Bölgələrdə 20 Yanvar faciəsinin

25-ci ildönümü qeyd olundu

Balakən

Yaddaşımızdan heç vaxt silinməyəcək 20 Yanvar faciəsinin 25-ci ildönümü ölkəmizin hər yerində olduğu kimi, Balakəndə də rayon ictimaiyyətinin yüksək fəallığı şəraitində qeyd olundu.

Rayon icra hakimiyyətinin başçsı İslam Rzayev başda olmaqla aparat işçiləri, hüquq-mühafizə orqanlarının, idarə, müəssisə və təşkilatların rəhbərləri və geniş ictimaiyyət nümayəndələri, şəhid ailələləri və Qarabağ müharibəsi veteranları və əlilləri xiyabana gələrək burada uyuyan şəhidlərin qəbri üstünə və onların xatirəsinə ucaldılmış abidə önünə tər qərənfillər qoymaqla onların unudulmaz xatirəsini ehtiramla yad etdilər.

Elə həmin gün saat 12.00-da rayon ərazisində maşınların hərəkəti dayandırılmaqla səs siqnalları vasitəsi ilə şəhidlərin xatirəsi bir dəqiqəlik sükutla yad edildi.

Sonra rayon icra hakimiyyətinin başçısı İslam Rzayev xiyabanda uyuyan şəhidlərin valideynləri ilə görüşdü və onlara səbr dilədi. Bildirdi ki, bu gün şəhidlərin xatirəsi uca tutulur. Onların ailələrinə hər cür qayğı göstərilir. Ölkə başçısı cənab İlham Əliyevin bu sahədə gördüyü işlər göz qabağındadır. Onlara yardımlar edilir, mənzillər verilir. İcra hakimiyyətinin başçısı onların problemləri, qayğıları ilə maraqlandı. Şəhid ailələri göstərilən diqqətə görə Azərbaycan Prezidenti cənab İlham Əliyevə minnətdarlıqlarını bildirdilər.

Sonra anım tədbiri rayon Mədəniyyət Mərkəzində mədəniyyət işçiləri tərəfindən hazırlanmış “Vətən uğrunda ölüm həyatın davamıdır” adlı ədəbi bədii kompozisiya ilə davam etdirildi və Azərbaycanın bugünkü inkişafına həsr edilmiş filmə baxışla sona çatdı.

İsmayıllı

Rafiq İsmayılov rayonun Hacıhətəmli kəndində doğulub, böyüyüb. Bakıda ali təhsil alıb və Daxili işlər orqanlarında işləyib. Kapitan rütbəsinə qədər ucalıb. Cüdo və sambo üzrə beynəlxalq dərəcəli usta kimi professional səviyyədə idmanla məşğul olub. İş yerində nümunəvi xidməti ilə seçilib. Qarabağ müharibəsi başlayanda tərəddüd etmədən birincilər sırasında ön cəbhəyə gedib və 1993-cü ilin yazında şəhid olub. O, 20 Yanvar şəhidliyi məktəbini keçmişdi. İndi 20 Yanvar faciəsi şəhidlərinin dəfn olunduğu xiyabanda uyuyur.

Rayon gənclər və idman idarəsi Regional cüdo mərkəzi ilə birgə 20 Yanvar şəhidlərinin və Rafiq İsmayılovun xatirəsinə həsr olunmuş sambo turniri keçirib.

Yarışlardan əvvəl şəhidin anası Əsmər İsmayılova çıxış edib. Rafiqin xatirəsini əziz tutanlara razılığını bildirib, oğlunun həyat yolunun gənclərə nümunə olduğundan danışıb.

Gənclər və İdman İdarəsinin rəisi Taleh Salehov 20 Yanvar faciəsinin xalqımıza gətirdiyi məhrumiyyətlərdən, bu qanlı aksiyanın Azərbaycan tarixinin şanlı səhifəsinə çevrilməsindən söhbət açıb, idmançılara uğurlar arzulayıb.

Regional Cüdo mərkəzinin direktor əvəzi, cüdo üzrə baş məşqçi Əkbər Şəfaqətov 20 Yanvar və Qarabağ şəhidlərinin xatirələrinin əziz tutulmasından, tanınmış şəhid idmançıların xatirəsinə həsr olunmuş turnirlərdən, idmanın kütləviliyində həmin turnirlərin böyük əhəmiyyət kəsb etdiyini bildirib.

70 nəfər idmançının iştirak etdiyi cüdo üzrə xatirə turnirində yarışlar gərgin keçib. Uğur qazananlar sırasında cüdoçu qızlar da vardı.

