“İri dövlət şirkətlərinin gəlirlər və xərclər smetaları haqqında” Azərbaycan Respublikası Nazirlər Kabinetinin 2016-cı il 30 dekabr tarixli 534 nömrəli qərarında dəyişikliklər edilməsi haqqında

Azərbaycan Respublikasının Nazirlər Kabinetinin Qərarı

№ 300

Bakı şəhəri, 20 iyul 2017-ci il

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, Azərbaycan Respublikası Maliyyə Nazirliyinin Azərbaycan Respublikasının İqtisadiyyat Nazirliyi, Azərbaycan Respublikasının Vergilər Nazirliyi, Azərbaycan Respublikasının Mərkəzi Bankı və Azərbaycan Respublikasının Maliyyə Bazarlarına Nəzarət Palatası ilə razılaşdırılmış təklifini nəzərə alaraq, Azərbaycan Respublikasının Nazirlər Kabineti QƏRARA ALIR:

“İri dövlət şirkətlərinin gəlirlər və xərclər smetaları haqqında” Azərbaycan Respublikası Nazirlər Kabinetinin 2016-cı il 30 dekabr tarixli 534 nömrəli qərarında (Azərbaycan Respublikasının Qanunvericilik Toplusu, 2016, №12, maddə 2249) aşağıdakı dəyişikliklər edilsin:

1. 6.1-ci bənddə “iyulun” sözü “avqustun ” sözü ilə və 6.4-cü bənddə “noyabr ayının 1-dək” sözləri “dekabr ayının 20-dək” sözləri ilə əvəz edilsin.

2. 6.5-ci bənd aşağıdakı redaksiyada verilsin:

“6.5. iri dövlət şirkətləri təsdiq olunmuş gəlirlər və xərclər smetalarının rüblük icrası barədə hesabatı artan yekunla hər rübdən sonrakı ayın 15-dək Komissiyanın üzvlərinə və Katibliyinə kağız və elektron daşıyıcılarda təqdim edirlər;”.

3. Aşağıdakı məzmunda 6.5-1-ci bənd əlavə edilsin:

“6.5-1. iri dövlət şirkətləri təsdiq olunmuş smetanın icrası barədə rüblük hesabatda iri dövlət şirkətlərinin daxilolmaları və xərcləri proqnoz göstəricilərindən 10 faizədək az və ya çox olduqda, Komissiyanın Katibliyinə bunun səbəbləri barədə müvafiq izahat təqdim edir. Komissiyanın Katibliyi hər rüb üzrə smetanın icrasına dair müvafiq arayış hazırlayaraq Komissiyanın üzvlərinə təqdim edir və hər rübdən sonrakı ayın 30-dək Komissiyada müzakirəsini təşkil edir;”.

4. Həmin qərarla təsdiq edilmiş 1 nömrəli əlavə - “Gəlirlər və xərclər smetaları hazırlanmalı, təsdiq edilməli və icrası üzrə monitorinq aparılmalı olan iri dövlət şirkətlərinin Siyahısı”nın 11-ci hissəsinə “Azərbaycan Respublikası” sözlərindən sonra “Nəqliyyat,” sözü əlavə edilsin.

5. Həmin qərarla təsdiq edilmiş 2 nömrəli əlavə - “İri dövlət şirkətlərinin gəlirlər və xərclər smetalarının tərtibi Qaydası” yeni redaksiyada təsdiq edilsin (əlavə olunur).

Artur Rasi – zadə

Azərbaycan Respublikasının Baş naziri

Qeyd: Qərara edilmiş əlavələrin tam mətni ilə www.cabmin.gov.az və www.xalqqazeti.com saytlarında tanış ola bilərsiniz.

Xalq qəzeti.- 2017.- 21 iyul.- S.4.