“Formula-1”-in texnoloji təminatı yüksək səviyyədə qurulmuşdur

“Yarışların telekommunikasiya xidmətləri üçün yaradılan işçi qrupu bütün texniki imkanlardan yararlanaraq dayanıqlı sistem qurulması üçün çalışmışdır”. Bu sözləri rabitə və yüksək texnologiyalar naziri Ramin Quluzadə xəbər.az saytına müsahibəsində bildirmişdir.

Onun sözlərinə görə, yarışlar ərzində lazımi məlumatların fasiləsiz ötürülməsi üçün dayanıqlı mobil rabitə sistemi qurulmuşdur. Yüksəksürətli və davamlı internet xidmətləri təşkil edilib, dünyaya yayım üçün bütün müasir resurslardan, o cümlədən Azerspace-1 peykinin imkanlarından istifadə olunur. Yarışların yayımının yüksək keyfiyyət standartlarına uyğun aparılması üçün xüsusi radiotezliklər ayrılmışdır.

Nazirin sözlərinə görə, indi yeni medianın auditoriyası ənənəvi mediadan daha genişdir və onlayn izləməyə tələbat böyükdür. Bunu nəzərə alaraq, yarışlar internet üzərindən də yüksək keyfiyyətlə yayımlanır. “Formula-1"-də rəqəmsal mühitin yaradılmasını və texnoloji imkanların tətbiqi Azərbaycanın ən qabaqcıl informasiya texnologiyaları şirkəti Eurodesign-a tapşırılıb.

Şirkətin layihə meneceri Ken Svift bildirib ki, “Formula-1" yarışlarının İKT təminatı olduqca yüksək səviyyədə təşkil edilib. Onun sözlərinə görə, yarışlar zamanı yüksək səviyyəli internet xidmətlərinin göstərilməsi, simsiz internet şəbəkəsinin yaradılması, internet üzərindən təhlükəsiz çıxışın təşkil edilməsi üçün hər cür şərait yaradılıb.

Layihə meneceri təhlükəsizliyə effektiv nəzarət və müşahidə məqsədi ilə CCTV- video müşahidə sistemi, habelə yarışların yüksək səviyyədə təşkili və tam rəqəmsal dəstəyin göstərilməsi məqsədilə zəruri proqram təminatları, informasiya sistemləri hazırlanmışdır. Yarışda iştirak edən hər komanda texniki avadanlığını özləri ilə gətirib.

Yarışların translyasiyası (yayım) internet üzərindən aparılır. Bunun üçün müxtəlif kabinələr ayrılıb. Belə ki, bütün trek boyu şərh birinci kabinədən ötürülür, İtaliya, Fransa, Yaponiya və s. xarici ölkələrdən olan digər şərhçilər isə yanaşı kabinələrdə otururlar.

Yarışlar ərzində internet təhlükəsizliyinə də Eurodesign şirkəti cavabdehdir. Bununla bağlı qabaqlayıcı tədbirlər görülüb. Komandamızda həm peşəkar mühəndislər, həm də olduqca təcrübəli mütəxəssislər var. Şirkətimiz yarışların telekommunikasiya və informasiya texnologiyaları işlərinin öhdəsindən yüksək peşəkarlıqla gəlib.

Qeyd edilib ki, şirkət korporativ məlumat bazasının yüksək səviyyəli təhlükəsizliyi və məxfiliyini təmin etmək üçün dünyanın ən qabaqcıl həllərini tətbiq edir və internet təhlükəsizliyə olduqca böyük önəm verir.

Şirkət rəsmilərinin sözlərinə görə, yarışları işıqlandırmaq üçün Azərbaycana gəlmiş 400- ə qədər xarici jurnalist Hilton otelində yerləşdirilmişdir. .

Hazırladı:

M. MÜKƏRRƏMOĞLU,

“Xalq qəzeti”

Xalq qəzeti.- 2016.- 18 iyun.- S.5.