“Xalq qəzeti”nin baş

redaktoru Həsən Həsənova

Hörmətli Həsən müəllim!

“Xalq qəzeti”nin fəaliyyətə başlamasının 100 illiyi münasibətilə Sizi və qəzetin yaradıcı kollektivini səmimi- qəlbdən təbrik edirik.

Bir əsrlik fəaliyyəti dövründə milli mətbuatımızın tarixində və cəmiyyətin həyatında özünəməxsus rol oynayan “Xalq qəzeti”nin inkişaf yolunu və nailiyyətlərini, təbii olaraq, milli mətbuatımızın keçdiyi keşməkeşli və şərəfli yoldan kənarda təsəvvür etmək və təhlil etmək mümkün deyil. “Xalq qəzeti” milli mətbuatımızın 100 illik tarixinə şahidlik etmiş və onun formalaşmasına bilavasitə töhfələr vermiş dəyərli mətbuat nümunələrimizdəndir. Azərbaycan milli mətbuatının tarixində davamlı şəkildə bir əsr fəaliyyət göstərmək və hər gün ən müxtəlif mövzularda oxucularına obyektiv məlumatlar çatdırmaq olduqca təqdirəlayiqdir. Azərbaycan Xalq Cümhuriyyəti dövründə müşahidə olunan geniş demokratikləşmə prosesində nəşrə başlayan və ilk nömrələrindən geniş ictimai populyarlıq qazanan qəzetin çox mühüm uğurlarından biri, şübhəsiz ki, müxtəlif siyasi quruluşlarda öz fəaliyyətini və missiyasını layiqincə davam etdirməsidir. Sovet dövründə ən çətin situasiyalarda və ciddi təzyiqlər qarşısında belə xalqımızın milli maraqlarına, tərəqqisinə mümkün olduğu qədər işıq tutmağa çalışan “Xalq qəzeti” ətrafında birləşdirdiyi dəyərli qələm sahibləri və görkəmli ziyalılarla xalqımızın maariflənməsinə, tarixi, milli-mənəvi dəyərlərimizin təbliğinə töhfələr vermişdir. Bu gün Azərbaycan ədəbiyyatında adları fəxrlə çəkilən böyük ustadlarımız, bir çox tanınmış yazıçı və şairlərimiz uzun illər bu qəzetdə dərc olunmuş yazıları ilə milli-mənəvi dəyərlərimizi yaşatmış, eyni zamanda, zəngin ədəbi nümunələri ilə qəzetə böyük oxucu auditoriyası qazandırmışlar.

Müstəqillik illərində isə “Xalq qəzeti” ölkəmizdə azad sözün keşiyində dayanan, mütərəqqi qəzetçilik ənənələrinin yaranmasına böyük töhfələr verən kütləvi informasiya vasitələri arasında layiqli yerini almışdır. Ümummilli lider Heydər Əliyevin siyasi hakimiyyətə qayıdışı qəzetin tarixində keyfiyyətcə yeni inkişaf mərhələsinin əsasını qoymuşdur. Həmin dövrdən etibarən Heydər Əliyev ideyalarının təbliği, hüquqi – demokratik dövlət quruculuğu yönündə reallaşdırılan inamlı layihələr və həyata keçirilən sosial və iqtisadi islahatların uğurlu nəticələrinin ictimaiyyətə çatdırılması “Xalq qəzeti”nin fəaliyyətinin əsas istiqamətlərini təşkil etmişdir. Ölkəmizdə siyasi plüralizmin və demokratiyanın bərqərar olmasına, vətəndaş cəmiyyəti quruculuğuna qəzetin töhfələrini də ayrıca vurğulamaq lazımdır.

Sevindirici haldır ki, “Xalq qəzeti” bu gün də öz fəaliyyətində ölkəmizdə uğurlu dövlət quruculuğu prosesini hərtərəfli şəkildə təbliğ edir, Azərbaycanın əldə etdiyi mühüm və tarixi nailiyyətlərin daha geniş auditoriyaya çatdırılması işində, etibarlı və səmərəli informasiya təminatının yaradılmasında bir media orqanı olaraq üzərinə düşən vəzifəni layiqincə yerinə yetirir. Mövzu rəngarəngliyi, tariximizə, milli dəyərlərimizə göstərdiyi həssaslıq, tarixi gerçəkliklərin işıqlandırılması istiqamətindəki fəaliyyəti də qəzetin kollektivinin uğurları sırasındadır.

Eyni zamanda, “Xalq qəzeti”nin milli jurnalistika məktəbimizin formalaşmasında da xidmətləri danılmazdır. Bir zamanlar bu qəzetin redaksiyasında çalışan xeyli sayda həmkarlarımız bu gün müxtəlif sahələrdə və fərqli ünvanlarda fəaliyyət göstərsələr də, onlar “Xalq qəzeti”ndə qazandıqları təcrübə ilə özlərini doğrultmağa davam edirlər.

Biz də “Yeni Azərbaycan” qəzeti olaraq, bir daha “Xalq qəzeti”nin kollektivini ürəkdən təbrik edir, sizə gələcəkdə daha böyük uğurlar, bu çətin və şərəfli yolda yorulmaz fəaliyyət arzu edirik.

Hörmət və ehtiramla:

Hikmət Babaoğlu,

“Yeni Azərbaycan” qəzetinin baş redaktoru,

Milli Məclisin deputatı

Xalq qəzeti.- 2019.- 29 avqust.- S.7.