Qəfil ölüm
kabusunu
cilovlayan kardioloji inqilab
İnvaziv kardiologiya – 40
Yola salmağa
hazırlaşdığımız 2018-ci ildə ürək-damar
xəstəliklərinin müalicəsində, ani və
vaxtsız ölüm kabusunun cilovlanmsında 1958-ci ildən
dünyada inqilab yaratmış invaziv kardiologiyanın Azərbaycana
gəlişinin 40-cı ili tamam oldu.
Ölkə kardioloqları bugünlərdə milli təbabət
tariximizə önəmli yenilik kimi daxil olmuş bu hadisəni
respublikamızda invaziv kardiologiyanın ilkin yaranması,
sürətli inkişafı və daha geniş
yayılması perspektivlərinə nəzər salmaqla qeyd
edirlər.
Kardiologiyanın
yüksək effektli bu sahəsi tarix boyu bəşəriyyət
üçün əlacsız bəla sayılan qəfil
ölümlərin qarşısını almaqda, həqiqətən,
yeni bir dövr açmış, yüz milyonlarla insanı ani
ölümlərin pəncəsindən xilas etmiş,
onların ömrünü 10-20 il, bəzən
də daha çox uzatmışdır. Məsələ
burasındadır ki, zaman-zaman vaxtsız ölümlərin, az qala, yarısı ürək-damar xəstəliklərinin
təsirli müalicəsinin olmaması səbəbindən
baş vermişdir.
İnvaziv
kardiologiyanın bu bəlanın qarşısına sədd
çəkdiyi bir dövrdə belə hər il
18 milyonadək insan ürək qüsurlarından
dünyasını dəyişir. Bütün
ani ölüm hallarının 88 faizi ürək
qüsurlarının vaxtında aşkar edilməməsi və
belə xəstələrin vaxtında ixtisaslı invaziv
kardiologiya xidməti ala bilməməsinə görə
baş verir. Invaziv kardiologiyanın
geniş yayıldığı Avropa ölkələrində
belə hər min ölümdən biri ürək qüsurlu
xəstələrin payına düşür və ani olaraq
baş verir. Bu statistika invaziv
kardiologiyanın çağdaş həyatımızda necə
ciddi önəm daşıdığından xəbər
verir.
İnvaziv kardiologiya nədir? O, həyatımızda hansı
önəm daşıyır? Kardiologiyanın
bu sahəsi necə formalaşmışdır? Azərbaycanda koronar angioqrafiya və stent əməliyyatlarının
uğurlu tətbiqi hansı inkişaf yolu keçmişdir?
Müasir
tibbin ciddi nailiyyətlərindən biri olan invaziv kardiologiya
ürəyin tac damarlarında darlıq və
tutulmaları aşkara çıxarmaq üçün
aparılan koronar angioqrafiya və bu qüsurların aradan
qaldırılması üçün icra edilən stent əməliyyatlarından
ibarətdir. İnvaziv kardiologiya müasir
kardiologiyanın ən böyük nailiyyəti hesab olunur.
Çağdaş təbabətin bu sahəsi
koronar angioqrafiya adlanan diaqnostika və stent qoyulması da daxil
olmaqla, kardiologiyanin geniş və önəmli bir sahəsini əhatə
edir.
Angioqrafiya termini 2 yunan sözündən yaranıb
“angeion”– damar və “grapho”– yazmaq deməkdir. Angioqrafiya qan
damarlarının xüsusi və mürəkkəb rentgenoloji
müayinəsidir. Bu dərin və əhatəli
informativ müayinə həkimlərin xəstənin
damarlarının vəziyyətini, oradakı pozulmaları dəqiq
qiymətləndirmələrinə imkan yaradır. Nəticədə, xəstəyə daha təsirli
müalicə təyin olunur. İndiki
inkişaf mərhələsinə gəlib çatana qədər
invaziv kardiologiya böyük bir yol keçmişdir.
