Yaponiya -Günəşlə oyanıb
yüksələn ölkə
“Təbəssüm,
gülüş olan evə xoşbəxtlik gələr”.
Yapon atalar sözü
Azərbaycanın
tanınmış yazıçı-dramaturqu, Milli Məclisin
deputatı Hüseynbala Mirələmov həm nəsr və
dram, həm də publisistik əsərlərin
müəllifi kimi geniş oxucu kütləsinə
yaxşı tanışdır. Onun
publisistikasında müxtəlif ölkələrə səyahət
təəssüratları da özünəməxsus yer tutur.
“Çində möhtəşəm on gün” və 2015-ci
ildə rus dilində işıq üzü görmüş
“Çin-dünyanın səkkizinci möcüzəsi” əsərləri
oxucuların maraqla qarşıladığı əsərlər
sırasındadır. H.Mirələmov ötən il
Yaponiya tərəfinin dəvəti ilə Xətai Rayon
İcra Hakimiyyətinin nümayəndə heyətinin tərkibində
bu gündoğar ölkədə olmuş və zəngin səfər
təəssüratları ilə qayıtmışdır.
Yaxın günlərdə yazıçı dramaturqun
“Yaponiya-Günəşlə oyanıb yüksələn
ölkə” adı altında kitab halında nəşr ediləcək
həmin təəssüratlardan bəzi parçaları qəzetimizin
oxucularına təqdim edirik.
Noyabr Azərbaycanda payız fəslinin sonuncu ayı olsa da, möhtəşəm Bakının mərkəzindən Heydər Əliyev Beynəlxalq Hava Limanına uzanan geniş, rahat yolun sağında-solunda boy verən yamyaşıl ağaclar adamın ruhuna hələ də bahar təravəti qatırdı. Elə bil təbiət uzaq səfərə çıxanların yolunda yaşıl işıq yandırıb, xəfif küləkdən ləngər vuran bu bərli-bəzəkli, həmişəyaşıl ağacların müşayiətilə onlara uğur diləyirdi.
Bakıdan Qətərin paytaxtı Doha şəhərinə
təyyarə ilə
üç saata çatdıq. Vaxtımıza
hələ çox qalmışdı. Nümayəndə heyətinin rəhbəri Xətai Rayon İcra
Hakimiyyətinin başçısı Razim Məmmədov və Xətai Rayon İcra Hakimiyyəti
başçısı aparatının ictimai-siyasi və
humanitar məsələlər şöbəsinin müdiri Pənah
İmanovla dünyanın elm, təhsil,
mədəniyyət, idman və biznes mərkəzlərindən biri sayılan Doha şəhərinin görməli yerlərini bir neçə saat gəzib-dolaşdıqdan
sonra yenidən hava
limanına döndük.
Onu da deyim ki, bir milyon
doqquz yüz minə
yaxın əhalisi olan Qətərin paytaxtında iki
kommersiya hava limanı
mövcuddur. Hamad adlanan Beynəlxalq Hava Limanı dünyanın on ən
yaxşı hava limanlarından
biridir. Dünyanın
hər yerindən təyyarələr fasiləsiz olaraq enib –
qalxırdı. Buradan mavi səmada
“üzən otelə” bənzəyən əzəmətli
hava gəmisiylə uzaq Yaponiyaya - dünyanı heyrətə
gətirən möcüzələr diyarına səfər edirdik. Rahat, geniş salonları olan təyyarədə sərnişinlərə yüksək səviyyədə xidmət göstərən
bir-birindən gözəl stüardessaların peşə atributlarından
biri də sanki təbəssüm
paylamaqdır. Amma diqqətimi çəkən təkcə bu gülərüz, öz
seçdikləri peşədən zövq alan gənc stüardessalar deyildi,
həm də yapon sərnişinlərinin,
yaşından asılı olmayaraq, bir çoxunun kitab, jurnal, qəzet
oxuması idi.
