Naxçıvan Dövlət Universitetinin 50 illik

yubileyinə daha bir kitab həsr edildi

Son 20 ildə özünün ən yaxşı günlərini yaşayan Naxçıvan Dövlət Universiteti Amerika Birləşmiş Ştatları, İngiltərə, Çin, Rusiya, Fransa, Almaniya, İspaniya, Cənubi Koreya, Türkiyə, Misir Ərəb Respublikası, Pakistan, İran, Özbəkistan və digər ölkələrin ali məktəbləri ilə geniş əlaqələrə malikdir. Bu universitet möhkəm milli əsaslara malik olan, dövlətçilik təmayüllü və dünyaya inteqrasiya etmiş müasir tipli ali məktəbdir. Dünya birliyində və ölkənin ali təhsil sistemində özünəməxsus yeri olan Naxçıvan Dövlət Universiteti daim yeniləşmək və inkişaf etmək istiqamətində tarixi yolunu davam etdirməkdədir.

Ona görə də universitetin professor-müəllim heyəti 50 illik yubileyə öz töhfəsini verməyə çalışır. Universitetin incəsənət fakültəsinin dekanı, muxtar respublikanın bəstəkarlar təşkilatının məsul katibi, sənətşünaslıq üzrə fəlsəfə doktoru Günay Məmmədovanın Elmi Şuranın 31 may 2017-ci il tarixli əmrinə əsasən tərtib edib ərsəyə gətirdiyi “Tofiq Bakıxanov: Naxçıvan sevincləri” adlı monoqrafiya da bu ali məktəbin 50 illik yubileyinə həsr edilmiş dəyərli çap məhsullarındandır.

Azərbaycan Respublikasının Xalq artisti, muxtar respublikanın Əməkdar incəsənət xadimi, professor, “Şöhrət” ordenli bəstəkar Tofiq Bakıxanovun Naxçıvan görüşləri, onun Naxçıvanda keçirilən yubileyləri haqqında olan məqalələr, bəstəkarın özünün naxçıvanlı bəstəkarlar Nəriman Məmmədov və Məmməd Nəsirbəyov haqqında yazdığı məqalələr, Naxçıvana həsr etdiyi mahnıların notları, eyni zamanda, muxtar respublikada bəstəkarın iştirakı ilə keçirilən tədbirlərdə çəkilmiş fotolar və digər tarixi sənədlərin toplandığı kitab “Əcəmi” Nəşriyyat – Poliqrafiya Mərkəzində çap edilib.

Kitab akademik, Milli Məclisin mədəniyyət komitəsinin sədri Rafael Hüseynovun qələmə aldığı “Yaxşı şagird olmağın bəhrələri” adlı redaktor sözü ilə başlanır. Akademik yazır: “Hər kitab bir tarixdir. Sənətşünaslıq üzrə fəlsəfə doktoru Günay Məmmədovanın tərtib etdiyi bu kitab da qalacaq, indinin və sabahın insanlarına söyləyəcək ki, görkəmli Azərbaycan bəstəkarı Tofiq Bakıxanov Naxçıvanı, naxçıvanlıları necə sevirmiş, Naxçıvan ona necə məhəbbət bəsləyirmiş”.

Monoqrafiyada muxtar respublika Ali Məclisinin sədri Vasif Talıbovun 2011-ci ilin yanvarında – bəstəkarın 80 illiyi münasibətilə Tofiq Bakıxanova göndərdiyi təbrik məktubu, Tofiq Bakıxanovun Naxçıvan Muxtar Respublikasının Əməkdar incəsənət xadimi adına layiq görülməsinə minnətdarlıq hissi olaraq Ali Məclis sədrinə yazdığı 8 dekabr 2015-ci il tarixli təşəkkür məktubu, Əməkdar jurnalist İttifaq Mirzəbəylinin Tofiq Bakıxanov yaradıcılığında Naxçıvan mövzusunu əhatə edən dörd məqaləsi, Tofiq Bakıxanovun Əməkdar incəsənət xadimi Nazim Quliyevlə birlikdə Naxçıvanın ilk professional bəstəkarı Məmməd Nəsirbəyovun 120 illiyi münasibətilə qələmə aldığı dəyərli tədqiqat əsəri, naxçıvanlı jurnalistlər Sara Əzimova, Hafizə Əliyeva, Fatma Babayeva, eləcə də, Lalə Hüseynova və Sevda Əliqızının hazırladıqları materiallar kitabı oxunaqlı etmişdir.

Naxçıvan Dövlət Universitetinin 50 illik yubiley sevinclərinə biz də qoşuluruq və sənətşünaslq üzrə fəlsəfə doktoru Günay Məmmədovanın yeni tədqiqat işini təbrik edirik. Görkəmli bəstəkar Tofiq Bakıxanova isə cansağlığı və yeni-yeni yaradıcılıq uğurları arzulayırıq.

İsaq ƏMƏNULLAYEV

Xalq qəzeti.- 2017.- 26 avqust.- S.7.