviyyədə təhsil üçün BANM-da yaradılan şəraitə görə Prezident İlham Əliyevə təşəkkürlərini bildiriblər.

Sonra 2015-2016-cı tədris ilində Bakı Ali Neft Məktəbinə qəbul olunmuş tələbələrə tələbə vəsiqəsi və ARDNŞ tərəfindən hədiyyə olunan noutbuklar təqdim olunub.

Neft və Sənaye Universiteti

Dünən Azərbaycan Dövlət Neft və Sənaye Universitetində (ADNSU) “Bilik Günü” münasibətilə yüksək balla bu təhsil ocağına daxil olmuş birinci kurs tələbələri ilə görüş keçirildi. Görüşdə Azərbaycan Dövlət Neft Şirkətinin vitse-prezidenti, akademik Xoşbəxt Yusifzadə və YAP Nəsimi rayon təşkilatının sədri Məlahət İbrahimqızı iştirak edirdi.

Tədbiri giriş sözü ilə açan ADNSU rektoru, professor Mustafa Babanlı bildirdi ki, artıq 11 ildir Azərbaycan Prezidenti İlham Əliyevin sərəncamına əsasən ölkədə “Bilik Günü” qeyd edilir. Rektor bu münasibətlə universitetə daxil olmuş bütün tələbələri, eləcə də professor-müəllim heyətini təbrik etdi. Onun sözlərinə görə, bu il ADNSU-nun bakalavr səviyyəsinə 1979 nəfər daxil olub, onlardan 116 nəfəri 600-dən çox bal toplayıb. Bir nəfər universitetə 690 balla daxil olub. Tələbələrin 1235 nəfəri dövlət sifarişi əsasında təhsil almaq hüququ qazanıb.

Rektor tələbələrin nə üçün Neft və Sənaye Universitetini seçməsi sualına cavab olaraq bildirdi ki, bu ali təhsil ocağı böyük və şanlı tarixə malikdir, yüksək elmi-texniki potensialı var. Ümummilli liderimiz Heydər Əliyev iki il burada ali təhsil alıb. 30 ilə qədər SSRİ Neft Sənayesinə və Dövlət Plan Komitəsinə rəhbərlik etmiş həmyerlimiz Nikolay Baybakov, SSRİ qaz sənayesi naziri, Sosialist Əməyi Qəhrəmanı Sabit Orucov, Rusiyanın bir çox rayonlarında neft-qaz yataqlarını kəşf edən, Sosialist Əməyi Qəhrəmanı Fərman Salmanov, Hindistan neftinin “atası” üç dəfə SSRİ Dövlət Mükafatı laureatı Əyyub Tağıyev, kosmonavt Vitali Jolobov, Anqolanın Prezidenti Duş Santuş, “Lukoyl” şirkətinin prezidenti Vahid Ələkbərov, Sovet İttifaqında kosmik uçuşlar üzrə dövlət komissiyasının sədri olmuş, general-leytenant, Sosialist Əməyi Qəhrəmanı Kərim Kərimov və yüzlərlə görkəmli dövlət və ictimai xadim, alim bu təhsil ocağının məzunu olub. Eyni zamanda, neft Azərbaycanın brendidir, tələbələrin ADNSU-nu seçməsinin səbəblərindən biri də budur.

Sonda birinci kurs tələbələrinə tələbə vəsiqəsi və qiymət kitabçaları, 650-dən çox bal toplayan tələbələrə, eləcə də yüksək tədris və mənəviyyat göstəricilərinə malik müəllimlərə qiymətli hədiyyələr təqdim edildi.

Nəsimi rayonu

“Bilik Günü” Nəsimi rayonunun təhsil müəssisələrində də təntənə və bayram şənlikləri ilə qeyd olunmuşdur. Əlamətdar günlə bağlı bütün orta məktəblərdə yeni dərs ilinin ilk günü rəngarəng və maraqlı tədbirlərlə qarşılanmışdır.