Yaponlar və
Yaponiya haqqında çox
maraqlı söhbətlər eşitmiş, görkəmli Azərbaycan yazıçısı və
kinorejissoru Həsən Seyidbəylinin “On beş gün
Yaponiyada” , məşhur rus
jurnalisti, “Pravda” qəzetinin xüsusi müxbiri kimi
ömrünün yeddi ilini Yaponiyada
keçirmiş Vsevolod Ovçinnikovun “Sakura
budağı”
kitablarını
oxumuşdum. “Memuar və səfər qeydləri”
janrında yazılmış əsərlərdən
onu da bilirdim ki,
Bakının Sabunçu
qəsəbəsində
doğulmuş XX əsrin ən
məşhur kəşfiyyatçısı, Sovet İttifaqı Qəhrəmanı Rixard Zorge 49 yaşında 7 noyabr 1944-cü
ildə Tokionun Suqamo həbsxanasında edam olunmuşdu.
Hələ
səfərdən bir həftə qabaq
nümayəndə heyətimiz
Bakının İzmir
küçəsində yerləşən Yaponiyanın Azərbaycandakı səfirliyində rəsmi qəbulda olmuş, sonra da
bu ölkənin fövqəladə
və səlahiyyətli səfiri cənab Tsuquo Takahaşi şam
yeməyinə qonaq olmuşdu.
Bizimlə çox maraqla söhbət edən səfir
bildirdi ki, 2017-ci il sentyabrın 7-də Yaponiya ilə Azərbaycan
arasında diplomatik əlaqələrin qurulmasının 25-ci
ildönümü qeyd olunacaqdır. “Bütün
bu illər ərzində bizim münasibətlərimiz kifayət
qədər uğurla inkişaf edib. Azərbaycan
müstəqillik əldə etdikdən sonra Yaponiya ölkənizin
inkişafına müxtəlif formada dəstək göstərir.
İqtisadi əməkdaşlıq sahəsində
yapon şirkətləri enerji hasilatı ilə bağlı
layihələrdə iştirak edir”.
Xalqımızın
ümummilli lideri Heydər Əliyevin 1998-ci ilin fevralında,
Azərbaycan Respublikasının Prezidenti İlham Əliyevin 2006–cı
ilin martında Yaponiyaya səfərlərindən məmnunluqla söz açan səfir Qarabağ
probleminə də ölkəsinin mövqeyini
açıqladı:
-Mən Azərbaycanda çalışan diplomat kimi
yaxşı anlayıram ki, Dağlıq Qarabağ
münaqişəsi nəinki Azərbaycanın, ümumilikdə
Cənubi Qafqaz bölgəsinin inkişafına əngəldir. Səmimi qəlbdən
bu problemin tezliklə həllinə ümid edirəm. Sevindirici haldır ki, Azərbaycan Respublikasının
Prezidenti cənab İlham
Əliyev də öz bəyanatlarında bu fikri
önə çəkir.
Razim
müəllim, öz ölkəsinin özəllikləri haqqında böyük məhəbbətlə
söz açan səfirin dediklərini təsdiqləyib
bildirdi ki, bunlar ona yaxşı tanışdır.
Çünki o bu gündoğar ölkədə bir dəfə
olub və bu, onun yaddaşına çox böyük təəssüratlar
yazan Yaponiyaya
ikinci səfəri olacaq. Azərbaycan Prezidenti
İlham Əliyev cənablarının həyata keçirdiyi xarici
siyasətin uğurları barədə
də səfirlə fikir mübadiləsi aparan Razim müəllim bildirdi ki, Yaponiyanın inkişaf
etmiş sahələrinin təcrübəsi
Azərbaycan üçün maraqlıdır. Sonda Razim müəllim
bildirdi ki, bu səfərimiz, dövlət başçımızın
xeyir-duası ilə Tokionun Setaqaya
Prefekturası ilə rəhbərlik etdiyi Xətai rayonu
arasında yaranmış dostluq, qardaşlıq münasibətlərinin
inkişafına yeni töhfələr verəcəyinə
inanır.
