Azərbaycan dünya futbol

tarixinə öz adını həkk etdi

Beləliklə, UEFA Avropa Liqasının Bakı finalı başa çatdı. Dünyanın 204 kanalı vasitəsilə canlı yayımlanan həlledici matçda güclü qalib gəldi. Hansısa bir futbolçunun Azərbaycana səfər edib-etməməsi ətrafında qaldırılmış boş və mənasız səs-küyə baxmayaraq, Bakı finalı təşkilat və təbliğat məsələsində yüksək səviyyə nümayiş etdirməklə hamını müsbət mənada təəccübləndirdi. Beynəlxalq ictimaiyyət bir daha şahidi oldu ki, sürətlə inkişaf edən Azərbaycan müasir, demokratik ölkədir və sivil xalqlarla əməkdaşlığa hər zaman açıqdır, müxtəlif mədəniyyətlərə və dinlərə məxsus insanların mehriban və dinc birgəyaşayışına şərait yaradan istənilən addımları dəstəkləyən qabaqcıl dövlətdir.

Tanınmış şotland məşqçi Bill Şanklinin futbol haqqında belə bir məşhur kəlamı var: “Bəziləri hesab edirlər ki, futbol həyat-ölüm məsələsidir. Onlar yanılırlar: futbol daha vacibdir”. Həqiqətən də, futbol tam başqa dünyadır və bu idman növünə belə yüksək dəyər verilməsi təsadüfi deyil.

Sual oluna bilər: dünyada yaşayan insanları nə birləşdirir? Uğur, şöhrət, yüksək mövqe? Əlbəttə, bütün bunlar cəlbedici görünə bilər, lakin etiraf etməliyik ki, onlar heç də insanları birləşdirmir. Bizi real birləşdirən həqiqi sevgidir. İlk baxışdan sadə, görünən, amma taktiki və strateji məsələlərdə real müharibədən heç də geri qalmayan futbola olan sevgi milyonlarla insanı tribunalarda, televizorlar qarşısında birləşməyə, həyəcanlamağa, sevinməyə, kədərlənməyə vadar edir. Məhz bu hisslərə görə biz futbolu sevirik. Futbola vurulanlar bu idman növünün həqiqi gücünü dərk edir, min kilometrlərlə uzaqda yerləşməsinə baxmayaraq komandasını dəstəkləyir. Mayın 29-da Bakıda keçirilən UEFA Avropa Liqasının final oyunu da dünyanın futbola olan heyranlığını bir daha nümayiş etdirdi. Futbolun fərqli ölkə vətəndaşlarının bir araya gələrək sevimli komandalarına dəstək verdiklərini göstərdi.

Diqqət yetirin: həlledici matçı dünyanın 204 kanalı canlı yayımladı. Qarşılaşma hətta Ermənistanın “Shant TV” kanalında da göstərildi. Hesablamalara görə, həmin gecə Böyük Britaniya klublarının qarşılaşmasını televizor qarşısında izləyənlərin sayı təqribən 1 milyard nəfərə çatmışdı. Razılaşın ki, bu qədər insanın eyni saatda eyni matçı izləməsi futbola olan yüksək sevgi və marağın nəticəsidir.

Məlumdur ki, belə bir tamaşaçı sayı final qarşılaşmasının keçirildiyi ölkəni potensial turizm obyektinə çevirir. Məhz buna görədir ki, dünya dövlətlərinin bir çoxu milyonlarla insanın izlədiyi vacib qarşılaşmalara evsahibliyi etmək üçün ciddi mübarizə aparır. Bu gün heç kimə sirr deyil ki, turizm istənilən ölkənin iqtisadiyyatına müsbət təsir göstərən sahədir və buna görə də, beynəlxalq səviyyədə hər bir turistin diqqəti uğrunda ciddi mübarizə gedir. Kütləvi idman növü kimi futbola marağın həddən artıq böyük olması da ölkələri beynəlxalq səviyyəli turnirlərə evsahibliyi etməyə vadar edir. Axı hamı qısa zaman kəsiyində və böyük vəsait xərcləmədən milyonlarla insana arzuladığı mesajları ünvanlaya biləcək vasitəni əldə etməyi arzulayır. Futbol da məhz belə mühüm mesaj vasitəsidir və bu fürsətdən maksimum yararlanan Azərbaycan UEFA Avropa Liqasının final matçına evsahibliyi etməklə dünyaya bir çox mühüm mesajlar ünvanladı. Rəsmi Bakı bildirdi ki, Azərbaycan beynəlxalq ictimaiyyətin layiqli üzvüdür və müasir insanın rahat və təhlükəsiz səfər edə biləcəyi ölkədir. Bundan başqa, Azərbaycan belə möhtəşəm final matçını bütün qaydalara uyğun səviyyədə təşkil etməklə dünyaya göstərdi ki, böyük miqyaslı tədbirləri keçirməyə qadirdir və bu məsələdə zəngin təcrübəsi olan qabaqcıl ölkələrlə yanaşı dayanır.