“Bilik Günü”nə həsr olunan tədbirlərin bir neçəsində iştirak edən Nəsimi Rayon İcra Hakimiyyətinin başçısı Asif Əsgərov kollektivləri yeni dərs ilinin başlanması münasibəti ilə təbrik etmiş, onlara təhsildə uğurlar arzulamışdır. Rayonun yeni rəhbəri qazanılan uğurlardan danışaraq bidirmişdir ki, bu il məktəbləri 1532 nəfər bitirmiş, onlardan 957-si tələbə adını qazanmışdır. Abituriyentlərdən 200 nəfəri 500-dən yuxarı, 72-si 600-dən, 29-u isə 650-dən çox bal toplamışdır. Məzunlarından 166-sı xarici ölkələrin müxtəlif ali məktəblərinə qəbul olunmuşlar.

Paytaxtın mərkəzindəki 23 saylı tam orta məktəbdə keçirilən şənlikdə təhsil ocağının direktoru Yuliya Kərimova pedaqoji kollektivə yeni dərs ilində daha böyük uğurlar arzulamışdır. O, təhsilə olan diqqət və qayğıya, məktəbdə yaradılan şəraitə görə cənab Prezidentə öz dərin təşəkkürünü bildirmişdir. Məktəbin tarixi barədə məlumat verən direktor qeyd etmişdir ki, əvvəlki bina 1935-ci ildə tikilmişdi. Prezident İlham Əliyevin sərəncamına əsasən sökülərək müasir standartlara uyğun tikilmiş məktəb 2014-cü il avqustun 26-da ölkə rəhbərinin və xanımı Mehriban Əliyevanın iştirakı ilə istifadəyə verilmişdir. Məktəb 2006-cı ildə “Ən yaxşı ümumtəhsil müəssisəsi” müsabiqəsinin qalibləri arasında olmuşdur. Burada 1974 şagird təhsil alır və 126 müəllim çalışır. Məktəb ingilis dili təmayüllüdür, iki xarici dil tədris olunur.

Rayondakı tarixi və ənənələri ilə seçilən 1 saylı orta məktəbdə keçirilən mərasimdə isə direktor Elida Rzayeva məktəbliləri və müəllimləri bayram münasibətilə təbrik edərək bildirmişdir ki, paytaxtın bu qocaman təhsil ocağı XIX əsrin axırlarından fəaliyyət göstərir. 1941-1945-ci illərdə burada hərbi hospital yerləşmişdir. 2012-ci ildə məktəb əsaslı təmir olunmuş, 2015-ci ildə isə həyətdə yeni 10 sinif otağından və idman zalından ibarət 3 mərtəbəli korpus inşa olunmuşdur. Buna görə direktor kollektiv adından ölkə başçısına minnətdarlığını bildirmişdir.

Texniki Humanitar Liseydəki tədbirdə direktor Səidə Zeynalova kollektivə yeni dərs ilində uğurlar arzulayaraq demişdir ki, ötən mövsümdə məktəb “Ən yaxşı ümumtəhsil müəssisəsi” adını qazanmışdır. Bu il 112 məzunun 106-sı ali məktəblərə qəbul olmuş, onlardan 40 nəfəri 500-dən, 16-sı 600-dən, 5-i isə 650-dən yuxarı bal toplamışlar. Dövlət Proqramına əsasən, bu il əsaslı təmir olunan lisey binası sentyabr ayının 10-da Prezident İlham Əliyevin iştirakı ilə istifadəyə verilmişdir.

Məktəblərdəki şənliklər şagirdlərinin hazırladığı bədii kompozisiya, müasir bal və milli rəqslər, tədbir iştirakçılarının alqışları ilə müşayət olunmuşdur. Bu tədbirlərdə RİH-nin məsul nümayəndələri, ağsaqqallar, veteranlar və rayon ictimaiyyətinin nümayəndələri iştirak etmişlər.

Nərimanov rayonu

Dünən bütün ölkə ərazisində olduğu kimi, paytaxtın Nərimanov rayonunda da yeni tədris ilinin başlanması və “Bilik Günü” silsilə tədbirlərlə qeyd edildi.

Rayon ərazisində yerləşən sağlamlıq imkanları məhdud uşaqlar üçün 5 nömrəli Respublika Xüsusi İnternat Məktəbində Heydər Əliyev Fondunun təşkilatçılığı ilə keçirilən tədbiri giriş sözü ilə məktəbin direktoru İradə Vəzirova açdı. O, tədbir iştirakçılarını salamlayaraq Heydər Əliyev Fonduna və Nərimanov Rayon İcra Hakimiyyətinin rəhbərliyinə göstərilən qayğı və diqqətə görə minnətdarlığını bildirdi.