Gənc yaşlarımdan bu
ölkəni görmək ən böyük arzularımdan biri olsa
da, Razim müəllimdən fərqli
olaraq bu,mənim uzaq
Yaponiyaya ilk səfərim idi.
Düzdür, Azərbaycan qaz
emalı zavodunun direktoru vəzifəsində çalışarkən Müstəqil Dövlətlər
Birliyi ölkələrinin keçirdiyi “100 sənaye və elm lideri” müsabiqəsində “İlin
direktoru”
nominasiyasının qalibi olanda
mənim Yaponiyaya getmək şansım yaranmışdı. Lakin o zaman səfər planım
bəzi şəxsi və üzürlü səbəblərə
görə baş
tutmamışdı. İndi isə səmanın ənginliklərində “üzən oteldə” arzularımdan birinin ünvanı -
gündoğar ölkə barədə düşüncələrə
dalmışdım. Və etiraf edim ki,
içimdə özümdən başqa bir kimsənin
görə bilmədiyi, keçmişdə qalan
uşaqlığımın, gəncliyimin yaşaya biləcəyi
sevinci yaşayırdım...
Adətimcə,
səfər öncəsi hamı kimi mən də istər-istəməz
yoluna çıxdığım ölkənin iqlimi, ictimai həyatı,
adamları və adət-ənənəsi barədə
müxtəlif məlumatlarla tanış oluram! Hansı qitədə,
materikdə yerləşməsindən, yaxın və uzaq məsafədə
olmasından asılı olmayaraq, hər bir ölkə bəşəriyyət
tarixinin maraqla oxunan kitabının rəngarəng səhifələri
kimidir! Son 10-15 ildə
dünyanın istər qərbində, istərsə də
şərqində, hansı
ölkələrdə səfərdə olmuşamsa belə olub. Vətənə
dönən kimi səfər təəssüratlarımı qələmə
aldığım
ölkələr də az olmayıb. Qoca və müdrik
Şərqin yatmış pələngi Çin barədə təəssüratlarım
Azərbaycan və rus dillərində kitab
şəklində
işıq üzü görüb. (“Çində
möhtəşəm 10 gün”
“Elm və təhsil” nəşriyyatı, Bakı -2012 və “Kitay
-vosmoye çudo sveta”
“Nuralar”, Baku-2015 ) Çoxsaylı oxucularımla
yanaşı,
ÇXR-in ölkəmizdəki səfirliyi də
bu kitabları çox müsbət qiymətləndirib...
Bəri
başdan deyim ki, Yaponiyada gördüklərim də məni Çin
qədər və hətta ondan
da artıq heyrətləndirdi. Əgər Çində
diqqətimi ən çox
cəlb edən Konfutsiçiliyin iki min ildən çox zaman müstəvisində
ölkənin yalnız siyasət,
iqdisadiyyat və mədəniyyət
sahələrində deyil,
davranış tərzinə təsiri idisə, Yaponiyada yapon xalqının əzəli ruhunun
daşıyıcısı olan samurayların əxlaq kodeksinin ənənə
kimi qorunub –
saxlanılması faktı oldu.
Oxuduqlarımdan sonra əyani şəkildə şahidi oldum
ki, samurayların əxlaq
kodeksi yapon xalqının təkcə keçmişi deyil, həm
də bu günüdür.
Elə bu
düşüncə içindəykən Yaponiya səfərindən qayıdan günün ertəsi Bakıda
çoxdan tanıdığım bir qələm
dostumla həmsöhbət oldum.
Səfər barədə söz düşəndə qeyri - ixtiyarı dedim:
– Allah
Qurani-Şərifi
elə bil yaponlara göndəribmiş... Çünki onlar Allahın öz (müsəlman) bəndələri üçün rəva bildiyinin çoxuna əməl edirlər.
Bəlkə
də bu
fikrim çoxuna
yanlış görünə bilər?!
