2019-cu il üçün “Balıq və digər su bioresurslarının ovunun

ümumi yol verilən miqdarı (kvota)”nın və “Balıq və digər su

bioresurslarının ovu üçün kvotaların ov növləri üzrə

bölgüsü”nün təsdiq edilməsi haqqında

AZƏRBAYCAN RESPUBLİKASININ NAZİRLƏR KABİNETİNİN Q Ə R A RI

№ 104

Bakı şəhəri, 18 mart 2019-cu il

“Balıqçılıq haqqında” Azərbaycan Respublikasının Qanununda

dəyişikliklər edilməsi barədə” Azərbaycan Respublikasının 2014-cü il 27

iyun tarixli 1015-IVQD nömrəli Qanununun tətbiqi haqqında”

Azərbaycan Respublikası Prezidentinin 2014-cü il 11 avqust tarixli 243

nömrəli Fərmanının 3.2-ci bəndinə əsasən Azərbaycan Respublikasının

Nazirlər Kabineti QƏRARA ALIR:

1. “Balıq və digər su bioresurslarının ovunun ümumi yol verilən

miqdarı (kvota)” təsdiq edilsin (1 nömrəli əlavə).

2. “Balıq və digər su bioresurslarının ovu üçün kvotaların ov

növləri üzrə bölgüsü” təsdiq edilsin (2 nömrəli əlavə).

3. Azərbaycan Respublikasının Ekologiya və Təbii Sərvətlər

Nazirliyi balıq və digər su bioresurslarının səmərəli istifadə edilməsinə,

artırılmasına və mühafizəsinə nəzarəti həyata keçirsin və 2019-cu il

üçün təsdiq edilmiş balıq və digər su bioresurslarının ovu üçün

kvotaların ov növləri üzrə mənimsənilməsi barədə məlumatı cari ilin

sonunda Azərbaycan Respublikasının Nazirlər Kabinetinə təqdim etsin.

4. Bu Qərarın icrasına nəzarət Azərbaycan Respublikası Nazirlər

Kabineti Aparatının regionların inkişafı, kənd təsərrüfatı və ekologiya

məsələləri şöbəsinə həvalə edilsin.

Novruz MƏMMƏDOV

Azərbaycan Respublikasının Baş naziri

Xalq qəzeti.- 2019.- 20 mart.- S.5.