Nərimanov Rayon İcra Hakimiyyətinin başçısı Abdin Fərzəliyev çıxış edərək məktəbdə təhsil alan şagirdləri yeni dərs ilinin başlanması münasibətilə təbrik etdi, onlara ən xoş arzularını çatdırdı. A.Fərzəliyev ümummilli liderimiz Heydər Əliyevin ölkəmizdə təhsilin inkişafı istiqamətində apardığı köklü islahatları diqqətə çatdırdı, müasir tələblər səviyyəsində və yüksək standartlara cavab verən yeni-yeni təhsil müəssisələrinin inşasından, uşaqlara, gənc nəslə dövlət tərəfindən göstərilən qayğıdan söhbət açdı. Natiq ulu öndərin layiqli davamçısı, ölkə Prezidenti İlham Əliyevin və

Heydər Əliyev Fondunun prezidenti Mehriban xanım Əliyevanın müəyyən fiziki məhdudiyyətləri olan uşaqları daim diqqət mərkəzində saxladığını xüsusilə vurğuladı.

Daha sonra Milli Məclisin deputatı Adil Əliyev və digər çıxış edənlər Azərbaycanda təhsil sisteminin inkişafına, eyni zamanda, şagirdlərə göstərdikləri qayğıya, onların yüksək səviyyəli təhsillə əhatə olunması naminə sərf etdikləri əməyə görə dövlətimizin başçısı İlham Əliyevə və Heydər Əliyev Fondunun prezidenti Mehriban xanım Əliyevaya, eləcə də Nərimanov Rayon İcra Hakimiyyətinə və tədbirin təşkilində əməyi olan hər kəsə təşəkkürlərini bildirdilər, fiziki məhdudiyyətləri olan uşaqlar üçün yaradılan şəraitdən məmnunluqlarını ifadə etdilər.

Sonda internat məktəbinin şagirdlərinə Heydər Əliyev Fondunun hədiyyələri – məktəbli geyimləri və dərs ləvazimatları təqdim edildi.

Yeni tədris ilinin ilk günündə Nərimanov rayonunda yerləşən Bakı Modern Məktəbinin müasir tədris korpusu da istifadəyə verildi. Tədbirdə Nərimanov Rayon İcra Hakimiyyətinin rəhbərliyi, məktəbin müəllim-şagird kollektivləri və valideynlər iştirak edirdilər.

Rayon icra hakimiyyəti başçısının birinci müavini Şahmar İbadov, YAP Nərimanov rayon təşkilatının sədri Təmraz Tağıyev və başqaları son illər dövlət başçısı İlham Əliyev və Heydər Əliyev Fondunun prezidenti Mehriban xanım Əliyeva tərəfindən Azərbaycanda təhsil sisteminin inkişafına, həmçinin şagirdlərə göstərilən qayğıdan söhbət açdılar.

Xatırladaq ki, 2012-2013-cü tədris ilində fəaliyyətə başlayan sözügedən təhsil ocağında Azərbaycan, rus və ingilis dillərində həyata keçirililən tədris proqramı ibtidai, ümumi orta və tam orta təhsil səviyyələri əsasında qurulub. Məktəbdə tədris planı və proqramları dövlət standartları və beynəlxalq təhsil proqramları əsasında tərtib olunur. Yeri gəlmişkən, Nərimanov rayonu son illər təhsil sahəsində qazandığı uğurlarla diqqəti cəlb edir. 2014-2015-ci tədris ilində rayon üzrə orta məktəbləri bitirənlərin sayı 1698 nəfər təşkil edib. Təhsildə fərqlənən 5 nəfər şagird məktəbi qızıl medalla bitirib. 2015-2016-cı tədris ili üçün keçirilmiş qəbul imtahanlarında 600 baldan yuxarı toplayan məzunların sayı 90 nəfər təşkil edib ki, onlardan da 30 nəfərin göstərdiyi nəticə 650 baldan yuxarı olub.

Suraxanı rayonu.