Çünki yaponların tapındığı Buddizm dini
kainatı yaradan bir qüvvənin mövcudluğu fikrini inkar
edir. Yəni buddizm Allahın adını
dilə gətirməyən dindir. Amma bir halda ki, söhbət
dürüstlükdən, haqdan, mənəvi saflıqdan və zənginlikdən gedirsə,
onda yaponlar “Allah” səviyyəsinə
qaldırdıqları budduzmin
qurucusuna çox bağlı
millətdirlər. Onların –yəni yaponların özünütərbiyə
sahəsindəki əsas amallarını məhz
özünü idarə edə bilmək vərdişiylə əlaqələndirmək
olar...
Yaponiyada əgər
kimsə ağır, mürəkkəb situasiyalarda hirsini
büruzə verib hədsiz çılğınlıq
göstərirsə, əsəbləşib ona-buna şər-böhtan atırsa,
bu cür adama pis baxırlar və həmin adam özü də tezliklə
başa düşür ki, belə hərəkətlər
gülünc hərəkətlərdir, adam özünü ələ
almağı, ehtiraslarını yatırmağı
bacarmalıdır. Yaponlara görə kədər içində
olan adam öz kədərini təbəssümləri arxasında gizlətməlidir
və elə etməlidir ki, onun qəlbindəki acı
duyğulardan heç kəs xəbər tutmasın.
Bax, elə bu sözləri yazanda mən
Həzrəti Əlinin
“Kişinin mömin qardaşının üzünə təbəssüm
etməsinin savab və mükafatı vardır” kəlamını
xatırladım. İmam Əli
(ə) gülümsəmək barəsində buyurur:
"Ən gözəl gülüş təbəssümdür".
Təbəssüm
bəxş etməksə,
İslamın hədisi-şəriflərində
ehsandan sayılır…
Yaponiyaya da səfər edən əcnəbilərin
çoxu bəlkə
düşünürlər ki, axı bu yaponlar yeri gəldi –
gəlmədi niyə gülümsəyirlər? Məsələ ondadır ki, yaponların təbəssümü
böyük bir tarixi dövrün nəticəsi kimi təzahür
edir. Bu təbəssüm həqiqi samuray tərbiyəsinin
yekunu olaraq, ən geniş mənada milli xarakterin mühüm
cizgilərindən birini formalaşdırır. Busido (Döyüşçünün yolu-
H.M.) mədəniyyətində
nəzakət əlaməti belə təzahür edir:
“Xoşbəxt adamlarla birgə sən də sevin və göz
yaşlarını kimsəyə bildirmə”.
İslam
dini ilə Buddizm
arasında belə paralellərə çoxlu misallar gətirmək
olar! Yaponiyaya işgüzar səfərimiz zamanı düşünürdüm,
bu ölkə barədə təəssüratlarım
o qədər qənaətbəxş və zəngindir ki,
bunu, bir-iki məqaləyə sığışdırmaq
mümkün olmayacaq. Ona görə qərara aldım ki, Yaponiya səfəri barədə
kitab yazım.
Tarix elmləri
doktoru, şərqşünas, tanınmış şair
Şahin Fazil demişkən:
Mən Yaponu öylə
gözəl görmüşəm ,
Canda yapon sevgisi
baş
qaldırıb...
“Yapon
sevgisi” barədə duyğularımı, eyni zamanda az qala
Yaponiya deyəndə əzmkarlıq və mübarizlik simvolu
kimi göz önünə gələn samuraylar barədə
maraqlandığımı bildirəndə, hələ
Bakıda tanış olduğum “Kosugi Zohen Co.LTD” şirkətinin
nümayəndəsi cənab Andreas Hamaşer mənə aşağıdakı
məzmunda məktub yazdı:
“Əziz cənab Mirələmov!
Yaponiyaya olan marağınıza görə Sizə təşəkkür
edirəm. Sizinlə Tokioda görüşüb tanış
olduğuma görə çox xoşbəxtəm.
