“İdrak” liseyi yeni

layihəsini təqdim etdi

Bu münasibətlə “Park İnn” hotelində keçirilən mərasimi İctimai TV-nin əməkdaşı Orxan Cabbarlı açaraq, son illər Azərbaycanda həyata keçirilən təhsil islahatlarının müsbət nəticələrindən danışdı. Bildirdi ki, təhsilə informasiya texnologiyalarının gətirilməsi müasir dövrün başlıca istiqamətlərindəndir. Bu gün təqdim olunan yeni layihə də bu sahədə görülən işlərin davamıdır.

Sonra layihənin müəllifi “İdrak” liseyinin direktoru, pedaqoji elmlər doktoru, professor Mönsüm Alışov layihə barədə geniş məlumat verdi. Bildirdi ki, bütün dövrlərdə öyrədənlə (müəllim) öyrənənlər (şagirdlər) arasında öyrənmə prosesini səmərəli, keyfiyyətli təşkil etmək, tədris materialının şagirdlərin yaddaşında uzun müddət qalmasına çalışmaq və onların təfəkkürünü fəallaşdırmaq, idrak fəaliyyətini təmin etmək məktəbin əsas vəzifəsi olmuşdur. Tədris materialı öyrədən tərəfindən şifahi olaraq izah edilir, bu da mənimsəməni 10-15 faiz təmin edə bilir. Amma uzun illər elmi-pedaqoji fəaliyyətim dövründə qazandıgım təcrübəyə əsasən deyə bilərəm ki, tədris materialının, eyni zamanda, həm göz, həm eşitmə yaddaşı vasitəsilə şagirdlərə ötürülməsi 85-90 faiz mənimsəməni təmin edə bilir. Bu məsələni həm öz elmi araşdırmalarım, həm də dünya pedaqoq və psixoloqlarının gəldiyi qənaət sübut etmişdir. Böyük Aristotel demişdir: “Təfəkkür prosesi heyrətdən başlayır, sonra idrak prosesi işə düşür”.

Direktor qeyd etdi ki, uzun illər praktik-fəaliyyətim dövründə hazırlayıb reallaşdırdığım bu layihədə liseyimizdə yeni təlim texnologiyalarının, kompüter, “agıllı lövhə”, internet və digər multimedia vasitələrinin, rəngli və animasiyalı təqdimatların tədris prosesinə tətbiqinin nə dərəcədə faydalı və səmərəli olması haqqında məlumat veriləcək. Bundan əlavə, diqqətinizi cox mühüm bir faktora – bütün fənlər üzrə “agıllı lövhə” vasitəsilə elektron dərs bazasının yaradılmasın – “45 dəqiqəlik dərs” məhdudiyyətinin aradan qaldırılmasına yönəltmək istəyirəm. Daha dəqiq desək, liseydə dərs zamanı təqdim olunan yeni dərs mövzularının izahı lövhənin yaddaşına yazılır.

45 dəqiqə müddətində, yəni bir akademik saat ərzində izahı dərindən mənimsəməyə imkan tapmayan şagird istənilən vaxt, istənilən yerdə internet vasitəsilə liseyin baza yaddaşına müraciət edib dərsin izahını təkrar-təkrar izləyə bilər. Bu proses şagirdlər üçün çox böyük imkanlar açır. Hər hansı bir səbəbdən məktəbə gələ bilməyən şagirdlər də bu yolla tədris materialını mənimsəmək imkanı qazanırlar.

Layihə rəhbəri dedi ki, elektron lövhənin daha bir üstünlüyü bundadır ki, müəllimlər də istənilən vaxt dərslərin keyfiyyətini artırmaq məqsədilə yaddaşdakı tədris resursları ilə, animasiyalar, videomateriallar vasitəsilə tədris materialını zənginləşdirə bilərlər. Göründüyü kimi, həm öyrədənlər, həm də öyrənənlər üçün zaman və məkan məhdudiyyəti tamamilə aradan qalxır.

M.Alışov daha bir məqama diqqət çəkərək bildirdi ki, lövhələrin bu şəkildə istifadəsi həm də növbəti illərdə tətbiq olunması nəzərdə tutulan distant (məsafədən) təhsilin inkişafı yolunda atılan bir addımdır. Bütün bunlar “İdrak” liseyində təhsilin yeni bir pilləsini formalaşdırmaga imkan verir. Xalqın, millətin gələcəyi onun gənclərindən, yetişməkdə olan nəslin inkişafından asılıdır. Ulu öndər Heydər Əliyevin çox müdrik bir kəlamını xatırlatmaq yerinə düşər: “Böyük dövlət, kiçik dövlət yoxdur. Dövlətin gücü onun vətəndaşlarının intellektual səviyyəsi ilə ölçülər.”

Direktor özəl təhsilin inkişafına münbit şərait yaratdığına, ölkədə sahibkarlığın inkişafına yüksək qayğı göstərdiyinə görə Prezident İlham Əliyevə dərin minnətdarlığını bildirdi.

Sonra layihənin təqdimatı oldu. Təqdimatdan sonra çıxış edənlər layihənin milli təhsilimizin inkişafına müsbət təsir göstərəcəyini, gələcəkdə bütün məktəblərdə tətbiqinin vacibliyini vurğuladılar.

Mərasimdə “İdrak” liseyinin müəllimləri öz fənləri üzrə dərsləri interaktiv şəkildə iştirakçılara təqdim etdilər.

Yüksək səviyyədə təşkil olunan mərasimdə məktəb direktorları, liseydə təhsil alan şagirdlərin valideynləri, ictimaiyyət nümayəndələri iştirak edirdilər.

M. MÜKƏRRƏMOĞLU

Xalq qəzeti.- 2017.- 15 yanvar.- S.7.