“Bilik Günü” münasibəti ilə Suraxanı ərazisində yerləşən bütün təhsil müəssisələrində tədbirlər təşkil olunmuşdur. Belə tədbirlərdən biri də rayonun Bülbülə qəsəbəsindəki 327 nömrəli tam orta məktəbdə keçirilmişdir. Rayon icra hakimiyyətinin başçısı İlqar Abbasovun iştirak etdiyi mərasimi giriş sözü ilə açan məktəbin direktoru Fəridə Şərifova qonaqları salamlamış və bildirmişdir ki, adı çəkilən tədris müəssisəsinin kollektivi yeni tədris ilinə tam hazırdır.

Tədbirdə çıxış edən başçı İlqar Abbasov demişdir ki, ümummilli lider Heydər Əliyev tərəfindən əsası qoyulmuş təhsil strategiyası bu gün Azərbaycan Prezidenti cənab İlham Əliyev tərəfindən uğurla davam etdirilir. Son 12 ildə respublikamızın ictimai-siyasi həyatının bütün sahələrində olduğu kimi, təhsil sistemində də çox ciddi irəliləyişlər, uğurlar əldə olunmuşdur. Ötən müddətdə yaradılmış baza ölkə təhsilinin inkişafına uzun müddət xidmət edəcəkdir.

Rayon rəhbəri qeyd etmişdir ki, 2015-2016-cı dərs ilinə ciddi uğurlarla başlayan Azərbaycan təhsili üçün ötən tədris ili bir sıra mühüm hadisələr, islahatyönümlü tədbirlərlə əlamətdar olmuşdur. Təhsil islahatlarının daha da dərinləşdirilməsi, təhsilin keyfiyyətinin yüksəldilməsi istiqamətində son illər başlanan işlər daha qətiyyətlə davam etdirilmiş, bir sıra yeni layihələrə start verilmiş, təhsil sistemimizin dünya təhsil məkanına daha sıx inteqrasiyası yönündə uğurlu addımlar atılmışdır. Prezident İlham Əliyevin 16 yanvar 2015-ci il tarixli sərəncamı ilə dövlət ümumi təhsil müəssisələrində çalışan bilik və bacarıqlarının diaqnostik qiymətləndirilməsi aparılan müəllimlərin həftəlik dərs yükü norması 1,5 dəfə, aylıq vəzifə maaşı orta hesabla 2 dəfə artırılmışdır. Eyni zamanda, möhtərəm dövlət başçımızın 19 yanvar 2015-ci il tarixli sərəncamı ilə “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planı"nın təsdiq olunması da təhsilin inkişafını sürətləndirmişdir.

Ölkənin sosial-iqtisadi inkişafı ilə bağlı qəbul edilmiş Dövlət proqramları, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın rəhbərliyi ilə Heydər Əliyev Fondunun həyata keçirdiyi “Yeniləşən Azərbaycana yeni məktəb” Proqramı və digər irimiqyaslı layihələr qarşıya qoyulan vəzifələrin icrasına, tədris müəssisələrinin maddi-texniki bazasının möhkəmlənməsinə yönəldilmişdir.

İlqar Abbasov tədbir iştirakçılarının diqqətinə bir daha çatdırmışdır ki, qəbul olunmuş müxtəlif Dövlət proqramlarının icrası nəticəsində Suraxanı rayonunda 2003-2014-cü illər ərzində 5930 şagird yerlik 8 məktəb binası, şagird sıxlığını aradan qaldırmaq məqsədi ilə 20 məktəb üçün 7780 şagird yerlik əlavə tədris korpusu tikilmiş, 14580 şagird yerlik 21 məktəb binası əsaslı təmir olunmuşdur.

2014-2015-ci tədris ilində rayon ərazisində yerləşən 34 tam orta məktəbi və Xarici Dillər Təmayüllü gimnaziyanı 1976 şagird bitirmiş, onlardan 1690 nəfəri ali məktəblərə qəbul olunmaq üçün sənəd vermişdir. Sənəd verənlərdən 1071 nəfəri tələbə adını qazanmışdır. Bu da sənəd verən məzunların 63,3 faizini təşkil edir. Abituriyentlərdən 68 nəfəri 600-dən yuxarı bal toplamışdır. 650-dən çox bal toplayan məzunların sayı isə 24 nəfərdir.