Bakı finalının yüksək səviyyədə keçirilməsi məşhur insanların da diqqət mərkəzində oldu. Məsələn, Rusiya Premyer Liqasının prezidenti Sergey Pryadkin bildirdi ki, Azərbaycanda yad deyillər: “Azərbaycan Futbol Federasiyaları Assosiasiyası ilə yaxşı əlaqələrimiz var, deyərdim ki, əladır. Avropa Liqasının finalının Bakıda keçirilməsi ölkədə futbolun inkişafında böyük addımdır”.

Avropa Futbol Assosiasiyaları Birliyinin (UEFA) prezidenti Aleksandr Çeferini də Bakıda Avropa Liqasınını finalının təşkilini ideal adlandırmışdı. Qeyd etmək yerinə düşər ki, cənab Çeferini mətbuat konfransında Azərbaycana qarşı kampaniya aparanlara tutarlı cavab da vermişdi. Jurnalistin “Ermənistan mətbuatı yazır ki, Mxitaryan diplomatik hücum etdi, sonra estafet erməni deputatlara keçdi. Siz bu barədə dəqiq nə deyə bilərsiniz?” sualına UEFA prezidenti cavab vermişdi ki, erməni mətbuatının yazdığı onu maraqlandırmır: “ Bu məsələni şərh etmək istəmirəm. Erməni mətbuatının yazdığı məni maraqlandırmır. Azərbaycan dövləti bütün təminatları verdi. Bura gəlməmək Mxitaryanın şəxsi qərarı idi. Heç bir problem görünmürdü”.

Xatırladaq ki, “Arsenal” klubunun oyunçusu, erməni Henrix Mxitaryana dövlət səviyyəsində tam təhlükəsizlik zəmanəti verilsə də, o, Azərbaycana gəlməkdən imtina etmişdi. Onun bu mənasız addımını dəstəkləyən bəzi xarici KİV məsələ ətrafında hay-küy qaldırmağa can atmış və məsələyə siyasi çalar verməyə çalışmışdı. Lakin Azərbaycana qarşı aparılan informasiya müharibəsi hədəfinə çatmadı, ölkəmizə səfərə gələn xarici azarkeşlər Bakıda əsl tolerantlıq mədəniyyətinin hökm sürdüyünü və təhlükəsizlik səviyyəsinin yüksək olduğunu müşahidə etdilər.

Bakı Olimpiya Stadionunda “Çelsi” və “Arsenal” komandaları arasında keçirilən final matçını canlı izləyən Böyük Britaniyanın Azərbaycandakı səfiri Kerol Krofts da qarşılaşmaya hazırlıqdan razı qaldığını bildirmişdir: “Final oyununun əla təşkil olunmasına görə Bakıya əhsən! Stadion dünya standartlarına cavab verir”. Avstraliya millisinin və İngiltərənin “Çelsi” klubunun futbolçusu olmuş Mark Şvartser isə “oxu.az” saytına müsahibəsində Britaniya mətbuatının final öncəsi Azərbaycanın, Bakının təhlükəli olmasına dair yaydıqları yazılara belə münasibət bildirmişdir: “Mən burada heç bir təhlükəni indiyədək görməmişəm. Heç bu barədə eşitməmişəm də. Hamı deyir ki, bura gözəl yerdir. Azərbaycan xalqı da möhtəşəmdir. Dediyim kimi, heç vaxt Azərbaycan barədə neqativ şeylər eşitməmişəm. Yalnız pozitiv informasiyalar eşitmişəm”. Məşhur futbolçu, “Çelsi”nin keçmiş oyunçusu Florent Malouda da yerli mətbuata açıqlamasında şəhərimiz barəsində dəyərli fikirlər səsləndirmişdir: “Bakı çox gözəl şəhərdir. İnsanları çox mehriban və dostcanlıdır. İlk dəfə bu şəhərə gəlmişəm, çox bəyəndim və təşkilati işlər də gördüyümə görə əla səviyyədə yerinə yetirilmişdir”.

Bir sözlə, “bulanıq suda balıq tutmağa” çalışan Ermənistan və bəzi xarici KİV Bakı finalının möhtəşəmliyinə kölgə sala bilmədilər və mühüm futbol qarşılaşması yüksək atmosfer şəraitində keçdi. Azərbaycan belə mötəbər futbol tədbirinə evsahibliyi etməklə və qarşılaşmaya hazırlığı yüksək səviyyədə həyata keçirməklə həm milyonlarla insanın sevincinə sevinc qatdı, həm də futbol yox, siyasət oynamaq istəyənləri oyundankənar vəziyyətdə qoydu.

Səbuhi MƏMMƏDOV

Xalq qəzeti.- 2019.- 31 may.- S.1-2.