Qazax

Qazax rayonunda da 20 Yanvar faciəsinin 25-ci ildönümü münasibəti ilə silsilə anım tədbirləri keçirilmişdir.Əvvəlcədən bu məqsədlə geniş tədbirlər planı işlənib hazırlanmış və rayon icra hakimiyyəti başçısının sərəncamı ilə təsdiq olunmuşdur. Hazırlanmış tədbirlər planına uyğun olaraq Qazax şəhərində və rayonun bütün yaşayış məntəqələrində, idarə, müəssisə və təşkilatlarda, çoxsaylı əmək kollektivlərində 20 Yanvar faciəsi ilə bağlı toplantı, konfrans, mühazirələr, sərgilər təşkil olunmuşdur. Rayon Mədəniyyət Mərkəzində faciəyə həsr olunmuş tamaşalar və kompozisiyalar göstərilmişdir. Rayonun bütün tədris müəssisələrində 20 Yanvar faciəsinə həsr olunmuş xüsusi dərslər keçirilmişdir. Gün ərzində Şəhidlər xiyabanında matəm musiqisi səsləndirilmiş, saat 12- də rayon ərazisində şəhidlərin xatirəsi bir dəqiqəlik sükutla yad edilmiş və Azərbaycanın dövlət bayraqları endirilmişdir.

Həmin tədbirlər çərçivəsində Şəhidlər xiyabanındakı abidə önündə də 20 Yanvar faciəsinin iyirmi beşinci ildönümü münasibətilə anım mərasimi keçirilmişdir. Mərasimdə rayon icra hakimiyyətinin başçısı Ayaz Əsgərov, RİH nümayəndələri, hərbi hissələrin və hüquq-mühafizə orqanlarının şəxsi heyəti və əməkdaşları, çoxsaylı əmək kollektivləri, əmək və müharibə veteranları, gənclər, QHT və KİV nümayəndələri və yüzlərlə rayon sakini iştirak etmişdir.

Gün ərzində insanlar Şəhidlər xiyabanına gələrək faciə qurbanlarının xatirəsini anmış və onların xatirəsinə ucaldılmış abidə önünə qərənfil dəstələri qoymuşlar.

Samux

Samux rayonundakı Heydər Əliyev Mərkəzində 20 Yanvar faciəsi qurbanlarının xatirəsinə həsr edilmiş tədbir keçirilmişdir. Tədbir iştirakçıları əvvəlcə Qanlı Yanvara həsr edilmiş video filmi izləmişlər.

Rayon icra hakimiyyətinin başçısı Alı Qocayev bu hadisənin dünyada insanlığa qarşı törədilmiş ən ağır cinayətlərdən biri olduğunu vurğulamış və qeyd etmişdir ki, 1990-cı ilin Yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin gecədə həlak olan Vətən oğulları Azərbaycanın tarixinə parlaq səhifə yazdılar, xalqın milli azadlığı, müstəqilliyi yolunda canlarını fəda etdilər.

Daha sonra rayondakı 2 saylı tam orta məktəbin müəllimi Aidə Namazova, 1 saylı tam orta məktəbin müəllimi Aysən Cəfərova və Alıuşağı kənd orta məktəbinin müəllimi Xatirə Əliyeva çıxış edərək Qanlı Yanvar faciəsinin Azərbaycan xalqının milli azadlıq hərəkatındakı yeri və rolu barədə danışmışlar. Tədbir iştirakçıları foyedə 20 Yanvar faciəsinə həsr edilmiş rəsm əsərlərindən ibarət sərgiyə baxmışlar.

* * *

Həmin gün minlərlə rayon sakini Şəhidlər xiyabanına gələrək o qanlı-qadalı günlərin qurbanlarının xatirəsini yad etmiş, abidə önünə gül-çiçək dəstələri qoymuş, şəhidlərimizin ruhuna dualar oxumuşlar.

Şəmkir

Şəmkir rayonunda 20 Yanvar şəhidlərinin anım mərasimi keçirilmişdir. Mərasimdə Şəmkir Rayon İcra Hakimiyyəti aparatının məsul işçiləri, rayonun idarə, təşkilat və müəssisə rəhbərləri, ictimaiyyət nümayəndələri iştirak etmişlər.

Mərasim açıq elan edildikdən sonra şəhidlərin xatirəsi bir dəqiqəlik sükutla yad edilmişdir. Şəmkir Rayon İcra Hakimiyyətinin başçısı Alimpaşa Məmmədov 20 Yanvar faciəsindən, sovet ordusunun günahsız insanları gülləbaran etməsindən, qəhrəman oğul və qızlarımızın Vətənin azadlığını öz canlarından əziz tutmasından danışmış, şəhidlərin xatirəsinin xalqımızın qəlbində daim yaşayacağını bildirmişdir.

Tədbir ədəbi-bədii kompozisiya ilə davam etdirilmişdir. Şəhidlər xiyabanı ziyarət olunmuş, şəhidlərimizin məzarı üzərinə gül dəstələri qoyulmuşdur. Bundan sonra Şəhidlər xiyabanında “Soyqırımı abidəsi”nin açılışı olmuşdur.

Şəmkir Rayon Qadınlar Şurasının sədri Nuşabə Seyidova, Ağsaqqallar Şurasının sədri Məhəmməd Əmirov 20 Yanvar faciəsi ilə bağlı öz təəssüratlarını bölüşmüşlər. Şəhid Xəqani İbrahimlinin həyat yoldaşı Tahirə xanım çıxış edərək ona göstərilən diqqət və qayğıya görə ölkə Prezidenti İlham Əliyevə və rayon rəhbərliyinə öz təşəkkürünü bildirmişdir.

İlqar HƏSƏNOV,

Hamlet QASIMOV

Xalq qəzeti.- 2015.- 22 yanvar.- S.9.