Azərbaycan Respublikası Nazirlər Kabinetinin 2009-cu il 17 sentyabr tarixli 142 nömrəli qərarı ilə təsdiq edilmiş “Avtomobil nəqliyyatı ilə yüklərin daşınması Qaydaları”nda dəyişikliklər edilməsi haqqında

Azərbaycan Respublikasının Nazirlər Kabinetinin Qərarı

№ 397

Bakı şəhəri, 28 sentyabr 2017-ci il

“Lisenziyalar və icazələr haqqında” Azərbaycan Respub-likasının 2016-cı il 15 mart tarixli 176-VQ nömrəli Qanununun tətbiqi barədə” Azərbaycan Respublikası Prezidentinin 2016-cı il 20 aprel tarixli 866 nömrəli Fərmanının 1.1.4-cü yarımbəndinin icrasını təmin etmək məqsədi ilə Azərbaycan Respublikasının Nazirlər Kabineti QƏRARA ALIR:

Azərbaycan Respublikası Nazirlər Kabinetinin 2009-cu il 17 sentyabr tarixli 142 nömrəli qərarı (Azərbaycan Respublikasının Qanunvericilik Toplusu, 2009, № 9, maddə 746; 2014, № 8, maddə 1013; 2017, № 5, maddə 981) ilə təsdiq edilmiş “Avtomobil nəqliyyatı ilə yüklərin daşınması Qaydaları”nda aşağıdakı dəyişikliklər edilsin:

1. 2.1.4-cü yarımbənd aşağıdakı redaksiyada verilsin:

“2.1.4. “İcazə” blankı — Azərbaycan Respublikası ilə beynəlxalq avtomobil daşımaları haqqında beynəlxalq müqavilə bağlamış xarici ölkələrin ərazisində beynəlxalq avtomobil daşımalarını yerinə yetirmək üçün avtodaşıyıcılara verilən xarici ölkələrin “İcazə” blankı;”.

2. 6.4-cü bənddən “xüsusi” sözü çıxarılsın.

3. 16.5-ci bəndin birinci cümləsində “karantin xidməti tərəfindən verilən icazəni” sözləri “daxili karantin sertifikatını” sözləri ilə əvəz edilsin.

4. 17.11-ci bənddə “karantin müfəttişliyi tərəfindən verilən icazələri və karantin sertifikatlarını” sözləri “daxili karantin sertifikatlarını” sözləri ilə əvəz edilsin.

5. 48.3-cü bənddə “icazə” sözü “İcazə” blankı” sözləri ilə əvəz edilsin.

Artur Rasi-zadə

Azərbaycan Respublikasının Baş naziri

Xalq qəzeti.- 2017.- 30 sentyabr.- S.9.