İlqar Abbasov əldə olunan uğurlara görə rayonun bütün təhsil işçilərini təbrik etmiş və qarşıdakı tədris ilində onlara uğurlar arzulamışdır.

Tədbirdə çıxış edənlər göstərilən diqqət və qayğıya görə dövlət başçısına öz minnətdarlıqlarını bildirmişlər. Sonra ilk zəng şagirdləri dərsə səsləmişdir.

“İdrak” liseyi

Mütərəqqi təhsil ənənələri ilə digər təhsil müəssisələrindən fərqlənən “İdrak” liseyi çoxsaylı valideyinlərin xahişi ilə artıq bir ildir ki, Bakı şəhərində fəaliyyətə başlayıb. Bu gün elektron-məktəb proqramı ilə işləyən “İdrak” liseyi ölkədə ən müasir təlim bazasına-müasir məktəb binasına, ən müasir avadanlıqlarla təchiz olunmuş sinif və laboratoriyalara, lazımi sosial fəaliyyət məkanına sahibdir. Pedaqoji kadrları peşəkar müəllim və tərbiyəçilərdən ibarət olan məktəbdə şagirdlərə yüksək səviyyədə təlim və tərbiyə verilir, şagirdlər üçün tələb olunan hər cür məişət, ictimai, mədəni, kommunal xidmətlərlə təmin olunurlar.

Dünən liseydə yeni dərs ilinin başlanması münasibətilə təntənəli mərasim keçirildi. Mərasimin aparıcıları məktəbin şagirdləri idi. İlkin olaraq məktəbin direktoru, pedaqoji elmlər doktoru, professor Mönsüm Alışov şagirdləri və valideynləri yeni dərs ili münasibətilə təbrik etdi. Bildirdi ki, artıq liseyin fəaliyyətə başlamasının bir ili tamam oldu. Nəticələrimiz sevindiricidir. Bizim məqsədimiz şagirdlərə yüksək keyfiyyətli təhsil verərək, onların respublikamızın və dünyanın istənilən ölkəsində universitetlərə daxil olmalarını təmin etməkdir. Yeniliyi yaratmaq çətin olsa da, biz bu işin öhdəsindən gəldik. Artıq məktəbimizə maraq xeyli artmışdır. Bunu bu il birinci sinfə qəbulda olan artım da sübut edir. Mən ilk növbədə Azərbaycanda özəl təhsilin inkişafına xüsusi diqqət və qayğı göstərən cənab Prezident İlham Əliyevə təşəkkür edirəm. Doğrudan da, son illər Azərbaycan təhsil sistemində davamlı islahat aparılır və bu da öz müsbət nəticəsini göstərir.

Bizim çox təcrübəli, səriştəli pedaqoji kollektivimiz var. Çalışırıq ki, müasir tələblərə cavab verən təhsil ocağı yaradaq və buna mütləq nail olacağıq.

Sonra söz tədbirə valideyn kimi qoşulan, təhsil eksperti, professor Şahlar Əsgərova verildi. Şahlar müəllim bu liseyi seçərkən onun təcrübəli pedaqoji kollektivinin olduğunu nəzərə aldığını bildirdi. Məktəbin direktorunun istedadlı alim, təcrübəli pedaqoq olduğunu da xüsusi olaraq vurğuladı və dedi ki, bu məktəbdə təhsil alan şagirdlər ali məktəblərə heç bir çətinlik çəkmədən daxil olacaqlar.

Tədbirdə birinci sinfə gələn uşaqlar şeirlər söylədilər, mahnılar oxudular. Liseydə təhsil üç dildə aparıldığından uşaqlar həm Azərbaycan, həm ingilis, həm də rus dilində mahnılar oxudular. Mərasimdə London “Yay məktəbi”ndə təhsil alan uşaqlar da danışdılar. Onlar belə məktəblərdə iştirakın uşaqların dünyagörüşünə müsbət təsirni xüsusi olaraq qeyd etdilər.

Müğənni Elton Hüseynəliyevin oxuduğu mahnılar da tədbirə xüsusi bir ovqat gətirdi.

