Azərbaycanda demokratik seçkilər keçirmək üçün mükəmməl qanunvericilik bazası və zəngin təcrübə var

Azərbaycan müstəqillik qazandıqdan sonra gələcək inkişafı üçün birmənalı olaraq demokratiya yolunu seçib və Avropanın demokratik strukturlarına inteqrasiya etməyə başlayıb. Müstəqillik dövründə ölkədə qəbul olunmuş bütün qanunlar Avropanın müvafiq təşkilatlarından, əsasən Avropa Şurasından və onun ayrı-ayrı qurumlarından rəy alıb. Bu rəylər, demək olar ki, həmişə müsbət olub. Çünki qanunlarımız yeniləşib və Qərb qanunvericiliyinə uyğunlaşdırılıb. Seçki Məcəlləsi də o cümlədən.

Bu gün Azərbaycanda həyata keçirilən bütün seçkilər mükəmməl Seçki Məcəlləsi əsasında baş tutur. Doğrudur, Azərbaycana ikili standartlarla yanaşan bəzi Qərb dairələri bəzən seçkilərimiz barədə tənqidi fikirlər söyləyiblər, amma bunlar həmişə ölkəmizə qarşı qərəzli münasibətdən irəli gəlib. Bu gün birmənalı şəkildə demək olar ki, Azərbaycan ulu öndər Heydər Əliyevin hakimiyyəti dövründən bəri həmişə azad, şəffaf və demokratik seçkilər keçirməyə çalışıb. Həmin dövrdən bəri ölkədə demokratik seçkilərin keçirilməsi üçün güclü hüquqi baza, beynəlxalq standartlara uyğun seçki qanunvericiliyi yaradılıb. Bu baxımdan ölkəmiz bu gün istənilən seçkini – istər prezident, istər parlament, istərsə də bələdiyyə seçkilərini demokratik qaydada keçirməyə tam hazırdır. Bütün rayonlarda dairə seçki komissiyaları üçün yüksək səviyyədə şərait yaradılıb, seçkilərin tam demokratik və şəffaf keçirilməsi üçün seçki məntəqələrinin əksəriyyətində veb-kameralar quraşdırılıb, digər texniki vasitələr tətbiq edilib.

Bu gün Azərbaycan ictimaiyyəti yaxşı bilir ki, qarşıdakı 11 aprel prezident seçkiləri daha mükəmməl qanunvericilik bazası və daha böyük seçki təcrübəsi əsasında keçirilir. Bu məsələdə həm də Mərkəzi Seçki Komissiyamızın uzun illər ərzində topladığı zəngin seçki təcrübəsinin əhəmiyyəti şəksizdir. Artıq ölkəmizin mərkəzi seçki orqanı Seçki Məcəlləsinin tələblərinə uyğun olaraq bütün ölkə ərazisində genişmiqyaslı maarifləndirmə işlərinə start verib.

Azərbaycanda seçkilərin demokratik prinsiplərə uyğun keçirilməsi birinci növbədə Prezident İlham Əliyevin siyasi iradəsi ilə bağlıdır. Dövlət başçısı seçkilərdə qanun-qaydalara əməl edilməsi, eləcə də səsvermə prosesində şəffaflığın təmin edilməsi ilə bağlı mərkəzi və yerli icra hakimiyyəti orqanlarının qarşısında həmişə ciddi vəzifələr qoyur. Seçki prosesində demokratikliyin və şəffaflığın təmin edilməsi üçün gərək olan hər bir addımın atılmasına dəstək verir. Yeri gəldikcə mütərəqqi seçki texnologiyalarından istifadə edilir. Bir vaxt məntəqələrdə saxtalaşdırmaya nəzarət üçün müşahidə kameralarının quraşdırılması məsələsi qaldırıldı. Cənab Prezident bu məsələnin reallaşmasını təmin etdi. Sonra bir seçicinin bir dəfədən artıq səs verməsinin qarşısını almaq üçün barmaqların şəffaf mürəkkəblə rənglənməsi məsələsi ortaya çıxdı. Dövlət başçısı bu məsələnin də təcili surətdə tətbiqinə yaşıl işıq yandırdı. Bəzi beynəlxalq təşkilatların, QHT-lərin başqa təklifləri nəzərə alındı və tətbiq edildi. Bir sözlə, seçkilərdə demokratikliyin, şəffaflığın təmin edilməsi üçün lazım olan bütün addımlar atılır. Əminik ki, indiyədək qazandığımız təcrübə, ölkədə mövcud olan sabitlik, iqtidarla xalqın birliyi və həmrəyliyi, zəngin seçki qanunvericiliyimiz bu il aprelin 11-də də demokratik seçkilər keçirməyə imkan verəcək.

Cavanşir PAŞAZADƏ,

Milli Məclisin deputatı

Xalq qəzeti.- 2018.-24 fevral.- S.4.