“Formula – 1” Avropa Qran-pri yarışları əsl adrenalin mənbəyidir!”

Azərbaycan paytaxtının müxtəlif məzmunlu beynəlxalq tədbirlərə ev sahibliyi etmək ənənəsi getdikcə daha geniş auditoriyanı əhatə edir.

Beynəlxalq siyasi və humanitar forumlar, Davos İqtisadi Forumu, “Avrovision” mahnı yarışması, ilk Avropa Oyunları kimi mötəbər tədbirlərə imza atmış paytaxtımız bu gün də miqyas etibarı ilə bütün dünyada üçüncü olan “Formula — 1” idman yarışının start fitinin şahidinə çevrilir. Biz fəxr edirik ki, bu mötəbər idman yarışını televiziya vasitəsilə yüz milyonlarla insan canlı olaraq izlıəyəcək. Bakının qonağı olan turist və “Formula — 1” fanatlarının fikrincə isə, yarışların məhz Azərbaycan paytaxtında izlənilməsinin özgə gözəllikləri vardır. Görüşüb həmsöhbət olduğumuz əcnəbi qonaqlardan bir neçəsinin Bakıda keçirilən idman tədbiri barədə ürək sözlərini təqdim edirik:

Robert PROJANSKU, Amerika Birləşmiş Ştatları:

— Bu, mənim və xanımım Luis Feuerlenin Azərbaycana ilk səfərimizdir. Əslində, “Formula — 1” yarışlarında iştirak etmək mənim çoxdankı arzum idi. Yaşımızın çox olduğuna görə idmana, xüsusən, “Formula — 1” kimi sürətli yarışlara aludə olmağımız sizə bir qədər qeyri-adi görünə bilər. Ancaq neyləməli, adrenalin arzusu yaş tanımır və bu yarışlar həqiqətən, adrenalin mənbəyidir. Yüksək sürət, usta pilotlar, dar döngələr — ümumiyyətlə, bu yarışlarda maraqlı olmayan heç nə yoxdur. Kimsə özünü həmin sükanın arxasında hiss etmirsə, deməli, “Formula — 1”in nə demək olduğunu bilmir.

O ki, qaldı bu yarışların keçirildiyi Bakıya, açığını deyim ki, paytaxtınızın gözəlliyinə vuruldum. Etiraf edim ki, bu gözəlliklə yanaşı, paytaxtınızda hökm sürən sabitliyi, füsunkar Bakı gecələrini, Xəzərin ab-havasını dünyanın hər yerində görə bilməzsən. Təbii ki, bu möhtəşəmlik, ilk növbədə, dövlət başçınız Prezident İlham Əliyevin apardığı uğurlu siyasətin bariz göstəricisidir. Birinci Avropa Oyunlarından cəmi bir il sonra belə bir möhtəşəm tədbirə ev sahibliyi edilməsi, məncə, o qədər də asan məsələ deyil. Amma, mətin, cəsarətli, fədakar insanlar bütün məsələləri asanlaşdıra bilirlər.

Luis FEUERLE:

— Əlbəttə, bu yarışlar sivil dünyanın bütün sakinləri kimi bizim üçün də maraqlı və arzuolunandır. Ancaq Bakıda olmağın mənim üçün başqa bir dəyəri, mənası da vardır. Çünki mənim atam Toni Feuerlenin ruhu bu şəhərdədir. Xatırladım ki, mənim atam 110 il əvvəl Nobel qardaşları ilə birlikdə Bakıda çalışmışdır. Odur ki, “Formula 1” Qran — Pri yarışında iştirak həm də mənim atamın ruhu ilə görüşmək imkanım oldu. Mən Azərbaycan xalqına firavanlıq, “Formula 1”- in iştirakçılarına isə uğurlar arzulayıram! Əminəm ki, güclülər, qələbəyə layiq olanlar qalib gələcəklər. Fəxr edirəm ki, bu gün dünyanın demokratik və sivil ölkələrindən birinin qonağıyam.

Anya və Marina ORXİMENKO bacıları, Ukrayna, Kiyev şəhəri:

Anya: — Bu, bizim Azərbaycana üçüncü səfərimizdir. İlk dəfə 2012-ci ildə — paytaxtınıza “Avrovision” mahnı müsabiqəsinin keçirildiyi günlərdə gəlmişdik. Möhtəşəm təəssüratla qayıtdıq. Həmin mədəni tədbir təkcə Avropanı əhatə etsə də, bütün dünyada böyük əks-səda yaratmışdı və insanların yaddaşında uzun illər silinməyəcək xatirə səhifələrinə çevrilmişdi. Xatırladım ki, 2011-ci ildə sizin təmsilçinizin həmin müsabiqədə qalib gəlməsində biz ukraynalıların da rolu olmuşdu. Çünki azərbaycanlı müğənninin ifasına ilk yüksək qiymət verənlərdən biri Ukrayna idi. Bakıya ikinci səfərimiz də məhz Avropa miqyaslı tədbirlə bağlı idi. Belə ki, ötən il paytaxtınızda keçirilən ilk Avropa Oyunları möhtəşəmliyinə görə “Avrovision”u qat-qat üstələmiş, çox mükəmməl beynəlxalq əks-səda vermişdi. Biz həmin tədbirin də canlı şahidi olduğumuza görə məmnunuq.

Marina: — Dünən rəsmilərinizdən kimsə dedi ki, “Formula-1"də ölkəmizdə keçirilmiş digər beynəlxalq tədbirlər kimi uğurla başa çatacaq. Ancaq mən əlavə edim ki, açılış mərasiminə şahidlik edəcəyimiz ”Formula — 1" yarışları həm miqyasına, həm də möhtəşəmliyinə görə paytaxtınızın qonaqlarında Bakının ev sahibliyi etdiyi bütün beynəlxalq tədbirlərdən qat-qat üstün təəssürat yaradacaq. Həm idmançılara, həm də təşkilatçılara böyük sevinc və uğurlar arzulayıram!

Anya: — Bu möhtəşəm tədbirləri işıqlandıran mətbuata da həmçinin.

Rafiq SALMANOV

Xalq qəzeti .-2016.- 17 iyun.- S.3.