Ümidvaram ki,
Yaponiyada səfərdə
olduğunuz günlərdən
və bizimlə Royal
Park Hoteldə baş tutan axşam yeməyimizdən zövq almısınız.
Sizə Yaponiyanın ən
adlı-sanlı samurayı Miyamoto Misaşi haqqında məlumat vermək istəyirəm.
Samuraylar
professional döyüşçü sinifinə 1185-ci ildən
daxil olmuşlar.
1400-cü ilə qədər Yaponiya əhalisinin
10 faizi samuray sinifinə daxil idi. Samuraylar qılıncla
və başqa silahlarla qeyri-adi qabiliyyətlərə yiyələnirdilər
və Sengoku dönəmində
xüsusi şöhrət
qazandılar. (1467-1603-cü illəri əhatə edən
Sengoku dönəmi kütləvi qiyamlar, siyasi intiriqalar və silahlı
çarpışmalarla keçmişdir. – H.M)
Busido, yəni
“Döyüşçünün yolu” ənənəsi
Yaponiya xalqı üçün xarakter və davranış
halına gəlmişdir. (Bushido və ya bəzi mənbələrdə
Busido ənənəsinə görə yaşayan
qılınc ustası döyüşçülər,
peşələrinə şərəflə bağlı
olmalarıyla tanınır. Samuraylar uğursuz
olduqda ləyaqətlərini xilas etmək üçün
seppuku edərək intihar edirdilər.
Qılınclarını müqəddəs sayan bu
döyüşçülər, hələ də hörmətlə
anılan bir şöhrətə sahibdirlər- H.M)
Miyamoto Misaşi (1584-1645)
Yaponiyanın ən məşhur samurayı və yapon tarixinin qeyri-adi şəxsiyyətlərindən
biri idi. Samuray mədəniyyəti təxminən 700
il yaponlara təsir etmiş və hətta
hazırda da yapon xalqının düşüncə və davranış tərzinə təsir etməkdədir.
Yapon xalqının əksəriyyəti öz davranışlarını
Misaşi düşüncələrinə görə modelləşdirir.
Misaşinin
29 yaşı olanda
dueldə (təkbətək döyüşdə) 60-dan
çox rəqibini məğlub etmişdi. Ancaq sonra öz həyat tərzini dəyişərək professional rəssam, xəttat,
şair və heykəltəraş
olmuşdur.
Ümid
edirəm ki, Miyamoto Misaşi haqqındakı bu kiçik məlumat sizə maraqlı gələcək və köməyi dəyəcəkdir.
Əslində
mənə görə Miyamoto Misaşi Yaponiyanın əfsanəvi
və ən dahi şəxsiyyətlərindən biri olmuşdur.
Ümidvaram
ki, yeni ilin başlanğıcında Azərbaycana səfərimizdə sizinlə görüşəcəyik.
Ən yaxşı diləklərlə,
Andreas
Hamaşer,
“Kosugi
Zohen Co.LTD” şirkəti
Bu məktubu
alana qədər, düzü özüm də internet vasitəsi
ilə samurayların həyat kodeksi ilə zəngin məlumatlar
toplamağa
başlamışdım.
Ən maraqlısı və məni heyrətə gətirən
dilimizdə olan bir çox aforizmlərin yapon samurayların
kodeksi ilə uyğun gəlməsi
oldu. Məsələn,
bizdə “bu
günün işini sabaha qoyma”
və ya “Hər
günü ömrünün
son günü kimi yaşa...” ifadəsi görün yapon döyüş sənəti
ustalarının "döyüşçünün
yolu" kodeksində hansı sözlərlə
başlayır: "Sən, hər bir zaman xatırlamalısan
ki, öləcəksən. Hər
gününü sonuncu gün kimi yaşamalısan. Yaşamaqla ölüm arasında qaldığın
zaman, tək doğru çıxış yolu
ölümdür. Hədəflərinə çatmadan
yaşamaq, it kimi yaşamaqdır.... Hər
gününü sonuncu gün kimi yaşayan insan, ürəyini
qərarlılığı ilə bərkidəcək.
