Musiqi Kolleci tələbələrinin konserti

Müslüm Maqomayev adına Azərbaycan Dövlət Filarmoniyasında Üzeyir Hacıbəyli adına Azərbaycan Dövlət Simfonik Orkestri ilə birgə Azərbaycan Milli Konservatoriyası tərkibində Musiqi Kolleci tələbələrinin ulu öndər Heydər Əliyevin anadan olmasının 93-cü ildönümünə həsr edilmiş konserti olmuşdur.

Orkestrin bədii rəhbəri və baş dirijoru, Xalq artisti, professor Rauf Abdullayevin idarə etdiyi konsertdə Musiqi Kollecinin istedadlı tələbələrinin ifasında Azərbaycan və Avropa bəstəkarlarının əsərləri səslənmişdir.

Konsert respublika müsabiqəsinin laureatı, IV kurs tələbəsi Mirzəhra Muradovanın (vokal) ifasında Niyazinin “Arzu” mahnısı ilə başlanmışdır. Beynəlxalq və respublika müsabiqələrinin laureatları – IV kurs tələbəsi Rəhim Xudaverdiyev ( klarnet) K.Veberin “Konsertino”, III kurs tələbəsi Günel Ələkbərli (skripka) K. Sen-Sansın “ İntroduksiya və rondo-kapriççiozo”, II kurs tələbəsi Cəmil Abdullayev (truba) A.Gedikenin “Konsert etüdü”, III kurs tələbəsi Kamal Qədirov (trombon) G.Perqolezinin “Simfoniya”, IV kurs tələbəsi İbrahim Babayev (tar) Hacı Xanməmmədovun “Konsert-2" (I hissə), IV kurs tələbəsi Eldəniz Ələkbərzadə F.Şopenin ”1 saylı konsert" (Op.11,I hissə), IV kurs tələbəsi Günel Rizvanova S. Raxmaninovun “2 saylı konsert” (Op.16,I hissə) əsərlərini yüksək professionallıqla təqdim etmişlər.Tələbələrin çıxışları alqışlarla qarşılanmışdır.

Afət SADIQOĞLU,

Xalq qəzeti.- 2016.- 8 may.- S. 4.