XX əsrdə tarix boyu insanları kütləvi surətdə
məhv etmiş bir sıra xəstəliklərin, xüsusən,
epidemiyaların qarşısının alınmasında ciddi
nailiyyətlər qazanılsa da, anadangəlmə və
qazanılmış ürək-damar qüsurlarının
aradan qaldırılması üsullarının
tapılması ilə bağlı inadlı mübarizə
xeyli davam etmişdir. Bu axtarışlarda əsas məsələ ürəyin
səthini ağac şaxəsi kimi bürüyən koronar
damarların görüntüsünə nail olmaq, bundan sonra
isə aşkar edilən darlıq və tutulmaları aradan
qaldırmaq üsullarının tapılması olmuşdur. Bir yenilik isə kardioloq və mütəxəssisləri
uğurlu axtarışlara daha ciddi sövq etmişdir.
1929-cu ildə 25 yaşlı alman həkimi Verner Forsman 65
santimetrlik sidik kateterini öz dirsək venasından sağ mədəciyinə
salıb rentgen şüası altında təbabət tarixində
ilk dəfə ürəyinin görüntüsünü
aldı. Çarlz Dotter isə bu yeniliyə əsaslanmaqla,
1950-ci ildə ürək kateterizasiyası adlı əməliyyatı
təbabətə gətirdi. Bundan sonra
Zimmerman və Lason sol sağ ürək
kateterizasiyasını uğurla icra etdilər. Bu sahədə əsas irəliləyiş isə
Meyson Sonsun ilk dəfə kateteri təsadüfən ürəyin
koronar arteriyasına salması ilə başlandı. Bu hadisə koronar angioqrafiyanın kəşfi ilə
nəticələndi.
Bu gün dünya təbabətində qısaca “anju”
adlanan inqilabi yeniliyi ilk dəfə 1958-ci ildə ABŞ-ın
Klivlend xəstəxanasında Meyson Sons özü tətbiq
etdi. O,
kontrast məhlulla X şüaları altında aotaqrafiya
apararkən kateter təsadüfən koronar arteriyaya
düşdü və ürək koronoqrafiyası çəkilişi
alındı-- ilk dəfə ürək damarları
görüntüləndi. 1959- cu ildə
isə Meyson ilk dəfə selektiv koronar angioqrafiya əməliyyatını
icra etdi. Bu təcrübə çoxillik
axtarışların dönüş nöqtəsi kimi modern
voskulyar texnologiyaların inkişafına və invaziv
kardiologiyanın formalaşmasına, açıq ürək əməliyyatlarının
sürətlənməsinə səbəb oldu.
1953-cü ildə koronar angioqrafiya üçün
kateterlə klassik giriş üsulunu ilk olaraq İsveç həkimi
Sven Seldinger irəli sürdü. Bu üsulla ilk
angioqrafiya əməliyyatını isə 1967-ci ildə
Jadkins apardı. O, Amplaçla birgə kateterin ucunu əyərək
sağ sol koronarlar üçün kateterlər yaratdı. Hazırda ən çox istifadə edilən Seldinger
üsuludur. Daha təsirli əməliyyatlar
aparılması üçün balonun ixtirası da təsadüf
nəticəsində mümkün oldu. Məlum
oldu ki, əməliyyat darlığı göstərməklə
yanaşı, onu genişləndirə də bilər.
Lakin ilk vaxtlar damrların
balon vasitəsilə şişirdilməsinə heç kəs
cəsarət etmədi. Bu əməliyyatı
ilk dəfə 1960-cı ildə ABŞ-da Çarlz Dotter
ayaqda sınaqdan keçirdi. O, əvvəlcə incə
borular, sonra isə balonlarla ayaq damarlarının genişləndirilməsinə
nail oldu. 1977-ci ildə isə İsveçrədə
gənc həkim Andreas Qruentziq ilk dəfə angioplastikanı
uzun, incə balonla heyvanlar üzərində sınaqdan
keçirdi. Bu üsul ilk vaxtlar müəyyən
tərəddüdlə qarşılansa da, Qruentziqin 38
yaşlı xəstə üzərində uğurlu əməliyyatından
və doktor Riçard Rayerin onu dəstəkləməsindən
sonra bu üsulun sürətli tətbiqinə başlandı.