Samuray yolu budur, busido bundan başlayır."
Bu kodeksdə hər balaca səhvin belə öz
cavabı var. “Sən səhv etdinsə, həmin səhvinə
görə cavab verməlisən”. Ümumiyyətlə, busidoda - yəni
"döyüşçünün yolu"nda həyatın
hər sahəsinə baxış və davranış
qaydaları var. Bu qaydalara riayət edən adamlara məhz "samuray" deyiblər. “Samuray” qədim yapon dilindən tərcümədə
- “ali mənsəbə məxsus insanlara xidmət”, “sahibinə
qulluq” mənasındadır.
Samuraylar Andreas Hamaşerin mənə yazdığı
kimi, Yaponiyanın hərbi elitası sayılırdılar. Onlar sədaqətləri
və döyüş sənəti ilə seçilirdilər.
Samuraylar heç bir and içmirdilər, and
içmək onların namusunu təhqir etmək idi. Samuraylıq Yaponiyada həmişə sayılan,
seçilən peşə olub. Samuraylar arasından məşhur
adamlar da az çıxmayıb (məsələn:
məşhur siyasətçi, məşhur rəhbər,
hökmdar və s.). Ən maraqlısı da budur ki, samuraylar arasında bəzi
hallarda qadınlar da olmuşdur. Şanlı
yapon samurayları üçün
döyüşçünün meyidini düşmənin ərazisində
qoymaq dövlətin bayrağını itirməyə bərabərdir.
Samuray həm müəllim, həm də
tələbədir...
Andreas
Hamaşerin Miyamoto Misaşi haqqında yazdıqlarına onu əlavə
etmək istərdim ki, bu döyüş ustasının
çox qəribə həyat yolu olub! Doğulan
gün anası dünyasını dəyişib. Ögey anasının yanında
boya-başa
çatan Musaşi 9 yaşında atasını da
itirib. 13 yaşında ilk rəqibinə
qalib gələrək
zəfər qazanır. 1605-1612 -ci illər arası o, bütün
Yaponiyanı gəzib-dolaşır. 30 yaşında 60 – dan çox döyüşün heç birində məğlub olmur. Ən möhtəşəm zəfərini isə 1612-ci ildə zamanəsinin ən
adlı-sanlı samurayı
Sasaki Kojroyu məğlub edərək qazanır. Və elə həmin il
öz məktəbini
yaradır.
Samurayların bilik öyrənmək kimi ehtiraslı
xarakteri onları igidlik göstərməyə yönəldir. Musaşi də həyatının
son dönəmini taxta
və metal lövhələri oyaraq
bir-birindən maraqlı əsərlər yaradıb. Zen fırçasıyla rəngbərəng tablolara
imza atıb.
HAŞİYƏ:
Mənbələrdə Zen buddizmi dedikdə, Yaponiya və
Çin olmaq üzrə iki əsas məktəb nəzərdə
tutulur. Zen, yaxud zen- buddizmi Yaponiyada 3 əsas
sektadan ibarət olmuşdur. “Zen”
sözünün mənası “işıqlanma, nurlanma, dərinliyə
baş vurma və fikrə çox dərindən qapanma”dır. Zen buddizmi anlayışlardan və
sözlərdən daha çox mənanın, masanın
üzərində dayanır və inanca olduğu qədər
meditasiyaya və fərdi təcrübəyə verdiyi əhəmiyyətlə
digər buddist məktəblərindən fərqlənir.Yenidən
doğum faktı və anı yaşamanın əhəmiyyətli
olduğuna diqqət çəkilir.
1643- cü ildə Musaşi Reigendo mağarasında
yaşamağa başlayır.