Budur, ilk zəngin sədaları ətrafı bürüyür. Əvvəlcə, məktəbə birincilər daxil olurlar. Sonra isə digər siniflərin şagirdləri yeni dərs ilinə başlamaq üçün dərs otaqlarına keçirlər. Beləliklə, liseydə ilk dərs günü başlayır. Yeni dərs iliniz mübarək!

Lənkəran

Ölkəmizin hər yerində olduğu kimi, Lənkəranda da yeni dərs ilinin başlanması yeni məktəblərin istifadəyə verilməsi ilə əlamətdar olub. Sentyabrın 15-də rayon ictimaiyyətinin nümayəndələri 180 yerlik Darquba kənd tam orta məktəbinin açılış mərasimində iştirak ediblər.

Qeyd edək ki, Lənkəran təhsilinin uğurları böyükdür. Yeni dərs ili ərəfəsində 330 adda 82323 ədəd dərslik, 197 adda 7350 ədəd bədii ədəbiyyat nümunəsi gətirilərək Lənkəranın mıktəblərinə çatdırılıb. Keçən dərs ilinin nəticələrinə görə, 910 nəfər lənkəranlı məzun ali məktəblərə sənəd verib və 436 məzun tələbə adını qazanıb. Onlardan 51 nəfəri 500-dən, 25 nəfəri isə 600-dən yuxarı bal toplayıb.

Yeni məktəbin direktoru Mayis Kazımov tədbiri açaraq kəndin sosial problemlərinin həllinin, təhsilin inkişafının daim rayon rəhbərliyinin diqqətində olduğunu vurğuladı və yeni tədris ocağının tikilib istifadəyə verilməsinə görə kollektiv adından dərin minnətdarlıq duyğularını ifadə elədi.

Darquba kəndinin ağsaqqalı, kənd təsərrüfatı elmləri namizədi Əbülfəz Ağayev son illərdə yolların asfaltlanması, təbii qaz çəkilişi, sosial obyektlərin inşası kimi məsələlərin reallaşdırılmasından razılığını bildirdi. Kənddə üçmərtəbəli, yaraşıqlı məktəb binasınn inşasını ölkəmizin iqtisadi qüdrətinin daha bir təzahürü kimi dəyərləndirdi.

Müəllim Lətifə Cavadova, şagirdlərdən İlahə Həsənli və Mətanət Xosrovzadə ürək sözlərini söylədilər.

Lənkəran Şəhər İcra Hakimiyyətinin başçısı Taleh Qaraşov tədbir iştirakçılarını “Bilik Günü” və yeni məktəbin açılışı münasibətilə təbrik edərək hər kəsə uğurlar arzuladı. Ulu öndər Heydər Əliyevin “Təhsil millətin gələcəyidir” fikrini xatırladan natiq bildirdi ki, Azərbaycan Prezidenti İlham Əliyev milli təhsilimizi forma və məzmunca yeni mərhələyə çıxarmışdır və dövlətimizin tərəqqi yolunu məhz elm və təhsilin inkişafında görür. Təsadüfi deyil ki, istər dövlət tərəfindən, istərsə də Heydər Əliyev Fondunun təşəbbüsləri ilə yeni əsrdə ölkəmizdə minlərlə yeni məktəb tikilmişdir. Elə bu gün istifadəyə verilən Darquba kənd tam orta məktəbi son bir ildə qapılarını şagirdlərin üzünə açan 12-ci yeni və müasir təhsil müəssisəsidir. Qarşıdakı dövrdə Lənkəranda daha bir neçə məktəbin tikintisi nəzərdə tutulub. Artıq binaların layihələri hazırlanıb.

Rəmzi qırmızı lent kəsildi və qonaqlar yeni məktəblə yaxından tanış oldular. ŞİH başçısı Taleh Qaraşov ilk dəfə parta arxasında oturan birincilərlə görüşərək onları təbrik etdi. Sonra müəllimlər otağına, informatika kabinetinə, kimya və fizika laboratoriyalarına, akt zalına, idman salonuna baxış keçirildi. Yüksək zövqlə və keyfiyyətlə tikilmiş yeni, müasir məktəbdə yaradılan şərait hamı tərəfindən bəyənildi.

Vaqif BAYRAMOV

Xalq qəzeti.- 2015.- 16 sentyabr.-S.11.