Xalq artisti Mustafa Mərdanovun

125 illik yubileyi qeyd olunmuşdur

Azərbaycan Dövlət Akademik Milli Dram Teatrında keçirilmiş mərasim Mədəniyyət Nazirliyinin, Azərbaycan Teatr Xadimləri İttifaqının, Akademik Milli Dram Teatrının və Azərbaycan Dövlət Teatr Muzeyinin birgə təşkilatçılığı ilə ərsəyə gəlmişdi. Tədbirdə mədəniyyət nazirinin birinci müavini Vaqif Əliyev iştirak etmişdir.

Teatrın direktoru, Xalq artisti Azər Paşa Nemətov çıxış edərək sənətkarın həyat və yaradıcılığından danışmış, onun Azərbaycan teatrı və kinosunun inkişafında xidmətlərinə nəzər salmışdır. Bildirmişdir ki, Mustafa Mərdanov 28 fevral 1894-cü ildə Cənubi Azərbaycanın Mərənd şəhərində anadan olub. Tiflis gimnaziyasında təhsil alıb. Şəhərin mədəni mühiti onun həyata baxışını formalaşdırıb, teatra böyük maraq oyadıb.

Buradakı müsəlman dram dərnəklərində 1910-cu ildən çıxış edən Mustafa Mərdanov 1921–1922-ci illərdə Tiflis Azərbaycan Dram Teatrının direktoru vəzifəsində çalışıb.

1924-cü ildə Moskva Dövlət Teatr Sənəti İnstitutunu bitirərək Bakıya gəlib və Azərbaycan Dövlət Dram Teatrında fəaliyyətini davam etdirib.

Qeyd olunmuşdur ki, yüksək aktyorluq texnikası, yumşaq yumor onun sənəti üçün xarakterik olan cizgilər idi.

Xalq artisti Hacı İsmayılov çıxış edərək görkəmli sənətkarın kinodakı uğurlarından söz açmışdır. Vurğulamışdır ki, 20-ci illərin sonu, 30-cu illərin əvvəllərində çəkilən əksər filmlərdə bu aktyora rollar həvalə edilir və o da səssiz kinonun imkanları daxilində öz personajlarına həyat verirdi. Qardaşı, kinorejissor Səməd Mərdanovun “Kəndlilər” filmi aktyorun yaradıcılığında yeni bir hadisə idi.

Bu ekran əsərindən sonra 1940-cı ildə “Yeni horizont” (trest müdiri), 1941-ci ildə “Səbuhi” (akademiya rəisi) filmlərində çəkilib. Aktyorun ən uğurlu rollarından biri “O olmasın, bu olsun” filmindəki “intelligent” Həsən bəy obrazı idi. Mustafa Mərdanov 12 dekabr 1968-ci ildə Bakıda vəfat edib.

Sənətkarın ailəsi adından çıxış edən qardaşı qızı Nuranə Mərdanova aktyorun xatirəsinə göstərilən ehtirama görə öz minnətdarlığını bildirmişdir.

Daha sonra Mustafa Mərdanovun rol aldığı filmlərdən fraqmentlər nümayiş olunmuşdur.

Tədbirdən sonra teatrın səhnəsində Mustafa Mərdanovun xatirəsinə həsr olunan “Müfəttiş” tamaşası oynanılmışdır.

M. MÜKƏRRƏMOĞLU

Xalq qəzeti.- 2019.- 2 mart.- S.15.