İki il sonra burada tələbəsi Teruo Moboyokiyə ithafən
yazdığı
dünyada ən məşhur
əsərini - “5 çevrə” (GO RIN NO SHO) kitabını
tamamlayır. Bu əsər dünya miqyasında
şöhrət qazanmaqla bərabər, bu gün də
döyüş məktəblərində dərs vəsaiti
kimi istifadə olunur.
1980-ci
illlərdə Amerika Birləşmiş Ştatları
Musaşinin kitabından bəhrələnərək yapon düşüncə tərzini
özünün düşüncə sisteminə daxil
etmişdir. Ona görə də bu kitab daha çox Amerika iş
adamlarının
stolüstü kitabına
çevrilmişdi. Savaş sənətindən başqa digər
sahələrdə də “5 çevrə” və ya “5 çəmbər”
kitabından faydalanmaq dəb halını almışdı.
* * *
İrəlidə samuraylar və onların əxlaq
kodeksi barədə oxuculara daha ətraflı məlumat verməyə
çalışacam. Hələlik isə Yaponiyaya nümayəndə heyətimizin
səfərindən bəhs etmək istərdim. Əvvala onu qeyd edim ki, Cənub-Şərqi
Asiyanın ən əsrarəngiz ölkəsi olan Yaponiya
dünyanın ən çox həsəd aparılası
ölkələrindən biridir. Hələ 4-5 il
əvvəl Çin Xalq Respublikasında 10 günlük səfərdə
olanda Yaponiya haqqında diqqətimi bir gözəl fikir cəlb
etmişdi. Çinlilərin yanaşmasına
görə, dünyaya günəş qonşu Yaponiyada
doğur. Buna görə də Yaponiya bəzən
“Gündoğar ölkə” adlandırılır.
Yaponlar isə öz ölkələrinə “Günəşin
yüksəldiyi yer” mənasında işlənən “Nihon” və
ya “Nippon” deyirlər. Bu sözlərin bir anlamı da “günəşin
mənşəyi” və ya “günəşin doğması”
deməkdir.
Yaponiyanın
qədim adı “Yamata”
olmuşdur. Bu ifadə “Dağlılar ölkəsi”
anlamına gəlir. Tokio 1868 - ci ildən ölkənin
paytaxt elan olunmuşdur.
Bizim qaldığımız beşulduzlu “New Otani” oteli
Tokionun 400 il bundan əvvəl salınmış göz
oxşayan füsunkar bir
bağında yerləşir. Xidmətin
çox yüksək səviyyədə olduğu otelin pəncərəsindən
geniş bağa, həm də əsrarəngiz və möhtəşəm
Tokioya böyük bir mənzərə açılır.
Paytaxtın mərkəzi
hissəsində olan bu oteldən
5 xətli metronun
Akasaka-Mitsuke stansiyasına
qədər olan məsafəni
piyada səkkiz-doqquz dəqiqəyə qət etmək olar...
Hər
gün otelin yerləşdiyi
qədim bağda gəzişib bu gözəlliyi seyr edərkən
nədənsə Bakının Xətai rayonunda
salınmış “Yapon
bağı”nı
xatırlayırdım.
Bakıda
“Yapon bağı”
Nümayəndə
heyətinin başçısı–əhalisinin sayına görə paytaxt
Bakının ən böyük
rayonu olan Xətai Rayon İcra Hakimiyyətinin
başçısı Razim Məmmədov 2014-cü ilin iyun
ayında Azərbaycanın bir sıra şəhər və
rayon icra hakimiyyəti başçıları ilə birlikdə Yaponiyada
olduğundan söz
açdı:
- İki il öncə biz burada on
günlük səfərdə olarkən Yaponiyanın yerli
idarəetmə sistemi, şəhər təsərrüfatının
idarə edilməsi ilə yaxından tanış olduq. Elə o zaman
Yaponiyada mövcud olan təcrübədən faydalanmaq və
təbii ki, ikitərəfli əməkdaşlığı
davam etdirmək məramı ilə iki ölkənin şəhərləri
arasında qarşılıqlı dostluq münasibətlərinin
yaradılmasını
müzakirə etdik.