1982-ci ildə Simpson koronar müdaxilələr
üçün yeni tellər təklif etdi.
Tezliklə məlum olan damarların təkrar tutulması
mütəxəssisləri növbəti axtarışlara məcbur
etdi. Təkrar tutulmanın qarşısını almaq
üçün müxtəlif üsullar və dərman
müalicəsi səmərə verməyəndə
çıxış yolu kimi damarın genişləndirilmiş
hissəsinə incə metaldan stent qoyulması
axtarışlarına başlandı, bu işə milyardlarla
vəsait xərcləndi. Nəticədə,1986-cı ildə isveçrəli kardioloq
Ulriq Sıqvart öz ölkəsində, fransız Jan Puel isə
Tuluzada ilk dəfə genişləndirilmiş ürək
damarlarına stent daxil etdilər. Stentlərin
tutulmasının qarşısını almaq
üçün isə sonrakı illərdə dərmanlı
stentlərdən istifadə edildi. İlk
belə stentləri ABŞ-ın Kordes şirkəti
yaratdı.
Keçmiş SSRİ-də koronar angioqrafiya ilk dəfə
Moskvada icra edildi. Qardaş Türkiyədə koronar
angioqrafiyanı ilk dəfə Sones üsulu ilə Mehmet
Özdəmir, 1975-ci ildə isə Seldinger üsulu ilə
professor Oral Pektaş gerçəkləşdirdilər.
Rusiyadan sonra angioqrafik tədqiqatlar, ikinci, Zaqafqaziyada isə
birinci olaraq 1978-ci ildə Azərbaycanda gerçəkləşdirildi. Bu sahədə
ilk axtarışlara Eksperimental və Tətbiqi Cərrahiyyə
İnstitutunda həmyerlimiz Oqtay Hacıyev başladı.
Həmin il ilk dəfə ürək kameralarının
kateterizasiyası əməliyyatı sınaqdan keçirildi.
Koronar angioqrafiya əməliyyatlarını
davam etdirmək üçün ilk avadanlıq Bakıya
1980-ci ildə gətirildi. Damar cərrahiyyəsi
əməliyyatlarını isə Cərrahiyə
İnsitutunda ilk dəfə mərhum professor Fikrət Zərgərli
apardı. 1986-cı ildə Bakıda
koronar angioqrafiya üçün avadanlıq
quraşdırıldı. Tədqiqatlara həmyerlimiz
Ələsgər Əliyev də qoşuldu.
Lakin sonrakı dövrdə lazımi
avadanlığın olmaması və digər səbəblər
üzündən tədqiqatlarda 10 ildən artıq bir
müddətdə fasilə yarandı. Azərbaycan
müstəqillik qazanandan sonra isə invaziv kardiologiyanın
inkişaf etdirilməsi ilə bağlı dövlət səviyyəsində
tədbirlər gerçəkləşdirildi. İlk
olaraq xarici ölkələrdə kadr hazırlğına
start verildi. Bununla yanaşı, müvafiq maddi
baza yaradılmasına başlandı.
Ölkəmizdə
səhiyyənin inkişafına müstəsna diqqətlə
yanaşan ümummilli lider Heydər Əliyevin, Prezident
İlham Əliyevin və Birinci vitse-prezident, Heydər
Əliyev Fondunun rəhbəri Mehriban Əliyevanın həyata
keçirdikləri tədbirlər invaziv kardiologiyanın tarixən
ən qısa bir vaxtda əhaliyə tibbi xidmətlər
sırasında layiqli yer tutmasını təmin etdi. Bu gün Azərbaycan invaziv kardiologiyası öz
samballı şəbəkəsi və yüksək
inkişaf səviyyəsi ilə Azərbaycanın
uzunömürlülər ölkəsi şöhrətinin
geri qaytarılmasına xidmət edir.