Özümlə gətirdiyim “Ağ şəhər” layihəsi,
“Ana harayı” və Xətai
rayonu barədə nəşrləri yapon dostlarımıza təqdim
etdim.
Tərkibinə
Bakı şəhərinin Səbail, Suraxanı, Yasamal, eləcə
də Ağcabədi, Masallı, Şabran, Qəbələ,
Qusar, Yardımlı rayonlarının və Şəki şəhərinin
icra hakimiyyətləri
başçılarının daxil olduğu nümayəndə heyətimiz
turizm və mədəniyyət obyektləri ilə
tanış oldu, Yaponiyada bir neçə şəhərin
tarixi və görməli yerlərini ziyarət etdi. Azərbaycan
Respublikası Prezidenti Administrsiyasının regional idarəetmə
və yerli özünüidarəetmə orqanları ilə
iş şöbəsi müdirinin müavini Hüseyn Mövsümov
nümayəndə heyətimizə rəhbərlik edirdi.
Razim
müəllim sözünə davam edərək deyir:
– Bakının Yasamal və Suraxanı rayonlarının
rəhbərləri Tokio yaxınlığında yerləşən
Yokohama şəhəri ilə dostluq mübadiləsinə
hazır olduqlarını bildirdilər. Biz isə o zaman
Xətai rayonunun Kitakyuşu şəhəri ilə dostluq və tərəfdaşlıq
mübadiləsi haqqında niyyət protokolunun layihəsini
yapon tərəfinə təqdim etdik.
...Az sonra Azərbaycan və Yaponiya dostluq münasibətləri çərçivəsində yapon bağları və parklarının salınması üzrə tanınmış “Kosugi Zohen” şirkətinin rəhbərliyi Bakıya və eyni zamanda rayonumuza səfər etdi. Biz birlikdə Ukrayna meydanı yaxınlığında yerləşən, ulu öndərin adını daşıyan Heydər parkında Azərbaycan – Yaponiya dostluq münasibətlərinin rəmzi kimi “Yapon bağı”nın salınmasını qərara aldıq. 2015-ci ilin oktyabr ayında Azərbaycan Pespublikası Prezidenti Administrasiyasının nümayəndəsinin, Yaponiyanın ölkəmizdəki səfiri cənab Tsuquo Takahaşinin və “Kosugi Zohen” şirkətinin rəhbəri Saki Kosuginin iştirakı ilə bu bağın təntənəli açılış mərasimi oldu... Bax, beləcə Azərbaycan - Yaponiya dostluq münasibətlərinin və regionlararası əməkdaşlığın davamı olaraq biz Yaponiya Parlamentinin Müşavirlər Palatasının üzvü, xanım Akiko Santodan bu ölkəyə növbəti dəfə səfərə dəvət aldıq.
... 2016-cı il noyabrın 29-udur və biz artıq Yaponiyadayıq. Elə ilk gündən nümayəndə heyətimizin Tokioda işgüzar səfərdə olması yaddaşımda bir çox məqamlarla dərin iz buraxdı. Amma əsas məramlardan biri iki dost ölkə arasındakı əlaqələrin tarixində ilk dəfə paytaxt şəhərlərin rayonları arasında dostluq və əməkdaşlıq münasibətlərinin yaradılması idi. Bu məqsədlə Bakı şəhərinin Xətai rayonu ilə Yaponiyanın Tokio Prefekturasının Setaqaya şəhəri arasında qardaşlaşmış şəhər layihəsinin müzakirəsində və əlaqələrin qurulmasında iştirakım mənim səfər tarixçəmdə deyil, ictimai-siyasi fəaliyyətimdə də unudulmaz tarixi hadisələrdən birinə çevrildi.
(ardı var)
Hüseynbala
MİRƏLƏMOV,
yazıçı-dramaturq,
Milli Məclisin deputatı
Xalq qəzeti.- 2017.- 18 fevral.- S.9.