Angioqrafiya və stent əməliyyatları ilk dəfə
ölkəmizdə 2000-ci illərin əvvəllərində
Mərkəzi Klinikada tətbiq edildi. Bu əməliyyatları
ilk vaxtlar Türkiyədən gəlmiş mütəxəssislər
icra edirdilər. Xaricdə uzmanlıq təhsili
almış və lazımi təcrübə toplamış
invaziv kardioloqlarımız artıqca, bu əməliyyatları
əsasən milli kadlar həyata keçirməyə
başladılar. Artıq ölkəmizin
dövlət və özəl klinikalarında onlarla invaziv
kardioloq çalışır.
Azərbaycanda angioqrafiya, stent müayinə və
müalicəsini icra edən ilk yerli mütəxəssis
invaziv kardioloq Abbasəli Abbasəliyev oldu. Bundan sonra Üzeyir Rəhimov,
Firdovsi İbrahimov, Ülvi Mirzəyev, həyatdan vaxtsız
getmiş Cavid Həmişəyev və onlarla digər mütəxəssis
invaziv kardioloq kimi yetişərək ölkəmizin klinikalarında
fəaliyyət göstərməyə başladılar.
Hazırda Kliniki Tibbi Mərkəzdə, Mərkəzi
Neftçilər Xəstəxanasında, Elmi Cərrahiyyə
Mərkəzində, Respublika Diaqnostika Mərkəzində, Hərbi,
Gömrük və Dövlət Təhlükəsizlik Xidməti
hospitallarında, “Baku Medical Center”də, “Zəfəran”, “Ege”
hospitallarında, “Mediland” klinikasında, Naxçıvanın
və Gəncənin ixtisaslaşdırtılmış xəstəxanalarında
və digər mərkəzlərdə invaziv kardioloji əməliyyatlar
uğurla icra edilir. Bu yaxınlarda 20-ci invaziv
kardiologiya mərkəzi Bakı sağlamlıq Mərkəzində
fəaliyyətə başlayıb. Hər il ölkəmizdə 35 minədək koronar
angioqrafiya, 15 minədək stent əməliyyatı həyata
keçirilir.
Əsas məqsədi
respublikamızda ürək-damar xəstəliklərinin
profilaktikasının, diaqnostikasının və müalicəsinin
dünya səviyyəsinə çatdırılmasına
kömək etməkdən ibarət olan Azərbaycan
Kardiologiya Cəmiyyəti ölkənin bütün kardiologiya
infrastrukturları ilə əməkdaşlıq şəraitində
soydaşlarımızın infarkt riskinin aradan
qaldırılmasında, ani ölümlərin
qarşısının alınmasında invaziv kardioloğiyanın
misilsiz imkanlarından daha səmərəli istifadə edilməsinə
çalışır. Cəmiyyət sahənin
problemlərinin həlli və yüksək inkişafı
üçün də zəruri tədbirləri əlaqələndirir.
Azərbaycan kardioloqları ölkəmizi beynəlxalq
məclislərdə böyük uğurla təmsil edirlər.
Beləliklə,
bu il Azərbaycanda 40 illiyi tamam olan invaziv
kardiologiya sahəsində tədqiqatlar ötən dövrdə
qabaqçıl dövlətlərin 60 ildə əldə
etdiyi bir səviyyəyə çatmışdır. Ölkəmizdə invaziv kardiologiyanın həqiqi
inkişafı onun yaranma tarixinin ikinci yarısından
başlansa da, bu sahə qısa müddətdə yüksəliş
yolu keşmiş və çox sayda soydaşımız
vaxtsız ölümün pəncəsindən xilas
edilmişdir.
Tofiq SADIQOV,
Bakı Şəhər Kliniki Mərkəzin
invaziv kardioloqu
Xalq qəzeti.-
2018.- 23 dekabr.- S.13.